أهم ألعاب البلاي ستيشن على ياقوطة
كتب: خالد عاصم
لو لسه شاري بلاي ستيشن جديد يبقى انت اتفتحلك عالم جديد وكبير من المتعة والترفيه اللي أكيد هياخد كتير من وقتك الفترة اللي جاية. وعلى الرغم من إن بلاي ستيشن PlayStation 4 بقاله دلوقتي خمس سنين في السوق إلا إنه لسه جديد ولسه قادر إنه يقدم متعة ألعاب الفيديو اللي بيستناها كل عشاق النوع ده من الترفيه، ووجوده في الأسواق لمدة خمس سنين مش معناها إنه بقى قديم على قد ما معناها إن إحنا مر علينا خمس سنين بنشوف فيها ألعاب بلاي ستيشن ممتازة كل يوم بتتطور أكتر وبتقدم أبعاد جديدة في عالم ألعاب الفيديو سواء على مستوى القصة أو طبيعة اللعب أو الجرافيكس اللي كل يوم بتتطور فيه عن التاني.
ومن بين عشرات عناوين ألعاب بلاي ستيشن اللي موجودة في العالم واللي بيمارسها عشاق الألعاب كل يوم، اخترنا لكم أهم العناوين وأكترها شعبية واللي بتنتمي لمختلف فئات الألعاب اللي بتتنوع ما بين الرياضة الإلكترونية وألعاب الأكشن وألعاب الإثارة وغيرها من الألعاب الممتازة، واختيارنا ده كان نتيجة لعنصرين مهمين من خلالهم قدرنا نحدد اختياراتنا، العنصر الأول هو رأي خبراء الألعاب المتخصصين اللي حددوا ألعاب بلاي ستيشن الأفضل من حيث الجرافيكس والقصة وأسلوب اللعب، أما العنصر التاني فهو اختيارات اللاعبين نفسهم اللي لما سألناهم عن أحسن ألعاب بلاي ستيشن اللي بيفضلوها، مختلفتش اختياراتهم عن الاختيارات اللي حددها الخبرا نفسهم واللي هنتكلم عنها النهارده.
فمن خلال المقال ده هنتعرف مع بعض عن أحسن ألعاب بلاي ستيشن اللي تقدر تلعبها النهارده على جهازك وتقضي بيها وقت ممتع بأبعاد جديدة في عالم ألعاب الفيديو. وطبعًا لو أي لعبة من ألعاب بلاي ستيشن اللي هنتكلم عنها خلال المقال عجبتك هتقدر تطلبها فورًا من خلالنا في ياقوطة وهتوصلك لحد باب البيت أو مكان ما تحب بأسرع وقت ممكن.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع
أفضل ألعاب بلاي ستيشن اللي تقدر تلعبها دلوقتي على جهازك
لعبة Horizon Zero Dawn
لو عدى عشر سنين على اللعبة دي هتفضل الناس تتكلم عن اللي قدمته لعالم ألعاب بلاي ستيشن، فاللعبة دي ممكن نقول إنها متكاملة على أكتر من مستوى وقدرت تحقق نجاح كبير على الألعاب المنافسة في نفس الفئة، وبتمتاز لعبة Horizon Zero Dawn بأنها بتدخلك في جو مليان مشاعر مختلفة مش بس أساسها إثارة اللعب المعتادة فاللعبة فيها مرح وإثارة ودراما ومشاعر كتير وكمان القصة محكمة جدا والشخصيات بناءها قوي وصلب وممتع جدًا.
ممكن تشوف لعبة Horizon Zero Dawn من هنا.
لعبة Bloodborne
في لعبة Bloodborne بيهاجمك الخطر والموت من كل حتة ففي الوقت اللي بتحاول تصطاد فيه أعدائك كلهم بيحاولوا يصطادوك في الوقت نفسه وده اللي ممكن يخلي اللعبة صعبة لبعض اللاعبين بس ممتعة لنسبة الأكبر منهم وده بيخليها واحدة من أحسن وأكتر ألعاب بلاي ستيشن إثارة ومتعة، اللعبة أحداثها قريبة جدًا من مسلسل Soul وبتمتاز بجو مثير جدًا من الإثارة وبتحتاج لتركيز كبير جدًا.
لعبة Marvel’s Spider-Man
اللعبة دي هتاخد منك حوالي تلاتين ساعة تقريبًا مش هتندم على أي دقيقة ضيعتها منهم، فمن خلال اللعبة دي هتقدر تكون إنت المتحكم في الشخصية الشهيرة اللي بتحاول تسيطر على الشر في شوارع مانهاتن واللي شفناها في أفلام كتير حققت نجاح مبهر مايزدش كتير عن النجاح اللي حققته اللعبة اللي اعتبرها عدد كبير جدًا من الخبرا ومن اللاعبين من أحسن ألعاب بلاي ستيشن واللعبة بتمتاز بأكتر من عنصر زي مثلًا الخريطة اللي مطابقة إلى حد كبير من الخريطة الفعلية لمانتهان في نيويورك ده غير القصة المحكمة وأسلوب اللعب الممتاز وكما الجرافيكس القوية جدًا واللي بتخليك تعيش أجواء أقرب للأفلام منها لمجرد لعبة فيديو، وسواء كنت بتحب شخصية سبايدر مان أو لا فأكيد هتحب اللعبة دي.
