كتبت: صفاء مجدي

الخلاط من الأجهزة المهمة جداً في المطبخ وحتى لو كان عندك في البيت كيتشن ماشين جايبه بالشيء الفلاني إلا إنك برده هتفضل تستخدم الخلاط لأنه أسرع وأسهل في الاستخدام بشكل عام وخصوصاً لو كان استخدامك مش بيزيد عن إنك تعصر شوية طماطم لصلصة المكرونة أو تعمل عصير الصبح على الفطار.

الخلاطات أنواعها كالتالي:

خلاط فائق السرعات

• وده بيقوم بمهام مختلفة وبيكون أسرع وأحسن في عصر الطعام وتقطيعه وتكسير الأطعمة المتلجة لعمل السموزي والأطعمة اللي فيها ألياف.
• النوع ده من الخلاطات اللي مش لازم تقطع له الفاكهة أو الخضار 100 حتة قبل العصر لأنه قوي كفاية إنه يقوم بالواجب ده.
• كمان النوع ده من الخلاطات متقدم جداً ومش بيقتصر الأمر فقط على سرعات مختلفة ولكن فيه اختيارات مختلفة للقطع والهرس والقطع.

اشتري سوبر خلاط من هنا.

خلاط عادي

• الخلاط ده اللي بيكون وظيفته أقل من اللي قبله وبيقتصر على المهام الخفيفة زي عصير الطماطم.
• غالباً لما تستخدمه هتقطع المكونات أجزاء الأول عشان يشتغل بكفاءة.
• مناسب جداً لو كان عندك بالفعل كيتشن ماشين بتقوم بالمهام الصعبة وبالتالي توفر ده للمهام اليومية الخفيفة.
• ده كمان مثالي لو انت بتحب العصاير سميكة شوية ومش ناعمة قوي أو زي ما بنقول نص ضربة.

اشتري خلاط عادي من هنا.

الخلاط الصغير الشخصي

• ده بيكون خلاط صغير الحجم ويا دوب بيعملك كوباية عصير واحدة بس. وده مناسب لو كنت عايش لوحدك.
• في منه أنواع بتكون وعاء الخلط نفسه كوباية تقدر تاخدها معاك الصبح بالعصير أو السموزي.

اشتري خلاط شخصي من هنا.

دراع الخفق

• بيكون دراع منفصل بأسلحة في آخره.
• مناسب جداً لو كنت بتخفق حاجات زي شوربات أو كده.
• مابيكونش له وعاء لكن بتاخده على بعضه كده وتخفق بيه الطعام في وعائه.

اشتري دراع الخفق من هنا.

• خصائص الخلاط المختلفة:

دي شوية خصائص ومميزات لازم تحطها في اعتبارك وانت بتشتري الخلاط الجديد.

المساحة المتوفرة

فكر في المساحة المتوفرة عندك في البيت وقارن بين ارتفاع الخلاط بقاعدته والارتفاع بين سطح المطبخ والرفوف.

قطع الغيار

اشتري خلاط تكون قطع غياره سهل الحصول عليها.

نوع الوعاء

• فيه وعاء بيكون بلاستيك والنوع التاني زجاج.
• البلاستيك طبعا أخف ومش بيتكسر على عكس الزجاج.
• لكن العيب الوحيد في البلاستيك إنه بيلقط ريحة ولازم يتغسل كويس قوي بعد كل استخدام.
• كمان اشتري وعاء تكون العلامات والمقاسات المكتوبة عليه تكون واضحة ويا ريت تكون محفورة عشان متتمسحش بالاستخدام الكتير.
• حاول تشتري وعاء يكون سهل التنظيف والغسل ومفيهوش حتت صعبة كتير أو انحناءات كتير صعب الوصول إليها.
• أما لو كنت هتغسل الوعاء في غسالة الصحون فاعمل حسابك تشتري خلاط يكون وعاؤه قابل للغسل في الغسالة.

غطاء الخلاط

• اشتري خلاط يكون غطاه مفتوح من فوق وبيسمح بإضافة مكونات أثناء الخلط خصوصاً لو كنت بتحب تعمل السموزيز والكوكتيل.
• فيه خلاطات بيكون معاها عصاية التقليب ودي بتدخل من فتحة الخلاط من فوق وتقلب المكونات دون الحاجة لإيقاف الجهاز.
• كمان ممكن تلاقي أنواع غطاها ليه مصفاة بتساعد على تنقية السائل وانت بتصبه.

وظائف الخلاط

• معظم الخلاطات ليها سرعات مختلفة.
• في خلاطات حديثة دلوقتي مش بس فيها سرعات لكن فيها برامج مختلفة لكل حاجة عاوز تعملها سواء العصر أو الهرس أو التقطيع.

حجم الخلاط

حجم الخلاط لازم يكون مناسب مع استخدامك وعدد أفراد أسرتك فبدل ما تعمل العصير لعيلتك على مرتين تعمله على مرة واحدة بس.

سلاح الخلاط

• طبعا لازم يكون سلاح الخلاط من الستانلس ستيل اللي مش بيصدي.
• الأنواع اللي بتنفع تخلع منها السلاح بتكون أحسن بكتير واَمن أكتر في التنظيف والغسل.

نصيحة أخيرة: لما تستخدم الخلاط يفضل تكون واقف جنبه طول الوقت وماتسيبهوش عشان المشهد المعروف بتاع انفجار الخلاط ممكن جداً يحصل وعشان كده كمان اختار خلاط تكون قاعدته ثابتة وغطاه محكم الغلق.