كتب: محمد عادل

تفتكر لو بتشتري موبايل جديد، هتفكر في الأسامي المعروفة في السوق ولا ممكن تجرب موبايل جديد ما سمعتش عنه قبل كده؟

الإجابة محيّرة، وده لإن شركات كتيرة دخلت السوق المصري على مدار السنتين اللي فاتوا مما أدّى لتطور كبير ومنافسة شرسة بين اللاعبين القُدام في السوق والوافدين الجدد. القُدام بيحاولوا يحافظوا على مكانهم، والجُداد بيحاولوا يثبتوا نفسهم. وخلال السنتين دول بعض الشركات الجديدة قدرت فعلًا تثبت نفسها وتفرض كلمتها وتجذب المُستخدمين بشكل كبير لموبايلاتها. من أهم الشركات دي Oppo و Tecno و Infinix. 

إحنا هنا في ياقوطة هنقدملكم أهم الموبايلات اللي نزّلتها الشركات دي وأفضلها خلال الفترة اللي فاتت، رتبنالك الموبايلات دي حسب كفاءة كل موديل وحجم الاستفادة والراحة اللي هتعود عليك من شرائك ليه. لوعجبك موديل فيهم ممكن تشتريه عن طريق ياقوطة وهيوصلك لغاية عندك وبأفضل سعر.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

Oppo F1 plus موبايل

تقييم الموبايل

هاتف أوبو F1 بلس شاشته بحجم ٥٫٥ بوصة بدقة وضوح ١٠٨٠ بكسل، بتصميم معدني، وكاميرا أمامية ١٦ ميجا بكسل بعدسة f/2.0 وكاميرا خلفية ١٣ ميجا بكسل وبروسيسور Helio P10  ثماني النواة ورامات ٤ جيجا بايت وذاكرة داخلية ٦٤ جيجا بايت، وممكن تضيف له كارت ميموري لغاية ٢٥٦ جيجا بايت، وبطارية سعتها ٢٨٥٠ مللي أمبير.

تجربة المُستخدم

الموبايل شاشته كبيرة ودقة وضوحها مميزة وده معناه إن أي حاجة بتعرضها وتشوفها على الموبايل هتكون ألوانها زاهية وواضحة جدًا، لكن أحيانًا بتحس الألوان حادة أكتر من اللازم، وده ما بيمنعش إن عرض الموبايل للفيديوهات بيكون ممتاز.

شركة أوبو في إعلانها للموبايل ده بتقول إنه «ملك التصوير السيلفي»، وده لإن الكاميرا السيلفي قوتها ١٣ ميجا بكسل والأهم إن عدستها واسعة وبتسمح بتصوير صور ممتازة مهما كان عدد الأشخاص في الصورة، وكمان بتظهر الصور واضحة ونقية جدًا حتى لو كانت الإضاءة ضعيفة. أما الكاميرا الخلفية فبتيجي بقوة ١٦ ميجا بكسل وتعتبر لقطاتها جيدة جدًا لكن في الإضاءة الضعيفة الصور ما بتكونش بالدقة المطلوبة.

لو هنقارن الموبايل بالموبايلات التانية زي HTC 10 و جلاكسي S7 فأكيد الموديلات دي هتتفوق عليه، ولو هتقارنه بالموديلات المتوسطة زي شاومي Mi5 و OnePlus 2 فهو اللي هيتفوق عليهم. من حيث الأداء، الموبايل هيقوم بالمطلوب منه بشكل ممتاز لكن لو هتحاول تشغل عليه ألعاب الجرافيك بتاعها عالي هتحس بشوية سخونة وممكن تحس إن أداؤه معاك بقى أقل.

موبايل Oppo F1 plus بيشتغل بنظام تشغيل لولي بوب واللي يعتبر قديم في الوقت الحالي بعد انتشار نظام تشغيل مارشميلو والنظام الأحدث نوجا.

بطارية الموبايل أدائها ممتاز وفي الاستخدام الشاق هتكفي معاك لغاية يوم ونص، وكمان الموبايل يدعم خاصية الشحن السريع واللي تقدر تشحن فيه البطارية في ساعة واحدة بس شحنة كاملة.

السعر

شوف موبايل Oppo F1 plus، بسعر يبدأ من ٦٩٩٩ جنيه مصري.

