كتب: محمد عبد الرحمن

ارتفاع وتغير أسعار الموبايلات كل يوم خلّى ناس كتيرة تحس إن الحصول على موبايل بإمكانيات وسعر كويسين شيء صعب جدًا. وبقى طبيعي إن كتير مننا يسمع جملة «عاوز موبايل حلو هتدفع سعر غالي».

ولإننا في ياقوطة ما يرضيناش تعب وحيرة المشتري، جمعنا لكم في المقال ده أهم موبايلات بتبدأ من سعر ٣٠٠٠ جنيه لغاية ٤٠٠٠ جنيه وفيها مميزات كتيرة توازي أسعارهم، بالإضافة لأهم مميزات وعيوب وتجارب مستخدمي الموبايلات دي، ولو عجبك موديل منهم تقدر تعرف أحسن الأسعار ليه من خلال ياقوطة، وممكن كمان تطلبه ويكون عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*ممكن تشوف مواصفات الموبايلات بالتفصيل من mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

١- موبايل Motorola Moto G4 Plus

المميزات

• شاشة بحجم ٥٫٥ بوصة بدقة بكسلات ١٩٢٠×١٠٨٠ بكسل، وكثافة بكسلات ٤٠١ بكسل، ومزودة بطبقة حماية ضد الكسر Corning Gorilla Glass 3.
• بروسيسور الموبايل ثماني النواة Qualcomm Snapdragon 617 ورامات بسعات ٢، ٣ و٤ جيجا رام، وميموري داخلي بسعات ١٦، ٣٢ و٦٤ جيجابايت، وممكن تضيف ميموري خارجي بسعة توصل لـ ٢٥٦ جيجابايت.
• كاميرا الموبايل بقوة ١٦ ميجابكسل بفتحة عدسة 0 وفلاش LED، وسيلفي بقوة ٥ ميجابكسل بفتحة عدسة f2.2.
• الموبايل بيدعم تشغيل راديو FM، وتشغيل شريحتين اتصال، وبصمة للإصبع، وفيه ميكروفون إضافي مانع للضجيج، وكمان بيدعم تقنية الاتصل للجيل الرابع.
• بطارية الموبايل بسعة ٣٠٠٠ مللي أمبير، وبتدعم تقنية الشحن السريع.

العيوب

• ما تقدرش تشغل على الموبايل شريحتين اتصال في نفس الوقت وهتستغنى عن واحدة فيهم مقابل إضافة ميموري خارجي.
• الموبايل مش مزود بتقنية الـ NFC.
• سيلفي الموبايل بقوة ٥ ميجابكسل بس.
• الموبايل مش مقاوم للمياه على عكس الأخ الأصغر له Moto G3.
• ما تقدرش تغير البطارية بنفسك وهتحتاج تروح بيها التوكيل.

