كتب: نادية حسين

كلنا عندنا فى البيت موبايلات قديمة ومش عارفين نعمل بيها ايه.. موبايل قديم كان بسعر غال ومش هاين عليك تبيعه عشان مش هيجيب ربع ثمنه. واللى ليك معاه ذكريات حلوة ومش قادر تستغنى عنه.. بس مش معقول هيفضل مركون كدا.. تلاقى فى المكتب موبايل قديم وفى المكتبة واحد تانى! ضرورى يكون في حل! ما الأجهزة دى كانت بتقدم وظايف كتير .. ممكن نشغلها تانى ونخف الضغط على أجهزتنا الحالية اللى معظمها بطاريته مش بتتحمل.. ما تيجوا نشوف ايه اللى ممكن نعمله ونستغل مورد بيساوى صفر ونحوله إلى مورد له قيمة! ولو مش هتناسبك كل الاستخدامات اللى ياقوطة هتقولك عليها.. فى نهاية الموضوع فى اقتراحات  تانية ممكن تعجبك.. ومش هنقولك تشترى أونلاين!

راديو

كثير من الناس بتحب الراديو وهو الحقيقة مُسلى وبيقدم حاجات متنوعة بين الأغانى والأخبار ومحطات عربية وأجنبية. ومعظم ويمكن كل محطات الراديو بتكون ليها بث على الانترنت .. وإذا كنت مشغل واي فاي عندك فى البيت أو فى الشغل مثلا.. هات موبايلك القديم واتصل بالواي فاى .. وبأى تطبيق من تطبيقات الراديو الكثيرة جدا ممكن تشغل الراديو زى ما تحب..هتقول ما انا بشغله على الرسيفر من الدش أو من لابتوب أو الموبايل والتابلت كمان.

 هتوفر شحن الحاجات دى كلها اللى بيخلص بسرعة مع كثر استخدامتنا.. والرسيفر ابقى شغل عليه محطة تلفزيون أو اطفيه ووفر الكهرباء.

كاميرا مراقبة

لو كاميرا الموبيل كويسة ممكن تستفيد بيه باستخدامه كجهاز مراقبة للمنزل بشكل عام أو حتى لمراقبة حركات طفلك الصغير للاطمئنان الدائم عليه.. ثبتها فى أى زاوية أو نافذة .. وفى تطبيقات كثير برضه متاحة فى جوجل بلاى وايتونز .. كلها خيارات قوية هتمكنك تخلى عينك على ممتلكاتك أو أطفالك وانت فى أى مكان تانى وتبقى مطمن عليهم.

هتوفر ثمن كاميرا مراقبة وهتستخدم موبايل قديم مش بتستفيد منه نهائى.. وحتى لو مش مهتم تراقب البيت ككل.. ممكن تراقب حركات طفلك الرضيع أول بأول وهو بيلعب وهو بينطق أول كلماته .. تجربة مثيرة حاول تستمتع بيها.

مشغل MP3

زمان كانت الموبايلات فى عصر ما قبل الهواتف الذكية، كلنا بنستخدمها لتشغيل الموسيقى أو أى ملفات صوتية زى حلقات من برنامج بنحبه.. كانت الموبايلات دى قوية وبطاريتها جبارة، تتحمل المكالمات واستعمالها كجهاز MP3.. هتلاقى تراكات الموسيقى لسه موجودة على موبايلك القديم وعلى كارت الذاكرة.. زود عليها كل الحاجات اللى عايز تسمعها سواء فى البيت أو لو هتستخدمه كجهاز MP3 للسيارة. ودلوقتى مش هتقلق إن الأغنية أو الحلقة هتقطع بسبب مكالمة مفاجئة.

 هتوفر ثمن ام بى ثرى .. هتوفر استهلاك بطارية السمارت فون اللى مش بتتحمل كام ساعة.. وهتسمع الأغانى والملفات الصوتية دون أى ازعاج من المكالمات الهاتفية.

قارىء الكترونى

لو شاشة موبايلك القديم كبيرة لدرجة تقرا عليها كتاب بى دى أف أو وورد أو بأى صيغة متاحة عليه.. هتبقى تجربة مفيدة جدا أنك تقرأ بعيد عن تشويش فيس بوك وتنبيهات البريد الالكترونى وواتس أب ..إلخ من كل وسائل التواصل.. هتبعد عن العالم كله باستثناء كتابك!

 جو هادئ لقراءة متأنية ومفيدة .. ليس هناك أى مقاطعات.. ممكن تقرأ وتدون ملاحظاتك وتستفيد بمساحة هدوء بعيد عن صخب الانترنت.

منبه

بالتأكيد انت بتظبط منبه عشان تصحى من النوم لأى ميعاد سواء الصبح عشان الشغل أو فى وسط اليوم لو نمت وعندك ميعاد لخروجة أو أى ارتباطات تانية .. الموبايل القديم هتظبط عليه أى عدد من المنبهات للاستيقاظ من النوم وخلى التذكيرات الهامة على الموبايل الجديد.. المنبه حاجة مهمة وبتستخدمه يوميا يعنى أكيد بيأثر على شحن الموابيل.

