كتب: خالد عاصم

على الرغم من إن اللعبتين الأبرز FIFA وPES بدأوا في وقت مش بعيد عن بعض وعلى الرغم من إن لكل واحدة منهم جمهور وعشاق ومتحمسين، إلا إنه لحد كم سنة فاتت كانت المقارنة شبه محسومة، فرغم إن PES بتطور بشكل كبير إلا إن دايمًا كانت FIFA بتكسب الرهان ودايمًا كانت سابقة بخطوة عن منافستها وده اللي كان بيخلي اللعبة هي الأكتر شهرة وشعبية في العالم، وبقت جملة (تعالى نلعب فيفا) هي السايدة سواء كانت اللعبة هي FIFA فعلاً أو كانت PES.

خلال الكام سنة اللي فاتوا اختلفت الأمور شوية في المنافسة بين FIFA وPES، لأن ده الوقت اللي قدرت فيه Konami المطورة للعبة PES إنها تقفز لخطوات كبيرة جدا خلتها تمشي تقريبًا خطوة بخطوة مع لعبة FIFA ومن هنا قدرت PES إنها تكون قاعدة جماهيرية كبيرة ماتقلش عن القاعدة الجماهيرية اللي قدرت FIFA تحققها على مدى وجودها من أواخر التسعينيات، وده اللي خلى السؤال القديم يرجع يتردد بقوة أكتر من أي وقت فات: إيه الأحسن FIFA ولا PES.

خلال النص التاني من سنة ٢٠١٩ ظهرت لعبة FIFA 19 ولعبة PES 2019 ورجعت الناس تسأل تاني، إيه الأحسن وإيه اللعبة اللي تستحق إننا نشتريها؟ الحقيقة إن اللعبتين في المجمل ممتازين وبيقدموا تطور كبير جدًا في العموم للعبة كرة القدم الأكتر شعبية في العالم سواء في نسختها الفعلية أو في نسختها في ألعاب الفيديو، بس أي لعبة فيهم أحسن فعلًا، وهل تقدر FIFA 19 إنها تقنع عشاق PES إنهم ينضموا لفريقها، ولا هتقدر PES 2019 إنها تخلي عشاق FIFA يتخلوا عن لعب وضع Ultimate Team ويتخلوا عن فكرة إن FIFA هي اللي بتمتلك ترخيص كل الأندية والمنتخبات؟

في المقال ده ومن خلال اختبارنا وتجربتنا للعبة FIFA 19 ولعبة PES 2019 ومراجعتنا لكل تفاصيل اللعبتين هنجاوب على سؤال أي لعبة فيهم أحسن وتستحق إنك تشتريها السنة دي. وبنفكركم إن اللعبتين متوفرين على ياقوطة وتقدروا تطلبوها من خلال الموقع وهتوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المقارنة الكاملة بين لعبة FIFA 19 ولعبة PES 2019

طريقة وأسلوب اللعب

مش صعب إن لعبة متخصصة في كرة القدم تتميز على مستوى أوضاع اللعب والتراخيص اللي بتحصل عليها من الأندية والمنتخبات وكمان الجرافيكس العالية الطبيعية، ولكن في النهاية أبرز حاجة وأهم حاجة بتحدد تميز لعبة عن التانية هو أسلوب وطريقة اللعب، ومن حسن الحظ إن اللعبتين اللي بنتكلم عنهم النهارده بيقدموا طريقة وأسلوب لعب ممتاز مع اختلاف طبيعة كل واحدة فيهم زي ما هنكتشف مع بعض دلوقتي.

مختلفتش طريقة وأسلوب لعب PES 2019 عن النسخ القديمة من اللعبة ومقدمتش تطور جذري في السلسلة بس ده مش معناه إن مفيش شوية تحسينات وتغييرات بسيطة خلت اللعبة واقعية أكتر. أول اختلاف واضح كان في اللمسة الأولى للكرة اللي بقى طبيعي أكتر ومدعوم بجرافيكس حركي شبيه جدا بالواقع وده أضاف للعبة سلاسة أكتر بكتير من قبل كده، كمان FIFA 19 طورت اللمسة الأولى للكرة من خلال نظام Active Touch System اللي ممكن تفعيله من خلال الضغط الخفيف على عصا التحكم اللي في الشمال في نفس وقت تلقي الكرة هيخلي اللاعب اللي هتوصله الكرة يتحرك بشكل أسرع وده هيسمح ببداية هجمة مرتدة سريعة وقريبة جدا من الواقع.

