كتب: محمد عبد الرحمن

«عاوزين ناخد سيلفي»..

الجملة اللي فاتت دي من أكتر الجمل اللي بنسمعها يوميًا في أي مكان بنروحه أو بنكون فيه، ولإن السيلفي بقى موضة العصر في الموبايلات، بنلاقي كتير من الشركات بتهتم بيه وبتركز كتير إنها تعلّي من قوة وكفاءة الكاميرا بتاعته وفيه كتير من الشركات بتخلي تركيزها أكتر على سيلفي الموبايل بتاعها.

لكن ومع التطور ده ومهما كانت قوة الكاميرا السيلفي هيفضل غياب الفلاش فيها نقطة ضعف قوية ومن الصعب نتغاضى عنها، وعلشان كده ياقوطة هتعرض عليك في المقال ده مجموعة من الموبايلات اللي بتتميز بكاميرا سيلفي مميزة وكمان مزودة بفلاش علشان تصور في الضلمة براحتك وتتباهى بصورك وسط أصحابك وطبعًا تحتفظ بلحظاتك الجميلة مع الأهل والأصحاب.

عن طريق ياقوطة تقدر تعرف أفضل الأسعار للموبايلات دي وتقدر كمان تطلبهم ويكونوا عند بيتك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*ممكن تشوف مواصفات الموبايلات بالتفصيل من mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

١- موبايل Sony Xperia XA Ultra

المميزات

• شاشة الموبايل حجمها كبير ٦ بوصة، بدقة وضوح FHD، وكثافة بكسلات ١٠٨٠×١٩٢٠ وحجم بكسلات ٣٦٧ بكسل.
• رامات الموبايل بحجم ٣ جيجا وبروسيسور ثماني النواة، وميموري داخلي ١٦ جيجابايت وممكن تضيف ميموري لغاية ٢٥٦ جيجابايت.
• كاميرا الموبايل الخلفية بدقة ٢١ ميجابكسل بفلاش LED، وسيلفي بقوة ١٦ ميجابكسل وفلاش LED.
• الموبايل مزود بميكروفون إضافي مانع للضجيج، راديو FM ومُستشعر للبوصلة.
• الموبايل بيدعم تقنية الاتصال للجيل الرابع ويدعم تشغيل خطين اتصال.

العيوب

• الموبايل مش مقاوم للمياه ولا الأتربة.
• الموبايل مش بيدعم تقنية الجيروسكوب ولا الـ OTG ولا الـ NFC، ومش بيتيح تقنية بصمة الإصبع.
• شاشة الموبايل من الممكن كسرها لإنها مش مزودة بطبقة حماية إضافية ضد الكسر.
• الشاشة بتدعم لغاية أربع أصابع لمسية بس ودي سعة قليلة.
• بطارية الموبايل مش بتدعم تقنية الشحن السريع وسعتها قليلة وسط المنافسين.
• وزن الموبايل تقيل شوية ٢٠٢ جرام.