الموبايل القديم مش هتحتاج تشحنه إلا كل كام يوم لأنك مش هتستخدمه غير كمنبه لإزعاجك بس عشان تصحى.. وهتحافظ على بطارية موبايلك الحالى وهتحافظ كمان عليه من أى ضربة تيجى عليه من غير ما تاخد بالك بغرض انك تسكته عشان تنام فتفقده ويسكت خالص.

اطار للصور

انت ممكن تحطه على مكتبك أو فى مكان فى البيت وتستخدمه لعرض الصور الغالية عليك أو صور بتحبها للطبيعة. ولو انت من عشاق انستاجرام ممكن تتصل بواسطة واي فاي ويعرض لك بشكل مستمر تحديثاتك وتحديثات اصدقائك.

 الصور هتبقى أدامك على طول ومفتوحة من غير ما تشغل بالك بالتبديل بين التطبيقات المختلفة.

للتواصل الاجتماعى

لو انت من هواة شبكات التواصل الاجتماعى زى تويتر وفيس بوك وبتحب تعمل شات طول اليوم وبتستخدم واتس أب ولاين وتليجرام وفايبر.. يبقى ممكن تخفف الضغط على موبايلك الحالى.. وتخلى الموبايل القديم تستخدمه للتواصل الاجتماعى بس..هتقدر تحكم وقتك وهتعرف أد ايه انت بتستهلك وقت كثير فى الشات وتقليب التايم لاين..

ممكن تكتشف إن جزء من الوقت دا افضل لك تعمل بيه حاجات تانية مفيدة.. وتفكر تعمل توازن بين استخدام الانترنت وحياتك الحقيقية. وهتوفر أكيد بطارية الموبايل، على الأقل هتخفف الاستخدام عليه شوية وانت قاعد فى البيت مع موبايلك القديم.

ساعة رقمية

ممكن تستخدم خلفية شكلها جذاب وتظبط الساعة عليها وتستخدمه فى أى مكان فى البيت أو فى مكتبك أو فى الشغل كساعة رقمية هتبقى أدامك بصورة دايمة ..ممكن تستخدمها فى المطبخ بحيث لو القعدة طولت فى ابتكارات الوصفات تبقى الساعة لطيفة وشكلها حلو وتفكرك بالمواعيد.

 شكله كساعة مع خلفية جذابة ممكن تتغير كل ما تحب هتفرق معاك جدا عن الشكل الممل اللى اتعودت عليه لأي ساعة عندك فى البيت.

مشغل لمقاطع الفيديو والأفلام

ممكن تتفرج علي مقاطع فيديو ساخرة أو مقاطع فيديو تعليمية أو حتى أفلام لو شاشته تسمح بكدا.. زهقت من كل اللى على الميمورى.. عرفت خلاص الطريقة هتتصل بأى واي فاى .. وافتح يوتيوب واتسلى زى ما انت عايز… مع الموبايل القديم هتلاقى وقت ترفيه مُركز بعيد عن أنك تكون مشغل حاجة تضحكك وتبص تلاقى فجأة فى صفحة فيس بوك حاجة تنكد عليك أو خبر مزعج ..

هتلاقى نفسك بتركز أكثر سواء ترفيه أو غيره لأن مفيش أي تشتييت من أى نوع. ابقى جرب كدا تاخد كورس من موقع زى كورسيرا وهتلاقى الحكاية ممتعة ومفيدة وسهلة جدا. مجرد نص ساعة فى اليوم هتفرق معاك.

الترفيه والألعاب

استخدمه للألعاب فقط.. زود مساحته بذاكرة خارجية وثبت عليه كل الألعاب اللى تناسب امكانياته والمساحة.. وخليه كجهاز للعب بس .. حتى لو الألعاب بسيطة جدا والجهاز مفيهوش امكانيات كثيرة.. كفاية انك هتلاقى مساحة من الترفيه متاحة من غير ما تبقى قلقان أن شحن البطارية يخلص أو تيجى لك مكالمة تبوظ عليك الجيم.

 لو مش بتحب اللعب، جهزه بالألعاب واشحنه واديه لأى حد فى البيت أو من أصحابك أو طفل صغير..هتفرق معاهم جدا وهتفرحهم وهتفرح لفرحتهم.. أما لو انت بتحب اللعب فأكيد دا اقتراح هيناسبك جدا.

لو مفيش أى حاجة من اللى فوق عجبتك، فكر انت تبتكر، فى ناس ممكن تعمل انذار للعربية بالموبايل بإمكانيات بسيطة أو تستخدمه لتصفح الانترنت والرد على الايميل بس. وممكن لو بيدعم الأشعة تحت الحمراء تستخدمه كريموت كنترول.. كل دا مش مناسب لك مفيش فايدة ومعندكش أفكار. يبقى حاجة من اثنين. يا إما  تتبرع بيه أو تبيعه !! اهو زى ما ممكن تشترى أونلاين .. هتقدر تبيع أونلاين.. وبرضه هتبقى تجربة وخبرة جديدة ليك.

ياقوطة تتمنى لكم أوقات سعيدة مع هواتفكم الجديدة والقديمة.