كتبت: صفاء مجدي

الديب فريزر من الأجهزة المنزلية اللي بتستخدم في تخزين الأغذية، في أسئلة كثير بتدور في دماغ اللى عايز يشتري ديب فريزر جديد زي مثلاً: هل مثلأ أنت محتاج ديب فريزر لأن فريزر الثلاجة مبقاش مكفي؟ هل يناسبك ديب فريزر رأسي أم ديب فريزر أفقي؟ ايه مميزات وعيوب كل نوع؟ ياقوطة هتعرض لك نصائح هامة قبل شراء ديب فريزر لتختار الأنسب لميزانيتك وكمان هتعرفك أي الأنواع ممكن يوفر الكهرباء وتقارن بين كل نوع والتاني لحد ما توصل للأنسب لك.. وتقدر تشتري ديب فريزر اللي يعجبك أونلاين ويوصلك لحد عندك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

امتى تشتري ديب فريزر؟

• لو كنت عايش لوحدك أو كنت عايش أنت وشخص تاني بس في البيت غالباً مش هتحتاجوا ديب فريزر، الديب فريزر عاوز عزوة ويحب العائلات الكبيرة أو الناس اللي غاوية تخزين.
• كمان الديب فريرز مناسب لنمط تسوق معين واللي هو الناس اللي بتحب تشتري كل حاجة مرة واحدة وبكميات كبيرة عشان التوفير.

أنواع ديب فريزر

الديب فريزر منه نوعين في السوق:

• النوع الأول هو الديب فريزر الأفقي واللي عامل زي ثلاجة الآيس كريم اللي في المحلات وله باب بيتفتح من فوق.
• النوع الثاني هو الديب فريزر الرأسي واللي شبه الثلاجة بالظبط لكن جواه أدراج.

ودلوقتي هنعرفك على كل نوع منهم عشان تعرف ايه النوع الأنسب لاحتياجاتك ونمط حياتك، هتلاقي ماركات زي الكتروستار، وتكنوجاز، ووايت ويل، وآريستون، والاسكا وغيرهم

الديب فريزر الأفقي

• في الأغلب بيكون جواه مساحة تخزين أكبر من النوع الرأسي.
• من عيوب الديب فريزر الأفقي: تقسيمته من جوا مش بتكون كويسة وعشان توصل للأكل اللي جواه ممكن تحتاج أنك توطي شوية وده مش مناسب للناس اللي عندها مشكلة في ظهرها.
• الدفروست يدوي بمعنى أنك بتحتاج تفصله عشان التلج يسيح ودي بتكون عملية متعبة.
• من مميزات الديب فريزير الأفقي أنه بيوفر في استهلاك الكهرباء لأنه لا يذيب الثلج آلياً.
• اشتري ديب فريزر أفقي يكون بابه بسوست تثبته كل ما تفتحه عشان متفضلش مثبت الباب بإيدك كل مرة تفتحه.
• عشان بيعمل تلج فهو مش هيسبب لسعة الأكل المجمد (Freezer burn)، اللسعة هي البقع السوداء أو البني اللي بتظهر في الأغذية المجمدة نتيجة لتسريب هواء بداخلها ودا بيحصل مع الأغذية الغير مغلفة جيداً.
• الديب فريزر الأفقي أفضل من الرأسي لو كنت في مكان الكهرباء بتقطع فيه كتير لأنه بيفضل محتفظ بالأكل بارد فترة أطول ممكن توصل ليوم كامل بدون الأكل ما يخسر.
• لأنه مفيهوش مروحة لتوزيع التبريد فبيكون أهدأ من الديب فريزر الرأسي.

اشتري ديب فريزر أفقي من هنا.

الديب فريزر الرأسي

• من أهم مميزات الديب فريزر الرأسي التقسيمة اللي جواه بيكون فيه أدراج أو أرفف بتسهل عليك التخزين.
• احرص أن تكون الأدراج شفافة عشان تشوف ايه اللي جواها.
• معظمها بيكون فيها ديفروست أتوماتيك ودي حاجة مريحة جداً لكن الطريقة اللي بيحصل بيها الديفروست أن الحرارة بتسخن وتبرد في شكل دورات فخلي بالك لو حصل ووقفت دورته فجأة لأن دا بيعرض الأغذية المجمدة أنها تبوظ.
• من عيوبه أن الأنواع التي تذيب الثلج آلياً تستهلك كهرباء أكثر من الديب فريزر الأفقي.
• الديب فرزير ده بيبرد الأكل من خلال دورات هواء وده ممكن يسبب لسعة للأكل (Freezer burn) ودا لو الأكل مش مغلف كويس أو العبوات والأكياس اللي مخزن فيها مش محكمة الغلق.
• مش بيحتاج مساحة كبيرة أفقية في البيت وبيحتاج بس مساحة رأسية.