تجربة المُستخدم

• شاشة الموبايل حجمها مناسب جدًا لهواة مشاهدة الأفلام والقراءة خصوصًا إنها قريبة من التابلت في الحجم وبفضل تصميم الجوانب المميز من سوني المُستخدم هيحس إن الشاشة حجمها ٥٫٥ بوصة.
• زوايا الرؤية والوضوح والسطوع مقبولين جدًا في ظروف الإضاءة المختلفة.
• زراير التنقل جوه الموبايل جزء من الشاشة وده بيدي انطباع للمُستخدم إنها أقل من ٦ بوصة، وكمان من السهل إنك تغير وتتحكم في أشكالها.
• أداء الموبايل ممتاز في المهمات المتوسطة والخفيفة زي تصفح الإنترنت وإرسال واستقبال الرسايل والانتقال بين التطبيقات المختلفة، لكن في الألعاب والمهمات التقيلة أداء الموبايل بيقضي الغرض لكنه مش الأقوي خالص.
• واجهة الموبايل اتحسنت من سوني وسخونة الموبايل قلت عن الإصدارات اللي قبله.
• ما تقدرش تحمي ملفاتك وبياناتك المهمة إلا عن طريق تحميل برامج حماية إضافية من على جوجل بلاي، وحماية الموبايل ككل بتكون عن طريق نقش على الشاشة أو كود ودي طرق حماية تقريبًا مفيش حد بيستخدمها مؤخرًا.
• كاميرا الموبايل السيلفي أداءها مميز جدًا وده بفضل الـ ١٦ ميجابكسل والفلاش الأمامية واللي هيطلع صورك السيلفي منورة حتى في ظروف الإضاءة الضعيفة، وفي ظروف الحركة المفاجئة للإيد بفضل تقنية الـ IOS.
• أداء الكاميرا الخلفية مميز جدًا وتقدر تاخد صورك بسرعة كبيرة ومع أوضاع الكاميرا المختلفة من سوني هتحس إنك مصور محترف، لكن عيبها إنك لازم تثبت إيدك كويس وانت بتلتقط الصور لإنها مش بتوفر ميزة المثبت البصري IOS زي السيلفي.
• بسبب حجم الميموري الداخلي ١٦ جيجابايت وحجم صور الموبايل الكبير، المُستخدم هيواجه مشاكل امتلاء الذاكرة في وقت سريع وهيضطر يزود ميموري خارجية وده ممكن يسبب مشاكل بسيطة لإن فيه برامج مش بتقبل تتنقل على الميموري الخارجي فكان الأفضل تزيد مساحة الميموري الداخلي (خصوصًا إن المساحة اللي بتتبقى للمُستخدم ١٠ جيجابايت بس).
• بطارية الموبايل فيها اكتر من وضع للحماية والتطويل من عمرها ورغم كده فهي بتكفي لغاية يوم ونص بالكتير مع الاستعمال المتوسط.
• وزن الموبايل تقيل شوية ومن الصعب إنه يتشال في الجيب وهيحتاج مكان واسع شوية.
• زرار الباور للموبايل بيسبب ألم للمُستخدم مع الاستعمال المتكرر وبصورة يومية.

شوف موبايل Sony Xperia XA Ultra من هنا.

٢- موبايل Asus ZenFone Selfie

المميزات

• شاشة الموبايل بتيجي بحجم مناسب ٥٫٥ بوصة، وكثافة بكسلات ١٠٨٠×١٩٢٠ وحجم بكسلات ٤٠٣ بكسل، ومزودة بطبقة حماية Corning Gorilla Glass 4.
• رامات الموبايل بحجم ٣/٢ جيجا وبروسيسور Qualcomm Snapdragon 615 ثماني النواة، ومعالج رسومي Adreno 405 وميموري داخلي ٣٢/١٦ جيجابايت، وممكن تضيف ميموري لغاية ٢٥٦ جيجابايت.
• كاميرا السيلفي للموبايل بتيجي بدقة ١٣ ميجابكسل، فتحة عدسة 2 وفلاش LED، وكاميرا خلفية بقوة ١٣ ميجابكسل وفتحة عدسة F2.0 وتقنية ثبات ليزري مع فلاش مزدوج LED.
• الموبايل بيدعم تشغيل راديو FM، تقنية الجيروسكوب والـ OTG.
• تقدر تشغل على الموبايل شريحتين اتصال وميموري خارجي من غير ما تستغنى عن شريحة الاتصال.
• واجهة أسوس بتستجيب بشكل سريع للأوامر الصوتية في برنامج جوجل.
• بطارية الموبايل سعتها مقبولة وكمان من السهل تغييرها بنفسك.

العيوب

• الموبايل مش بيدعم تقنية الـ NFC ولا تقنية بصمة الإصبع.
• صوت سماعة المكالمات ضعيف شوية.
• كاميرا الموبايل مش بتصور فيديو بدقة 4K.

