كتب: خالد عاصم

على مدى السنين اللي فاتت كانت بتظهر إعلانات كتير في التليفزيون خصوصاً في القنوات غير المعروفة بيظهر فيها موبايلات مختلفة خصوصًا موبايلات Samsung وiPhone وبتظهر الموبايلات دي بأسعار أقل بآلاف الجنيهات عن الموبايلات المتوفرة على المواقع وفي المحلات، وفي الإعلانات دي مش بيتقال إن الموبايل ده مُقلد أو مضروب زي ما بنقول، وده خلى ناس كتير تقع ضحية الموبايلات دي بعد ما بتشتريها وتكتشف إن مفيش أي حاجه من اللي اتقالت عنها حقيقية.

ولو كان الموضوع وقف بس عند حد الإعلانات كان هيبقى التحكم فيه سهل، يعني سهل قوي إننا ننصح الناس إنهم مايشتروش موبايلات من إعلانات القنوات دي وخلاص وننقذ ناس كتير من إنهم يقعوا ضحية للموبايلات المضروبة دي، بس المشكلة إن موبايلات كتير مزيفة أو مُقلدة بقت منتشرة في السوق وبتتباع بأسعار أقل شوية من الموبايلات الأصلية وده بيخلي الناس تنخدع فيها وللناس دي بنقدم المقل ده.

فمن خلال المقال ده هنقدم دليل متكامل يخليك تقدر تفرق بين أي موبايلات مزيفة وبين الموبايلات الأصلية وهنستشهد بمجموعة من نماذج الموبايلات المختلفة اللي توضحلك فكرتنا. وماتنساش إنك تقدر تطلب أي موبايل هيظهر في المقال ده من خلالنا في ياقوطة وهيوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

إزاي تقدر الموبايلات الأصلية من الموبايلات المضروبة

زي ما قلنا من شوية بقى صعب بمجرد النظر إنك تفرق بين الموبايلات الأصلية والموبايلات المزيفة وده بسبب إن الشركات اللي بتقلد الموبايلات بقت بتحاول هي كمان تطور من نفسها وتحاول توصل لأقرب شكل من الموبايل الأصلي، وعشان كده بقى صعب التفرقة بينهم بمجرد النظر.

بس قبل ما نتكلم عن الطرق اللي ممكن من خلالها تفرق ما بين الموبايل الأصلي والمضروب خلينا نتفق الأول على شوية نصايح مهمة جدًا:

• لو قادر تشتري الموبايل من التوكيل مباشرة ده يكون أفضل حل وهو حل ممكن يكون صعب على قطاع كبير مننا بسبب ارتفاع أسعار الموبايل في التوكيل عن أي محل مختلف.
• ممكن كمان تشتري من المواقع المتخصصة وطبعًا تقدر تعمل ده من خلالنا في ياقوطة اللي بيقدملك ميزة المقارنة بين أفضل الأسعار.
• لازم تعرف كل تفصيلة عن الموبايل اللي عايز تشتريه قبل ما تنزل تشتريه عشان من خلال التفاصيل دي هتقدر تتبع الطرق اللي هنتكلم عنها بعد كده..

مع افتراض إنك قررت توفر شوية وتنزل تشتري الموبايل اللي انت عايزة من محل عادي متخصص في الموبايلات مش من توكيل ولا من موقع معتمد وموثوق زي ياقوطة، في الحالة دي زي ما قلنا من شوية لازم تكون عارف المواصفات التفصيلية للموبايل اللي ناوي تشتريه، والمواصفات دي منها شكله وتصميمه، أبعاده ووزنه، مواصفاته الداخلية، نظام التشغيل والبطارية، باختصار كل حاجة متعلقة بالموبايل لازم تكون عارفها، وده تقدر تعرفه من خلال مواقعنا المختلف زي ياقوطة وMobilesgate وMobihall اللي بيوفروا معلومات كاملة عن أي موبايل ممكن ييجي في دماغك.

بننصحك كمان إنك ماتنزلش تقلب في الموبايلات وخلاص يعني لازم تحدد الأول مجموعة من الموبايلات المفضلة وتقارب ما بينها وبعد كده تستقر على موبايل بعينه تنزل تشتريه وده هيسهل عليك فكرة إنك لما تنزل تشتري الموبايل تقدر تركز في اكتشاف إنه أصلي أو لا. ودلوقتي نبدأ نتكلم عن طرق اكتشاف الموبايلات المزيفة من الأصلية.

تصميم الموبايل وصناعته

فيه حالتين في تصميم الموبايلات، الأولانية إن موبايل مزيف يبقى بيحمل اسم لموبايل أصلي بس مش بنفس التصميم أصلاً لصعوبة تقليد التصميم زي مثلاً موبايل Oppo Find X.

فالموبايل ده بيعتمد على تقنية صعب قوي إن أي شركة تقلدها ولو قدرت تقلدها بالشكل هيبقى صعب تقلها بالطريقة وهيبقى سهل قوي إنك تكشف الفرق بمجرد معرفتك بتصميم الموبايل الأصلي.

أما الحالة التانية فمتعلقة بموبايل سهل إن تصميمه يتقلد زي مثلاً موبايل Samsung Galaxy S9 Plus اللي مفيش صعوبة كبيرة في إن شركة تقليد تنسخ تصميمه.

