كتب: محمد حمدي

زي النهارده من ١٠ سنين بالظبط وقف المدير التنفيذي ورئيس مجلس الإدارة الخاص بشركة Apple علشان يعلن للعالم عن منتج جديد هيغير نظرة العالم للموبايلات. منتج عليه علامة الشركة اللي كانت عبارة عن تفاحة نصف مقطومة كانت سبب في هوس وانبهار وحلم كتير من الناس إنهم يكونوا شايلين موبايل Iphone، واللي بيحمي منهم الموبايل بجراب لازم الجراب يبين التفاحة كمان، وده كان بداية تغيير وجهة نظر كتير من الناس عن الموبايل وشكله وحتى استخدامه.

بعد عشر سنين وبعد وفاة مؤسس الشركة (ستيف جوبز) بيقف الرئيس التالي للشركة (تيم كوك) على نفس المسرح علشان يقدم سلسلة من التغييرات والأجيال الجديدة من هواتف أيفون وباقي أجهزة الشركة اللي تم طرحها سنة بعد سنة، وموعد اللقاء ده كان ١٢ من سبتمبر الساعة ٧ بتوقيت مصر، يعني من ساعات قليلة فاتت.

ياقوطة هتقدم لكم في التقرير ده نظرة شاملة على التقنيات والأجهزة الجديدة اللي تم طرحها، ووجهة نظرنا بخصوص كل جهاز سواء العيوب والمميزات، بالإضافة للأسعار الرسمية للأجهزة من أبل ومواعيد صدورها.

1. WatchOS 4

أول حاجة تم الإعلان عنها هو نظام التشغيل الجديد WatchOS 4 للساعات الذكية اللي بتنتجها أبل. نظام التشغيل بيتيح اهتمام أكبر بمعدلات ضربات القلب، كمان هتقدر الساعات العاملة بالنظام الجديد إنها تاخد بيانات من صالات الجيم اللي فيها أجهزة متوافقة مع الساعات، وبكده هتقدم الساعة تقارير أفضل بخصوص نشاط الجسم بشكل عام. أما الناس اللي بتمارس رياضة السباحة، الساعة هتقدم لهم تقارير مهمة ومختلفة تخلي أداؤهم الرياضي أفضل وأقوى.

النظام الجديد هيكون متاح للتنزيل في ١٩ من سبتمبر القادم.

2. Apple Watch Series 3

ولسه مع مجال الساعات أبل أعلنت عن جيل جديد من الساعات الذكية باسم Apple Watch Series 3 . أول وأهم ميزة في الجيل الجديد من الساعات هو احتوائها على شريحة مستقلة Cellular data بتستخدم للاتصال بالإنترنت وإجراء المكالمات بشكل مستقل عن التليفون، وإن كان بنفس الرقم، ودي نقلة عظيمة جدًا والسبب إنك ممكن تعمل مكالماتك وتسمع الموسيقى وترد على الرسائل، وغيرهم من العمليات من الساعة مباشرة ومن غير ما الموبايل يكون في جيبك! وده بيدي أي شخص حرية أكبر في التنقل.

الميزة التانية هي احتفاظ الساعة بنفس حجمها وسمكها على الرغم من الإمكانيات الجديدة، وده كان تحدي كبير قدام فريق العمل زي ما عرفنا من المؤتمر.

الساعة هتكون متاحة بسعر ٢٤٩ دولار للجيل القديم من الساعات، و ٣٢٩  دولار للساعات من غير اتصال بيانات، و ٣٩٩ دولار للساعات الجديدة بميزة الاتصال بالبيانات. كمان الساعة هتكون متاحة للطلب المسبق Pre order في ١٥ من سبتمبر وهتتاح للبيع العام في المتاجر في ٢٢ من سبتمبر القادم.

3. Apple TV 4K

ومن الساعة للتليفزيون، تم إصدار تطبيق جديد من Apple TV واضح من عنوانه الجديد فيه، وقصدنا هنا Apple TV 4K اللي بقى بيقدم خدماته بدقة شاشة 4K وكمان بيدعم الجهاز خاصة الألوان بتقنية HDR علشان يقدم جودة مميزة جدًا على مستوى الصورة.

مش بس كده، أبل أعلنت تعاونها مع شركات الإنتاج السينمائي علشان تحول الأفلام اللي بجودة عادية أو عالية لجودة 4K مجانًا.