Oppo Neo 7 موبايل

تقييم الموبايل

موبايل أوبو نيو 7 بييجي بشاشة ٥ بوصة ٩٦٠×٥٤٠ بكسل، تصميم بلاستيكي محاط بحواف معدنية، يعمل ببروسيسور رباعي النواة سناب دراجون ٤١٠، رامات ١ جيجا بايت، وذاكرة داخلية ١٦ جيجا بايت وبيدعم كروت ميموري حتى ١٢٨ جيجا بايت، الكاميرا الأمامية للهاتف ٥ ميجا بكسل والخلفية ٨ ميجا بكسل، وبطارية الجهاز ٢٤٢٠ مللي أمبير.

تجربة المُستخدم

يقدم موبايل أوبو نيو 7 شاشة دقة وضوحها ضعيف ومتعب في القراءة، ولكن ألوانها متوازنة وبتقدم زوايا رؤية كويسة تحت أشعة الشمس، وتصميم الموبايل جيد ولكنه تقيل مقارنة بحجم الموبايل. الموبايل بيقدم أداء جيد مع المهام الخفيفة، لكن في المهام المتعددة Multitasking مش هيكون محل إعجاب عندك، وهتحس بسخونته لو حبيت تشغل ألعاب الجرافيك بتاعها عالي شوية.

تجربة التصوير على الموبايل بالكاميرا الخلفية ممتعة، وده بسبب إن فتحة العدسة واسعة فهتلاقي صورك كلها منورة وألوانها أقرب للحقيقية ودي ميزة كويسة في الموبايلات اللي تعتبر من الفئة المتوسطة، والكاميرا الأمامية هتبهرك بدقة ووضوح الصور حتى في ظروف الإضاءة الضعيفة.

سعة التخزين على الموبايل ١٦ جيجا بايت وتعتبر سعة مقبولة ولو حبيت تضيف ذاكرة خارجية ممكن وخصوصًا إن الموبايل بيشيل ميموري خارجي لغاية ١٢٨ جيجا بايت، الميزة الحلوة برضه للموبايل إنه فيه تقنية OTG واللي ممكن تشغلك فلاش ميموري على الموبايل. سعة البطارية تعتبر جيدة وممكن تكفي معاك لغاية يوم كامل من الاستخدام المتوسط.

سعر الموبايل يعتبر مبالغ فيه مقارنة بإمكانياته، خصوصًا إن فيه موبايلات أفضل منه وفي نفس فئته السعرية زي لينوفو فايب P1m.

 السعر

شوف موبايل Oppo Neo 7، بسعر يبدأ من ٢٣٤٨ جنيه مصري.

Oppo A37 موبايل

تقييم الموبايل

شاشة الموبايل ٥ بوصة ١٢٨٠×٧٢٠ بكسل، يعمل ببروسيسور سناب دراجون ٤١٠ رباعي النواة ١٫٢ جيجا هرتز، ورامات ٢ جيجا بايت وذاكرة داخلية ١٦ جيجا بايت، كاميرا خلفية ٨ ميجا بكسل وأمامية ٥ ميجا بكسل، بطارية الموبايل ٢٦٣٠ مللي أمبير.

تجربة المُستخدم

موبايل أوبو إيه 37 تصميمه شيك معدني مريح للاستخدام وتقدر تتحكم فيه وتوصل لكل جزء في الشاشة بإيد واحدة، شاشة الموبايل بتقدم دقة عالية مقارنة بحجمها وسعر الموبايل، ومش هتحس بأي صعوبة في التعامل معاها تحت أشعة الشمس.

الموبايل بيقدم أداء كويس بشكل عام، لكن بيسخن ويهنّج مع الجرافيكس والجيمز وأداء المهام المختلفة في وقت واحد، والموبايل شغال بأندرويد لولي بوب بواجهة ColorOS 3.0، واللي بتوفر اختصارات كتيرة للموبايل من خلال التعامل مع الشاشة بمجموعة إشارات، حتى لو كانت مقفولة، فمثلًا هتفتح الكاميرا بإنك ترسم شكل دايرة على الشاشة، وكمان السيستم بيوفر ميزة Eye Protection لتقليل الإضاءة الزرقاء الخارجة من الشاشة عشان ما ترهقش عينك وانت بتستخدم الموبايل بالليل أو في الضلمة.

بطارية موبايل Oppo A37 تعتبر نقطة قوة بتساعد المُستخدم إنه يستمر في استخدام موبايله بالشكل العادي طوال يوم كامل، وفي نفس الوقت مزودة بتقنية VOOC اللي بتخلي الموبايل يشحن من ٠٪ لـ ٧٠٪ في ٣٠ دقيقة بس.