تجربة المستخدم

• شاشة الموبايل بحجم مناسب لهواة القراءة وتصفح الإنترنت، وزوايا الرؤية والوضوح مناسبين في ظروف الإضاءة المختلفة.
• حجم الموبايل وأبعاده مناسبين للاستعمال بإيد واحدة مدة طويلة، وتقدر بإيد واحدة تتحكم في الموبايل وتوصل لكل أجزاء الشاشة بسهولة.
• صوت سماعات الموبايل مش من السهل إنه يتكتم وسهل تسمعه في الأماكن الزحمة لإنها موجودة تحت شاشة الموبايل.
• زرار الباور مصمم بشكل مستقل عن زراير التحكم في الصوت لسهولة التحكم والتفرقة بينهم.
• أداء الموبايل مقبول في فتح وتحميل والتنقل بين أكتر من برنامج في نفس الوقت، ومش هتحس ببطء مع استعمال الموبايل مدة طويلة، ولو كنت من هواة الألعاب فالموبايل اختيار يقضي الغرض منه مش أكتر من كده، فلو كنت من مدمني الألعاب ومتابعة الجديد الموبايل مش هيكون في قايمة اختياراتك.
• بصمة الموبايل أداءها كويس، وممكن من خلالها تحمي برامجك المختلفة وصورك الخاصة.
• كاميرا الموبايل من أهم الحاجات اللي بتشد المستخدم، وصورها مميزة في الإضاءة العالية والداخلية زي البيت والمكتب، صور الكاميرا في الإضاءة الضعفية ومع وجود الفلاش مش هتكون الأفضل وده بسبب ضيق فتحة العدسة.
• استخدام برنامج كاميرا الموبايل بسيط وهتتعود عليه من أول مرة، وجود ميزة الفلاتر هيوفر عليك تحمل برامج اللعب في الألوان الخاصة بكل صورة.
• سيلفي الموبايل مش كويس غير في الإضاءة العالية وصوره هيكون فيها بكسلات بسيطة، لكن في الإضاءة المنخفضة الصور هتكون مبكسلة بشكل واضح.
• بفضل تقنية الشحن السريع للبطارية تقدر تشحن الموبايل شحنة كاملة في ساعة تقريبًا وده معدل مميز.

شوف موبايل Motorola Moto G4 Plus من هنا.

٢- موبايل Huawei Gr 3 2017

المميزات

• شاشة بحجم ٥٫٢ بوصة ودقة وضوح IPS وكثافة بكسلات ١٩٢٠×١٠٨٠ وكثافة بكسلات ٤٢٤ بكسل.
• معالج ثماني النواة من نوع HiSilicon Kirin 655 مع رام ٣ جيجا وذاكرة داخلية ١٦ جيجا بايت، وممكن تضيف ميموري خارجي لغاية ٢٥٦ جيجابايت.
• كاميرا خلفية بقوة ١٢ ميجابكسل وفلاش LED، وسيلفي بقوة ٨ ميجابكسل.
• الموبايل بيدعم بصمة الإصبع، وتشغيل راديو FM، وفيه ميكروفون إضافي مانع للضجيج.
• الموبايل بيدعم تشغيل شريحتين اتصال، وبيدعم تقنية الاتصال للجيل الرابع.

العيوب

• للأسف شاشة الموبايل ما بيجيش عليها طبقة حماية إضافية ضد الكسر.
• صغر حجم الذاكرة الداخلية مقارنة بالموبايلات المقاربة ليه في السعر.

تجربة المستخدم

• تصميم الموبايل شبه أيفون جدًا ووزن الموبايل مريح في الاستعمال لفترة طويلة.
• حجم الشاشة بيخلي من السهل جدًا إنك توصل لكل أجزاءها بإيد واحدة، وزوايا الرؤية والوضوح مميزين في ظروف الإضاءة المختلفة.
• الموبايل بييجي معاه ضهر خلفي مصنوع من البلاستيك علشان يحمي ضهر الموبايل من الكسر خصوصًا إنه مصنوع من الزجاج.
• مكان وضع الكاميرا الخلفية مش معتاد في الموبايلات وهتحتاج وقت علشان تتعامل معاه، وصور الموبايل مميزة لكن المستخدم هيحس بوجود لون أصفر وقت التقاط الصور.
• صور سيلفي الموبايل مميزة في ظروف الإضاءة المختلفة.
• الموبايل بيقدم تجربة أداء مميزة في التنقل بين البرامج والتطبيقات المختلفة، وبيقدم تجربة ممتعة في ممارسة الألعاب ومش هتحس بسخونة ملحوظة عند استعمال الموبايل مدة طويلة.
• بصمة الموبايل موجودة في منتصف ضهر الموبايل وأداءها قوي وسريع، وبتقدم للمستخدم حماية للصور الخاصة.
• صوت الموبايل مش عالي قوي.
• للأسف أداء البطارية مش موازي لقوتها (٣٠٠٠ مللي أمبير).

