مكرونة بالفراخ والخضروات
مامتى عامة مكنتش بتحب تدخلنى المطبخ (مش دلع ولا حاجة هى كانت بتخاف من المصايب اللى بعملها) المهم مرة خرجت و دبستنى انا اللى اطبخ و انا طبعا مش متمرنة وفى نفس الوقت نفسى ابهر اهلى و اثبت لهم انى بعرف اعمل حاجات حلوة مش أي كلام. المهم انا عارفة إن لازم يكون فى مكرونة/رز و خضار و فراخ/لحمة و مكنش عندى وقت كتير على ما بابا و اخواتى يرجعوا من الشغل فقلت خلاص اعمل اكلة واحدة فيها كل حاجة و فعلا سويت كل حاجة و حاطتهم على بعض و زودت حركة دلع كده و كانت بالنسبه لهم اختراع و عاجبتهم اوى.
المقادير
٥٠٠ جرام مكرونة مسلوقة
٤ صدور فراخ مخلية و متقطعة مكعبات
٣ جزر متقطع شرايح
٣ كوسة متقطعة شرايح
٢ طماطم متقطعة شرايح
٢ فلفل الوان متقطع شرايح
١ كوباية كريمة الطبخ
الطريقة
– حمرى الفراخ فى نقطة زيت لحد بس ما لونها يبيض بعدين شليهم من الحلة و سبيهم على جنب.
– حمرى الخضار فى نقطة زيت، بالترتيب ده عشان فى حاجات بتاخد وقت عن غيرها: كوسة و جزر و طماطم و فلفل الوان.
– لما الخضار يستوى (هتلاقيه بقى طرى) زودى الفراخ عليهم و ملح و فلفل.
– حطى المكرونة فى صنية و حطى عليها الخضار و الفراخ و الكريمة و قلبيهم كويس و بعدين رشى جبنة مبشورة من فوق و دخليهم الفرن ١٠ دقايق.