كتب: خالد عاصم

لحد النهارده ناس كتير بتحتار بين التكييف الاسلبيت والتكييف الشباك، وعلى الرغم من أن الأغلبية حاليًا بتفضل شرا التكييف الاسبليت وده لعدد كبير من الأسباب زي شكله المودرن الملائم لديكور البيت ولتوفيره في الطاقة وغيرها من الأسباب، إلا أن لسا برضه فيه مستخدمين بيفضلوا التكييف الشباك وليهم أسبابهم في اختيارهم ده.

من فكرة الأسباب المختلفة اللي بتخلي مستهلكين يختاروا التكييف الاسبليت ومستهلكين تانيين يحتاروا التكييف الشباك، بيتضح لينا إن الاختيار بالفعل متوقف على احتياجاتك وكمان على الميزانية اللي انت محددها عشان تشتري التكييف، وعشان تقدر تطبق احتياجاتك دي على الواقع الفعلي وتختار التكييف الأنسب، لازم تعرف الفوارق المختلفة بين النوعين وده اللي هنساعدك تعرفه النهاردة.

من خلال مقال النهاردة هندخل عالم أجهزة التكييف بتفاصيل أكتر من خلال مقارنتنا بين التكييف الاسبليت والتكييف الشباك وهنتعرف على أبرز أنواعهم المتوفرة على ياقوطة، ولو عجبكم أي تكييف من التكييفات اللي هنتكلم عنها خلال المقال هتقدروا تطلبوها من خلالنا في ياقوطة وهتوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

تعريفات التكييف الاسبليت وبين التكييف الشباك

التكييف الشباك

التكييف الشباك بيكشف من اسمه الطريقة اللي بيتركب فيها بمعنى إنه بيحتاج يتركب فعليًا مكان شباك موجود في الحيطة، ولأن ده مش بيكون متاح على طول، فبيتفتحله فتحه في الحيطة على قده بالظبط عشان يبقى هو اللي زي الشباك، والتكييف الشباك بيتكون من وحدة واحدة بتضمن كل مكونات التكييف بلا استثناء، وبيكون جزء من التكيف مواجه للأوضه من جوا والجزء التاني خارج من الحيطة لبره، وبيتميز التكيف الشباك بسهولة صيانته وحجمه الصغير وكمان بيفضل استخدامه مع المساحات الصغيرة.

التكييف الاسبليت

التكييف الاسبليت كمان بيتعلق على الحيطة بس مش بيحتاج إننا نفتح فتحة كاملة على قد حجمه في الحيطة، وبيتفتح بس فتحة صغير عشان تعدي منها الكابلات والأنابيب اللي بتوصل بين الوحدتين اللي بيتكون منها التكييف وهي وحدة الضاغط Compressor اللي بتبقى موجوده بره، ووحدة المكثف اللي بتبقى موجوده جوا الأوضة، وبيتميز التكييف الاسبليت بشكله الملائمة للديكور العصري وكمان باستهلاكه للطاقة ده غير إنه ملائم أكتر للمساحات الأكبر.

المقارنة بين التكييف الاسبليت والتكييف الشباك

التصميم

لكل تكييف من التكييفات ميزته وعيبه من حيث التصميم، التكييف الاسبيلت مثلًا شكله عصري جدًا وكمان بييجي بألوان وتصاميم مختلفة مش بس هتتناسب مع ديكور الشقة أو الأوضه، لا ده ممكن كمان يضيف ليها لمسة ممتازة جدًا، ده على عكس التكييف الشباك اللي بيكون شكله واحد ومش بيختلف وعلى الأغلب كمان بيكون بلون واحد وهو اللون الأبيض، وتصميمه مش جذاب أوي.

من ناحية تانية، التصميم هو نفسة السبب في ميزة التكييف الشباك عن التكييف الاسبليت، فكونه متكون من وحدة واحدة بس فتركيبة سهل جدًا ومش بيتكلف فلوس كتير في تركيبه خصوصًا ل هيتركب مكان شباك فعلي، وكمان سهل أول إنك تنقله لو حبيت تغير مكانه أو حبيت تسيب شقتك وتنقل لمكان تاني، التكييف الاسبليت طبعًا بيتنقل برضه بس بيحتاج شغل أكتر في تركيبه وفي شيله وكمان نقله صعب أكتر لأنه مكون من وحدتين كبار بيستهلكوا مساحة كبيرة في النقل ونسبة تعرضهم للأذى خلال النقل أكبر.

