كتب: خالد عاصم

عايز تشتري ساعة جديدة؟ شرا الساعات الرجالي بتختلف كتير عن شرا أي حاجة تانية من الملابس والإكسسوارات الرجالي، فالملابس مثلًا كل اللي بتحتاجة لما بتيجي تشتريها إن الحاجة تعجبك وتكون على مقاسك وإن يكون معاك فلوسها، بس الموضوع في الساعات بيختلف شوية وعلى الأغلب كتير مننا بيقف قدام محل الساعات أو على صفحة الساعات الرجالي على أي موقع ويبقى مش عارف يبدأ منين، وهنا بييجي دور مجموعة من الأسئلة، زي مثلًا أنهي ساعة تنفع لأي موقف أو مناسبة؟ هل كل الساعات تصلح لكل المواقف زي لو حبيت استخدمها في نشاط رياضي أو في الغطس مثلًا؟ ولو كنت بتشتري اونلاين إزاي تعرف إن الساعة على مقاسك؟

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

الخلاصة في مجموعة الأسئلة دي إن شرا الساعات الرجالي بيحتاج لمجموعة من المعلومات اللي بتحتاج تتعرف عليها قبل ما تاخد قرار شرا ساعة معينة واختيارها هي تحديدًا بدل أي ساعة تانية، لأنك في حالة لو ماهتمش بالمعلومات والتفاصيل دي هتوقع في مشكلة من مجموعة مشكلات زي مثلًا:

• الساعة مش على المقاس بالظبط.
• الساعة تمنها أغلى من الطبيعي.
• حزام الساعة معمول من مواد ضعيفة.
• معدن الساعة مزيف أو إن الساعة مقلدة مش أصلية.
• الساعة مش متوافقة مع احتياجاتي واهتمامامي.

من هنا بتيجي أهمية المقال ده اللي هنقدم من خلاله دليل كامل لكيفية اختيار الساعات الرجالي المناسبة، وهنتعرف على مختلف أنواع الساعات الرجالي المعروفة وكمان هنعرف إزاي تفرق ما بينها وهنوضح تفاصيل كتير عن الساعات الرجالي. تقدروا تطبقوا المعلومات اللي هنتكلم عنها في الدليل ده على شراكم لساعة من تشكيلة الساعات الرجالي المتوفرة من خلالنا في ياقوطة واللي لما تطلبوها هتوصلكم لحد باب البيت أو مكان ما تحبوا في أسرع وقت ممكن.

أنواع الساعات من حيث طريقة العمل

الساعات بتختلف على مستوى طريقة عملها، بمعنى إن الساعات بتفرق عن بعضها على مستوى الطريقة اللي بتعتمد عليها الساعة في تشغيل نفسها، وفي السطور الجاية هنستعرض أهم أنواع الساعات على مستوى طريقة عملها:

الساعات الميكانيكية

الساعات الميكانيكية تعتبر من أقدم أنواع الساعات وأكترها قيمة النهارده، ودي ساعات بتعتمد على اللف اليدوي لنابض الساعة عشان تقدر تاخد الطاقة اللي تخليها تشتغل، ودي حاجة كده عاملة زي زمبلك الألعاب القديمة اللي بنملاها يدوي عشان تفضل تشتغل.

الساعات الأوتوماتيكية

بتعتمد الساعات الأوتوماتيكية والمعروفة كمان باسم الساعات ذاتية اللفة على حركة إيد المستخدم عشان توجه النابض الأساسي للساعة اللي بيخليها تفضل شغالة، وده بيخلي عملية اللف اليدوية مش ضرورية.

ساعات كوارتز

ودي أشهر أنواع الساعات دلوقتي وأكترها انتشارًا وأشهر أنواعها الساعات السويسرية والساعات اليابانية، ودي الساعات اللي بتشتغل بالبطارية واللي موجودة حالياً في كل بيت تقريبًا.

أنواع الساعات الرجالي من حيث الاستخدام

ساعات الفاشون

ساعات الفاشون هي الساعات اللي بتتلبس عشان تكون ملائمة للبس الرسمي زي البدل عشان تضيف لمسة من الأناقة للشكل والهيئة العامة للرجل، ولأن ده هدفها الرئيسي والوحيد تقريبًا فعدد كبير منها مابيكونش فيه عقرب ثواني مثلًا لأنها مابتكونش مهتمة قوي بفكر تفاصيل الوقت الدقيقة، ومن هنا بتيجي صفتها الرئيسية وهي البساطة المفرطة.

من بين الأمور المهمة في اختيار النوع ده هو إن مقاسها لازم يكون مظبوط جدًا بحيث إنها تكون مقفولة بشكل كامل حوالين الإيد وماينفعش تكون بتتحرك أو تتهز لأنه مش المفروض منها إنها تشد أنظار الناس عن اللبس الرئيسي والمفروض تكون جزء متناغم معاه، سمك الساعة كمان لازم يكون رفيع عشان يكون سهل حركة كم البدلة عليها، تصميم الساعة الداخلية نفسه يفضل يكون بسيط جدًا والحزام بيكون معمول من الجلد.

كده نقدر نحدد عناصر ساعات الفاشون في نقطة محددة:

• هيكل الساعة بيكون مصنوع من معدن أنيق.
• تصميم الساعة الداخلي لازم يكون بسيط جدًا ومفيهوش عناصر كتير.
• سمك الساعة يفضل يكون رفيع.
• حزام الساعة بيكون مصنوع من الجلد.

