إزاي تحضر شنطة صغيرة خفيفة لرحلة ١٠ أيام في أوروبا (في الصيف)
كتب: فريق عمل مشروع سفر وياقوطة
ما زلت بستغرب لغاية دلوقتي الناس اللي بتاخد معاها شنطة كبيرة مليانة هدوم وجزم وإكسسوارات مالهاش لازمة لسفرية مش هتعدي ١٠-١٥ يوم بالكتير. بالذات لو رايح أوروبا وهتستخدم فيزا شينجن استخدام كامل وهتستغل فرصة إنك تقدر تدخل ٢٦ بلد مختلفة لإن كل ما البلاد تكتر موضوع الشنط بيبقى أرخم ومتعب أكثر في إنك تفضل ماشي بشنط كتير في المطار وتتنقل من مكان لمكان.
عشان كده الحل المثالي بالنسبالي هو شنطة واحدة carry-onأو شنطةBackpackفيها اللي أنا محتاجه وبس وبرتبها بطريقة بسيطة تسمحلي آخذ كل اللي محتاجه في نفس الوقت.
أول حاجة محتاجها هي إنك تعرف هتعمل إيه هناك
يعني المدن اللى هتروحها. النشاطات اللي هتعملها فيها عاملة ازاي. هتطلع جبال ولا هتقضيها تمشية. ولا خروجات وسهر وحفلات ولا كل الحاجات دي. ده بيحدد الهدوم اللي هتدخل الشنطة لإن عشان الشنطة تكفي أي حاجة مش محتاجها مش هتاخدها. بعد ما تعرف إنت هتعمل إيه هناك هتدخل على الخطوة اللي بعدها.
ورقة فيها كل اللي انت محتاجه
أنا عارف إن الأسهل إنك تبتدي تحط حاجاتك كلها وتشوف بعد كده إيه اللي انت شايفه ناقص، بس الطريقة دي بتمنع إمكانية إنك تنسى أي حاجة انت محتاجها وفي نفس الوقت بتخليك ما تاخدش غير اللي انت محتاجه. بالنسبالي الورقة دي بيبقى مكتوب فيها الآتي:
–٤ تيشيرتات نص كم للخروجات اليومية العادية.
–قميصين للسهر والحفلات.
–شرابات.
–فوطة.
–شورتين.
–شاحن.
–قفل.
طبعًا القايمة دي بتختلف على حسب الوقت اللي بتكون مسافر فيه وعلى حسب الجو هيبقى عامل ازاي لكن دي القايمة اللي بمشي عليها لو مسافر أوروبا في شهور الصيف.
لف اللبس ما تطبقهوش
دي أحسن طريقة توفر بيها مكان في الشنطة بسهولة وبتقلل من كرمشة الهدوم. بالذات في أنواع اللبس اللي بتاخد مساحة كبيرة زي البنطلونات الجينز.
بالإضافة للف الهدوم، حاول تستغل كل جزمة أو جيب بنطلون عشان تحط فيهم حاجات مش لاقيلها مكان، زي الحزام مثلاً في الجزم وفرشة الأسنان والمعجون في جيب البنطلون. الفيديو ده بيشرحلك أكتر إزاي تقدر تلف هدومك في الشنطة وتستغل كل جزء فاضي.
لو هتسافر وماعندكش وقت تشتري الحاجات اللي محتاجها ادخل على Yaoota.com، أول محرك بحث إلكتروني للتسوق في مصر.
لو عايز تعرف معلومات ونصايح أكتر عن السفر ادخل على مشروع سفر www.SafarProject.com