شوف أسعار الديب فريزر الرأسي من هنا.

قد يعجبك: مجموعة من أفضل الأجهزة المنزلية

أهم مواصفات تبحث عنها عند شراء ديب فريزر

السعة

• السعة بتتقاس باللتر وكل كيلوجرام أكل تقريباً بياخد حوالي 2 لتر.
• وأنت بتختار السعة حط في اعتبارك عدد أفراد أسرتك ونمط التسوق الخاص بكم.
• غالباً كل ما تزيد السعة هيزيد استهلاك الكهرباء لكن ده مش شرط وعشان كدا اسأل عن استهلاك الكهرباء وأنت بتشتري.

شوف ديب فريزر 140 لتر من هنا ،  ديب فريزر 210 لتر من هنا.

اقرأ أيضاً: ازاي تشتري وتختار ثلاجة جديدة

الحجم

• بيتقاس بالقدم المكعب والأحجام الموجودة في السوق بتكون كالتالي:
  • ديب فريزر حجم صغير أوي أو مضغوط وده حوالي 5 قدم.
  • ديب فريزر حجم صغير وده بيتراوح بين 6 إلى 9 قدم.
  • ديب فريزر حجم وسط وده بيكون 12- 18 قدم
  • ديب فريزر حجم كبير وده فوق 18 قدم
• ونصيحتنا أنك تشتري أكبر حجم تقدر عليه مادياً من ناحية الفلوس ومن ناحية المساحة المتوافرة لأنه طالما توصلت لقرار شراء ديب فريزر فأنت تدريجياً ممكن احتياجاتك هيزيد مع مرور الوقت ونمو أسرتك.

شوف ديب فريزر 5 قدم من هنا.

المساحة والمكان

• لما تيجي تشتري ديب فريزر لازم في الأول تقيس المكان المتاح.
• لما تيجي تقيس المساحة اعمل حساب مسافة بينه وبين الأجهزة التانية اللي حواليه، سيب حوالي 5 سم بين الديب فريزر والحيطة اللي وراه والأجهزة اللي جنبه.
• اختار للديب فريزر مكان ميكونش فيه حرارة وده بيشمل الأماكن اللي جنب الأجهزة الكهربية والأماكن اللي فيها شمس.
• مش بس محتاج تقيس المكان اللي هتحط فيه الديب فريزر لكن كمان كل مكان هيمر بيه الديب فريزر لحد ما يوصل لمكانه يعني أبعاد الأبواب أو الممرات اللي هيمر بيها.
• لو نويت تشتري ديب فريزر رأسي فاعمل حساب مساحة كافية لفتح وغلق الباب وأنت بتقيس الأبعاد.
• خلي بالك يكون فيه إضاءة عشان لو هتطلع حاجة في الظلمة أو بالليل.

خصائص إضافية:

• اشتري فريزر يكون فيه لمبة تنور لما تفتحه عشان توصل للأكل بسهولة.
• خاصية التبريد السريع: دي خاصية في ديب فريزر بتبرد الأكل بسرعة لو كنت مستعجل على تبريده أو بتخزن أكل سخن وخايف حرارته تأثر على أداء ديب فريزر.
• لمبة تشير إلى أن ديب فريزر شغال بالفعل وكله تمام بدون الحاجة لفتحه.
• منبه يرن لو كان الباب مفتوح بقاله فترة أو مش مغلق بشكل صحيح.
• منبه يرن لو درجة الحرارة جوا ديب فريزر مش مناسبة وارتفعت فجأة.
• ابحث عن Energy Star ® لتتأكد هل الديب فريزر موفر لاستهلاك الكهرباء أم لا.

وللحفاظ على ديب فريزر وأكلك يفضل طازة اتبع النصائح التالية:

• خلي مكان الفريزر في مكان بارد نسبياً يكون بعيد عن أي مصدر حرارة أو أشعة الشمس.
• حاول يكون فتحك للباب قليل عشان كل ما تفتح الباب كل ما تضيع برودة وتهدر في الطاقة.
• تأكد أنك قفلت الباب كويس بعد ما تفتحه وتخلص استعمالك له.
• لف الأكل في بلاستيك كويس اوي بحيث تمنع عنه أي تسريب هواء يسبب لسعة للأكل (Freezer burn) وهذه المشكلة تظهر بسبب تضرر الأغذية المجمدة نتيجة لوصول الهواء إليها ويحدث عادة في الطعام الغير ملفوف أو غير مغلف بإحكام.