السعر

شوف موبايل Oppo A37، بسعر يبدأ من ٢٩٧٤ جنيه مصري.

Infinix Zero 4 plus موبايل

تقييم الموبايل

موبايل إنفينكس زيرو 4 بلس بييجي بشاشة ٥٫٩ بوصة مصنوعة من زجاج 2.5D، وبروسيسور Helio X20 بتردد ٢٫١ جيجا هرتز ورامات ٤ جيجا بايت، وذاكرة داخلية ٣٢ جيجا بايت، وكاميرا خلفية ٢٠٫٧ ميجا بكسل، وأمامية ١٣ ميجا بكسل، وبطارية ٤٠٠٠ مللي أمبير.

تجربة المُستخدم

الشاشة بتقدم دقة وضوح مميزة وتعتبر اختيار مثالي لعشاق الألعاب ومشاهدة الفيديوهات، وبتتميز بانحناء انسيابي عند أطرافها وده هيسهل استخدام الشاشة بإيد واحدة، وهي محمية بشكل كبير ضد الخدش والكسر من خلال طبقة الجوريلا جلاس اللي بتغطي شاشتها. 

الموبايل بيشتغل بشكل سريع بنسخة أندرويد مارشميلو وواجهة إنفينكس بتسهل التعامل مع الموبايل. أداء الموبايل سريع وقوي لو حبيت تتعامل مع أكتر من برنامج في وقت واحد ومش هتحس بسخونة لو حبيت تشغل عليه ألعاب الجرافيك بتاعها عالي لإنه بيتميز بكارت رسوميات Mali T-880. لإن الرام بتاعة الموبايل ٤ جيجا بايت ودي سعة كبيرة جدًا مش هتحس بأي بطء أو تقل وانت بتتعامل مع الموبايل بغض النظر عن عدد البرامج اللي هتتعامل معاها وحتى لو في وقت واحد.

التصوير بالكاميرا الأمامية في الإضاءة الجيدة بيقدم صور مميزة وألوانها طبيعية، لكن عند التصوير في الإضاءة الخافتة هتلاقي الصور معتمة شوية، والتصوير الخارجي في ضوء الشمس بيقدم صور جيدة وزاهية. تجربة السيلفي للموبايل زيها زي الكاميرا الخلفية، بتقدم صور مميزة مهما كانت ظروف الإضاءة لكن لو استخدمت الفلاش هتحس إن الصور فيها لمعة زايدة شوية.

بطارية الموبايل بتشتغل لمدة حوالي ١٥ ساعة متواصلة من المكالمات أو ١٠ ساعات متواصلة من تصفح الإنترنت.

السعر

شوف موبايل Infinix Zero 4 plus، بسعر يبدأ من ٥٥٩٩ جنيه مصري.

Infinix Note 3 موبايل

تقييم الموبايل

الموبايل ييقدم شاشة ٦ بوصة بدقة وضوح FHD، وبيشتغل ببروسيسور ميدياتك 6753 بتردد ١٫٣ جيجا هرتز، وبيعمل بنظام تشغيل أنديرويد مارشميلو، بكاميرا خلفية ١٣ ميجا بكسل وأمامية ٥ ميجا بكسل وبطارية ٤٥٠٠ مللي أمبير.

تجربة المُستخدم

نجحت شركة إنفينكس في تطوير سلسلة هواتفها إنفينكس نوت عن طريق ترقية صناعة موبايلاتها الأخيرة من الهيكل البلاستيكي المقوى إلى هيكل معدني لامع أنيق، وده إدى للموبايل إحساس بالتميز والرقي.

بتقدم شاشة موبايل إنفينكس نوت 3 جودة صور مقبولة، ومشاهدة الفيديوهات عالية الجودة هتستمتع بيها على شاشة الموبايل بشكل كويس، لكن للأسف الشاشة مش مغطاة بطبقة تحميها من الخدش والكسر، لكن الشركة بتقدم جوه علبة الموبايل طبقة حماية إضافية للحفاظ على الموبايل.

شاشة الموبايل مريحة للعين عند التعامل معاها لكن هتحتاج ترفع الإضاءة الخاصة بيها لو هتتعامل معاها تحت أشعة الشمس.

الموبايل بيقدم أداء جيد مع المهام الخفيفة، ولكنه في المهام المتعددة Multitasking مش هيكون محل إعجاب عندك، وهتحس بسخونته لو حبيت تشغل ألعاب الجرافيك بتاعها عالي شوية.