شوف موبايل Huawei GR 3 2017 من هنا.

٣- موبايل Xiaomi Redmi Note 3

المميزات

• شاشة بحجم ٥٫٥ بوصة بدقة بكسلات ١٩٢٠×١٠٨٠ بكسل، وكثافة بكسلات ٤٠٣ بكسل، ومزودة بطبقة حماية ضد الكسر.
• بروسيسور الموبايل سداسي النواة Snapdragon 650 ورام بسعة ٢ و٣ جيجابايت، وميموري داخلي بسعة ١٦ و٣٢ جيجابايت وممكن تضيف ليه ميموري خارجي بسعة توصل لـ ٢٥٦ جيجابايت.
• كاميرا الموبايل بقوة ١٦ ميجابكسل وتقنية الـ autofocus وفلاش LED.
• الموبايل بيدعم تشغيل راديو fm، وتشغيل شريحتين اتصال، وبيدعم تقنية الاتصال للجيل الرابع، وبصمة الإصبع، وكمان OTG وir.
• بطارية بسعة ٤٠٥٠ مللي أمبير، وبتدعم تقنية الشحن السريع.

العيوب

• نظام حماية الشاشة ضد الكسر مش جوريلا جلاس.
• سيلفي الموبايل ٥ ميجابكسل، ومن غير فلاش.
• ما تقدرش تشغل شريحتين الاتصال في وقت واحد مع الميموري الخارجي ولازت تستغنى عن واحد منهم.
• مش بيتوفر مع الموبايل سماعات Hands-Free.

تجربة المستخدم

• تصميم الموبايل من المعدن وده بيديه مظهر جمالي وأناقة، لكن للأسف من الممكن إن الموبايل يتزحلق من إيدك لإن الضهر الخلفي ليه ناعم جدًا ومش موجود فيه أي بروز لسهولة التحكم فيه.
• شاشة الموبايل مميزة وبتقدم للمستخدم زوايا رؤية ووضوح ودقة عرض الصور والأفلام بشكل جميل، وفيها خاصية مريحة للمستخدم اللي غاوي قراية وهي تحويل الشاشة للون الأزرق لحماية العين من الإجهاد مع القراية لوقت طويل.
• مشكلة الشاشة إن السينسور بتاعها مش سريع في التعامل مع أشعة الشمس المباشرة وبياخد وقت، مش كبير لكنه مش الأسرع.
• زرار الباور منفصل عن زراير التحكم في الصوت لسهوةل التمييز والتفرقة بينهم.
• مكان بصمة الإصبع موجود في ضهر الموبايل وأداءها كويس، لكن المستخدم هيلاحظ إنها أحيانًا بتعلّق ومش بتستجيب من أول مرة، ومش هتقدر تحمي من خلالها برامجط وصورك المختلفة.
• مكان سماعات الموبايل هيخلي من السهل قوي إن الصوت يكون مكتوم ومش واضح، وده لإنها موجودة في ضهر الموبايل ومن السهل كتمه لو كان على أي سطح.
• أداء الموبايل مريح قوي للمستخدم واللي تقدر تتنقل بين أكتر من برنامج بسهولة ومش هتلاحظ أي تهنيج، ولو كنت غاوي لعب فالموبايل خيار كويس قوي ليك رغم سعره المتوسط، ومش هتلاحظ سخونة واضحة غير في الاستعمال المكثف ولوقت طويل شوية.
• كاميرا الموبايل بتقدم تجربة تصوير متوسطة، الصور في الإضاءة العالية كويسة وحتى تصوير الفيديو واللي بيظهر بشكل ناعم وسلي، لكن في الإضاءة الضعيفة هتلاحظ وجود تشويش بسيط، وبالنسبة للصور في الإضاءة القليلة هتلاحظ وجود Noise مش هيأثر على جمال الصور عمومًا.
• سيلفي الموبايل مش بيقدم صور كويسة ويعتبر من أهم الحاجات اللي ممكن تضايق المستخدم الغاوي سيلفي.
• بطارية الموبايل من أهم الحاجات اللي هتخلي المستخدم ما يحسش بزهق من كتر شحن البطارية، وبتكفي لغاية يوم ونص أو يومين من الاستعمال المتوسط، وعن طريق دعمها للشحن السريع تقدر تشحنها شحنة كاملة في ساعة ونص ودي مدة كويسة مقارنة بسعة البطارية.

