دليل ياقوطة لاختيار هاتف بأفضل كاميرا
كتبت: منى عوض
أي واحد بيقرر إنه يشتري موبايل بيبقى محدد شوية مواصفات عشان يشتريه بناءً عليها. زي مثلا البطارية، فيه ناس بتهتم جدًا بقوة وكفاءة بطارية الموبايل بتاعها. وواحد تاني استعماله للموبايل بسيط. مكالمات وشوية فيسبوك على واتساب وخلاص. وفيه اللي بيهتم بالأداء وقوته وعاوز يتعامل مع أكتر من برناج في وقت قليل. وفيه كمان – ودي نسبة كبيرة برضه- ناس بتهتم بالكاميرا وقوتها، وتباين الألوان وقربها من الوقاع، والعزل وغيرها من تفاصيل الكاميرات. واحد عايز موبايل ببطارية تقعد فترة طويلة واحد تاني عايز الموبايل عشان يتكلم فيه وبس ومش فارق معاه حاجه تانية وهتلاقي حد تالت عايز أداء سريع وسلس بس الفئة الأكبر من المستهلكين بتدور دايمًا على موبايلات بكاميرات بتقدر أنها تقدم صور جبارة من حيث الوضوح والتفاصيل وكل حاجه.
هنتكلم النهارده من خلال ياقوطة عن أهم طرق ومعايير اختيار كاميرات الموبايلات المختلفة.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
عدد البكسلات
كان من المعتقد في الماضي إن كلما زاد عدد البكسلات زادت جودة الصورة ولكن الاعتقاد ده خاطئ لأن عدد البكسلات مش الحاجة الوحيدة المسئولة عن جودة الصورة بل فيه عوامل تانية بس في العموم عدد البكسلات دي مقصود بيها عدد النقاط اللي بتتكون منها الصورة.
وخلينا نوضح إنه كلما زاد عدد البكسلات في الصورة كل ما زادت التفاصيل ووضوحها وكمان كلما زاد عدد البكسلات في الصورة كلما ما زادت القدرة على طباعة الصورة بحجم ووضوح أكبر، ده بجانب إنه كلما زادت عدد الميجابكسل بتاعة الكاميرا كلما هتقدر تعمل زووم للصور بشكل أفضل من غير ما تفاصيل الصور تروح بشكل كبير.
فتحة العدسة
دي عبارة عن ثقب داخل العدسة بينتقل الضوء من خلاله إلى جسم الكاميرا، وبيشتغل زي قزحية العين اللي بتتسع كل ما كان الإنسان في إضاءة منخفضة أو ظلام وبتتقلص كل ما كانت البيئة المحيطة بتمتاز بإضاءة عالية.
فتحة العدسة بتأثر على جودة الصور يعني كلما كانت العدسة أكبر كلما كان حجم الضوء المنعكس إلى داخل جسم الكاميرا أكبر وبالتالي كلما كانت الصور الملتقطة أكثر إشراقًا وبالتالي جودة وضوح أعلى.
والجدير بالذكر كمان إن فتحة العدسة دايمًا بيشار ليها في مواصفات أي موبايل بالعلامة (رقم/F)، مع العلم إنه كلما كان الرقم صغير كلما كانت فتحة العدسة أكبر يعني فتحة العدسة اللي رقمها F/1.6 بتكون أفضل من فتحة العدسة F/2.0 لأنها بتقدر بالتالي تستقطب كمية ضوء أكبر خلال عملية التصوير وبالتالي الصور بتكون واضحة أكتر.
حجم المُستشعر Sensor
الجزء الأكبر من مهمة تصوير صور بجودة ووضوح عالي بتقع على عاتق المُستشعر ده لأنه مسئول عن استقبال ومعالجة الضوء الداخل من فتحة العدسة لجسم الكاميرا وبالتالي إنتاج الصور.
وكلما كان حجم المستشعر كبير كلما قدر إنه يستقطب ضوء أكبر كلما قدرنا أننا نحصل على صور جودتها أفضل ودرجة التشويش فيها أقل خاصة في ظروف الإضاءة المنخفضة.
الفلاش LED
من المعروف إن الفلاش مجرد وميض أو ضوء بسيط بيظهر خلال عملية التقاط الصور وده عشان يقدر يوفر صور بجودة أفضل خاصة في ظروف الإضاءة المنخفضة، بس طبعًا فلاش LED الثنائي أو الرباعي اللي بدأ يظهر مؤخرًا في عدد من الهواتف بيُعتبر أفضل لأنه بيقدر يوفر وضوح أفضل للصور.
الزووم
الزووم بيكون متوافر منه نوعين في الموبايل، أولهما الزووم البصري عن طريق عدسة الزووم وده بيُعتبر زووم حقيقي يعني بيتم خلال عملية التصوير يعني تقدر تكبر الصورة زي ما إنت عايز وبعدين تصور وده مش بيأثر تمامًا على جودة الصور.
أما النوع التاني فهو الزووم الرقمي وده بيتم بعد التصوير يعني بمجرد ما تلتقط الصورة تقدر تعمل زووم أو تقرب حاجة معينة في الصورة بس هنا جودة الصورة بتبدأ تقل تدريجيًا.
المثبت البصري OIS
حاول دايمًا تتأكد من وجود خاصية المثبت البصري في كاميرا الموبايل لأنها خاصية مهمة جدًا بتساعد في الحصول على صور جودتها عالية ومش مهزوزة يعني واحنا ماسكين الموبايل في أيدينا وبنصور وارد جدًا إن الأيد تتهز ولو حاجة بسيطة وهي بتصور ويجي هنا بقى دور المثبت البصري اللي بيمنع ظهور الاهتزازات دي في الصور.
ده طبعًا غير خصائص الكاميرات المعروفة زي خاصية الكشف التلقائي لبؤرة العدسة وخاصية التركيز التلقائي والتصوير البانورامي.
ممكن تختار أكتر موبايل مناسب لاحتياجاتك وتطلبه كمان من خلالنا من هنا.
ياقوطة بتقدملك أهم النصائح والمقترحات لاختيار التليفون المناسب لأولادك.
مش عارف تفرق بين الموبايل الأصلي والتقليد يبقى اعرف الفرق مع ياقوطة.
ممكن كمان تعرف أحدث التقنيات الموجودة في الهواتف المحمولة لحمايتها من السرقة والضياع من خلال المقال ده.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.