Yaoota! Magazine

كتب: خالد عاصم

ألعاب الفيديو من بين أكتر الصناعات نجاح وشهرة وشعبية وكمان أكترها من حيث الربح على الرغم من أنها بتتكلف كتير على الشركات اللي بتطورها على عكس ما ناس كتير بتتخيل، فلعبة الفيديو مش مجرد أداة تسلية دي صناعة بيقف ورا كل إصدار منها مئات العاملين من أول اللي بيكتبوا قصتها لحد اللي بيصمموا غلافها. من بين أشهر ألعاب الفيديو وأكترها شعبية ألعاب القتال وده لأسباب كتير جدًا.

من بين الأسباب ورا إن ألعاب القتال ليها الشعبية المتميزة دي هي إنها نوع ألعاب الفيديو الوحيد اللي بيكون فيه التحدي واضح جدًا بين اتنين لاعبين لو بيلعبها اتنين قصاد بعض، لأن مفيش تحدي أكبر من إن اتنين يمسكوا الدراعات ويبدأوا معركة قتال قوية بين شخصيات بتتميز بقدرات خارقة، ألعاب القتال كمان بتنتمي للألعاب الكلاسيكية اللي بقالها سنين بتتطور من أيام ما كانت الجرافيكس ضعيفة والصور مبكسلة لحد ما وصلت الألعاب للمرحلة المتطورة اللي بنعيشها دلوقتي.

إيه هي أحسن ألعاب القتال لمختلف منصات الألعاب وللكمبيوتر؟ هو ده السؤال اللي بييجي في دماغ اللي ملعبش الألعاب دي قبل كده أو اللي متعود عليها وعايز يجرب لعبة جديدة، وهو ده السؤال اللي هنجاوب عنه النهاردة. ماتنسوش إنكم تقدروا من خلالنا في ياقوطة تختاروا من بين مجموعة من أفضل ألعاب الفيديو اللي هتوصلكم لحد باب البيت أو مكان ما تحبوا بأسرع وقت ممكن.

أحسن ألعاب القتال على منصات الألعاب والكمبيوتر

لعبة Soul Calibur 6

على الرغم من أن سلسلة الألعاب دي ماكنتش قادرة تحقق نجاحات كبيرة أو تصمد قصاد ألعاب تانية أكتر شهرة ونجاح، إلا أن الإصدار ده قدر يحقق نجاح يخليه من بين أفضل ألعال القتال الموجودة على الإنترنت دلوقتي، فالإصدار ده قدر إنه يجمع بين أحسن العناصر الموجودة في كل الألعاب اللي صدرت خلال الفترة اللي فاتت وكمان عرفت تتفادى كل العيوب اللي كانت موجودة في إصداراتها اللي فاتت أو في إصدارات أي لعبة تانية منافسة.

المنصات المتوافقة مع اللعبة: الكمبيوتر – بلاي ستيشن ٤ – إكس بوكس ون

من آراء مستخدمين اللعبة

نقدر نلخص أراء اللي جربوا اللعبة في إنها بتمتاز بجرافيكس ممتازة وميكانيزم اللعب فيها رائع وكمان فيها محتوى كبير جدًا للعبي الفردي وده بيخليها من أحسن ألعاب القتال اللي مش محتاج تلعب فيها قصاد حد، أما عيوبها الواضحة فهي إن جزء التدريب فيها ضعيف ومحدود ومش بيهم اللعب حاجات كتير من إمكانيات التحكم فيها.

لعبة Street Fighter V: Arcade Edition

واحدة من أشهر ألعاب القتال في تاريخ النوع ده من الألعاب وفي تاريخ ألعاب الفيديو بشكل عام، وأكتر لعبة مناسبة للي عايز يفهم طبيعة النوع ده من الألعاب ويلعبها على أصولها من غير إضافات من اللي ناس كتير مابتفضلهاش، اللعبة بتمتاز بأنها مباشرة جدًا وبتركز بشكل كبير على القتال وبس والميكانزم بتاعها مباشر وكمان شخصياتها كل اللي ليه في ألعاب الفيديو بشكل عام عارفينها لأن الشخصيات دي هي نفسها اللي بدأت معاها اللعبة من سنين كتير.

