دلوقتى ممكن بدل ما تخترعوا مشروبات كل شوية تعملو فكرة ذكية و لذيذة … تسقعوا تلج بنكهات مختلفة و تحطوه فى مشروبات عادية فالمشروب يبقى طعمه مختلف و جميل و منعش فى الصيف و بالذات فى الحر القاسى اللى بنعانى منه الأيام دى.

افكار للتلج بنكهات مختلفة

فى المياه قبل ما تسقعى التلج تعملى الآتى …

1- حطى ورق نعناع فى المياه – ممكن تزوديه على عصير لمون او شاى ساقع iced tea

2- حطى ورق البقدونس فى المياه – ممكن تزوديه على عصير لمون

3- اخلطى لمون معصور بعسل فى المياه – زوديه على شاى ساقع iced tea

4- كولا (النوع اللى بتحبوه) من غير مياه – ممكن تزوديه على مشروب غازى بطعم تانى عشان تغيرو طعمه او على مياه غازيه او حتى على كولا بردوا بس عشان يسقعه من غير ما يزود فيه مياه زى التلج العادى.

5- عصير توت برى cranberry – زوديه على مياه غازية او على عصير فاكهة.

6- اعملى قهوة قوية (من غير ولا لبن ولا سكر) – زوديه على قهوة ساقعة عشان يحافظ على حرارتها من غير ما يزود فيها مياه زى التلج العادى.

ممكن تقعدى تجربى نكهات تانية و تحطيها على مشروبات مختلفة و بالطريقة دى بقى عندك احتمالات لمشروبات جديدة ملهاش نهاية …

جربى و اخترعى و وقولى لنا عملتى ايه؟