في الحالة دي لازم تمسك الموبايل بإيدك لإن ده اللي هيكشف حاجات كتير جدًا أولها تفاصيل الموبايل زي مكان السينسورات مثلاُ والموبايل بكاميرا خلفية وأمامية واحدة ولا اتنين وماسح البصمة موجود فين بالظبط، لأن ممكن شركات التقليد تغلط في تفصيلة من التفاصيل دي.

تاني حاجة بتبقى متعلقة بالصناعة، لأن شركات التقليد عايزة تنزل موبايلاتها بأسعار أقل فلازم تخفض في صناعته بإنها بدل من استخدام المعدن تستخدم البلاستيك وتستخدم البلاستيك برضه بدل القزاز المستخدم في صناعة مقدمة وضهر أغلب الهواتف الرائدة، وكل ده هيأثر على الوزن اللي هتكتشفه بمجرد ما تمسك الموبايل وعشان كده أكدنا إنك لازم تكون عارف أبعاد الموبايل وتفاصيل تصميمه كويس جدًا.

نظام التشغيل

ماينفعش تفتح موبايل iPhone X مثلًا وتلاقيه شغال بأندرويد ولو مكتوب في المواقع الرسمية إن موبايل Samsung Galaxy Note 9 بيشتغل بأندرويد 8.1 أوريو فماينفعش لما تفتحه تلاقيه شغال بأقل من كده أو بنظام تشغيل تاني خالص، عشان كده لازم تتأكد من نسخة نظام التشغيل المستخدم في الموبايل وتتأكد من إن ده نظام التشغيل المستخدم في الموبايل اللي هتشتريه ولا لأ.

أول ما تمسك الموبايل اتأكد من خلال إعدادات الموبايل Settings من نسخة وإصدار نظام التشغيل واتاكد إن لو الموبايل iPhone فإنه شغال بنظام iOS فعلًا مش مجرد ثيم شبهه محطوط على أندرويد.

المكونات والإمكانيات الداخلية

لو قدرت شركات تقليد الموبايلات إنها تنسخ التصميم وتستخدم نفس نظام التشغيل وكمان تستخدم نفس الإمكانيات الداخلية فكده يبقى الأحسن إنها تصنع موبايلات جديدة بدل ما تقلد موبايلات موجودة فعلًا، والجملة دي معناها باختصار إن الموبايل المزيف أو المضروب مستحيل تكون فيه نفس إمكانيات الموبايل الأصلي.

وهنا بتيجي تاني أهمية إنك تبقى عارف كل تفصيلة متعلقة بالموبايل اللي ناوي تشتريه، وخلينا ناخد موبايل زي Huawei P20 Pro كمثال.

الموبايل ده في إمكانيات كتير يكاد يكون مستحيل تقليدها مش بس متعلقة بالتصميم لا كمان متعلقة بالإمكانيات الداخلية زي إن البروسيسور ده مستحيل يتقلد، زي إن مفيش شركة تقليد تقدر تستخدم نفس عدسات الكاميرات التلاتة دي وهكذا.

السعر

لازم تبقى عارف متوسط أسعار الموبايل وأعلى وأقل سعر ليه في السوق وتقارن بينهم وبين سعر الموبايل اللي هتشتريه وتتأكد إن فرق السعر مش كبير بشكل مبالغ فيه وده تقدر ببساطة ومن خلال موبايلك إنك تعرفه من خلالنا في ياقوطة بمجرد البحث باسم الموبايل وهتعرف مختلف عروض أسعاره وتحدد أقل سعر إيه، لازم تتأكد كمان إن كان الموبايل عليه عروض بتخفض سعره مثلًا.

طرق تانية تقدر تعرف بيها أصلية الموبايل

من بين الطرق اللي ممكن تعرف بيها إذا كان الموبايل أصلي ولا لا هو السيريال كود بتاع الموبايل وفيه شركات كتير بتتيح إمكانية تحديد أصلية الموبايل من خلال كتابة السريال كود على الموقع زي Apple وXiaomi وغيرها من الشركات.

لو الموبايل قديم شوية وضهره بيتفتح افتح الضهر وشيل البطارية وشوف البيانات المكتوبة عليه واتأكد إن فيه بيانات مكتوبة أصلا لأن أغلب الموبايلات المزيفة مابيكونش مكتوب فيها بيانات، كمان اتأكد من بلد المنشأ واعرف الموبايل مصنوع فين.

لو قدرت شركة تقلد موبايل فمش هيكون سهل تقلد ضمانه عشان كده أولا لازم تشتري موبايل بضمان وده كده كده هينفعك بشكل عام في حالة إنه حصل أي حاجه للموبايل، وكمان لأن الموبايلات المقلدة بنسبة ٩٠٪ مابيكونش معاها حتى ضمان مقلد أو مزيف.

وأخيرًا بنأكد عليك إنه الأفضل دايمًا إنك تشتري موبايلاتك من التوكيلات أو المحلات المعتمدة حتى لو كان سعرها أعلى أو من خلال المواقع الموثوقة اللي كمان بتديلك إمكانية إنك تختار بين نطاق أسعار مختلف للموبايل الواحد زي موقع ياقوطة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.