نصايح ومقترحات: إزاي تختار التليفون المناسب لأولادك؟

morga7a

كتب: أحمد إبراهيم

أول ما ظهر الموبايل، كان جهاز مخصص لرجال الأعمال، ومع تطور التكنولوجيا ورخص تمنه، بقى متاح لكل الناس عشان يقدروا يتواصلوا مع بعض في أي وقت، وخلال السنين الأخيرة بقى فيه ألعاب ووسائل تواصل اجتماعي وكاميرات وعشرات الخواص اللي بتخليه مغري للأطفال والمراهقين.

ومع تزايد أهمية وجود موبايل مع الأطفال للاطمئنان عليهم وهم في النادي، في الدرس أو عند حد من أصحابهم، بقى لازم تختار موبايل طفلك بعناية بحيث يكون على قد احتياجاته ومتطلباته في العمر ده.

ياقوطة بتقدملك خطوات ونصايح لكيفية شراء موبايل مناسب لابنك عشان تقدر تطمن عليه.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

قبل ما تفكر تشتري تليفون لطفلك، فيه بعض الأسئلة اللي لازم تحدد إجابتها في الأول:

إمتى الطفل ممكن يتحمل مسئولية الموبايل؟

الإجابات بالطبع مختلفة طبقًا لأسلوب كل عيلة في التربية.

دكتورة مها عماد الدين، استشاري الطب النفسي للأطفال والمراهقين، بتنصح الآباء بعدم شراء تليفونات محمولة لأولادهم قبل ما يوصلوا لسن ١٢ سنة. دكتورة مها قالت لـ ياقوطة إن الطفل في السن الصغير مش المفروض يروح المدرسة ومعاه تليفون نظرًا لإن ده ممكن يأثر على تركيزه، وكل ما يقل تعامل الطفل مع الإلكترونيات، كل ما بيزيد نمو مهارات التواصل عنده.

في أوروبا وأمريكا، فيه منتجات مختلفة مخصصة للأطفال في السن الأصغر، زي My Buddy Tag، وAmber Alert GPS، وTrax وغيرها، على شكل ميداليات أو ساعات، جواها أجهزة تتبع GPS بتراقب مكان تواجد الطفل طول الوقت، وجواها إمكانيات محدودة في استقبال المكالمات والاتصال من أرقام محددة من الأبوين.

للأسف النوع ده من المنتجات ما زال غير متوافر في مصر والأسواق العربية، خصوصًا إن أغلبها غير متوائم مع شركات المحمول المصرية وأغلب منتجيها شركات ناشئة عمرها سنوات قليلة. لكن مع التطور التكنولوجي الكبير في سوق أجهزة الاتصال بالأطفال وازدياد الوعي بيها، من المتوقع ظهور منتجات متوائمة مع احتياجات جمهور الشرق الأوسط آجلًا أو عاجلًا.

لحد ما ده يتحقق، لازم تحط في الاعتبار بعض الأمور لو قررت إنك محتاج تشتري تليفون لابنك أو بنتك في سن صغير، أهمها الغرض من التليفون، هل هو التواصل والاطمئنان أم التعليم والمذاكرة؟

في حالة التواصل فقط، فيُنصح بتليفون صغير رخيص الثمن، وفي حالة المذاكرة، فربما يكون الأفضل شراء tablet موجود في البيت للغرض ده فقط، من غير الحاجة لتليفون.

لو قررت تشتري تليفون لطفلك، إيه هي المحاذير اللي لازم تعلّمهاله؟

دكتورة مها قالت إن الأطفال الصغيرين مش هيبقوا فاهمين الاحتياطات الأمنية المتعلقة باستقبالهم للمكالمات، زي مثلاً إن حد ممكن يتصل بيهم للمعاكسة، أو معرفة أماكنهم أو معرفة معلومات عنهم وعن تحركات أهلهم، وغيره.

ومن هنا لازم التوعية الكبيرة بإن التليفون مش لعبة، وإنه غير مسموح بالرد على الأرقام الغريبة أو ذكر أي معلومات شخصية من أي نوع غير للوالدين فقط.

أما الأطفال فوق سن الـ ١٢ سنة، فدكتورة مها قالت إن أهم حاجة قبل ما تجيبله الموبايل، هي إنه يفهم مدى خطورة بعض التصرفات على سلامته وعلى مستقبله، خصوصًا في التعامل مع الإنترنت ووسائل التواصل الاجتماعي.