التمرير كمان اتحسن في اللعبتين مع الاختلاف إن لعبة PES 2019 بتركز أكتر على طريقة لعب البناء من الخلف Build-up، أما FIFA فلسه فيها مشكلة التمركز اللي بتخلي بعض اللاعبين ميكونوش متواجدين في الأماكن اللي المفترض يكونوا موجودين فيها على عكس PES اللي دايمًا هتلاقي فيها حد تمررله الكرة في حالة الحركة السريعة والهجمات المرتدة.

اللي ممكن نعتبره مشكلة بالنسبة لعدد من اللاعبين في FIFA 19 هو إن فيها عدد كبير جدا من اللي بنسميه حركات الكومبو، وحركات الكومبو هي الحركات اللي بتحتاج إنك تدوس على أكتر من زرار في نفس الوقت عشان تنفذ حركة معينة وده هتلاقيه في بعض أنواع التصويب وفي الوان تو، وده مش هتلاقيه في PES اللي بتمتاز بسهولة وسلاسة وسرعة أكتر.

الخلاصة في طريقة وأسلوب اللعب هو إن لعبة PES 2019 بتقدم أسلوب وطريقة لعب أسهل وأحسن بس ده مش معناه إن طريقة اللعب في FIFA 19 أسوأ بس نقدر نقول إنها أصعب شوية وده بيخليها أبطأ بس هتكون أمتع لو قدرت إنك تحفظ كل حركات الكومبو الموجودة في اللعبة وده موضوع صعب شوية.

شوف عروض أسعار لعبة PES 2019 على ياقوطة من هنا.

الجرافيكس

ما يختلفش الوضع في الجرافيكس عنه في طريقة وأسلوب اللعب، بمعنى إن مفيش تغييرات كبيرة عن النسخ اللي فاتت بس فيه شوية تحسينات بتحسن شوية من تجربة اللعب.

بالنسبة للعبة PES 2019 هنلاحظ إن فيه اختلاف كبير بين جرافيكس الأندية واللاعبين اللي اللعبة معاها ترخيصهم وبين غيرهم، يعني مثلا نادي برشلونة ولاعبين زي ميسي وكوتينيو ونادي ليفربول ولاعب زي محمد صلاح وملاعب الأندية دي زي كامب نو وأنفيلد، هنلاحظ إن كل دول الجرافيكس فيهم أكتر من رائعة وقريبة جدا من الحقيقة على عكس أي أندية ولاعبين تانيين غير مرخصين اللي الجرافيكس بتاعتهم أقل بكتير.

على مستوى الجرافيكس عمومًا مفيش اختلافات كتير غير في الإضاءة اللي بتبان ممتازة جدًا في لعبة PES 2019 خصوصا لو كان عندك جهاز قوي وشاشة فيها تقنية HDR أو 4K لأن اللعبة بتدعم الجودة دي وبتقدم أداء مذهل. وزي ما كان رأينا رأي كتير من الناس في قوايم وواجهة استخدام اللعبة في نسخها القديمة، لسه القوايم وواجهة الاستخدام في PES 2019 سيئة جدًا وبدائية وبطيئة.

من ناحية تانية بتمتاز FIFA 19 بمستوى أعلى بكتير على مستوى تصميم الوشوش والتعبيرات القريبة جدًا من الواقع على عكس PES 2019 بس برضه هنلاحظ إن فيه وشوش تصميمها أحسن بكتير من وشوش تانية. أما على مستوى القوايم وواجهة المستخدم فهي أحسن كتير في FIFA 19.

الخلاصة بالنسبة للجرافبكس إن FIFA 19 بتتفوق بشكل واضح عن PES 2019 بس مش كبير قوي.

