ازاي تختار وتشتري أفضل حقيبة ظهر؟
كتبت: صفاء مجدي
بيحتاج الناس حقيبة الظهر في استخدامات متنوعة وبتختلف من شخص لآخر، يعني مثلًا حقيبة الظهر بيستخدمها الناس في السفر، والشغل، وفي المشاوير المختلفة وأكيد في المدارس.. وكمان لوحد رايح تمرين وفي استخدامات تانية كثيرة جدًا.. عشان كدا عملنا دليل يشرح ازاي تختار حقيبة الظهر المناسبة ليك على حسب استخداماتك واحتياجاتك المختلفة.
وطبعًا علاقة معظم الناس بحقيبة الظهر موقفتش عند ذكريات المدرسة، والطفولة، وكتب العربي والحساب والدين، والكراريس والكشاكيل لكن في الواقع شنطة الظهر مناسبة لكل الأعمار من الجنسين.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
شخصيًا مقدرش استغنى عنها وبتريحني جدًا في مشاويري سواء مشاوير سفر أو حتى خروجة عادية محتاجة أشيل فيها أكتر من حاجة.
هل شنطة الظهر أفضل من شنطة الكتف؟
دايمًا بفضل شنطة الظهر على شنطة الكتف العادية لأكتر من سبب:
- طريقة حمل شنطة الظهر أريح بكتير من شنطة الكتف، ودا لما شنطة الظهر تكون بالمواصفات الصح وطريقة حملها صح.
- مش بتشغل ايدي وبالتالي بتديني فرصة أشيل حاجات تانية في ايدي لو محتاجة أو اتعامل بيها بكل حرية والحركة بيها أسهل بشكل عام.
- بتشيل حاجات كتير وفي نفس الوقت الحمل بيتوزع على ظهرك كله فمش بتحس بالتقل أوي.
- مش هتاخد مساحة كبيرة خصوصًا لو كنت في وسيلة مواصلات لأنك يا إما هتفضل لابسها على ضهرك أو هتشيلها على رجلك بسهولة.
كل الأسباب دي بتخليني أختار شنطة الظهر لكن في الواقع شنطة الظهر غير المناسبة أو إذا استخدمت بشكل غير صحيح ممكن بسهولة تسبب مشاكل في الظهر والرقبة.وعشان كده النهاردة ياقوطة هتساعدك توصل لشنطة الظهر المثالية لاحتياجك.
لما تيجي تشتري شنطة ظهر فيه أربع حاجات أساسية لازم تفكر فيها وهي النوع والحجم والمقاس والمميزات.
1. شنط الظهر من حيث النوع:
وهنا ممكن نقسمها لحاجتين
- نوع على حسب طبيعة الاستخدام.
- نوع على حسب الخامة.
نوع شنطة الظهر على حسب الاستخدام:
شنط الظهر ذات الاستخدام اليومي:
- تشمل شنط المدرسة، وشنط الجامعة، وشنط الشغل، وشنطة الظهر العادية اللي بتاخدها في أي مشوار سفر صد رد في نفس اليوم أو مثلًا هتبات بيها يوم أو يومين في سفرية سريعة.
- الشنطة دي بتكون خفيفة نسبيًا ومن خامات خفيفة.
الشنطة ذات الإطار الداخلي:
- الشنطة دي بيكون ليها إطار داخلي متغطي بالخامة اللي منها الشنطة.
- الإطار بيكون من البلاستيك المقوى أو من الألومنيوم.
- وظيفة الإطار إنه يحافظ على شكل الشنطة لأن النوع ده من الشنط بيكون كبير الحجم نسبيًا.
- الإطار كمان بيلم حمل الشنطة فيركزه على ظهرك وعلى منطقة الحوض عشان دي أقوى عظام في الجسم وتقدر تستحمل حمل كبير.
- حجم الشنطة بيكون أكبر وأضخم وبتكون أتقل من شنطة الاستخدام اليومي.
- الشنطة دي مناسبة أكتر للمتسلقين لأنها بتلم الحمل على أجسامهم وبتسهل الأمر عليهم في عملية التسلق الشاقة.