«لازم الآباء يفهّموا ولادهم إن أي حاجة هيكتبوها على السوشيال ميديا حتفضل معاهم طول العمر»، قالت الدكتورة مها. عشان كده هي بتنصح إن الأطفال في السن ده ما يحطوش أي صور شخصية ليهم، ويفكروا قبل ما يحطوا أي حاجة إن كان فيه حاجة من اللي بينشروها ممكن تضايقهم لو اتعرفت عنهم حتى لو بعد ١٠ سنين.

إزاي تحافظ على التليفون من الكسر؟

يفضل دايمًا للأطفال الأقل سنًا، تليفونات بشاشات أصغر نسبيًا وتستحمل الصدمات. في حالة الموبايل اللي شاشته أكبر، من الأفضل شراء جراب قوي ويستحمل، خصوصًا لو الموبايل تمنه كبير. تليفونات الـ iphone مثلاً، ممكن حمايتها بجراب lifeprood NUUD اللي بيخليه مقاوم للكسر والمياه، وبيقلل جدًا من احتمالية تكسير الشاشة من اللعب، أو جراب Rugged Armor اللي بيصلح لموديلات مختلفة من موبايلات سامسونج وغيرها.

في كل الأحوال، لو فيه احتياج إنك تشتري تليفون لابنك أو بنتك لرغبتك مثلًا في إنك تطمّن عليهم، أو لأنهم كبروا ونفسهم في تليفون، فلازم تفكر أولًا في السعر اللي تقدر تستحمله مقارنةً باحتمالية إن التليفون يتكسر، والإمكانيات المتعلقة بقدرة التليفون في استخدامه في المذاكرة واللعب، وطبعًا مدى قدرتك على مراقبة كيفية استخدامه للتليفون والتأكد من إنه مش هيستخدمه بشكل يضر بيه.

إيه أفضل نظام استخدام للأطفال؛ ويندوز، أندرويد ولا IOS؟

نظم التشغيل المختلفة بتقدم إمكانيات متفاوتة في مناسبتها للأطفال.

نظام Windows فيه مزايا مخصصة للآباء والأمهات، وإمكانيات كبيرة في السيطرة على المحتوى اللي بيشوفه الطفل، من خلال خاصية Microsoft Family، ودي بتسمح بتحديد نوعية المواقع المسموح بيها والأخرى الممنوع على الأطفال مشاهدتها، وأنواع الـ apps اللي مسموح ينزلوها، وتحديد وقت أقصى لعدد الساعات المسموح ليهم باللعب فيها على التليفون يوميًا.

نظام تشغيل Android عنده بعض الخصائص اللي بتسمح للآباء إنهم «يسلّفوا» تليفوناتهم الشخصية لأطفالهم من غير خوف على إنه يفتح حاجة سرية أو خاصة، لكن إمكانيات نظام التشغيل محدودة في إنه يراقب تصرفات الأطفال بشكل كامل ويمكن الأبوين من الرقابة على موبايلات أطفالهم.

أما نظام تشغيل IOS المخصص لأجهزة الـ iphone فهو الأكثر تطورًا في تمكين الأهل من مراقبة أطفالهم، بعشرات الخصائص اللي بتقدر تحدد استعمالات الطفل للتليفون، وتمنع عنهم أي خصائص أو تطبيقات غير مرغوب فيها، زي مواقع وتطبيقات التواصل الاجتماعي مثلًا، بالإضافة لإمكانية مراقبة أماكن تواجدهم طول الوقت.

في القايمة الجاية، ياقوطة بتقدملك بعض أفضل التليفونات اللي ممكن تكون مناسبة لأطفالك.

Alcatel One Touch

أحيانًا بتكون إمكانيات الموبايل القليلة والمحدودة ميزة في حد ذاتها. موبايل ألكاتيل One touch 1054 بسيط جدًا. ده بيخليه مناسب للأطفال لأنه لو اتكسر مش هيبقى خسارة ضخمة، غير إنه مش مطمع كبير للحرامية.

مفيش قلق كبير على خصوصية طفلك أو تعرضه لأي محتوى غير مناسب لعمره، ببساطة لإن التليفون غير مزود بإنترنت أو كاميرا أو بلوتوث، واستخدامه الوحيد إنك تطمّن عليه بيه، أو إنه يتصل بيك في حالة الطوارئ.

نوكيا Nokia 105

بعيدًا عن سباق الموبايلات الذكية، وسعة الذاكرة وقوة البروسيسور، ما زالت الموديلات القديمة لنوكيا حافظة مكانها ومركزها، وده بيحطها في مكانة مميزة للغاية، خصوصًا في فئة الموبايلات المناسبة للأطفال صغار السن.

موبايل Nokia 105، زي أغلب هواتف نوكيا، بطاريته قوية جدًا، وممكن تفضل ٨٤٠ ساعة من غير شحن، و١٢ ساعة ونص من المكالمات، ودي ميزة مهمة، بتضمن التواصل مع طفلك لوقت طويل من غير قلق من إنه يفصل شحن.