تجربة المُستخدم

• شاشة الموبايل دقتها وألوانها وزوايا الرؤية والوضوح مقبولين في الإضاءة الداخلية، لكن الإضاءة الخارجية السطوع ما كانش كويس قوي.
• مكان زراير التحكم في صوت الموبايل موجودة تحت الكاميرا الخلفية واللي يعتبر مكان مش معتاد نهائي للمُستخدمين وهتلاقي صعوبة في التعود عليهم في البداية.
• نفس المشكلة دي هنلاقيها مع زرار الباور واللي موجود فوق الشاشة وده مكان مش معتاد عليه نهائيًا، وكمان هيسبب صعوبة في الوصول ليه مع حجم الشاشة. أسوس ريحت المُستخدم ووفرت ليه ميزة الضغط على الشاشة مرتين للفتح والقفل وده هيحل المشكلة بتاعة مكان الزرار مؤقتًا.
• مكان سماعة الموبايل في الجزء الخلفي لضهر الموبايل ورغم كده فالصوت هيكون مسموع وده بسبب التقوس الموجود في ضهر الموبايل.
• تصميم الموبايل رفيع شوية وفيه كرف بسيط فيه من المنتصف ومع حجم الشاشة هتلاقي التعامل مع الموبايل لمدة طويلة مريح بشكل كافي.
• زراير التحكم في الموبايل موجودة بره الشاشة ومضيئة ومن السهل عىل المُستخدم التعامل معاهم.
• أداء الموبايل في المهمات والظايف اليومية المتعددة محتاج تعديل وتحسين شوية من أسوب خصوصًا إن المستخجم هيحس إنه بيؤدي الوظايف دي بصعوبة شوية وده بسبب الواجهة واللي بتحتاج تحسينات تسهل على المُستخدم التعامل والوصول للي هو عاوزه.
• أداء الجهاز في الألعاب بجرافيك قليل ومتوسط بيكون طبيعيى ومقبلو جدًا والألعاب اللي جرافيك بتاعها عالي بيعرضها بجرافيك قليل شوية علشان تلاقي سلاسة فيها لكن الألعاب الضخمة هتقابل مشاكل بطء وده طبيعي في سعر الموبايل.
• أداء سيلفي الموبايل مرضي جدًا حتى في الإضاءة الضعسفة وده بسبب الفلاش، أما الكاميرا الخلفية للموبايل فأداءها مرضي في الإضاءة القوية والنهارية ولو الإضاءة قلت هنلاحظ Noise في الصور، وتقدر تاخد من خلالها صور بسرعة كبيرة جدًا.
• ميزة تاني للمُستخدم وهي إن الكاميرا تقدر من خلالها تاخد صور بدقة بكسلات ٥٢ ميجابكسل، وعيبها إن الصورة دي بتاخد وثت طويل شوية علشان تشوفها (١١ ثانية).
• أداء البطارية مميز وبتكمل لغاية ٦ ساعات وضع تشغيل شاشة مستمر، وبتتشحن في ساعتين ونص.
• أسوس زودت الموبايل ببرامج كتيرة جدًا المُستخدم مش هيحتاج ليها وبتاخد مساحة ودي حاجة مش كويسة.

شوف موبايل Asus ZenFone Selfie من هنا.

٣- موبايل Tecno Camon CX

المميزات

• شاشة IPS بحجم ٥٫٥ بوصة بدقة وضوح FHD وكثافة بكسلات عالية ٤٠٤ ودقة وضوح ١٩٢٠×١٠٨٠ بكسل.
• الموبايل بييجي بروسيسور ثماني النواة من نوع MediaTek MT6750T بتردد ١٫٥ جيجاهرتز، وممكن تضيف ميموري خارجي لغاية ١٢٨ جيجابايت.
• الموبايل بيدعم تشغيل راديو FM، الـ OTG، تقنية بصمة الإصبع والجيروسكوب.
• ممكن تشغل على الموبايل خطين اتصال وميموري خارجي في نفس الوقت.
• كاميرا خلفية بقوة ١٦ ميجابكسل بفتحة عدسة واسعة مع فلاش رباعي، وسيلفي بدقة ١٦ ميجابكسل بفتحة عدسة واسعة مع فلاش ثنائي.

العيوب

• رام الموبايل ٢ جيجابايت بس، والميموري الداخلي ١٦ جيجابايت.
• طبقة حماية الموبايل ضد الكسر والشرخ مش الأفضل في السوق.
• الموبايل مش بيتيح ميكروفون إضافي مانع للضجيج.
• بطارية الموبايل ما تقدرش تغيرها بنفسك ولازم تروح بيها التوكيل.

