كتب: خالد عاصم

من بين كل شركات تصنيع الكاميرات بتعتبر كانون هي أكبر شركة لتطوير وتصنيع الكاميرات في العالم، ودي حاجة ماجتش بالصدفة ولا لأن الشركات التانية ضعيفة، السبب الحقيقي ورا تفوق كانون هو قدرتها على تقديم كاميرات مناسبة لكل المستخدمين سواء كانت كاميرات مبسطة ومدمجة وسهلة الاستخدام بتساعد على التصوير بجودة عالية من غير تعقيدات، أو كانت الكاميرات الاحترافية اللي ممكن تكون معقدة وأكيد سعرها غالي بس كمان بتقدم أعلى جودة ممكنة سواء كنت هتصور بيها فوتوغرافية أو فيديو، ومن بين الكاميرات اللي من النوع ده كاميرا Canon EOS 6D Mark II اللي ممكن نوصفها ببساطة بعملاقة التصوير.

والنهارده ومن خلال المقال ده هنتعرف أكتر على كاميرا Canon EOS 6D Mark II وهنعرف مواصفاتها ونراجع المواصفات دي عشان نكتشف مميزات وعيوب الكاميرا. وماتنسوش لو الكاميرا عجبتكم وعايزين تشتروها، تقدروا من خلالنا في ياقوطة تعرفوا أحسن أسعارها وتقارنوا بينها وتقدروا تطلبوها من على الموقع وتوصلكم لحد البيت أو مكان ما تحبوا في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

كاميرا Canon EOS 6D Mark II

المواصفات Canon EOS 6D Mark II

• نوع الكاميرا: DSLR
• نوع المستشعر: CMOS
• منفذ العدسات: Canon EF
• البيكسلات: ٢٦٫٢ ميجا بيكسل.
• حجم البيكسل: ٥٫٦٧ ميكروميتر.
• الإطار: إطار كامل.
• المعدل: ٣:٢
• معدل التصوير المستمر: ٦٫٥ إطار في الثانية.
• البروسيسور: DIGIC 7
• نطاق ISO للحساسية: من ١٠٠ لحد ٤٠٠٠٠.
• التركيز التلقائي: لحد ٤٥ نقطة.
• سرعة الشاتر: من ١/٤٠٠٠ ثانية لحد ٣٠ ثانية.
• منفذ Viewfinder: بصري بمعدل زوم لحد 0.71x
• الشاشة: شاشة LCD من نوع TFT قطرها 3 بوصة بمعدل ٣:٢ ودقتها تقريبًا ١٫٠٤ مليون نقطة قابلة للمس وقابلة للحركة.
• نوع الصور: JPEG – RAW
• تصوير الفيديو: لحد جودة 4K

مراجعة كاميرا Canon EOS 6D Mark II

بتتميز كاميرا Canon EOS 6D Mark II بمستشعر قوي من فئة CMOS بإطار كامل وبقوة بيكسلات جيدة جدا بتوصل لحد ٢٦٫٢ ميجا بيكسل، والمستشعر متصمم عشان يقدر يقدم صور جودتها عالية جدًل وبتفاصيل ممتازة وكمان قدرة على التصوير في أوضاع إضاءة مختلفة بفضل نطاق ISO اللي بيتراوح بين ١٠٠ لحد ٤٠٠٠٠ وبالمعدلات دي بمساعدة حجم البيكسل المستخدم واللي حجمه ٥٫٦٧ ميكروميتر، بتقدر الكاميرا تلقط صورة بدقة ٦٢٤٠ × ٤١٦٠ بيكسل مليانه تفاصيل وبألوان بتنطق بالحياة.

وبتعتمد الكاميرا على بروسيسور DIGIC 7 المتطور وده بيساعدها على الوصول لمعدلات سرعة ممتازة وبيأثر بكل إيجابي على جودة الصورة من ناحية وعلى إمكانية التصوير الممتازة حتى في ظروف الإضاءة الضعيفة سواء كنت بتصور صور فوتوغرافية أو فيديو.

بفضل كل اللي فات وكمان عشان سرعة الشاتر اللي بتتميز بيها Canon EOS 6D Mark II بتقدر الكاميرا تصور تصوير مستمر لحد ٦٫٥ فريم في الثانية وكمان قوة وسرعة البروسيسور بتزود من سرعة ودقة نظام التركيز التلقائي القوي المعتمد على تقنية Dual Pixel الممتازة الي بتشتغل بكفاءة ممتازة في تصوير الفيديو والفوتوغرافية بس بتقل شوية مع استخدامها من خلال منفذ Viewfinder.

الكاميرا كمان بتمتاز بمقاومتها للظروف الجوية المختلفة وده اللي بيسمح باستخدامها في المطر أو في درجات الحرارة المنخفضة جدًا. وكمان الكاميرا مزودة بمختلف تقنيات الاتصال زي الوايف اي والبلوتوث وكمان NFC.

مزايا Canon EOS 6D Mark II

• كاميرا Canon EOS 6D Mark II كاميرا قوية جدًل بقوة ٢٦ ميجا بيكسل وبمستشعر جودته عالية بنطاق وأداء ISO متميز.
• الكاميرا قدرتها ممتازة على إنتاج الألوان في صور JPEG
• أساليب التحكم في الكاميرا ممتازة وسهلة رغم تعقيد إمكانياتها.
• الكاميرا بتدعم التركيز التلقائي بتقنية DUAL Pixel الممتازة.
• شاشة الكاميرا دقتها عالية جدًا غير إنها قابلة للمس وللحركة في اتجاهات مختلفة.
• الكاميرا بتقاوم تغييرات المناخ والظروف الجوية.
• منفذ Viewfinder إلكتروني جودته عالية.
• الكاميرا قادرة على التصوير المستمر لحد ٦٫٥ إطار في الثانية.
• نظام التركيز التلقائي اللي في الكاميرا قوي جدًا بصورة عامة.
• الكاميرا بتدعم الاتصال اللاسلكي واي فاي وبلوتوث وكمان NFC
• الكاميرا فيها نظام تثبيت صورة بصري ممتاز للصور الفوتوغرافيه والفيديو.

عيوب Canon EOS 6D Mark II

• الحد الأدنى في نطاق ISO في الكاميرا أقل من كاميرات تانية منافسة.
• التركيز التلقائي التحكم فيه صعب شويه من خلال منفذ Viewfinder
• بالإضافة للنقطة اللي فاتت كمان فيه مشكلة تأخير شوية بين التحكم في التركيز التلقائي وبين ظهوره على المنفذ.
• في وضع Live View مع التركيز التلقائي بيكون التصوير المستمر بطيء جدًا.
• جودة تصوير فيديو 1080p بمعدل ٦٠ إطار في الثانية تفاصيله مش عميقة وألوانه مش ممتازة.
• الكاميرا مفيهاش منفذ لتوصيل سماعات.

شوف كاميرا Canon EOS 6D Mark II من هنا

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من 2007 ومن سنة 2013 تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من 1000 تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة 1999 وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.