كتبت: منى عوض

غسالة الملابس واحدة من أهم الأدوات المنزلية واللي حقيقي من غيرها الناس هتتعب جدًا، عشان كدا يفضل دايمًا الاهتمام بيها والحفاظ عليها من خلال صيانتها بشكل دوري سواء بنفسك أو من خلال أشخاص متخصصين.

ولأن ياقوطة يهمها دايمًا راحتك، حبت إنها تساعدك من خلال تقديم دليل شامل لتنظيف وصيانة الغسالة في البيت، عشان الأمور كلها تبقى سهلة بالنسبالك في أي وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

الغسالة ذات الفتحة العلوية

• عشان تقدر تحافظ على العمر الافتراضي للغسالة- سواء غسالة أوتوتوماتيك أو عادية- لازم تحطها على قاعدة معدنية عشان ترفعها بعيد عن الأرض وبعيد عن أي مياه ممكن تكون متواجدة على أرض الحمام أو المكان اللي محطوط فيه الغسالة وبالتالي هتقدر تحافظ على جسم الغسالة من التعرض للصدأ والتآكل.
• بمجرد الانتهاء من عملية الغسيل يفضل استخدام قطعة قماش نظيفة وناعمة وتجفيف الهيكل الخارجي للغسالة وكمان الهيكل الداخلي عشان مايعملش ريحة كريهة أو الجسم مايتعرضش للصدأ.
• ممكن كمان تستخدم قطعة قماش وتغمرها في مزيج مكون من ماء وخل وتمسح بيها الهيكل الخارجي وأزرار التشغيل وكل جزء من الهيكل عشان تحافظ على رونقه ولمعانه.
• يفضل أنك تسيب الغسالة مفتوحة بعد الانتهاء من الغسيل عشان مايظهرش جواها أي روائح كريهة أو عفن أو فطريات.
• من الممكن تنظيف الغسالة أيضًا من خلال وضع من ثلاثة إلى أربعة أكواب من الخل الأبيض إلى ماء ساخن وتشغل الغسالة لمدة دقيقة وبعدين تضيف نص كوب من بيكربونات الصوديوم وتشغل الغسالة تاني حتى يمتزج الخليط بشكل كويس والغسالة تنضف بشكل فعال، وبعدين وقف الغسالة وسيب المزيج جواها بين نص ساعة إلى ساعة عشان التنظيف يكون أكثر فعالية.
• وممكن تستخدم خليط الماء مع الخل وبيكربونات الصوديوم في تنظيف جسم الغسالة الخارجي من خلال غمر قطعة قماش في الخليط وعصر القماش بشكل كويس وبعدين تبدأ تنظف الغسالة بشكل كويس.
• ممكن ترجع تشغل الغسالة- سواء العادية أو الأوتوماتيك- مرة تانية بعد مرور ساعة من وجود مزيج الماء والخل وبيكربونات الصوديوم بداخلها وسيبها لحد ما تخلص وقت البرنامج اللي ظبطها عليه وبمجرد ما تفرغ الماء من الغسالة هتلاقي إنها أصبحت نظيفة تمامًا.

الغسالة الأوتوماتيك ذات الفتحة الأمامية

• من الضروري وضع الغسالة على قاعدة معدنية عشان ترفعها بعيد عن الأرض وبعيد عن أي مياه ممكن تكون متواجدة على أرض الحمام أو مكان الغسالة عمومًا وبالتالي هتقدر تحافظ على جسم الغسالة من التعرض للصدأ والتآكل.
• يفضل تنشف غسالة الملابس أول بأول لو جيه عليها مياه عشان الهيكل ميتعرضش لصدأ، وممكن كمان تستخدم قطعة قماش مغمورة في مزيج ماء وخل وتمسح بيها الهيكل الخارجي بأكمله عشان تحافظ على رونقه.
• يفضل أنك تسيب باب الغسالة مفتوح بعد الغسيل عشان ماتكونش روائح كريهة أو عفن أو فطريات.
• يفضل تجفيف الإطار المطاطي للغسالة بشكل كويس جدًا من خلال استخدام قطعة قماش جافة وده عشان تحافظ عليه وممكن تنظفه كمان باستخدام فرشاة أسنان عشان تقدر توصل لكل جزء فيه وتنضفه بشكل كويس.
• تقدر تصنع مزيج مكون من نصف كوب خل أبيض و3 ملاعق كبيرة بيكربونات الصوديوم في وعاء صغير وبعدين تجيب قطعة قماش نظيفة وتغمرها في الخليط وتبدأ تمسح كافة أجزاء الغسالة الداخلية والخارجية والإطار المطاطي وباب الغسالة، وممكن كمان تستخدم فرشاة أسنان لو احتاجت توصل لأماكن صعب الوصول إليها.
• ممكن كمان ترش جوا الغسالة نص كوب بيكربونات الصوديوم وتضيف 2 كوب خل أبيض في درج مسحوق الغسيل، وبعدين تشغل الغسالة على برنامج درجة حرارته عالية جدًا، وبمجرد الانتهاء من دورة الغسيل وفتح باب الغسالة ممكن تجيب سفنجة وتنضف باب الغسالة من جوا.
• درج الغسالة كمان بيحتاج لتنظيف مرة أو مرتين شهريًا، وتقدر تعمل ده من خلال فك الدرج بالاستعانة بدليل المستخدم، وبمجرد ما تفكه تقدر تغسله بمياه ساخنة وفرشاة ناعمة للتخلص من آثار المساحيق المتراكمة بداخله، ولو كانت المساحيق المتراكمة متحجرة فيفضل نقع الدرج في ماء ساخن لمدة 10 دقائق عشان يبقى من السهل تنظيفه كويس بعد كدا، وبمجرد ما تغسل الدرج لازم تسيبه في الهواء لحد ما ينشف تمامًا وبعدين تركبه تاني وفقًا للتعليمات.

*** ملحوظة: يفضل تكرير عملية تنظيف الغسالة الشاملة بمزيج الخل وبيكربونات الصوديوم مرتين سنويًا على الأقل، في حين أنه من الضروري تنظيف الهيكل الخارجي للغسالة بشكل دوري.

ممكن تختار غسالة الملابس المناسبة ليك من هنا.

المقال ده ياقوطة قدمتلك من خلاله بعض النصائح قبل تشغيل الغسالة لأول مرة.

لو عايز تشتري غسالة وحاسس أنك محتار ومحتاج مساعدة، ممكن تشوف دليل ياقوطة لاختيار غسالة الملابس.

المقال ده بيضم قائمة بأهم مواصفات الغسالة.

ممكن تعرف مع ياقوطة أيهما أفضل غسالات التحميل العلوي أم الأمامي؟

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.