ايس كريم كوكى ساندويتش
الجو حر اوى و محتاج ان التحلية اليومين دول تبقى ساقعة عشان تلطف الجو علينا شوية.. بس فى الحر دا الواحد مش عايز ينزل ولا حتى عشان يجيب حاجة و يرجع. الحل ان نعمل احنا الحلو بتاعنا فى البيت بطريقة سهلة و متاخدش ولا وقت ولا مجهود.
المقادير
١و١/٤ كوباية سكر
١٢٥ جرام زبدة
٣ بيضات
٣/٤ كوباية شوكولاتة مطبخ (كورونا أو سويزا) سايحة
١ معلقة صغيرة ڤانيليا
١و١/٢ كوباية دقيق
١/٢ كوباية كاكاو مش مسكر
٣/٤ معلقة صغيرة ملح
٣/٤ معلقة صغيرة بيكينج باودر baking powder
علبة ايس كريم ڤانيليا سادة
الطريقة
– اضربى السكر و الزبدة لحد ما يتخلطوا كويس.
– اضربى معاهم البيض و الشوكولاتة و الڤانيليا.
– فى طبق تانى اضربى الدقيق و الكاكاو و الملح و البيكينج باودر.
– زودى الخليط اللى فيه دقيق على الخليط الأول اللى فيه زبدة و انتى بتضربى بس زودى شوية بشوية
– سبيها نص ساعة فى التلاجة
– كوريها و دوسى عليها لحد ما تبقى على شكل كوكيز يكون سمكها ١ سم.
– رصيهم فى صنية مدهونة بزبدة و حطيهم فى الفرن من ٦ ل ٨ دقايق.
– بعد ما تطلعيهم و يبردوا شوي … اقلبى نصهم و حطى عليهم الايس كريم و اقفلى بالنص التانى
و بالهنا و الشفا