المنصات المتوافقة مع اللعبة: الكمبيوتر – بلاي ستيشن ٤

شوف لعبة Street Fighter V: Arcade Edition من هنا.

من آراء مستخدمين اللعبة

من أكتر الحاجات اللي بيشيد بيها عشاق اللعبة دي هي المجتمع الضخم اللي بتتميز بيه وإنه مستحيل تلعبها أونلاين ومتلاقيش حد يلعب معاك، اللعبة كمان سهلة جدا وسهل إنك تاخدها كبداية لألعاب القتال، اللعبة كمان شخصياتها متنوعة وإمكانياتها القتالية مختلفة وكمان المحتوى بتاعها كبير.

لعبة Dargon Ball FighterZ

الأخ الأصغر في سلسلة طويلة من الألعاب وزي اللعبة الأولانية في قائمتنا ده يعتبر أحسن إصدار من بين إصدارات اللعبة دي فاللعبة برضه بتجمع بين عناصر كتير من العناصر الناجحة للنوع ده من ألعاب القتال، وبتمتاز بأنها كمان بتعتمد على محرك رسوميات ممتازة، اللعبة كمان فيها محتوى كبير يصلح لكل أنواع اللاعبين سواء اللي بيحبوا الألعاب التنافسية بين لاعبين حقيقين أو اللي بيحبوا يلعبوا لوحدهم من غير مشاركة.

المنصات المتوافقة مع اللعبة: الكمبيوتر – بلاي ستيشن ٤ – إكس بوكس ون

من أراء مستخدمين اللعبة

ناس كتير بتشيد بالجرافيكس المذهلة للعبة وكمان بمتعة لعبها اللي ليها أسباب كتير من بينها المحتوى الضخم اللي بيميز وضع اللعب الفردي، بس أبرز مشاكل اللعبة إنها ممكن تجبلك نفس اللاعب عدد لا نهائي من المرات في حالة اللعب أونلاين.

لعبة Tekken 7

واحد من بين أفضل ألعاب القتال على كل المستويات سواء على مستوى متعة اللعب أو الجرافيكس الممتازة وكمان التفاصيل اللي في الجرافيكس زي السلو موشن اللي بيحصل مع بعض الضربات وبيحصل قرب نهاية كل قتل بين اللاعبين، واللعبة بتعتمد على محرك Unreal 4 وكمان شخصياتها ممتازة جدًا على مستويات كتير.

المنصات المتوافقة مع اللعبة: الكمبيوتر – بلاي ستيشن ٤ – إكس بوكس ون

شوف لعبة Tekken 7 من هنا.

من آراء مستخدمين اللعبة

أراء المستخدمين بتأكد استمتاعهم بالجرافيكس والأنيميشن الممتازة ثلاثية الأبعاد وكمان بالشخصيات الكتير المتنوعة على مستوى الألعاب القتالية اللي بيلعبوها، أما عيوب اللعبة فبتتلخص في ضعف التدريبات اللي فيها وكمان محدودية محتوى وضع اللعب الفردي.

لعبة Injustice 2

لو أنت من عشاق ألعاب القتال اللي بتعتمد على قصة وعلى وضع فردي قوي، فاللعبة دي هي الأنسب ليك بفضل القصة الممتازة والمحكمة اللي بتمتاز بجرافيكس رائعة جدًا وكمان تمثيل صوتي ممتاز، وده زي ما قلنا بيخليها ممتازة جدًا على مستوى القصة الفردية بس مش ممتازة أوي على مستوى اللعب اونلاين أو اللعب التشاركي وطبعًا فكرة إنك بتلعب بشخصيات معروفة زي باتمان دي لوحدها بتضيف متعة زيادة للعبة.

المنصات المتوافقة مع اللعبة: بلاي ستيشن ٤ – إكس بوكس ون

شوف لعبة Injustice 2 من هنا.

من آراء مستخدمين اللعبة

ناس كتير أشادت بوضع القصة الفردي في اللعبة وكمان بتعدد الشخصيات اللي فيها أو اللي ممكن تنزلها من على النت زي شخصية Hellboy وزي سلاحف النينجا، أما عيوبها اللي لاحظها ناس كتير فهي إن الأنيميشن فيه شوية عيوب بتحصل بين الوقت والتاني.

اختار من بين أبرز ألعاب الفيديو المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.