وكمان التليفزيون الجديد من أبل هيعرض مباريات ومتابعات وتحليلات مباشرة على مدار الساعة، يعني مش هيقدم محتوى مسجل قبل كده.

أسعار الجهاز الجديد هتكون النسخة العادية من غير 4K بتخزين ٣٢ جيجا بسعر ١٤٩ دولار أما نسخة 4k فالنسخة ٣٢ جيجا بسعر ١٧٩ دولار ونسخة ٦٤ جيجا بسعر ١٩٩ دولار.

وهيبدأ الطلب المسبق ١٥ من سبتمبر، ويبدأ البيع في ٢٢ من سبتمبر الحالي.

4. أيفون 8 و أيفون 8 بلس

قدمت أبل ٣ موبايلات جديدة، الأول هو موبايل أيفون 8 بتصميم زجاجي أمامي وخلفي وألومنيوم من الجوانب ومقاوم للماء وبألوان فضي ورمادي وذهبي.

أبعاد iPhone 8 شاشة بحجم ٤٫٧ بوصة، وآيفون 8 بلس شاشة بحجم ٥٫٥ بوصة. وتمت إضافة تحسينات على الصوت للجهازين واستعملت معالج جديد أقوى هو A11 Bionic .

على مستوى الكاميرا قدت أبل تعديلات كبيرة جدًا على الكاميرات بتصل لـ ١٢ ميجا بكسل مع أسلوب توفير في الطاقة وإظهار لأكبر عدد ممكن من الألوان على صعيد التصوير الثابت أو الفيديو، واللي بقى ممكن تصويره بدقة 4K لكل الجهازين.

كمان الأجهزة الجديدة بتدعم خاصية الواقع المعزز وهي خاصية بتفيد محبي الألعاب الواقعية.

المفاجأة هي دعم الأجهزة لميزة الشحن اللاسلكي بسبب الخلفية الزجاجية وده هيقدم ثورة في طريقة شحن أبل للأجهزة وهيوفر كتير على المستخدمين.

بالنسبة للسعر موبايل iPhone 8 بسعر هيبدأ من ٦٩٩ دولار وأيفون 8 بلس بسعر هيبدأ من ٧٩٩ دولار. وهيبدأ الطلب المسبق ١٥ من سبتمبر وهيتاح للبيع في ٢٢ سبتمبر. والموبايلين بيشتغلوا بنسخة iOS 11 التي هتتاح للجمهور في ١٩ من سبتمبر الجاري.

5. وأخيرًا.. أيفون X

وهو أحدث وأفخم وأغلى أيفون صدر لغاية النهارده، وبيسمى أيفون 10 وبيتميز بشكل خاص واللي من غير حواف خالص، وبحجم كبير شوية ومن غير زر Home وبتقنية التعرف على الوجه لفتح الجهاز وهي تقنية جديدة بتقدمها أبل لأول مرة في أجهزتها.

الموبايل هيكون متوفر بألوان فضي ورمادي وأبعاد ٥٫٨ بوصة بدقة ٢٤٣٦ × ١١٢٥ بوصة بكثافة بكسلات ٤٥٨ بكسل، كمان أعلنت أبل عن خاصية  Animoji وهو نظام جديد من الإيموشنز بصوت صاحب التليفون وبتعبيرات وجهه بحيث كل واحد يقدر يعمل إيموشن بيعبر عنه بالظبط وبشكل مضحك وجميل.

أما عن الكاميرا كاميرا iPhone X  مزدوجة لكن العدستين فوق بعض بدقة 12 ميجابكسل وفتحتي عدسة 1.8 و 2.4 لكل واحدة مع تثبيت محسن في الفيديو. وعشان يدي إضاءة أفضل فيه ٤ ليدات للفلاش. وبتدعم الكاميرا الأمامية وضعية التصوير البورتريه مع نظام إضاءة خاص

أما عن الأسعار أعلنت أبل إن الجهاز هيتوفر بسعر 999 دولار لسعة تخزين ٦٤ جيجا والطلب عليها هيبدأ ٢٢ من أكتوبر الجاي وبداية شحن المنتجات هتكون في ٣ من نوفمبر الجاي.

ده كان عرضنا لأجهزة أبل الجديدة.. استنوا مننا كل جديد بمجرد نزول الأجهزة دي في مصر وبداية بيعها.