ألعاب تساعد طفلك على تنمية مهاراته
كتبت: نهى مؤمن
في مفهوم خاطئ موجود في مجتمعنا مفاده إن لعب الأطفال ما هو إلا تضييع للوقت، وإنه لازم يعمل شيء مفيد بدل اللعب طول النهار.
أعزائي الآباء والأمهات، لازم تعرفوا إن الدراسات العلمية أثبتت إن الطفل لحد سن ٧ سنوات لازم يلعب ويستمتع باللعب كمان، جوه وبره البيت. وبعد سن ٧ سنوات، اللعب بيفضل مهم لكن بنبدأ نضيف عليه بعض الواجبات اللي لازم الطفل يؤديها تجاه أسرته أو المجتمع، عشان ننمّي جواه الإحساس بالمسئولية ونتجنّب تربية طفل ما بيفكرش إلا في نفسه واحتياجاته فقط.
في المقال ده، ياقوطة هتقدملكم تشكيلة متنوعة من الألعاب اللي من خلالها تقدروا تمرنوا دماغ طفلكم وتخلّوه يستمتع بطفولة ولعب مفيد.
أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
نفس الدراسات اللي ذكرناها في مقدمة المقال، أثبتت إن نوع اللعب اللي بيتم تقديمه للطفل ليه تأثير كبير على تشكيل طرق ونمط التفكير وتنمية عضلات الدماغ والفكر.
أيوة.. الدماغ ليه عضلات وبتحتاج تمرين زي باقي عضلات الجسم، وكل ما تهتمي بيها أكتر، كل ما هتقوى وهتلاقي طفلك أقدر على حل مشكلاته وأكفأ في تواصله مع الآخرين، وأكتر قدرة على الإبداع والتعبير. وكل ما هتسيب العضلات تضمر وتهملها، بتقديم ألعاب إلكترونية أو مشاهدة طويلة للتليفزيون، كل ما هتلاقيه أضعف في التعبير، فهيعبّر بالضرب أو بالزعيق، وهتلاقيه أضعف في حل مشكلاته وبيلجأ لطرق أخرى للتواصل بدون استخدام دماغه.
خلينا ناخد فكرة عن أهم الألعاب اللي ممكن من خلالها تقدم لطفلك الوسيلة الأنسب لتنمية مهاراته في شكل لعبة مسلية ومفيدة.
١- ألعاب البازل
ألعاب البازل من الألعاب اللي ممكن تقدمها لطفلك من سن السنة، وكل ما يكبر، تقدم واحدة أكتر تعقيدًا، بالنسبة لعدد قطع البازل.
اعرف إن أثناء ما طفلك بيلعب بالبازل، في ٣ مهارات أساسية بيتم تنميتها وتقويتها:
- المهارة الذهنية: إزاي يحل تعقيدة البازل ويكون الرسمة.
- المهارة العضلية: إنه يفضل يحاول إنه يركب القطعة من كل زاوية لغاية ما يلاقي الزاوية الصحيحة اللي بتركب على القطعة السابقة.
- المهارة العاطفية: من تعلم الصبر ومتعة الإنجاز نتيجة صبره بعد حل البازل.
موجود على ياقوطة مجموعة كبيرة من ألعاب البازل، اختارنالكم شوية منها:
مجموعة بازل iLearn
بتقدم البازل المكونة من قطعتين اللي ممكن نبدأ بيها من طفل في عمر السنة، ولحد سن الـ ٣ سنين ممكن نقدم بازل من ١٠ قطع.
اللطيف في المجموعة دي إنها بتعلم الطفل المعلومات الأساسية اللي يقدر يستوعبها في المرحلة دي، من الألوان، الأشكال، الحيوانات، الخضروات والأرقام، مع المهارات الأساسية التلاتة اللي اتكلمنا عليهم فوق.
شوف مجموعة بازل iLearn من هنا.
مجموعة Educa للأطفال من سن ٣-٥ سنوات
من سن ٣ سنوات، بنبدأ نزوّد في القطع، وده المُسمّى «أكتر تعقيدًا»، ممكن تشكيلة كبيرة من البازل المبنية على كارتون محبب للأطفال زي «صوفيا»، «الأميرات»، «ويني الدبدوب»، «السيارات» و«الديناصورات».
شوف مجموعة Educa للأطفال من سن ٣-٥ سنوات من هنا.
مجموعة البازل المجسمة ثلاثية الأبعاد 3D
البازل دي مختلفة؛ لأنها بتكون صورة مجسمة زي مثلًا برج إيفل، تاج محل أو الكرة الأرضية.
زيادة عن تنمية المهارات اللي اتكلمنا عليها فوق، البازل دي بتنمي الإدراك والتصور المكاني والتفكير الإبداعي.
شوف مجموعة البازل المجسمة ثلاثية الأبعاد 3D من هنا.
