كتبت: صفاء مجدي

كتير بيحصل أن حاجة تعطل في البيت ونجري نكلم حد مختص يصلحها وبعدها تحس أن الموضوع كان سهل أوي ومش محتاج التكاليف أو الوقت ده كله والفكرة كلها أنك محتاج تعرف أدوات الصيانة الصح وطريقة استخدامها السليمة. وعشان كدة ياقوطة في المقال ده هتقدملك أهم أدوات الصيانة، وطرق استخدامها، ونصائح للسلامة والحفاظ على عدة الصيانة وكمان لينكات للشراء أونلاين.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

1. الشاكوش

من أشهر أدوات الصيانة واللي لازم تستخدمها مرة على الأقل في حياتك، الشاكوش مهمته الدق على الحاجات زي المسامير وكمان خلعها وده لأن الشاكوش بيكون له وشين. وش ناعم وكبير للدق على المسامير والجزء التاني بيكون رفيع لخلع المسامير وغيرها. تأكد وأنت بتشتري الشاكوش أن يكون ايده وراسه متثبتين كويس جدًا في بعض وأن وزنه معقول بحيث يكون مناسب للمهمات المنزلية وميكونش تقيل زيادة عن اللزوم.

اشتري  الشاكوش أونلاين من هنا، يبدأ السعر  35 جنيه مصري.

2. المفكات

المفكات دورها أنها تفك المسامير اللي رأسها فيها شرطة واحدة أو فيها شرطتين عاملين علامة x، وعشان كده المفكات نوعين: مفك عادة وده بيفك النوع الأول من المسامير أبو شرطة واحدة والنوع التاني هو المفك الصليبة واللي بيفك النوع التاني من المسامير اللي فيه علامة اكس.

ولأن المسامير مقاسات منها الكبير والصغير ياقوطة بتنصحك أنك بدل ما تشتري مفك واحد صليبة وواحد تاني عادة، أحسن لك تشتري عدة المفكات اللي بتكون ايد منفصلة وأكتر من رأس بمقاسات مختلفة.

في كمان نوع ثالث من المفكات اسمه مفك تست أو  مفك اختبار ودي اللي فيها لمبة بتنور لما يكون فيها كهرباء ودي مناسبة للأعمال الكهربية بالذات، وبينفع لو في مصدر كهرباء فيه مشكلة وعايز تعرف هل في كهرباء ولا تيار الكهرباء فصل عنه.

اشتري المفكات من هنا، يبدأ السعر من  8 جنيه مصري.

شوف عدة مفكات من هنا، يبدأ السعر من 34 جنيه مصري.

شوف مفك تست من هنا، يبدأ السعر من 25 جنيه مصري.

3. الكماشة

ودي أداة تشبه في شكلها شوية المقص لكن رأسها سميكة ومعقوفة وبنستخدمها في مسك وخلع الأدوات أو المسامير أو غيرها. وأنت بتشتري الكماشة اختار اللي تكون سهلة الحركة في الفتح والقفل.

شوف كماشة من هنا، يبدأ السعر من 49 جنيه مصري.

4. مازورة القياس

المازورة هي المتر اللي بتلاقيه عند الخياطين لكن مازورة القياس بتاعة العدد وأدوات الصيانة بتكون مختلفة شوية في إنها بتكون مفرودة زي المسطرة ومش هتحتاج منك حد يمسك قصادك لما تقيس حاجات طويلة أو عريضة، وله طرف ممكن تشبكه في بداية المكان أو الحاجة  اللي ناوي تقيسها عشان لما تسحب المتر (مازورة القياس) وتقيس المسافة ميفلتش الطرف الأولاني منك.

اشتري مازورة قياس من هنا، يبدأ السعر من 25 جنيه مصري.

5. القصافة

دي كمان من الأدوات اللي تشبه المقص في طريقة عملها وبتكون رأسها حادة ورفيعة وبنستخدم القصافة في قص وقطع الأسلاك أو تعريتها، والقصافة من الحاجات اللي لازم يكون ايدها مُغطاه بالكامل بمادة عازلة للكهرباء.

شوف أسعار القصافات من هنا، يبدأ السعر من 45 جنيه مصري.