الكاميرا هتقدم صور بجودة ممتازة في الإضاءة العادية، لكن في الإضاءة الضعيفة الصور هتكون مش واضحة قوي، وللأسف لو استخدمت الفلاش مش هيحسن من نتيجة الصور كتير.

فيه ملحوظة صغيرة يا ريت تاخد بالك منها وانت بتصور، كاميرا الموبايل ما بتدعمش خاصية ثبات الصور التلقائي ولازم تثبت إيدك كويس جدًا وانت بتصور لأن أي حركة بسيطة هتخلّي الصور مهزوزة.

بتقدم البطارية مستوى شحن سريع يصل إلى ساعة و٤٥ دقيقة للوصول من ٠٪ إلى ١٠٠٪ شحن البطارية، وبتوفر ١٠ ساعات من تصفح الإنترنت عن طريق شبكات الواي فاي أو الـ 3G.

السعر

شوف موبايل Infinix Note 3، بسعر يبدأ من ٢٩٢٩ جنيه مصري.

Infinix Hot S موبايل

تقييم الموبايل

موبايل إنفينكس هوت إس بيقدم شاشه ٥٫٢ بوصة، ومعالج ثماني النواة ١٫٣ جيجا هرتز، ورامات ٢ جيجا بايت، وذاكرة داخلية ١٦ جيجا بايت، كاميرا خلفية ١٣ ميجا بيكسل وكاميرا أمامية ٨ ميجا بكسل، والبطارية ٣٠٠٠ مللي أمبير ونظام التشغيل أندرويد مارشميلو.

تجربة المُستخدم

موبايل إنفينكس هوت إس X521 بييجي بتصميم أنيق ومتوازن وغير قابل للفك، والواجهة الأمامية للموبايل وجوانبه من المعدن اللامع، والجزء الخلفي منه بنقوش بسيطة تسهل السيطرة عليه والتحكم في استعماله حتى لو بإيد واحدة.

الموبايل يعمل بشكل جيد في ٩٠٪ من الوقت، لكن أحيانًا بيتوقف الموبايل فجأة عن العمل مصابًا بنوع من “التهنيج” ويضطر المُستخدم إنه يقفل الموبايل ويفتحه مرة تانية علشان يخلص من التهنيج ده.

أداء الجهاز مخذل مع الألعاب الثقيلة والفيديوهات ذات الرسوميات المتطورة، وكمان الموبايل بيسخن لو هتشغل عليه ألعاب تقيلة ومش هتكون مرتاح بسبب التهنيج بسبب بعض أنواع الألعاب.

تجربة التصوير بتخرّج الصور حادة الألوان، والتصوير في الإضاءة الليلية بيقدم جودة مقبولة بتوزيع الضوء بشكل جيد، سواء في الإضاءة المباشرة المرتفعة أو الخافتة، بحيث تخرج الصور واضحة التفاصيل ومتوازنة الإضاءة.

الكاميرا الأمامية ٨ ميجا بكسل بتقدم صور سيلفي جيدة، بالإضافة لوجود فلاش شاشة Retina Flash بيخلي الصور مضيئة بشكل مميز، حتى في الإضاءة الخافتة. في بعض اللقطات وخاصة في الصور إللي إضائتها بتكون قوية هتحس إن الألوان متشبعة over saturated بشكل مبالغ فيه.

تقدم البطارية من ٣ إلى ٤ ساعات عند تشغيل شبكة الإنترنت عبر الـ 3G وتشغيل الشاشة بشكل متوصل Screen-on time.

السعر

شوف موبايل Infinix Hot S، بسعر يبدأ من ٢٧٥٠ جنيه مصري.

Tecno Camon C9 موبايل

تقييم الموبايل

موبايل تكنو كامون سي 9 شاشته ٥٫٥ بوصة بدقة ١٩٢٠×١٠٨٠ بكسل بسطوع ٤٠٠ نقطة ضوئية ومعالج ثماني النواة ١٫٣ جيجا هرتز ورامات ٢ جيجا بايت وسعة الذاكرة الداخلية ١٦ جيجا بايت إلى جانب كاميرا خلفية ١٣ ميجا بكسل وكاميرا أمامية ١٣ ميجا بكسل وبطارية ٣٠٠٠ مللي أمبير يعمل بنظام التشغيل أندرويد مارشميلو.

تجربة المُستخدم

شاشة الموبايل جيدة ودقة وضوحها وسطوعها ممتازين بزوايا رؤية مميزة تحت أشعة الشمس، وأداء الموبايل جيد مع الرسوميات المتطورة وكمان أداء المهام والوظايف المتعددة في نفس الوقت.

