كتب: محمد حمدي

لما بنفكر في الأجهزة اللوحية بنحاول نشوف أهم العوامل اللي بتخلّي الجهاز اللوحي اللي بنختبره يتميز بيها عن باقي الأجهزة. وبالنسبة لجهاز أبل أيباد ميني 4 كان الحجم الصغير والأداء الجيد هم أهم العوامل اللي لفتت انتباهنا، حتى إن العوامل دي كانت من أهم العوامل اللي ركزت عليها الحملات الأعلانية في وقت إصدار أيباد ميني 4 من أبل.

لكن زي ما بعض العوامل تُعتبر مميزات أساسية، ممكن تكون عيوب كمان.. إزاي ده؟ السبب بيكون في اختلاف المستخدمين واهتماماتهم ناحية الأجهزة، وهو ده اللي هنشوفه من خلال تجربتنا لأيباد ميني 7.9 بوصة الجيل الرابع.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

المواصفات الفنية

المميزات

• تصميم الجهاز صغير وعصري وخفيف ومناسب جدا للحركة والانتقال والسفر.
• تجربة الكتابة لوقت طويل على الأيباد جيدة ومش متعبة وحتى الشاشة واضاءتها مريحة للعين.
• بطارية الجهاز بتدوم لوقت طويل ويمكن الاعتماد عليها بدون وجود شاحن لفترة معقولة.
• الجهاز من الأجهزة المدعومة بتحديث أبل الأخير IOS11
• الجهاز متوفر بألوان جذابة وشكل الجهاز عموما جميل وجذاب للعين.
• الـ Covers المتوفرة للجهاز بتخلي شكله مميز جدا واستخدامه أفضل، لكنها بتتباع بشكل منفصل عن الجهاز.

العيوب

• السعر يعتبر غالي مقارنة بامكانيات الأيباد، خاصة لو عملنا مقارنة بين سعره وسعر أيباد2
• الجهاز مفتقد للامكانيات الحديثة من أبل زي خاصية 3D Touch على سبيل المثال.
• مع التحديثات الجديدة لنظام التشغيل IOS الميني أيباد 4 ممكن يواجه بعض المشاكل في التشغيل زي البطء في الاستجابة على سبيل المثال. أو قفل بعض التطبيقات بشكل غير متوقع.
• الأيباد مش مناسب لممارسة الألعاب لوقت طويل، علشان البطارية وعلشان حجم الشاشة الصغيرة نسبيا.
• الجهاز لا يعتبر من الأجهزة الحديثة في السوق خاصة مع اصدار أيباد Pro واقتراب تقديم أبل لأجهزة لوحية جديدة.

تجربة الاستخدام

أيباد ميني 4 يعتبر جهاز مثالي للناس اللي عاوزه تعمل المهام اليومية البسيطة والعادية زي تصفح الانترنت وسماع الموسيقى والأغاني أو حتى تشغيل مقاطع اليوتيوب وغيرها، لكن الناس اللي المهام الأكتر صعوبة أو تخصصا مش هايقدر أيباد 4 يوفي بيها. والسبب في ده نتيجة أن الجهاز مش حديث نسبيا، بالتالي مش هايقدر يوفي المتطلبات الحديثة للمستخدمين.

بالنسبة للبنات اللي بتحب تشيل كل حاجة في شنطة ايدها، أو الشباب اللي بتشيل معاها شنطة صغيرة أو عاوزين جهاز حديث وكبير نسبيا في ايدهم طوال الوقت وسهل الحمل ورفيع الحجم، الأيباد ميني 4 هايكون مناسب جدا لهم. لكن الناس اللي بتحب تلعب أحدث الألعاب وأثقلها وأصعبها، في الحالة دي أيباد ميني 4 هايسقط بشدة في الامتحان ده لأن الـ Processor الخاص بيه مش مناسب للألعاب الحديثة وكمان البطارية الخاصة به مش هاتقدر توفي بالتزاماتها في الحالة دي.

ماحبيناش نتوقف عند رأينا الشخصي في الجهاز وقررنا نسأل المسئولين عن البيع في (تريد لاين) المتخصصة في بيع منتجات أبل. وأكدوا لنا أن الطلب على أجهزة أيباد ميني 4 أصبح أقل بشدة بعد اصدار أيباد برو الجديد. لكن حتى اليوم فئة لا يستهان بها من المستخدمين بتميل لاقتناء أيباد ميني 4 رغم كل شيء، والناس دي هي اللي بتتنقل كتير وفي نفس مش بتعمل مهام متخصصة أو صعبة جدا بالايباد. بالنسبة للناس دي ايباد ميني 4 هايكون الاختيار الأفضل خاصة أن سعره يعتبر منخفض بالنسبة للأجهزة الأحدث.

تقدر تشوف آيباد ميني 4 من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا فى تعليق أو من خلال صفحة Yaoota.com على فيسبوك.