قد يهمك: تجهيزات العودة إلى المدرسة
شنطة الإطار الخارجي:
- علي عكس – شنطة الظهر ذات الإطار الداخلي- اللي قبلها، شنطة الإطار الخارجي بيكون لها إطار من برة.
- الشنطة بتبان شوية كأنها متعلقة في الإطار ده بشرايط وأحزمة.
- التركيبة المميزة للنوع ده من الشنط بيخليها مثالية جدًا للرحلات اللي فيها مشي كتير، فلو كنت مخطط الصيف الجاي تلف مصر أو أوروبا بننصحك بشدة تشتري شنطة ذات إطار خارجي.
- الشنطة دي برده بتكون كبيرة الحجم وتقيلة شوية لكن جيوبها كتير ومتقسمة بشكل يسمح لك تشيل ملابس، ومستلزمات كتير تكفيك أسبوعين وأكتر.
اتفرج على حقائب ظهر للمدرسة من هنا، بأسعار تبدأ من 69 جنيه مصري.
نوع شنطة الظهر على حسب الخامة
شنطة الظهر القماش
- ميزات الشنطة القماش إنها خفيفة الوزن وممكن تغسلها في الغسالة طالما مسموح بكده.
- تستحمل الاستخدام اليومي بس متشيلش أحمال كبيرة.
- غير مقاومة للماء.
- عمرها قصير بالمقارنة بالخامات التانية.
شنطة الظهر البوليستر
- الشنط البوليستر بتعرفها من إنها بتكون شبه القماش شوية ولكن أسمك.
- مقاومة للماء.
- فترة عمرها طويلة نسبيًا.
- تستحمل أحمال كبيرة.
- البوليستر مادة بتحافظ على الألوان مدة أطول وبالتالي بتكون مناسبة جدًا لشنط الظهر للأطفال عشان بيكون أشكالها جذابة.
- البوليستر بيلقط الروائح بسرعة وصعب تتخلص منها.
شنطة الظهر النايلون
- بتعرفها من مظهرها الناعم أوي وبيكون بيلمع شوية.
- مقاومة جدًا للمياه.
- تعيش فترة طويلة جدًا.
- أخف من شنط الظهر القماش.
- هتلاقي منها درجات وأنواع مختلفة في السوق، اختار الدرجة اللي تناسب طبيعة استخدامك.
- النايلون مش بيلقط ريحة زي البوليستر.
- يعتبر الأفضل في الخامات لأنه كمان سعره كويس، وبيعيش كتير، ومميزاته كتيرة.
قد يعجبك أيضًا: مستلزمات للمغامرين
شنطة الظهر الجلد
- من الخامات الممتازة جدًا.
- تعيش شنطة الظهر الجلد مدة طويلة وبتتحمل البهدلة.
- مضاد للمياه.
- شكلها بيكون حلو أوي وبيناسب الناس اللي بتهتم بالمظهر أكتر.
- عيب الجلد الوحيد أنه بيكون غالي نسبيًا.
اتفرج على تشكيلة من حقائب ظهر لاب توب من هنا، بأسعار تبدأ من 219 جنيه مصري.
2. نوع شنطة الظهر على حسب المقاس
- أيا كان نوع الشنطة فلازم تقيسها عشان تعرف إن كانت مناسبة أو لأ.
- لما تلبس الشنطة لازم يكون نهايتها عند نهاية ظهرك.
- دراعات الشنطة الكويسة بتكون مريحة ومش ضيقة سواء من فوق الدراع أو تحته.
- الدراعات الواسعة بتكون مريحة عشان توزع الحمل صح على كتفك لكن برده الدراع الواسع زيادة عن اللزوم ممكن يضايقك. اختار حاجة تناسب حجم كتفك.
- الجزء اللي بنظبط منه طول الدراع يكون تحت بداية كتفك بحوالي 2.5-5 سم.
- يكون حزام الوسط على مقاسك، وظيفة الحزام ده أنه بيخفف الحمل من على الظهر ويخليه على الحوض أكتر.
- موديلات الشنط بتكون نازلة بمقاسات:
- Small, x-small لشخص طول جذعه حوالي 45 سم.