شوف موبايل Xiaomi Redmi Note 3 من هنا.

٤- موبايل Samsung Galaxy J7- 2016

المميزات

• شاشة بحجم ٥٫٥ بوصة بدقة وضوح ١٢٨٠×٧٢٠ بكسل، وكثافة بكسلات ٢٦٧ بكسل.
• بروسيسور الموبايل ثماني النواة Qualcomm Snapdragon 617 ورام ٢ جيجابايت، وميموري داخلي ١٦ جيجابايت، وممكن تضيف ليه ميموري خارجي لغاية ٢٥٦ جيجابايت.
• كاميرا الموبايل بقدرة ١٣ ميجابكسل بفتحة عدسة F1.9، وفلاش LED.
• الموبايل بيدعم تشغيل شريحتين اتصال وراديو FM.
• بطارية الموبايل بسعة ٣٣٠٠ مللي أمبير، وممكن تغيرها بنفسك.

العيوب

• عدد بكسلات الموبايل مش قوية زي المنافسين، ومش موجود عليها طبقة حماية إضافية ضد الكسر.
• الموبايل مش بيدعم وجود بصمة للإصبع، ولا الجيروسكوب، ومش موجود معاه ميكرفون إضافي مانع للضجيج.
• سيلفي الموبايل ٥ ميجابكسل.
• بطارية الموبايل مش بتدعم تقنية الشحن السريع.

تجربة المستخدم

• شاشة الموبايل مش اللي المستخدم متعود عليها من شركة كبيرة زي سامسونج، وألوانها مش الأفضل من سامسونج وزوايا الرؤية والوضوح في أشعة الشمس مقبولة وكان من الأفضل عدد البكسلات يزيد شوية.
• كاميرا الموبايل الخلفية واحدة من أهم نقاط القوة للمستخدم وتدقر من خلالها تاخد صور كويسة في ظروف الإضاءة النهارية والليلية، لكن هيعيبها إنها مش هتظهر منورة قوي وده بسبب الشاشة وألوانها، وهتلاحظ كمان تفاصيل قليلة مش واضحة قوي في الصور بالليل.
• سيلفي الموبايل مش مميز لإن سعته قليلة وكمان فتحة العدسة مش الأفضل (2).
• وزن الموبايل وسمكه بيدي للمستخدم راحة في استعمال الموبايل لوقت طويل.
• أداء الموبايل متوسط مقبول وبيشغل أكتر من لعبة عليه بشكل كويس ومش هتلاحظ سخونة صادرة منه بشكل قوي.
• الميموري الداخلي بمجرد ما تتملي هتلاقي أداء الموبايل قل شوية وهتحتاج تستعين بميموري خارجي، وللأسف هتقابلك مشكلة نقل البرامج عليها لإن كتير من البرامج مش بتقبل النقل.
• بطارية الموبايل قوية وبتكفي معاك لغاية يوم ونص من الاستعمال المتوسط.

شوف موبايل Samsung Galaxy J7 -2016 من هنا.