Microsoft Lumia 540

موبايل Microsoft Lumia 540 يعتبر بداية معقولة كأول smart phone لطفلك، اللي كبر كفاية إنه يقدر يشيل تليفون ذكي. سعره مش كبير نسبيًا، وبيبدأ بـ ١٠٠٠ جنيه. إمكانيات الموبايل كتليفون ذكي كويسة جدًا مقارنة بسعره. كاميرا ٨ ميجابيكسل بفلاش وبتصور فيديو، ذاكرة ٨ جيجابايت، مع مكان لإضافة كروت ذاكرة، وشاشة ٥ بوصة Touchscreen.

أول ميزة بتخليه مناسب للأطفال في المرحلة دي إن تليفونات ميكروسوفت فيها برامج الـ office، اللي سهل توصيلها بالكمبيوتر والاتصال بيها بطرق مختلفة من أجهزة الكمبيوتر اللي بنظام تشغيل ويندوز. الخاصية دي ممكن تبقى مفيدة جدًا في ظل اعتماد كتير من المدارس على الكمبيوتر في حل الواجب وإعداد المشاريع المدرسية المختلفة، وبالتالي وجود الـ office هيساعد الأولاد، الآباء والأمهات على التواصل بخصوص مذاكرتهم بشكل أسرع وأفضل ومن أي مكان.

الميزة التانية هي وجود المساعد الصوتي الذكي الخاص بميكروسوفت Cortana، وممكن الاستعانة بيها في تذكير أولادك بمواعيد العشا والمذاكرة وغسيل الأسنان وغيرها، غير قدرتها على الرد على أسئلة أولادك بخصوص أي حاجة. وطبعًا ميكروسوفت ما نسيتش تربط Cortana بجهازها الشهير الخاص بالألعاب XBox، ويبقى ممكن من خلال التليفون إنه يتكلم مع الـ Xbox ويديله أوامر مختلفة.

Samsung Galaxy J1 Ace

يعتبر الـ Samsung Galaxy J1 Ace تليفون smart كويس مقارنة بسعره الرخيص نسبيًا، لكن هو فيه مزايا كويسة بالنسبة لسعره، زي الـ 1.3 GHZ Dual Core Processor، والـ Touchscreen، وكاميرتين خلفية ٥ ميجابيكسل، وأمامية ٢ ميجابيكسل.

نظام التشغيل للتليفون هو أندرويد، ودي بيدي لطفلك القدرة على الدخول لآلاف الألعاب والأبليكيشنز المختلفة. مؤخرًا، أندرويد بدأت تحط إمكانيات جديدة لتمكين الآباء والأمهات من تتبع أولادهم، وبدأت تظهر بالفعل في بعض الـ tablets، لكن للأسف لسه مش متوافرة في التليفونات الذكية.

بس لحد ما Android تطور من الخصائص دي، فيه Store أبليكيشنز مجانية كتير مخصصة للمهمة دي، زي منع الأطفال من الدخول على مواقع خارجة أو تنزيل Apps جديدة من غير كلمة سر. عمومًا نظام Android بينزله تحديثات بشكل دوري واستخدامه سهل، وده اللي بيدفع البعض لتفضيله عن موبايلات الويندوز.

iphone

طبعا منتجات أبل هي الأغلى في السوق لكن برضه ده ليه مقابل في قيمة وجودة المنتج. تقدر توفر شوية في تمن الأيفون بشراء موديل أقدم، زي iphone 5s. بعيدًا عن كل مميزات الأيفون المعروفة، من سهولة التصميم وسرعة البروسيسور والخيارات المتاحة في App Store، نظام IOS جواه إمكانيات رائعة للتحكم في كل حاجة يقدر يشوفها طفلك.

النظام بيسمحلك بسهولة شديدة في تحديد الـ Apps اللي مسموحله يفتحها، وتفعيل نظام رقابي بيمنعه من فتح أي محتوى مخصص للكبار فقط على أي موقع، إضافة لإمكانية منعه أو السماح ليه من استخدام إمكانيات الجهاز المخنلفة، ابتداءً من إرسال الصور ومشاركة مكان وجوده، لاستخدامه لوسائل التواصل الاجتماعي وSiri.

ممكن كمان تستخدم الأيفون في معرفة مكان طفلك بسهولة وتتبع مكانه، أو الاطلاع على تاريخ تصفحه، وغيرها من الإمكانيات.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا فى تعليق أو من خلال صفحة Yaoota.com على فيسبوك.

Leave a Reply

Your email address will not be published. Required fields are marked *