- Medium, regular لشخص طول جذعه بين 45-50 سم.
- Large لشخص طول جذعه فوق 50 سم.
*طول الجذع هو المسافة بين نهاية رقبتك ونهاية ظهرك عند بداية عظمة الحوض.
3. نوع شنطة الظهر على حسب الحجم
- يتوقف حجم الشنطة على وظيفتها واللي بتشيله فيها.
- الحجم أقل من 40 لتر هيشيل معاك مياه، وكاميرا، وأكل مرتاحين.
- 40 لتر إلى 65 لتر هتنفع للسفر ورحلات التخييم لويك اند.
- 65-95 لتر لرحلة لمدة أسبوع تشيل الملابس، ومعدات تخييم.
- أكتر من 95 لتر مناسبة للسفر الطويل أكتر من اسبوعين، ورحلات التسلق.
اقرأ أيضًا: لعشاق السفر .. راحتك علينا
4. نوع شنط الظهر على حسب المميزات
البطانة:
- بطانة الشنطة مهمة جدًا خصوصًا لو كنت ناوي تشيل فيها لاب توب أو تابلت، البطانة هتحمي الجهاز، ده غير إن فيه شنط مخصصة للأجهزة الالكترونية بتكون البطانة فيها زيادة شوية.
- كمان بطانة ظهر الشنطة أساسية، وكل ما كانت البطانة ناشفة وسميكة كل ما يكون أحسن. البطانة الناشفة قد تبدو غير مريحة لكنها في واقع الأمر مريحة جدًا لأنها مش بتتأثر بمحتويات الشنطة. فلو كنت مالي الشنطة ملابس على سبيل المثال برده هيفضل ظهر الشنطة مفرود ومريح لجسمك.
- البطانة الناشفة كمان بتسمح بدخول الهواء بين ظهرك وظهر الشنطة وبكده مش هتكون حران وأنت لابسها.
- كذلك بيكون فيه أنواع مبطنة بفوم يسمح بدخول الهواء ويقلل عرق الظهر.
- البطانة كمان لازم تمتد للكتف عشان تكون عملية الحمل مريحة.
اتفرج على حقائب ظهر رياضية من هنا، بأسعار تبدأ من 89 جنيه مصري.
السوستة:
- السوستة لو فيها مشكلة هتبقى من أكبر الأسباب اللي ممكن تخليك تستغنى عن شنطتك عشان كده جرب السوستة مرة واتنين وتلاتة قبل ما تشتري الشنطة.
- كل ما كانت السوستة عريضة بيكون أحسن.
- كمان تأكد إن جرار السوستة مريح في الاستخدام ومثبت كويس جدًا.
الخياطة:
- الخياطة تاني سبب ممكن يخليك ترمي شنطة ظهرك، تأكد من الخياطة قبل ما تشتري، شوف الخياطة جوا وبرة وفي كل جيب.
- تأكد من عدم وجود أي قماش زيادة أو خيوط زيادة وخصوصًا عند السوستة عشان متعلقش.
- راجع الخياطة اللي عند الكتف كويس لأن ده أول جزء بيبوظ في أنواع الشنط الرديئة.
الجيوب:
- كل ما زادت تقسيمة الشنطة كل ما هتكون حياتك أسهل، الشنطة هتكون منظمة وهتوصل للي محتاجه بشكل أسرع.
- لو هتشيل لابتوب يبقى لازم يكون في الشنطة مكان لللاب توب ويُفضل كمان يكون بحزام أمان يحمي جهازك ويثبته وقت الحركة.
- دلوقتي بعض الشنط عليها جيب صغير عليه علامة سماعات، الجيب ده بيسمح لك بتوصيل سماعاتك بجهاز الموبايل أو الـ mp3 وهو داخل الشنطة وبكده متضطرش تشغل ايدك بيه وفي نفس الوقت تقدر تسمع مزيكتك بسهولة.
- انا واحدة من الناس اللي بتحب يكون للشنطة جيب برة يسمح لي احط فيه الحاجات الصغيرة اللي ممكن تضيع جوا ويكون الوصول ليها أسهل.