أوضاع اللعب

مفيش شك إن لعبة PES 2019 ممتازة على أكتر من مستوى بس مع الأسف مقدرتش Konami تطورها على مستويات تانية أبرزها أوضاع اللعب اللي خسرت فيها اللعبة أوضاع كانت متوفرة حتى في النسخ الأقدم منها. اللعبة لسه فيها وضع Master League الشهير بس نظام التنقلات فيه سيء جدًا والأرقام مش قريبة خالص من الواقع وكمان مفيش تفاعل مع اللاعبين، وده بيخلينا نحس إن اللي طور وضع اللعب ده يمكن عمره حتى ما اتفرج على كرة قدم قبل كده. من ناحية تانية لسه وضع MyClub المنافس لوضع Ultimate Team بتاع FIFA موجود وفيه شوية تحسينات مش بطالة بس ماظنش إنه قدر يحقق نفس الشعبية والنجاح اللي محققهم نفس الوضع في FIFA.

الضربة القوية قوي اللي تلقتها PES 2019 هو انتهاء مدة حصولها على ترخيص البطولتين الأهم المملوكين للاتحاد الأوروبي UEFA وهما بطولة دوري الأبطال والدوري الأوروبي، واللي كانوا مرخصين لصالح شركة Konami وبقت دلوقتي مرخصة لصالح EA العملاقة اللي بتطور FIFA، وده خلى FIFA 19 هي الوسيلة اللي ممكن من خلالها تلعب البطولتين الأشهر في عالم الأندية.

وطبعًا استغلت FIFA 19 وجود البطولتين دول ودخلتهم في كل أوضاع اللعب تقريبًا يعني بقوا موجودين في وضع البطولات ووضع Ultimate Team وممكن تتلعب أونلاين وكمان اللعبة بتتيح إمكانية لعب النهائي بشكل مباشر وكل ده بيضيف قوة لأوضاع لعب FIFA 19 أكتر من قوتها اللي بتتميز بيها أصلا.

حتى وضع Kick-off اللي من الصعب إن يكون فيه أي تغييرات في أي لعبة، بيتميز في لعبة FIFA 19 بعدد من أوضاع اللعب المختلفة والجديدة زي مثلا إنك ممكن تلعب ماتش بتحسب فيه أهداف الفولي والأهداف اللي بالراس بس وكمان فيه وضع تاني يتخسر فيه لاعب كل مره بتحرز فيها هدف.

أما وضع Career Mode فميختلفش كتير عن قبل كده وأهم حاجه كانت بتميزه وهي التفاعل بينك كمدير فني وبين اللعبين موجودة زي ماهي بس بيتضاف للوضع ده طبعًا وجود بطولات دوري أبطال أوروبا والدوري الأوروبي.

وبتضم لعبة FIFA 19 الحلقة الجديدة من وضع The Journey اللي بتحمل اسم Champion واللي بتكمل حدوتة أليكس هانتر اللي بدأت في لعبة FIFA 18 بس مع إضافة إن ممكن تلعب فيه كمان دور صديقه داني أو أخته كيم وطبعًا بتاخد بطولة دوري أبطال أوروبا حيز كبير من الجزء الجديد من وضع اللعب اللي حقق نجاح ممتاز جدا لما ظهر للمرة الأولى في النسخة اللي فاتت.

الخلاصة في أوضاع اللعب واضحة جدًا لصالح FIFA 19 اللي بتحقق تفوق كبير جدًا على PES 2019.

شوف عروض أسعار لعبة FIFA 19 على ياقوطة من هنا.

الخلاصة بين لعبة FIFA 19 ولعبة PES 2019

زي ما اتضح من اللي قلناه قبل كده كل لعبة من اللعبتين بتتميز عن التانية في حاجة معينة بس كمان واضح إن لعبة FIFA 19 لسه قادرة تحقق تميز بصورة عامة عن منافستها، بس ده مش معناه إطلاقًا إن PES 2019 مش بتقدم تجربة لعبة ممتازة وخصوصًا بعد ما قدرت تاخد ترخيص دوري أبطال أوروبا والدوري الأوروبي.

في النهاية الاختيار متروك ليك واللي علينا عملناه وحاولنا نساعدك إنك تقدر تحدد كل الفروق بين اللعبتين الأشهر في عالم ألعاب كرة القدم، لعبة FIFA 19 ولعبة PES 2019.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.