كتب: محمد حمدي

مع انتشار أجهزة الأيباد واستعمالاتها المختلفة، الناس بدأت تلمس مدى روعة فكرة وجود جهاز بيعمل حاجات كتيرة من اللي يقدر يعملها الكمبيوتر، وفي نفس الوقت يكون في حجم ووزن أكبر بشىء بسيط عن الموبايل. لكن هل تجربتنا بخصوص أيباد برو 12.9 إنش هتثبت صحة الكلام ده أم العكس؟ تابعونا علشان تشوفوا تجربتنا في استخدام الجهاز.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

المواصفات الفنية

المميزات

• الجهاز رفيع وخفيف مقارنة بحجمه وده بيخليه سهل الحمل والتنقل بيه من مكان للتاني.
• المساحة التخزينية للجهاز مناسبة لتخزين الصور وباقي الملفات.
• استخدام الجهاز للاتصال بالانترنت بالشريحة أو الوايف اي بيعطي الشخص إمكانيات للاتصال بالانترنت في أي مكان وبسهولة.
• وجود قلم مع الجهاز بيخليه اختيار مناسب للرسامين أو الناس اللي بتحتاج قلم الكتروني في استخداماتها.
• وجود كيبورد يمكن استخدامها مع الجهاز بيعطي إمكانية ممتازة للكتاب والناس اللي بتستعمل الأيباد للكتابة علشان يكون أمامهم تجربة استخدام مميزة.
• إمكانيات الكاميرا الخاصة بالأيباد ممتازة جدا ومثالية بالنسبة للناس اللي بتشتغل في مجال التصوير بالفيديو.
• الجهاز من الأجهزة اللي بيدعمها نظام التشغيل الجديد من أبل IOS11 وده بيعطي الجهاز إمكانيات جديدة ومتطورة مع أحدث نظام من أبل.
• وجود تقنية تعدد المهام اللي بتجعل المستخدم يقدر يشتغل على تطبيقين في نفس الوقت.

العيوب

• حجم الأيباد أكبر بشكل ملحوظ عن الموديلات السابقة، ده ممكن يسبب مشكلات بالنسبة للناس اللي بتفضل حجم أقل للأيباد علشان تقدر تشيله في كل مكان.
• سعر الأيباد غالي مقارنة بموديلات تانية من شركات تانية، أو حتى الموديلات التانية اللي بتطرحها أبل.
• مافيش تطبيقات كتير بتقدم مميزات جديدة لمستخدمي Ipad pro.
• استخدام خاصية تعدد المهام غير عملي في كتير من الحالات ومحتاج تطوير
• على الرغم من امكانياته العالية لكن الجهاز مش بيقدر يقدم استخدام بديل عن الابتوب أو جهاز الكمبيوتر الشخصي.

تجربة الاستخدام

قبل وفاة ستيف جوبز مؤسس شركة أبل، كانت الشركة قادرة على أنها تقود السوق من ثورة تكنولوجية للتانية. لكن بعد وفاته وتولي تيم كوك المنصب، حسينا أن أبل خسرت عقلها المدبر وتحولت لشركة بتحاول تلحق بالشركات التانية.

جهاز أيباد برو يعتبر أول الأجهزة اللي بيتم أصدارها علشان تلحق أبل المنافسة مع الشركات التانية، علشان كده تم تزويد الجهاز بقلم وبلوحة مفاتيح منفصلة قابلة للحمل، وكلها أمور كانت جديدة على عائلة الأيباد. لكن المميز في الأمر أن أبل لما قدمت القلم ولوحة المفاتيح قدمتهم بشكل متميز ويستحق التجربة.

من حيث الشكل: الجهاز يعتبر كبير نسبيا، وده فيه ميزة وعيب في نفس الوقت، الميزة في الإمكانيات الكبيرة اللي بيقدمها الجهاز لما بتكون شاشته كبيرة، خاصة بالنسبة للناس اللي بتشتغل في مجال الكتابة أو الرسم. أما العيب بيكون في صعوبة الحركة وحمل الجهاز بالشاشة الكبيرة. لكن أبل حاولت تتجنب المشكلة دي من خلال جعل الجهاز أخف بشكل كبير.

من حيث الاستخدام: الجهاز بيعمل كل المطلوب منه بكفاءة متميزة، وده نتيجة سرعة الجهاز والمعالج الحديث اللي بيتمتع بيه، لكن في نفس الوقت السعر اللي بييجي بيه الجهاز يعتبر سعر عالي جدا مقارنة بالاضافات اللي قدمها الجهاز مقارنة بأجهزة أيباد السابقة، أو حتى بالنسبة للأجهزة اللوحية من الشركات التانية واللي يعتبر أيباد برو محاولة للوصول لها ومنافستها.

داليا البدري طبيبة أطفال بتستخدم أيباد برو لتسجيل مواعيدها ومتابعة الحالات اللي بتتعامل معاها، أكدت لنا أن الجهاز سهل عليها كتير من مهام عملها، خاصة القلم الالكتروني اللي بتقدر تستعمله بسرعة علشان تسجل معلومات سريعة أو غيرها من الاستخدامات. كمان بتستخدمه للدخول على الانترنت وتحميل المراجع ومراجعة المعلومات المختلفة، وبيفيدها جدا وجود أكتر من نمط للاتصال بالانترنت.

من حيث بطارية الجهاز: وفقا لاستخدامها كانت بتخلص بسرعة خاصة مع تشغيل الكاميرا لفترة طويلة، أو عند تشغيل ملفات فيديو أو روابط (يوتيوب). وده بيخليها تعيد شحن الجهاز أكتر من مرة خلال اليوم علشان يستحمل الاستخدام المتواصل.

شوف  iPad Pro 12.9 Wi-Fi Cell 128GB Space Gray من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا فى تعليق أو من خلال صفحة Yaoota.com على فيسبوك.