قوة التبريد

طبعًا فيه قياسات واضحة بتقدر من خلالها نحدد قوة التكييف وقدرته على التبريد، بس من غير ما نوجع دماغك بالوحدات والقياسات خلينا نسعتين بس بوحدة واحدة من وحدات قياس قدرة التكييف وهي الطن، واللي منها بنقدر نقيس سعة تبريد التكييف، وكفاية إننا نقول إن أقصى سعة تبريد للتكييف التكييف محدودة لحد ٢ طن وأقصى سعة تبريد للتكييف الاسبليت ش مقيدة عند ٢ طن بس، عشان نقدر نعرف إن قدرة تبريد التكييف الاسبليت أكبر بكتير من قوة تبريد التكييف الشباك وعشان كده بستخدم التكييف الاسبليت في توفير قوة تبريد كافية للمساحات الكبيرة.

السعر

سعر التكييف الاسبليت بيتكلف تقريبًا ضعف التكييف الشباك اللي بنفس قدرة التبريد، يعني لو تكييف سبليت بسعة تبريد ١٫٥ طن هيكلفك ضعف سعر التكييف الشباك بسعة تبريد ١٫٥ طن برضه، وعشان كده لازم تبقى عارف كويس احتياجاتك إيه عشان تحتار الأنسب على مستوى السعر، يعني مثلًا لو محتاج تكييف لأوضة صغيره ومش فارق معاك أوي السعر والإمكانيات فيهكون التكييف الشباك هو أنسب حل ليك.

استهلاك الطاقة

في البداية ومع ظهور التكييفات الاسبليت كان استهلاكها للطاقة أعلى بكتير من التكييف الشباك، بس ده اتظبط مع الوقت ومع تطور التكييفات وظهور تكنولوجيا الإنفرتر الموفرة للطاقة بنسبة بتوصل لحد ٤٠ في الميه في بعض التكييفات، بس في الوقت نفسه استهلاك الطاقة عملية معقدة شوية في الحسابات وبتتوقف على عدة عوامل زي سعة التبريد وقدرة التكييف وفئته كمان، وعشان كده لازم تبقى حريص في اختيار التكييف المناسب على حسب مساحة الأوضة وسعة التبريد.

الضوضاء والإزعاج

فكرة التكييف الاسبليت أصلًا قامت على فصل الجزء المسؤول عن الضوضاء عن وحدة التكييف الأساسية وده معناه إنه طبعًا صوته أقل ويكاد يكون مالوش صوت أصلًا في حالات كتير لأن الوحدة المسؤولة عن الضوضاء والإزعاج بتبقى موجودة برة البيت أصلًا، أما التكييف الشباك فصوته عالي ومزعج بحد كبير وده من بين أبرز عيوبه.

الصيانة

في الجزء ده تحديدًا بيتفوق التكييف الشباك بوضوح، فصيانته النوع ده من التكييفات سهل جدًا بفضل تصميمه المدمج وإن كل مكوناته موجودة في علبة واحدة منظمه وبسيطة التفاصيل، وعشان كده دايمًا بتكون صيانته سهلة ومع الوقت تقدر انت بنفسك تعمله الصيانات الأساسية، وده على عكس التكييف الاسبليت المعقد جدًا واللي بيحتاج متخصص خصوصًا لو العيب كان في الوحدة الخارجية، كمان اكتشاف الأعطال في الشباك أسهل بكتير من الاسبليت.

الخلاصة

من خلال السطور اللي فاتت من المقال ده حاولنا نشرح الفروق الكاملة بين التكييف الاسبليت وبين التكييف الشباك وعرفنا إن لكل واحد فيهم مميزاته وعيوبه، وبناكد تاني إنه رغم إن التكييف الاسبليت بيفرض تفوقه بقوه، إلا ان الاختيار برضه متروك ليك لاحتياجاتك وللميزانية اللي ناوي تخصصها لشرا التكييف ده.

شوف عروض أسعار مختلف التكييفات المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.