كتبت: منى عوض

من أول ما اخترعوا الغسالات وفيه ثورة حصلت في عالم الغسيل والمساحيق، وأصبحت الأجهزة الكبيرة دي شيء ضروري كل في بيت بس في الأول كانت عملية شرائها سهلة أما دلوقتي الأمر بقى صعب شوية لأننا أول ما بنقرر شراء غسالة جديدة بتبدأ أسئلة كتير تدور في ذهننا زي مثلًا إحنا عايزين غسالة أوتوماتيك ولا عادية وعايزنها تشيل لحد كام كيلو وهإيه الفروق بينهم.

و ياقوطة هتساعدكم  في عملية الاختيار من خلال مقال بيقدم مقارنة شاملة بين غسالات التحميل العلوي والأمامي عشان تقدر تحدد أيهما أفضل وأنسب بالنسبة ليك ولاحتياجاتك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

وقت الغسيل

لو محتاج غسالة تنجز في الوقت يبقى الغسالات العلوية هي الخيار الأفضل ليك ولكن لو معندكش مشكلة في الوقت وممكن تستنى فترات طويلة عادي جدًا يبقى ممكن تشوف الغسالات الأمامية.

مدى الملائمة والسهولة في الاستخدام

غسالات التحميل العلوي عادة بتكون مناسبة بشكل أكبر لأنها مش هتخليك تحتاج إنك تنحني عشان تشيل الملابس أو تدخل الملابس جوه الغسالة على عكس غسالات التحمل الأمامي اللي هتطلب منك الأمر ده.

الكفاءة

غسالات التحميل الأمامي قادرة على توفير نظافة أكثر وقدرة أكبر على إزالة البقع مقارنة بغسالات التحميل العلوي، وكمان بتميل إلى تحقيق كفاءة أكثر في استخدام الطاقة والمياه من الغسالات العلوية.

مسحوق الغسيل

في العموم الغسالات العلوية ممكن تستخدم معاها مسحوق عادي اللي بيساعد في التوفير في الميزانية أو مسحوق أتوماتيك اللي عادة بيكون سعره أغلى يعني حرية الاختيار ليك تمامًا، أما الغسالات الأمامية فهتلاقي أنها مش بتقبل غير بالمسحوق الأتوماتيك يعني إنت هنا معندكش رفاهية الاختيار.

الغسيل

من الممكن إنك تضيف مزيد من الغسيل في الغسالات العلوية وهي شغالة عادي جدًا ودي ميزة مش متوفرة على الإطلاق في الغسالات الأمامية اللي بمجرد ما بيتقفل بابها والكهرباء تشتغل مش هتعرف تقرب منها ولا تفتح بابها أصلًا غير لما دورة الغسيل تخلص.

برامج الغسيل

سواء اخترت غسالة تحميل علوي أو أمامي فهتلاقي أنهم بيضموا برامج غسيل كتير ومتنوعة، الأمر كله بيتوقف عليك وإنت بتختار يعني من الآخر خد بالك الغسالة اللي بتشتريها فيها كام برنامج غسيل وبرامج الغسيل دي عبارة عن إيه.

استهلاك الكهرباء

الغسالات العلوية بتستهلك كميات كهرباء أعلى من نظيرتها الأمامية وده معناه أن فواتير الكهرباء ممكن تيجي بمبالغ كبيرة مع الغسالات العلوية وممكن يكون الفواتير قيمتها أقل في حال استخدام الغسالات الأمامية.

استهلاك الماء

لازم تعرف إن غسالات التحميل الأمامي بتستهلك كميات أقل من المياه مقارنة بنظيرتها ذات التحميل العلوي، وبالتالي هتقدر توفر في فاتورة المياه، وكمان مش هتسبب أي إهدار في الماء وهتحافظ على البيئة في الوقت نفسه.

الصيانة

عادة ما تتطلب غسالات التحميل الأمامي صيانة وعمليات تنظيف أكثر من غسالات التحميل العلوي، وده لأن الغسالات الأمامية بيتراكم الماء داخل الجلدة اللي بتبقى موجودة على الباب وده ممكن يسبب ريحة عفن وممكن يقلل من العمر الافتراضي للجلدة دي، أما الغسالات العلوية فبتشتغل على فكرة سحب المياه لأسفل وبالتالي مفيش أي مياه بتتراكم بداخلها وبالتالي فهي بتعتبر أسهل في الصيانة.

السعر

عادة ما بتكون تكلفة غسالات التحميل الأمامي أعلى من نظيرتها ذات التحميل العلوي، بس السعر والتكاليف مش بيقفوا على سعر الشراء فقط، لأ أنت لازم كمان تحسب وتشوف تكاليف كل غسالة فيهم على المدى الطويل وأنهي هيناسب ميزانيتك على المدى الطويل.

عايز تشتري غسالة ومش عارف تختار، يبقى لازم تشوف دليل ياقوطة لاختيار غسالة الملابس المناسبة.

ممكن تشوف كمان قائمة بأهم مواصفات الغسالة من هنا.

وده مقال بقى بيرصد الغسالات: ما بين الماضي والحاضر.

أما المقال ده بقى بيضم دليل رموز غسيل الملابس.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.