اقرأ أيضًا: تجهيزات حفلات الشواء

6. سلم

السلم من الأدوات المهمة جدًا مش بس لأعمال الصيانة لكن كمان عشان توصل للرفوف العالية أو أي حاجة عالية عندك في البيت، في الأغلب الناس بتستسهل وبتطلع على كرسي لكن الحقيقة دي مخاطرة لأن الكراسي مش معمولة عشان نقف عليها ومش سهل اللي واقف على الكرسي يحفظ توازنه وممكن جدًا حد يقع من عليها لا قدر الله. وعشان كده بننصحك تستثمر في سلم كويس يكون ثابت ورجليه متساوية.

اشتري السلم أونلاين من على ياقوطة، يبدأ السعر من 174 جنيه مصري.

7. المفتاح الفرنساوي

المفتاح الفرنساوي أساسي جدًا ويمكن من الحاجات اللي ست البيت غالبًا بتكون جربتها مرة؛ وده لأن أشهر استخدام له هو تركيب وفك أنبوبة البوتاجاز. المفتاح الفرنساوي بتقدر تقفل وتغير مقاس فتحته على حسب الشغل وبنستخدمه لفك الصواميل.

 اشتري مفتاح فرنساوي من هنا ، يوصلك لحد البيت، يبدأ السعر من 39 جنيه مصري.

8. ميزان المياه

وظيفة ميزان المياه هي الكشف عن وجود عدم تساوي في أي مستوى سطح سواء كانت أرضية أو سطح ترابيزة أو غيره، وهي أداة هامة بالذات لو كنت بتركب بلاط أو سيراميك جديد في البيت أو بتعمل أعمال نجارة لأنه هيعرفك درجة ميل أو استواء السطح.

شوف ميزان المياه من هنا، يبدأ السعر 190 من جنيه مصري.

9. WD 40

الاختراع ده من الحاجات اللي لو جربتها مش هتقدر تستغنى عنها لأنه تقريبًا مفيش حاجة مبيدخلش فيها. الـ WD 40  هو بخاخ مكوناته الأساسية المياه والزيت واستخدماته كثيرة سواء داخل البيت أو خارجه. تقدر تستخدم WD 40 في إزالة الصدأ والحماية من ظهوره بالأساس وتزييت مفاصل الأبواب، وكمان إزالة البقع القوية من على الحيطان والأبواب وغيرها. ممكن تلمع بيه كمان الحواف الحادة للمنشار أو غيره من الأدوات وتلميع إطارات السيارات وحتى إزالة اللبان اللاصق في الأحذية، استعمالات WD 40 مش محدودة ويمكن لما تشتريه تكتشف له استخدامات جديدة.

شوف WD 40 من هنا، يبدأ السعر من 26 جنيه مصري.

قد يعجبك أيضًا: مستلزمات للمغامرين

10. الايبوكسي ريزن  Epoxy Resin

الايبوكسي هو مادة تستخدم لإصلاح الكسور في الأدوات المنزلية المختلفة زي مثلًا الطفايات الزجاج أو الفازات، يتميز الايبوكسي بقوته الشديدة في اللصق وفي الأغلب مش هتحتاج تعيد لصق الحاجات مرة تانية بعد ما تلصقها بالايبوكسي.

شوف الايبوكسي ريرن من هنا، يبدأ السعر من 18 جنيه مصري.

11. الشنيور

الشنيور أو الدريل الكهربائي هو أداة مهمة جدًا في البيت، الشنيور وظيفته الأساسية هو عمل الأخرام والحفر سواء في الحائط أو الخشب أو الألومنيوم أو الحديد أو حتى الخرسانة في بعض الأنواع. ودي حاجة مفيدة لو كنت عاوز تدق مسمار في الحائط أو في الخشب بدون ما تكسر الخشب أو تسبب أي شروخ أو شكل مش مناسب في الحائط لأن الشنيور بيكون دقيق وسريع وسهل في المهمة دي بالذات.