- جيب زجاجة المياه من الحاجات اللي لا غنى عنها، وجود زجاجة المياه في الجيب الكبير بيزنق الشنطة وممكن لو الزجاجة المياه اتفتحت تغرق الكتب أو الهدوم أو الأجهزة اللي موجودة جوا، جيب خارجي في الجنب لزجاجة المياه شيء أساسي جدًا.
مقاومة المياه:
- زي ما ذكرنا سابقًا إن الشنط اللي من الجلد أو النايلون أو البوليستر بتكون كويسة جدًا لمقاومة المياه.
- السوستة اللي بيكون ليها إطار من القماش برة بتحمي محتويات الشنطة من البلل.
- كمان فيه شنط بييجي معاها كيس تغطي بيه شنطتك وقت المطر الغزير.
شنط ظهر بعجل ولا من غير عجل؟
- العجل منتشر جدًا وخصوصًا في شنط الأطفال لكن في الواقع الشنط دي بتكون غالبًا مش مريحة للظهر.
- الشنطة دي بتكون معمولة لغرض الجر وبالتالي مهمة الحمل بتكون مزعجة.
- لو اضطريت تشتري شنطة من النوع ده يفضل إنها تكون ذات بطانة خلفية كويسة جدًا عشان متسببش ألم للظهر.
شنطة الكتف الواحد
- انتشرت من كام سنة شنطة الظهر اللي بكتف واحد ومعظم الطلبة في المدرسة اشتروها لكن في الواقع النوع ده من الشنط مش صحي على الإطلاق لأنها بتحمل الثقل كله على ذراع واحد.. وخصوصًا لما تستخدمه شنطة للمدرسة ولهذا ننصحكم بالشنطة ذات الكتفين.
بتنور في الضلمة
- شنط الظهر الكويسة بتكون مزودة بشريط لامع لونه فسفوري أو فضي محطوط على الشنطة من برة.
- الشريط ده يساعدك توصل للشنطة في الظلام وكمان لو مسافر مع مجموعة ليلًا وماشيين في طريق سوا هيساعدكم تشوفوا بعض عن طريق الشنط.
القفل
- في شنط ظهر بيكون سوستها مزودة بحلقة صغيرة تقدر تشبك فيها قفل عشان تتأكد أن محتوياتك بأمان.
لوح تزحلق
- لو كنت من هواة التزحلق skating فأنت أكيد هتحب تأخذ لوح التزحلق معاك في شنطتك.
- بدل ما تشيله في جيب الشنطة وتسيب الجيب مفتوح، اختار شنطة ظهر مزودة بحزام من واجهتها عامل زي حرف X أوعامل خطوط أفقية بتدخل فيها لوح التزحلق والحزام بيمسك عليه.
إضافة ملحقات
- بعض شنط الظهر مزودة بحلقات في واجهتها عشان تعلق فيها أي ملحقات زيادة عندك عن طريق خطاف.
قاعدة الشنطة
- قاعدة شنطة الظهر لازم تكون سميكة جدًا ومن خامة ذات جودة عالية عشان احنا كثير بنضطر نحط شنطنا في أماكن غريبة مرات على سيراميك، وأحيانًا على تراب فلازم تكون حاجة تستحمل متبوظش.
نصائح عامة
- متشيلش في الشنطة حاجة أتقل من 15% من قيمة وزنك وطبعًا كل ما كان أخف كل ما يكون أحسن.
- وأنت بتشتري فكر في اللي هتشيله جوا الشنطة معظم الوقت: كتب؟ لابتوب؟ هدوم؟
- هل هتفضل قاعد طول الوقت؟ ولا هتمشي كتير؟ ولا هتجري؟
- حالة الطقس.. مسافر بلد ممطر؟ ولا الجو حر فهتحتاج شنطة تهوي ظهرك؟
- شنط الظهر للسيدات بتكون دراعاتها المسافة بينها قريبة نسبيًا وكمان بيكون حجم الدراع نفسه ضيق عشان أكتاف السيدات في الأغلب أرفع من أكتاف الرجالة.
وأخيرًا ادخل على ياقوطة هتلاقي تشكيلة متنوعة من شنطة الظهر بأحسن الأسعار.
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.