شوف لعبة Marvel’s Spider-Man من هنا.
لعبة God of War
لو كنت من اللي لعبوا أي جزء من أجزاء لعبة God of War قبل كده فأكيد مش هتقدر تستني كتير لحد ما تلعب اللعبة دي. الجزء الجديد من اللعبة بيمتاز بمميزات كبيرة قوي حتى عن الأجزاء اللي فاتت فالموضوع مبقاش بس مجرد لعبة أكشن بتعتمد على الالتحامات الشخصية أو الأسلحة القديمة أو السحرية، لأن الموضوع اتطور على مستوى القصة بشكل كبير خلاها بتجمع بين الدراما وبين الأكشن، الشخصية الرئيسية اللي عاش معاها كتير من عشاق اللعبة Kratos بقى عنده ابن هيكمل معاه الرحلة اللي هتمتد على طول اللعبة واللي بتبدأ لتلبية طلب أم الابن ده اللي وهي بتموت بتطلب طلب معين مش بس معاه بتبدأ اللعبة بس بتتحول شخصيتها الرئيسية لشخصية معقدة جدًا لأول مرة في تاريخ اللعبة.
لعبة Uncharted 4: A Thief’s End
جزء جديد بنكمل معاه الرحلة اللي بدأناها مع السلسلة دي اللي بتعد من أشهر وأنجح سلاسل ألعاب بلاي ستيشن واللي بتتحكم فيها في شخصية ناثان دراك الشخصية الرئيسية للعبة، الجزء الجديد من اللعبة أشبه بسلسلة أفلام إنديانا جونز اللي بتحارب فيها الأشرار من ناحية وبتدور على كنوز مخفية من ناحية تانية، وكتير من الخبرا واللاعبين بيعتبروا اللعبة دي هي جوهرة ألعاب سوني في الفترة اللي فاتت.
شوف لعبة Uncharted 4: A Thief’s End من هنا.
لعبة Resident Evil 7: Biohazard
الجزء الأقوى والأنجح من سلسلة ألعاب بلاي ستيشن الأنجح والأكتر إثارة على مستوى ألعاب الرعب والأكشن، واللعبة بتمتاز بميزة مهمة جدًا وهي إمكانية لعبها بالكامل على نظارة بلاي ستيشن في أر PS VR وده بيخليها بتقدم تجربة لعبة استثنائية جدًا ومش مسبوقة في عالم ألعاب الرعب. اللعبة في الجزء ده بتختلف طبيعتها عن باقي الألعاب السابقة من السلسلة، ففي الجزء ده مش مطلوب منك إنك انت اللي تطارد الزومبيز، المطلوب منك فعليًا إنك تحاول تفضل عايش وتحافظ على حياتك من العيلة اللي بتطاردك جوه بيت مطلوب منك فيه إنك تفضل عايش لأطول فترة ممكنة.
شوف لعبة Resident Evil 7: Biohazard من هنا.
لعبة The Last Guardian
اللعبة دي مناسبة للكبار والصغيرين وكمان ينفع يلعبها الاتنين مع بعض وبتوصف أحداثها حالة من الصداقة اللي بتخوض مغامرة مثيرة جدًا مطلوب منك فيها إنك تحل مجموعة كبيرة من الألغاز الكتير اللي لازم تحلها عشان تقدر تتقدم في أحداث اللعبة، أبطال اللعبة شخصيتين بس هما الولد الصغير وكائن تاني ضخم بيجمع بين القط والطير وبيساعد الشخصية الرئيسية في حل ألغاز اللعبة.
شوف لعبة The Last Guardian من هنا.
لعبة The Witcher 3: Wild Hunt
واحدة من أنجح ألعاب بلاي ستيشن وأكترهم إثارة على الإطلاق مش بي كجزء من سلسلة ألعاب قدرت تكسب جوايز كتير جدًا في الفترة اللي فاتت والجزء ده تحديدًا فاز بجايزة أفضل لعبة في مؤتمر E3 للألعاب اللي بتصدر فيه أهم عناوين ألعاب الفيديو كل سنة، اللعبة استكمال للسلسلة اللي بتدور حوالين صائد ساحرات شخصيته معقدة جدا على المستوى الدرامي والنفسي، قصة اللعبة محكمة جدًا والجرافيكس ممتازة لأبعد الحدود.
شوف لعبة The Witcher 3: Wild Hunt من هنا.
ألعاب كرة القدم FIFA 19 وPES 2019
ماينفعش نتكلم عن ألعاب بلاي ستيشن الأفضل ومانجبش سيرة اللعبتين الأشهر والأكتر انتشار في عالم ألعاب الفيديو، FIFA 19 وPES 2019 واللي مش محتاجين نتكلم عنها كتير بس لازم نجيب سيرتها على الأقل في وسط القايمة بتاعتنا اللي نتمنى إنها تكون دليل تقدر تستعين بيه عشان تملى وقتك بمتعة ومرح ألعاب بلاي ستيشن الأفضل واللي تقدر تطلب أي لعبة منها من على موقع ياقوطة.
شوف كل حاجة متعلقة بألعاب الفيديو من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.