تجربة المُستخدم

• أداء شاشة الموبايل مقبول في ظروف الإضاءة المختلفة، مش الأفضل لكن الرؤية فيها واضحة.
• الموبايل بييجي معاه اسكرينة ملزوقة على الشاشة للحماية فمش هتحتاج تشتري واحدة وتركبها.
• تكنو بتقدم ضمان مجاني على الشاشة في حالة الكسر (أول ٣ شهور بس).
• تكنو ميزت زرار الباور عن زرارين التحكم في الصوت لسهولة التفرقة بينهم.
• أداء بصمة الموبايل مقبول جدًا وتقدر عن طريقها تفتح الكاميرا وتأمن برامجك وصورك الخاصة، لكن مشكلته للمُستخدم إنه صعب التفرقة بينه وبين جسم الموبايل الخارجي لإن مفيش أي بروز بين البصمة وجسم الموبايل.
• أداء الموبايل في المهام اليومية والتنقل بين البرامج بيكون سلس وسريع ومش هتحس بأي تقل من خلاله، وأداء الموبايل في الألعاب مقبول لكن لو كنت من هواة الألعاب اللي الجرافيك بتاعها عالي فالموبايل مش هيكون ممتع قوي ليك.
• فيه إضافات مريحة للمُستخدم زي إنه يقدر يرسم حرف الـ C على الشاشة فتفتح الكاميرا، وكمان تقدر تنسخ أكتر من برنامج تواصل اجتماعي عندك على الموبايل بحساب ورقم موبايل مختلف زي واتساب وفيسبوك.
• سيلفي الموبايل مميز في الموبايل وبيخرج صور جميلة ومش هتقابلك مشاكل في الإضاءة الليلية بسبب الفلاش، ولا مع عدد أصحابك الكبير لإن عدسة الكاميرا واسعة.
• الكاميرا الخلفية صورها حلوة لكن ما تهزش إيدك وانت بتصور علشان الكاميرا مش موجود فيها مثبت بصري ضد الاهتزاز.
• أداء بطارية الموبايل معقول ومش بتوازي سعة الأكبير الخاص بيها وبتتشحن شحنة كاملة في ساعتين بس وده وقت مناسب جدًا.

شوف موبايل Tecno Camon CX من هنا.

٤- موبايل Infinix Zero 4

المميزات

• شاشة بحجم مميز ودقة وضوح IPS وكثافة بكسلات ١٩٢٠×١٠٨٠.
• شاشة الموبايل مزودة بطبقة حماية ضد الكسر.
• بطارية الموبايل بتدعم تقنية الشحن السريع.
• قارئ بصمة مميز وسريع.
• معالج ثماني النواة من نوع Mediatek MT6753، مع رام ٣ جيجا وذاكرة داخلية بحجم ٣٢ جيجابايت.
• الموبايل بيدعم تشغيل خطين اتصال وذاكرة خارجية.
• كاميرا خلفية بدقة ١٦ ميجابكسل بمثبت بصري وفلاش مزودج LED، وكاميرا سيلفي بدقة مميزة ٨ ميجابكسل بفلاش أحادي.
• الموبايل بيدعم تقنية الجيروسكوب والـ OTG.
• الموبايل مزود بتقنية بصمة الإصبع.

العيوب

• للأسف أداء البروسيسور مش بالقوة ولا الكفاءة المعتادة من شركة إنفينكس.
• سهولة خدش الكاميرا الخلفية للموبايل بسبب بروزها.

تجربة المُستخدم

• تصميم الموبايل وسمكه القليل بيساعدك في التحكم فيه بإيد واحدة.
• مش هتقدر تشيل الموبايل على أي سطح مش نضيف أو خشن بسبب بروز الكاميرا الخلفية واللي سهل جدًا خدشها.
• زراير التحكم في الصوت والباور منعزلين وفيه خشونة بسيطة لزرار الباور لسهولة التفرقة بينه وبين زراير الصوت.
• أداء الكاميرا حلو قوي في الإضاءة الخارجية ومش بنفس الوضوح في الإضاءة الليلة أو الضعيفة وهتلاقي Noise في الصور.
• أداء البروسيسور معقول للمهام والوظايف اليومية وبس لكن ما يتحملش شغل تقيل منك ولا ممارسة ألعاب تقيلة.
• أزرار التحكم في الموبايل عبارة عن نقط صغيرة مضيئة واللي زودت الشكل الجمالي للموبايل.
• بصمة الموبايل بتشتغل باللمس وتقدر منها ترد على المكالمات وتتنقل بين صور الموبايل المختلفة.
• الموبايل بيدعم تقنية الشحن السريع وبيشحن البطارية شحنة كاملة في ٩٠ دقيقة بس وده معدل ممتاز لو افتكرنا سعة البطارية (٣٢٠٠ مللي أمبير).