٥– موبايل LG K10

المميزات

• شاشة بحجم مقبول ٥٫٣ بوصة، ودقة وضوح ١٢٨٠×٧٢٠ بكسل، وكثافة بكسلات ٢٧٧ بكسل، والشاشة مزودة بطبقة حماية إضافية ضد الكسر Corning Gorilla Glass 3.
• الموبايل بييجي ببروسيسور ثماني النواة، ورام بسعة ٢ جيجابايت، وميموري داخلي ١٦ جيجابايت، وممكن تضيف ليه ميموري خارجي.
• الموبايل بيدعم تقنية تشغيل راديو FM، وبيدعم تقنية الاتصال للجيل الرابع وكمان تقنية الـ NFC.
• كاميرا الموبايل الخلفية بدقة ١٣ ميجابكسل، ومزودة بفلاش LED.
• سيلفي الموبايل مزود بفلاش.
• تقدر تشغل على الموبايل شريحتين اتصال وميموري خارجي في نفس الوقت من غير ما تستغنى عن شريحة منهم.
• بطارية الموبايل ممكن تغيرها بنفسك.

العيوب

• أقصى سعة ميموري ممكن تزودها للموبايل هي ٣٢ جيجابايت وتعتبر أقل سعة في الموبايلات المعروضة معانا.
• سيلفي الموبايل دقته قليلة ٥ ميجابكسل.
• الموبايل مش بيدعم تقنية وجود بصمة الإصبع.
• بطارية الموبايل مش بتدعم تقنية الشحن السريع.

تجربة المستخدم

• شاشة الموبايل حجمها مرضي ورغم إن أرقامها بتقول إن زوايا الرؤية والوضوح مش الأفضل، لكن مع الاستخدام كان أداءها مرضي بدرجة كبيرة.
• زوايا الموبايل وحجمه ووزنه مناسبين جدًا للتعامل معاه لأوقات طويلة وخصوصًا إنه من البلاستيك وكمان ضهر الموبايل فيه خربشات بتدي شكل جمالي وكمان بتسهل من مسكه بإيد واحدة من غير ما يتعرض للوقوع.
• أداء الموبايل متوسط مع البرامج والألعاب وبيؤدي المطلوب منه من غير تهنييج، وتقدر تحدث الموبايل لنسخة الأندرويد الحديثة مارشميلو.
• أزرار التنقل بالموبايل مش موجودة على الجوانب زي معظم الموبايلات وموجودة في ضهر الموبايل تحت الكاميرا، وتقدر عن طريق الضغط على الزر الخلفي بالموبايل مرتين تقدر تشغل الكاميرا وتلتقط صور بسرعة، وممكن لو دوست على زر تعلية الصوت مرتين تقدر تكتب Note على الشاشة بإيدك.
• سماعات الموبايل موجودة في أسفل الجزء الخلفي للموبايل وصوتها مش الأفضل ومن السهل كتمه لو شيلت الموبايل على أي سطح مستوي.
• أداء كاميرا الموبايل مقبول في ظروف الإضاءة العالية ومقبول في الإضاءة الضعيفة، وبيصور فيديو بدقة ١٠٨٠ بكسل.
• سيلفي الموبايل مش الأفضل في النهار، وصوره بالليل مقبولة بفضل الفلاش الموجود معاها.
• بطارية الموبايل لو حصل فيها أي مشكلة تقدر تغيرها بنفسك، وبتكمل معاك في المعتاد لغاية يوم كامل من الاستعمال المتوسط والشاق.

شوف موبايل LG K10 من هنا.

٦- موبايل Asus ZenFone Selfie

المميزات

• شاشة الموبايل بتيجي بحجم مناسب ٥٫٥ بوصة، وكثافة بكسلات ١٠٨٠×١٩٢٠ بكسل، وحجم بكسلات ٤٠٣ بكسل ومزودة بطبقة حماية Corning Gorilla Glass 4.
• رامات الموبايل بحجم ٣/٢ جيجا وبروسيسور Qualcomm Snapdragon 615 ثماني النواة، ومعالج رسومي Adreno 405 وميموري داخلي ١٦ و٣٢ جيجابايت وممكن تضيف ميموري لغاية ٢٥٦ جيجابايت.
• كاميرا السيلفي للموبايل بتيجي بدقة ١٣ ميجابكسل فتحة عدسة 2 وفلاش LED، وكاميرا خلفية بقوة ١٣ ميجابكسل وفتحة عدسة F2.0 وتقنية ثبات ليزري مع فلاش مزدوج LED.
• الموبايل بيدعم تشغيل راديو FM، وتقنية الجيروسكوب، والـ OTG.
• تقدر تشغل على الموبايل شريحتين اتصال وميموري خارجي من غير ما تستغنى عن شريحة الاتصال.
• واجهة أسوس بتستجيب بشكل سريع للأوامر الصوتية في برنامج جوجل.
• بطارية الموبايل سعتها مقبولة وكمان من السهل تغييرها بنفسك.