تجربة التصوير تعتبر مميزة من حيث دقة الكاميرتين ولكن اتساع عدستي الكاميرتين الأمامية والخلفية لا تقدم إضاءة كافية للصور وده بيخلي الصور معتمة وتخرج غير واضحة.

مقارنة بأداء الموبايل وحجم الشاشة، تقدم بطارية موبايل تكنو كامون سي 9 أداء مميز بيكفي ليساعدك على العمل ليوم كامل.

السعر

شوف موبايل Tecno Camon C9، بسعر يبدأ من ٢٧٦٠ جنيه مصري.

Tecno Boom J8 موبايل

تقييم الموبايل

شاشة الموبايل ٥٫٥ بوصة ومعالج ثماني النواة ١٫٣ جيجا هرتز ورامات ٢ جيجا بايت والذاكرة الداخلية ١٦ جيجا بايت إلى جانب الكاميرا الخلفية ١٣ ميجا بكسل والكاميرا الأمامية ٥ ميجا بكسل والبطارية ٣٠٠٠ مللي أمبير ويعمل بنظام التشغيل أندرويد مارشميلو.

تجربة المُستخدم

موبايل تكنو بووم J8 يعتبر اختيار مناسب لعشاق التصوير، لكن هيحتاجوا لزيادة ذاكرة الموبايل بكارت ميموري بسبب انخفاض سعة ذاكرة الموبايل، لإن سعتها ١٦ جيجا بايت فقط، ولو كنت من عشاق الألعاب فالموبايل ده ما يعتبرش اختيار مناسب ليك لإن دقة عرض الشاشة للألعاب مش بالقوة المطلوبة، أما على مستوى المُستخدمين العمليين واللي مش بيحتاجوا يلعبوا كتير أو يصوروا صور ليهم ولأصحابهم فهيكون اختيار كويس جدًا بسبب بطاريته اللي بتكفي يوم ونص أو يومين من الاستعمال العادي.

السعر

شوف موبايل Tecno Boom J8، بسعر يبدأ من ٢٥٩٩ جنيه مصري.

Tecno Phantom 6 plus موبايل

تقييم الموبايل

موبايل تكنو فانتوم 6 بلس يأتي بشاشة ٦ بوصة بدقة ١٩٢٠×١٠٨٠ بكسل بكثافة توزيع ٣٧٠ بكسل في البوصة، ومغطاة بطبقة زجاج من جوريلا جلاس 3، والموبايل يعمل ببروسيسور Helio x20 عشاري النواة، ورامات ٢ جيجا بايت، وذاكرة داخلية ٦٤ جيجا بايت، والكاميرا الخلفية ٢١ ميجا بكسل والأمامية ٨ ميجا بكسل، وبطارية الموبايل ٤٠٥٠ مللي أمبير.

تجربة المُستخدم

شاشة الموبايل تعتبر من مميزاته المهمة، لإنها بتسمح للمُستخدم بالقراءة بشكل مريح جدًا للعين وكمان لو انت من محبي عرض الفيديوهات هتلاقي فيها اللي انت محتاجه بسبب وضوح ألوانها ونقاء الصور المعروضة.

الموبايل بيقدم واجهة استخدام HiOS واللي بتقدم مميزات وأدوات كتيرة ممكن من خلالها تتعامل مع الموبايل بشكل سهل وبسيط وخصوصًا إنه بيشتغل بنظام تشغيل أندرويد مارشميلو.

أداء الموبايل مميز مع المهام السريعة والفيديوهات ذات الرسوميات لكنه بيسخن شوية مع الشغل كتير وممكن تحس إنه بقى بطيء.

تجربة التصوير مش ممتعة قوي بسبب ضيق عدسات الكاميرتين، لكن الموبايل بيقدم الأداء المطلوب منه مقارنة بحجم البكسلات وإن كنا نتمنى منه أداء وصور أحسن من كده وفي الحقيقة صوره مقبولة بنسبة كبيرة جدًا.

بطارية الموبايل من أهم مميزاته لإن سعتها كبيرة جدًا وفيها خاصية الـ Doze واللي بتساعدك كمُستخدم إنك تتعامل مع الموبايل ليوم كامل من غير ما تشحنه.

السعر

شوف موبايل Tecno Phantom 6 plus، بسعر يبدأ من ٥٧٥٠ جنيه مصري.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.