شوف موبايل Infinix Zero 4 من هنا.

٥- موبايل Huawei Mate S

المميزات

• شاشة الموبايل بحجم مناسب للقراءة والتصفح ٥٫٥ بوصة بكثافة بكسلات ١٩٢٠×١٠٨٠ بكسل، وكمان مزودة بطبقة حماية إضافية ضد الكسر Corning Gorilla Glass 4.
• بروسيسور الموبايل ثماني النواة HiSilicon Kirin 935 ومعالج رسومي Mali-T628 MP4 ورامات بسعة ٣ جيجابايت وميموري داخلي بسعة ١٢٨/٦٤/٣٢ جيجابايت، وممكن تضيف ليه ميموري خارجي بسعة توصل لـ ٢٥٦ جيجابايت.
• الموبايل فيه مُستشعر بصمة الإصبع، وبيدعم تشغيل راديو FM، الجيروسكوب، الـ NFC وبيدعم تقنية الاتصال للجيل الرابع.
• كاميرا الموبايل الخلفية بقوة ١٣ ميجابكسل ومزودة بتقنية التركيز التلقائي، وسيلفي الموبايل بقوة ٨ ميجابكسل ومزود بفلاش.
• الموبايل مزود بميكروفون إضافي مانع للضجيج.

العيوب

• ما تقدرش تشغل على الموبايل شريحتين اتصال في نفس الوقت.
• سعة بطارية الموبايل قليلة شوية ٢٧٠٠ مللي أمبير، ومش بتدعم تقنية الشحن السريع، وما تقدرش تغيرها بنفسك.

تجربة المستخدم

• شاشة الموبايل مناسبة للقراءة والتصفح والقراءة، ومن السهل الوصول لكل أجزاءها بإيد واحدة، ولو كنت من الناس اللي بتستعمل موبايلها في الإضاءة الخارجية كتير فزوايا الرؤية والوضوح ليه مناسبين.
• تصميم الموبايل من المعدن بيزود من الشكل الجمالي ليه.
• الموبايل بييجي معاه كوفر بيحمي جوانبه بشكل كويس ومش بيمنع رؤية الأسماء والأرقام وقت الاتصال.
• أداء الموبايل مريح وسهل في التعامل مع البرامج المختلفة زي التواصل الاجتماعي وإجراء المكالمات وكمان التنقل بين أكتر من برنامج، ولو كنت من هواة الألعاب فالموبايل هيقدم تجربة مرضية بنسبة كبيرة ليك، لكن الجرافيك مش هيكون بالجمال اللي هتلاقيه لنفس الألعاب على موبايلات تانية، وكمان الألعاب اللي الجرافيك بتاعها عالي مش هتستمع خالص بيها وهتضر تقلل الجرافيك بتاعها ورغم كده فالموبايل مش بيسخن تقريبًا.
• واجهة هواوي بتوفر ليك فتح برامج معينة عن طريق رسم أول حرف منها، وعن طريق النقر مرتين تقدر تاخد Screen Shot للشاشة.
• بطارية الموبايل أداءها مش الأفضل وبتكمل معاك لغاية يوم كامل في الاستخدام المتوسط، ولو استخدامك مُكثف فالموبايل مش هيكمل معاك اليوم.
• بطارية الموبايل بتاخد ساعتين وربع تقريبًا علشان تتشحن شحنة كاملة ودي مدة كبيرة لو هنقارن الوقت ده بسعة البطارية واللي أقل من ٣٠٠٠ مللي أمبير.
• كاميرا الموبايل الخلفية أداءها مش الأفضل وسط المنافسين، صورها مقبولة جدًا في الإضاءة الخارجية وفي إضاءة البيت، أما لو الإضاءة قلت فهنلاحظ بكسلات وتشويش في أطراف الصور.
• وضع التصوير الاحترافي واللي يعتبر جديد لهواوي، فتقدر من خلاله تعلي من كفاءة الصور، وعن طريق زر الصوت تقدر تفتح الكاميرا.
• لو فتحت كاميرا الموبايل وأخدت صورة بسرعة فالنتيجة مش هتكون الأفضل ولازم تستنى لحظات قليلة لغاية ما تاخد صورك.
• سيلفي الموبايل أداءها مقبول ومع وجود فلاش أمامي (أحادي) هتلاقي صورك في الإضاءة الضعيفة مقبولة لكن مش بنفس قوة الفلاش الخلفي.
• أداء بصمة الموبايل سريع وممزي وتقدر من خلالها تحمي برامجك المُختلفة.