العيوب

• الموبايل مش بيدعم تقنية الـ NFC ولا تقنية بصمة الإصبع.
• صوت سماعة المكالمات ضعيف شوية.
• كاميرا الموبايل مش بتصور فيديو بدقة 4K.

تجربة المستخدم

• شاشة الموبايل دقتها وألوانها وزوايا الرؤية والوضوح مقبولين في الإضاءة الداخلية، لكن الإضاءة الخارجية السطوع ما كانش كويس قوي.
• مكان زراير التحكم في صوت الموبايل موجودة تحت الكاميرا الخلفية واللي يعتبر مكان مش معتاد نهائي للمُستخدمين وهتلاقي صعوبة في التعود عليهم في البداية.
• نفس المشكلة دي هنلاقيها مع زرار الباور واللي موجود فوق الشاشة وده مكان مش معتاد عليه نهائيًا، وكمان هيسبب صعوبة في الوصول ليه مع حجم الشاشة. أسوس ريحت المُستخدم ووفرت ليه ميزة الضغط على الشاشة مرتين للفتح والقفل وده هيحل المشكلة بتاعة مكان الزر مؤقتًا.
• مكان سماعة الموبايل في الجزء الخلفي لضهر الموبايل ورغم كده فالصوت هيكون مسموع وده بسبب التقوس الموجود في ضهر الموبايل.
• تصميم الموبايل رفيع شوية وفيه كرف بسيط فيه من المنتصف ومع حجم الشاشة هتلاقي التعامل مع الموبايل لمدة طويلة مريح بشكل كافي.
• زراير التحكم في الموبايل موجودة بره الشاشة ومضيئة ومن السهل عىل المُستخدم التعامل معاهم.
• أداء الموبايل في المهمات والظايف اليومية المتعددة محتاج تعديل وتحسين شوية من أسوب خصوصًا إن المستخجم هيحس إنه بيؤدي الوظايف دي بصعوبة شوية وده بسبب الواجهة واللي بتحتاج تحسينات تسهل على المُستخدم التعامل والوصول للي هو عاوزه.
• أداء الجهاز في الألعاب بجرافيك قليل ومتوسط بيكون مرضي جدًا والألعاب اللي جرافيك بتاعها عالي بيعرضها بجرافيك قليل شوية علشان تلاقي سلاسة فيها لكن الألعاب الضخمة هتقابل مشاكل بطء وده طبيعي في سعر الموبايل.
• أداء سيلفي الموبايل مرضي جدًا حتى في الإضاءة الضعيفة وده بسبب الفلاش، أما الكاميرا الخلفية للموبايل فأداءها مرضي في الإضاءة القوية والنهارية ولو الإضاءة قلت هنلاحظ Noise في الصور، وتقدر تاخد من خلالها صور بسرعة كبيرة جدًا.
• ميزة تاني للمُستخدم وهي إن الكاميرا تقدر من خلالها تاخد صور بدقة بكسلات ٥٢ ميجابكسل وعيبها إن الصورة دي بتاخد وقت طويل شوية علشان تشوفها (١١ ثانية).
• أداء البطارية مميز وبتكمل لغاية ٦ ساعات وضع تشغيل شاشة مستمر، وبتتشحن في ساعتين ونص.
• أسوس زودت الموبايل ببرامج كتيرة جدًا المُستخدم مش هيحتاج ليها وبتاخد مساحة ودي حاجة مش كويسة.

