كتب صفاء مجدي

في مرحلة ما في تاريخ البشرية كان أقصى أحلام البشر وتحديدًا الستات أنهم يضغطوا على زرار يقوم الأكل يجهز لوحده أو الهدوم تتغسل بسرعة أو السجاد يتنفض لوحده أو الهدوم تنشف في ساعتها. ونحمد ربنا إن الأحلام دي تحققت في حياتنا. عمرك وقفت أدام الغسالة وتساءلت عن مين اخترعها عشان تروح تشكره بنفسك؟ من غيره كان زمانك بتغسل في طشت وبتسخن ميه وبتمر بعملية متعبة جدًا.

أجهزة البيت عموما مهمة جدًا في حياتنا ومن غيرها هنحتاس وياقوطة النهاردة جابت لكم تاريخ الأجهزة دي. بشكل عام تطوير الأجهزة المنزلية بدأ من سنة 1800 لحد ما وصلت للشكل اللي عارفينه دلوقتي، تاريخ وحكاية الأجهزة المنزلية وتطورها مرتبط ارتباط وثيق بالحركة النسوية ورغبة السيدات في الخروج من البيت والعمل زيهم زي الرجالة بالظبط. من هنا بدأت محاولات لاختراعات تقلل عدد ساعات العمل للنساء داخل البيت وتسمح لهم بوقت أكتر يقضوه براحتهم، وأول اختراع نبدأ بيه هيكون البوتاجاز.

البوتاجاز

اختراع البوتاجاز من الحاجات المهمة جدًا لأن الناس زمان كانت بتطبخ على سطح من الحديد وبيولعوا تحته حطب أو فحم وده كان طبعًا شيء خطير، وكان بيسبب فوضى كبيرة جدًا وبيسيب آثار سوداء على جدران البيت وبتكون ريحة البيت كأنه بيولع. وكمان كان مش عملي لأن استخدام البوتاجاز البدائي ده كان بيبدأ الصبح بدري مع تحضير أكل الفطار وعشان تفضل محافظ عليه لوقت الغداء أو العشاء لازم يكون البوتاجاز مولع نار على طول فكان بيستهلك وقود كتير جدًا. فضلت الناس تستخدم النوع البدائي ده من الطبيخ لحد نهاية القرن الـ 19.

مع نهاية القرن الـ19، بدأ استخدام الجاز في التدفئة والإضاءة، الاكتشاف ده غلب استخدام الفحم. شوية بشوية حلت المصابيح الكهربية محل المصابيح الجاز وعشان مصانع اللمبات دي متعطلش فكروا في طريقة تانية لتعويض الخسارة ففكروا يخترعوا بوتاجاز بيشتغل بالجاز بدل الفحم، وكان البوتاجاز الجديد ده بحجم أصغر وأسهل في الاستخدام من بوتاجاز الفحم، ده غير إن عامل الأمان والسلامة كان أفضل. شوية بشوية ظهرت البوتاجازات الكهربية والبوتاجازات اللي بتشتغل باللمس وكل الاختراعات اللي موجودة دلوقتي.

المكواة

المكواة زمان كانت جسم حديد بيتسخن على النار وبعدين نكوي بيها الهدوم. غالبًا لو المكواة مكنتش اتطورت بالشكل اللي عندنا دلوقتي كنا كسلنا كلنا نكوي هدومنا؛ عشان الموضوع كان متعب جدًا. المكواة الكهربية الخفيفة تم اختراعها سنة 1903 واخترعها الأمريكي «ايرل ريتشاردسون» من كاليفورنيا.

اختراع المكواة وابتكار فكرة تسخين الأسطح بالكهربا كان السبب في ظهور اختراعات تانية زي الدفاية الكهربية وجهاز تحميص التوست. والفضل يرجع للمهندس « البرت مارش» واللي اخترع خليط النيكروم (النيكل والكروم) اللي بيسخن الأسطح بدون حرقها. وسنة 1927 تم اختراع المكواة اللي بمنظم للحرارة.

الثلاجة

بدأ اختراع الثلاجة بالعالِم المعروف «ابن سينا» اللي اخترع في القرن الـ 11 لفائف التبريد، وبعدها في سنة 1784 تم اختراع أول جهاز نقدر نسميه الثلاجة واللي ظهر في جامعة جلاسجو. سنة 1913، اخترع «فريد وولف» أول تلاجة واللي كانت وحدة صغيرة بتتحط فوق آيس بوكس. وفضل شكل التلاجة يتغير ويتطور لحد ما وصلنا لشكل التلاجة العادي اللي بتشتغل بالفريون وكان دا في سنة 1929.

وقبل ما يكون فيه تلاجة، كانت البيوت بتستخدم حاجات زي النملية واللي هي وحدة من وحدات المطبخ بتكون مصنوعة من الخشب وليها شباك من السلك الرفيع جدًا واللي كانت بتحفظ الطعام بعيد عن الحشرات والتراب. وطريقة تانية للتبريد كانت بحفظ الأطعمة جنب الشبابيك والبلكونات للتهوية أو ببساطة كانت الناس ببتجنب تجيب أكل بزيادة عشان ميباتش ويبوظ.

الغسالة

مش صعب إننا نتخيل الحياة قبل اختراع الغسالة، كانت الناس بتغسل في طشت الغسيل أو زي ما لسه بنشوف في بعض القرى ناس بتغسل هدومها في الترع. غسالة الملابس مظهرتش لحد منتصف الثلاثينات على يد مخترع اسمه «جون شامبرلاين».

في امريكا كان يوم الاتنين هو يوم الغسيل والعملية دي كان فيها دعك ومياه كتير وكمان ميه مغلية. سنة 1922، كان آخر حاجة وصلوا لها في حوار الغسالات دي هو حوض فيه من تحت مراوح بتلف الميه بسرعة فتخلي المسحوق والمياه تتخلل الملابس وتغسلها كويس لكن كانت زي الغسالات العادية اللي لسه موجودة دلوقتي في مصر واللي بتحتاج حد يصرف المياه، فكانت برده عملية متعبة جدًا.

دي كانت شوية من الأجهزة اللي بنستخدمها في حياتنا من غير ما نفكر في تاريخها أو أهميتها، وعشان كده بنفكرك المرة الجاية اللي تغسل فيها أو تطبخ على البوتاجاز أو تكوي هدومك فكر شوية في المخترعين العظماء اللي سهلوا حياتنا دلوقتي. وماتنساش تدخل على ياقوطة.كوم عشان تعرف آخر الاختراعات في الأجهزة المنزلية.