٢- مجموعة ألعاب العلوم الخضراء Green Science
دي مجموعة رائعة من الألعاب العلمية من سن ٤ سنوات فما فوق.
بتعتمد إنها تعلم الطفل معلومات ليها علاقة بالطبيعة، وإزاي يقدر يستخدمها لإنتاج طاقة زي البطارية، الطاقة الشمسية، إعادة التدوير، فهم المناخ، تنقية المياه وإنتاج آلة حاسبة بمكونات بيئية متوفرة.
شوف مجموعة ألعاب العلوم الخضراء من هنا.
٣- مجموعة الإنسان الآلي
مدارسنا بتفتقر تحبيب الأولاد في التكنولوجيا، الأمر اللي بيترتب عليه قتل جزء من الإبداع بداخلهم.
الإنسان الآلي وعلومه من المهارات اللي بتحبب الأطفال في التكنولوجيا وبتساعد على تقديم علم البرمجة ليهم. فإن الطفل يصنع بإيده إنسان آلي ويلمس قدرته على القيام بأعمال بسيطة زي كونه مثلًا سلة مهملات متحركة، هتخلق في ذهنه حب الاختراع والتصنيع وتوسع مداركه كمان.
شوف مجموعة الإنسان الآلي من هنا.
٤- مجموعة ألعاب البناء والتشييد Teifoc
ألعاب البناء الـ Teifoc بتساعد الطفل على تنمية المهارات العضلية والذهنية، بالإضافة إلى التخيل والابتكار والصبر، غير إنها بتمزج بين الفن والهندسة والعلم.
اللعبة بتتكون من طوب أحمر بأحجام صغيرة، وأسمنت ومدق لدمج الأسمنت، وبتحتاج من الطفل إنه يكون عنده انتباه للتفاصيل الصغيرة فيقدر يبني مبنى متماسك ومستقيم.
الطوب من الممكن استخدامه أكتر من مرة، بيحتاج إنه يتفك في ميّة لفترة ويُعاد استعماله. بالنسبة للأسمنت، فده من الممكن شراؤه منفصل عن اللعبة لو حبيتوا تبنوا أكتر من مرة.
شوف مجموعة ألعاب البناء والتشييد من هنا.
٥- مجموعة ألعاب البناء Eitech
نوع تاني من ألعاب البناء، بدل الطوب الأحمر والأسمنت، البناء هيكون بالمسامير والألواح المعدنية من الاستانلس ستيل والمفك.
اللعبة بتهدف لبناء مباني مماثلة للواقع، زي برج إيفل، برج خليفة وإبر الفضاء. ومن خلال اللعب الدقيق، بيتم تمرين عضلة الطفل الدماغية للتركيز والتصور والإدراك المكاني، وأكيد بيتعلم الصبر والثقة بالنفس مع الإنجاز.
شوف مجموعة ألعاب البناء من هنا.
٦- ألعاب المكعبات
ألعاب البناء بالمكعبات زي الليجو ليها فائدة كبيرة في تطور عقل طفلك وقدراته، والدليل إنهم بيستخدموها كتير في أساليب التعليم المتطورة.
٧- الألعاب الكلامية
الألعاب الكلامية بتساعد أطفالك على تكوين حصيلة لغوية قوية وتنميتها في جو اجتماعي مرح، وده بيساعد على خلق روح من التنافس، وبيزود انتباههم للكلمات من حواليهم.
مثال للألعاب الكلامية المتوفرة في ياقوطة، لعبة «سكرابل».
لعبة سكرابل هي من الألعاب الأكتر شهرة في مجموعتها، فكرتها في التنافس في تكوين كلمات، ومزودة بأرقام تحت كل حرف من الحروف، وبيكسب اللعبة اللي يقدر يكون مجموع كلمات بمجموع أرقام أعلى من اللعيبة التانيين.
اللعبة متوفرة باللغتين العربية والإنجليزية.
شوف ألعاب كلامية من سكرابل من هنا.
٨- الشطرنج
من الألعاب المهمة جدًا واللي بتنمّي دماغ الطفل والكبير كمان بشكل واسع، وبتساعد على اكتساب مهارة التخطيط الاستراتيجي، وتعلم قراءة الخصم والصبر اللي ممكن يمتد لساعات.
اللعبة دي من الألعاب اللي ليها بطولات عالمية، وكمان كتب لتعليم اللعبة وفهم مفهوم التخطيط.
شوف لعبة شطرنج وكتب تعليم الشطرنج من هنا.
نتمنى تكون ياقوطة قدرت تساعدك ببعض الأفكار لألعاب لطفلك لتمرين عضلاته الدماغية، وفي نفس الوقت الاستمتاع بطفولته وتخزين ذكريات كتيرة حلوة لأسرته.
قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.