Yaoota! Magazine

كتب: خالد عاصم

لو انت ساكن في مكان زحمة ماتقدرش تتمشى فيه براحتك، أو مش مشترك في نادي، أو وقتك مش بيسمحلك إنك تخرج من بيتك أو من مكتبك كتير، فأكيد الأسباب دي وغيرها هيمنعوك من ممارسة الرياضة، وتحديدًا رياضة المشي أو الجري، واللي يعتبروا أهم الرياضات اللي مش محتاجة أي خبرة ولا تدخل من مدربين ولا معدات كتير معقدة، وعشان تقدر تتغلب على الظروف دي وتحافظ على صحتك من خلال المشي أو الجري، فانت محتاج لحاجة واحدة بس، المشاية الكهربائية أو Treadmill.

المشايات الكهربائية أو Treadmills هي الحل السحري لممارسة رياضة المشي أو الجري من غير ما تحتاج تسيب بيتك أو مكتبك ومن غير ما تضطر تعرض نفسك لخطر في الشارع، وإن كان لا يزال ممارسة الرياضة في مكان مفتوح خصوصًا لو الجو نقي وصحي هو الأفضل، ولكن في كتير من الأوقات بيكون فيه أسباب تمنعنا من ممارسة الرياضة بره البيت ده غير إن في كتير من المناطق بتكون مخاطر الشارع كتير والجو المحيط مش دايما بيكون نقي أو صحي، وعشان كده بتوفرلك المشايات الكهربائية الحل، وبسبب تصميمها وإمكانية طيها أو تحريكها فانت ممكن تستخدمها في أي مكان في البيت حتى في البلكونة عشان تستفيد كمان من الهوا الطبيعي وانت بتمارس الرياضة.

وعلى الرغم من إن المشايات منتشرة في البيوت دلوقتي وكمان في الصالات الرياضية كواحدة من أهم الأدوات الرياضية الأساسية، إلا إن تاريخها مكانش ليه أي علاقة بالرياضة، وتاريخها ده مربوط باسمها باللغة الإنجليزية لحد دلوقتي، وده لأن الجهاز ده واللي يعتبر واحد من أقدم الأجهزة على الإطلاق كان بيستخدم في البداية كأداة لطحن الحبوب، وكان بيستخدم في تحريكها البشر أو الحيوانات، وطبعًا ده كان لتوفير أداة بتعتمد على القوة العضلية للإنسان أو الحيوان في عصر ما قبل اكتشاف المحركات.

وفي فترة لاحقة على كده وتحديدًا في القرن التاسع عشر ولحد بدايات القرن العشرين، كان الجهاز ده نفسه ولكن بشكل مطور بيتم استخدامه كأداة لعقاب السجناء في السجون، وكان بيتم إجبارهم على السير عليه لساعات طويلة وفي نفس الوقت يقوم برضه بطحن الحبوب، فيتم عقاب السجين من ناحية وتحقيق استفادة ما من ناحية تانية، لحد ما تم التخلي عن الجهاز ده بعد ما تم إلغاء كل أشكال العقوبات الجسدية في السجون اللي كانت بتعتمد على الألة دي، وده اللي نقلها من المرحلة دي للمرحلة الأهم وهي استخدامها كجهاز لممارسة الرياضة في المكان.

ففي ستينات القرن الماضي قدر مهندس الميكانيكا ويليام شتاوب إنه يطور أول Treadmill موجهة للاستهلاك المنزلي الرياضي، ومن هنا بدأ عصر المشايات اللي اتطورت بكل أشكالها عشان توصل لحد المستويات اللي شفناها دلوقتي من التطور، واللي هتشوفوها في المقال ده.

مع ارتفاع الأسعار الكبير خلال الفترة اللي فاتت، ممكن تتخيل إن أسعار المشايات الكهربائية بقت ضخمة جدًا، وحقيقي في منها موديلات غليت بشكل كبير أوي، بس ده مش معناه إنك ماتقدرش تجيب Treadmill بسعر معقول مقارنة بالأسعار العامة دلوقتي، وده اللي هنتكلم عنه النهاردة، ففي المقال ده هنتعرف على أبرز المشايات الكهربائية بأقل من ١٠ آلاف جنيه مصري.

وما تنساش إن لو أي منتج هنتكلم عنه عجبك هتقدر تطلبه من خلالنا في ياقوطة وهيوصلك لحد باب البيت وكمان تقدر تشتري المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

Read More…