شوف موبايل Asus ZenFone Selfie من هنا.

٧- موبايل Tecno Camon CX

المميزات

• شاشة IPS بحجم ٥٫٥ بوصة بدقة وضوح FHD وكثافة بكسلات عالية ٤٠٤ ودقة وضوح ١٩٢٠×١٠٨٠ بكسل.
• الموبايل بييجي بروسيسور ثماني النواة من نوع MediaTek MT6750T بتردد ١٫٥ جيجاهرتز، وممكن تضيف ميموري خارجي لغاية ١٢٨ جيجابايت.
• الموبايل بيدعم تشغيل راديو FM، والـ OTG وتقنية بصمة الإصبع، والجيروسكوب.
• ممكن تشغل على الموبايل خطين اتصال وميموري خارجي في نفس الوقت.
• كاميرا خلفية بقوة ١٦ ميجابكسل بفتحة عدسة واسعة مع فلاش رباعي، وسيلفي بدقة ١٦ ميجابكسل بفتحة عدسة واسعة مع فلاش ثنائي.

العيوب

• رام الموبايل ٢ جيجابايت بس، والميموري الداخلي ١٦ جيجابايت.
• طبقة حماية الموبايل ضد الكسر والشرخ مش الأفضل في السوق.
• الموبايل مش بيتيح ميكروفون إضافي مانع للضجيج.
• بطارية الموبايل ما تقدرش تغيرها بنفسك ولازم تروح بيها التوكيل.

تجربة المستخدم

• أداء شاشة الموبايل مقبول في ظروف الإضاءة المختلفة، مش الأفضل لكن الرؤية فيها واضحة.
• الموبايل بييجي معاه اسكرينة ملزوقة على الشاشة للحماية فمش هتحتاج تشتري واحدة وتركبها.
• تكنو بتقدم ضمان مجاني على الشاشة في حالة الكسر (أول ٣ شهور بس).
• تكنو ميزت زرار الباور عن زري التحكم في الصوت لسهولة التفرقة بينهم.
• أداء بصمة الموبايل مقبول جدًا وتقدر عن طريقها تفتح الكاميرا وتأمن برامجك وصورك الخاصة، لكن مشكلته للمُستخدم إنه صعب التفرقة بينه وبين جسم الموبايل الخارجي لإن مفيش أي بروز بين البصمة وجسم الموبايل.
• أداء الموبايل في المهام اليومية والتنقل بين البرامج بيكون سلس وسريع ومش هتحس بأي تقل من خلاله، وأداء الموبايل في الألعاب مقبول لكن لو كنت من هواة الألعاب اللي الجرافيك بتاعها عالي فالموبايل مش هيكون ممتع قوي ليك.
• فيه إضافات مريحة للمُستخدم زي إنه يقدر يرسم حرف الـ C على الشاشة فتفتح الكاميرا، وكمان تقدر تنسخ أكتر من برنامج تواصل اجتماعي عندك على الموبايل بحساب ورقم موبايل مختلف زي واتساب وفيسبوك.
• سيلفي الموبايل مميز في الموبايل وبيخرج صور جميلة ومش هتقابلك مشاكل في الإضاءة الليلية بسبب الفلاش، ولا مع عدد أصحابك الكبير لإن عدسة الكاميرا واسعة.
• الكاميرا الخلفية صورها حلوة لكن ما تهزش إيدك وانت بتصور علشان الكاميرا مش موجود فيها مثبت بصري ضد الاهتزاز.
• أداء بطارية الموبايل معقول ومش بتوازي سعة الأمبير الخاص بيها وبتتشحن شحنة كاملة في ساعتين بس وده وقت مناسب جدًا.

شوف موبايل Tecno Camon CX من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.