كتبت: سارة عمار

معظم البيوت بتعاني من مشكلة إخراج الأكل الجاهز من التلاجة أو الديب فريزر وتسخينه، أو لما يكون فاضل تحمير الفرخة، أو وش صينية البطاطس لسه ما أخدش لون، الساندوتشات بقيت باردة ومحتاجة تتسخن والجبنة تسيح، عشان كده ياقوطة حلّتلكم المشكلة دي وجابتلكم فرن تحميص من الحلول الذكية العصرية، وهتقولكم كل حاجه عنه في الريفيو اللي جاي ده.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مواصفاته

الحلو فيه

• سعته كويسة قوي عشان تقدري تحطي أكبر كمية فيه، ممكن صينية أو طبق بايريكس كبير، وده بيوفر وقت أكتر من السعة الصغيرة اللي لازم ندخل طبق طبق.
• في ٣ مفاتيح أول مفتاح بلفه لدرجة الحرارة اظبطها، وتاني مفتاح عشان عايزا اشغله ايه تحمير لحمة يعني الحرارة من فوق ولا تحميص العيش الحرارة من فوق ومن تحت ولا شوي الفرخة ولا إزالة ثلج عن العيش الفينو حرارة من الجناب؟، ثالث مفتاح الوقت بقى في الأول ماكنتش بظبطه كنت بقفل وافتح أنا لحد ما اتعودت عليه وخلاص عرفت كل حاجة محتاجة وقت قد ايه.   
• عملي أوي في المطاعم اللي بتقدم وجبات وأطباق وأصلًا أنا عرفته منهم وجبته لما شوفتهم بيستخدموه.
• في مكان أقدر ألف السلك عليه عشان مايتنيش مني وأنا بلمه.
• الناس اللي بتخاف من فكرة التسخين بالإشعاع والكلام ده، الفرن ده لاغي الكلام ده خالص وآمن تمامًا لأن الحرارة من ترموستات عادية خالص بتوزع الحرارة بشكل مكثف على حسب عايزا الفرن يعمل ايه.

الوحش فيه

• بيسحب كهرباء جامد وطبعًا لاحظت فرق السحب لما كنا في رمضان و عندي عزايم وشغلته كتير، الفاتورة جت غالية قوي.
• بيسخن أوي وبيسخن المكان حواليه اضطريت احطه على رف خشب وتحت بلاطة سيراميك أو رخام و لوحده، بعيد عن أي حاجة عشان السخنية ماتبوظش أي حاجة.
• الثانية بتفرق في الفرن ده يعني لو سبت الحاجة ثانية ممكن تتحول من جهزت الأكل لحرقت الأكل في لمح البصر، عشان كده كان لازم أخد بالي أوي، والمفروض الدليل اللي يجي معاه يكون شامل لأدق التفاصيل دي، يعني الساندوتشات اتعلمت احطها ٣ دقايق، البيتزا عشان الجبنة الموزاريلا ٥ دقايق، الكيك الفادج ٧ لـ ٩ دقايق أو أكتر لو الحتة كبيرة.  
• إيد الفرن مش عازلة للحرارة ولازم البس جونتي أو امسكها بفوطة.

اللي بعد الشراء

مالوش قطع غيار ولا صيانة ولا ضمان، بس ممكن يتصلح تبع الأفران العادية لو حاجة باظت فيه، بس عامة أفران الكهرباء كلها ملهاش صيانة، حتى الباب لما بيتكسر خلاص كده مفيش حل غير انه يتلزق تاني ودي فكرة فاشلة.

شوف فرن تحميص بلاك أند ديكر من هنا.

وتقدروا لو حابين تبصوا على إمكانيات أعلى وماركة ليها اسم وضمان وتوكيل قوي زي باناسونيك تشوفوه من هنا.

مش كل الناس جربت فرن التحميص، لو عندك تجربة معاه قولها لـ ياقوطة في كومنت.