الساعات العسكرية أو ساعات الميدان

ظهر النوع ده خلال الحروب اللي حصلت في القرن العشرين وفضلت مستمرة لحد النهارده كنوع من أنواع الساعات المفضلة لعدد كبير من المستخدمين زي المنتمين للمؤسسات العسكرية وزي الشباب اللي بيحبوا يلبسوا ساعة بتديهم إحساس بالقوة.

أول سمات النوع ده من الساعات هو قوتها وصلابتها، وكانت الساعات دي بيتعمل هيكلها في الأساس من الاستانليس ستيل ودلوقتي اتضاف ليها مادة PVD أو التيتانيوم الصلب. كمان النوع ده لازم تكون قرايته سهلة حتى في ظروف الإضاءة المنخفضة أو بالليل، عشان كده أغلبها بيعتمد على سطح مينا أسود وأرقام وعقارب بيضا عشان يبقى التباين بينهم عالي وبالتالي قرابتهم أسهل.

حزام الساعات دي بيكون معمول عادة من الجلد أو من الكتان المغزول لأنه بيكون سهل يتغير في حالة إنه اتقطع، وعلى الرغم من إن الاستانليس ستيل أقوى وقدرته على التحمل أعلى إلا إنه سهل يتخدش وكمان تغييره مكلف وعشان كده مش بيستخدم.

• هيكل معمول من الستانليس ستيل أو PVD أو التيتانيوم.
• سطح مينا أسود بأرقام بيضا وعقارب بيضا.
• غطا الساعة من الكريستال المقاوم للانعكاس.
• عقرب ثواني طويل ومختلف في شكله.
• حزام الساعة بيكون معمول من الجلد أو الكتاب المغزول.
• عرض حزام الساعة بيكون ما بين ٣٦ إلى ٤٤ مم.

ساعات الطيارين

قبل كده ماكانش فيه استايل ساعات معين ينفع يتوصف بالوصف ده، ففي البداية كان الطيارين بيستخدموا الساعات العسكرية اللي اتكلمنا عنها من شويه وده لأنها كانت في البداية بتقضي الغرض المطلوب زي التباين بين ألوان الساعة اللي بيخلي قرايتها سهلة وزي متانتها والدقة الشديدة المعروفة بيها، ومع الوقت اتطورت الساعات دي من خلال القوات الجوية في أماكن مختلفة من العالم عشان تتضمن شوية خصائص مفيدة للطيارين.

التطورات دي وصلت لشكل ساعات الطيارين اللي معروفة دلوقتي واللي نقدر نلخص مواصفاتها في النقط دي:

• سطح مينا أسود بأرقام بيضا مضيئة.
• كرونوجراف وده بيبقى مجموعة عدادات لتشغيل التايم ووتش ولاستخدامات تانية هنتكلم عنها كمان شوية.
• زرارين للتحكم في عدادات الكرونوجراف.
• حزام من الجلد أو الكتان المغزول زي الساعات العسكرية.

ساعات الغطس

نوع تاني من أنواع الساعات المشهورة والمفضلة من عدد كبير من المستخدمين، والنوع ده من الساعات لازم يكون فيه عناصر أساسية أولها مقاومتها للمياه، فساعة الغطس المعتمدة هي اللي بتعتمد على قياسات ISO 6425 ودي قياسات بتتكون من مجموعة من الاختبارات اللي بتضمن إن الساعة بتقدر تقاوم المياه لحد 100 متر.

حزام وهيكل الساعة لازم يكون مضاد للتآكل طبعًا وده معناه إنهم لازم يكونوا معمولين من الاستانليس ستيل أو التيتانيوم أو المطاط أو السيليكون، ومن المعتاد إن عرض حزام الساعة بيكون أكبر من الطبيعي عشان يتلائم مع معدات الغطس، وبيفضل إن الساعات دي تعتمد على الزجاج المعدني المقوى بدل من استخدام زجاج الياقوت الأزرق المستخدم في أغلب الساعات الأصلية وده لأن النوع الأولاني بيتحمل الضغط بشكل أكبر عن التاني.

• مقاومة المياه لحد عمق ١٠٠ متر.
• حوالين إطار الساعة بيكون فيه قرص مقياس الغطس.
• زجاج الساعة مصنوع من الزجاج المعدني المقوى.
• هيكل الساعة والحزام بيكونوا معمولين من التيتانيوم أو الستانليس ستيل أو المطاط أو السليكون عشان مقاومة التآكل.
• عرض الحزام بيكون كبير.

ساعات السباق / الساعات الرياضية

أهم عنصرين بيميزوا ساعات السباق هما Chronograph وTachymeter، والأولاني اتكلمنا عنه قبل كده وده بيكون عبارة عن عدادات لمجموعة من الخصائص زي الستوب ووتش ولازم يكون معاه زرارين بالضغط للتحكم في تشغيل وإيقاف العدادات دي، أما الخاصية التانية فدي بتكون عبارة عن قرص بيكون حوالين إطار الساعة وبيستخدم في حساب السرعة بالوقت والمسافة، بمعنى إن المقياس ده بتقدر من خلاله تحسب السرعة في حالة حسابك لزمن قطعك لمسافة معينة.

من هنا نقدر نحدد النقط اللي بتميز ساعات السابق:

• بيكون فيها كرونوجراف.
• بيكون فيها Tachymeter
• زرارين بالضغط للتحكم في الكرونوجراف.
• بتكون على الأغلب معمولة كلها من المعدن.

عشان تقدر تحقق أكبر استفادة ممكنة من الدليل ده جربه فورًا واختار ساعتك من بين تشكيلة الساعات المتوفرة على موقع ياقوطة.

شوف مختلف الساعات الرجالي المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.