• بعض أنواع الشنيور: الشنيور شكله شبه المسدس برؤوس مختلفة على حسب الوظيفة، وفيه منه أنواع موجودة في السوق مش بس بتعمل الأخرام ولكنها بتفك وبتركب المسامير اللي لها رأس تلف منها.
• في أنواع حديثة مش بتشتغل بسلك وده طبعًا بيكون أسهل في الاستخدام وأكثر عملية.
• احتياطات عند استخدام الشنيور: خلي بالك وأنت بتعمل أي حفرة في الحائط أنك تكون بعيد عن مصدر كهرباء أو مفتاح كهرباء في الحائط عشان متسببش مشكلة في وصلات الكهرباء.
• لما توصل الشنيور بالكهرباء وقبل ما تبدأ بعمل الحفرة جربه الأول في الهواء لفوق وتأكد أنه شغال بشكل سليم وواصله كهرباء.
• لما تيجي تعمل حفرة في مكان محدد في الحائط يُفضل الأول أنك تحدد المكان بواسطة قلم أو علامة.
• لازم وأنت ماسك الشنيور تكون مثبت ايدك كويس أوي ومتمكن منه جدًا، وأنت بتحفر هتضغط شوية على الشنيور.
• الشنيور بيكون كمان فيه سرعات فأنت ابدأ بسرعة بطيئة وزود لو تطلب الأمر.
• لو بتحفر في حائط فيفضل تغطي وشك أو تلبس نظارة على عينيك عشان بيكون فيه تراب ناتج عن الحفر.
• لما تخلص استخدام الشنيور خرجه الأول من الحفرة اللي عملها وبعدها افصله عن الكهرباء.
• 
  اتفرج على تشكيلة متنوعة من الشنيور من هنا، يبدأ السعر من 345 جنيه مصري.

12. شريط اللحام

وده عبارة عن بكرة لزق ولكنه بيكون سميك وملون، وعادة يستخدم في الأعمال الكهربية وتغطية الأسلاك. شريط اللحام بيعمل كعازل وبالتالي بنغلف بيه الأسلاك العريانة أو أي حاجة تانية بيمر بيها كهرباء.

لو معندكش شريط لحام تقدر تشتريه من هنا، يبدأ السعر من 3 جنيه مصري.

نصائح للسلامة والحفاظ على عدة الصيانة:

• احفظ الأدوات في صندوق خاص يستحمل وزنها وعشان تحمي المعادن من الصدأ والرطوبة ممكن تغطيها بطبقة رقيقة من الزيت وتلفها في كيس بلاستيك عشان تمنع الرطوبة عنها وتعيش معاك فترة أطول ممكن كمان تحط في صندوق العدة نفتالين يمتص الرطوبة.
• بلاش تستخدم أداة للقيام بوظيفة أداة تانية، يعني متستخدمش المفك عشان تدق على مسمار عشان ميسببش أي إصابات، استخدم كل أداة لوظيفتها المحددة وبس.
• خلي بالك عند استخدام الأدوات اللي بتتكون من أكثر من جزء يعني مثلًا المنشار فيه جزء ايد وجزء سلاح.. لازم  يكون الجزئين ماسكين في بعض كويس جدًا وميكونش حاجة منها باظت من الركنة الكتير أو فكت من بعضها لسوء الاستخدام، اتأكد من الأمر ده كويس أوي قبل ما تستخدم الأدوات.
• قبل ما تستخدم السلم تأكد كويس أوي من ثباته ولما تطلع السلم أو تنزل من عليه خليك ماسك فيه كويس بايديك الاتنين وكمان لازم تواجه السلم بوجهك.
• لو هتشتغل في حاجة فيها كهرباء، من احتياطات الأمان أنك تفصل الكهرباءعن البيت كله الأول قبل القيام بأي خطوة، ويفضل أنك تكلم حد مختص وخصوصًا في مهام الكهرباء.
• لو كانت المنتجات فيها حركة زي مثلًا القصافة أو الكماشة فننصحك تجرب حركتها الأول وتتأكد أنها سهلة الحركة.
• لو كانت الأداة مطلية، اتأكد أن الطلاء مش متشقق أو له أطراف زايدة.

بنفكرك أن ياقوطة عليه قسم كامل لأدوات وعدد الصيانة وتقدر تشوف الأسعار وتشتري أونلاين وأنت في بيتك.

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.