شوف موبايل Huawei Mate S من هنا.

٦- موبايل (Samsung Galaxy J5 (2016

المميزات

• شاشة الموبايل بحجم ٥٫٢ بوصة، وكثافة بكسلات ١٢٨٠×٧٢٠ بكسل، وحجم بكسلات ٢٨٢ بكسل، تقنية Super Amoled.
• كاميرا الموبايل الخلفية بدقة ١٣ ميجابكسل بفتحة عدسة F 1.9، وسيلفي الموبايل بقوة ٥ ميجابكسل بفتحة عدسة F 1.9 ومزود بفلاش LED للكاميرتين.
• الموبايل بيدعم تشغيل راديو FM، وفيه ميكروفون إضافي مانع للضجيج، وممكن تضيف ليه ميموري خارجي لغاية ٢٥٦ جيجابايت وبيدعم تقنية الاتصال للجيل الرابع 4G.
• بطارية قوية بسعة ٣١٠٠ مللي أمبير.

العيوب

• بروسيسور رباعي النواة، ورام ٢ جيجابايت، مع ميموري داخلي بسعة ١٦ جيجابايت تعتبر قليلة.
• شاشة الموبايل مش مزودة بطبقة حماية إضافية ضد الكسر.
• الموبايل مش بيدعم تقنية الـ OTG ولا الجيروسكوب، وكمان مش بيدعم تقنية بصمة الإصبع.

تجربة المُستخدم

• شاشة الموبايل حجمها مقبول، لكن ألوانها مش الأفضل وزوايا الرؤية والوضح مش الأفضل وسط المنافسين وهتحتاج ترفع درجة سطوع وتباين الشاشة علشان تشوف كويس في ضوء الشمس.
• حجم الموبايل مناسب جدًا للاستعمال بإيد واحدة ومهما كان وقت استعمالك للموبايل فمش هتحس بأي تقل ليه.
• أداء الموبايل مقبول للمُستخدم اللي مش بيحتاج من الموبايل أكتر من التصفح ومتابعة مواقع وصفحات التواصل الاجتماعي. هنلاقي عن التنقل بين البرامج والتطبيقات المختلفة بيتم بشكل كويس، الألعاب الخفيفة والمتوسطة الجرافيك بتاعها مرضي، لكن هيكون فيه تقل نسبي مع الألعاب اللي الجرافيك بتاعها عالي، ولإن مساحة الرامات ٢ جيجا فهيكون فيه ألعاب مش هتشتغل عليه.
• كاميرا الموبايل مميزة وهترضي المستخدم، لكن لو عرض الصور على موبايل تاني أو شاشة كمبيوتر أو لاب توب هيلاقي صوره منورة أكتر، ومع الفلاش هتكون النتيجة صور ليلية أفضل من المنافسين لكن مش بكتير وهنلاحظ Noise بسيط فيها.
• التعامل مع برنامج الكاميرا مش بيقدم أي جديد من سامسونج والتعامل معاه سهل ومن أول مرة.
• سيلفي الموبايل بيقدم صور مرضية ومش هتلاقي أي صعوبة من التقاط صور مميزة في الإضاءة الضعيفة بسبب الفلاش وفتحة العدسة الضيقة.
• بطارية الموبايل بتقدم أداء ممتاز وبتقعد مع الاستخدام المتوسط لأكتر من يوم كامل.
• تقدر تحمي الموبايل عن طريق النقش أو كلمة مرور من أحرف وأرقام بس.

شوف موبايل (Samsung Galaxy J5 (2016 من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.