كتب: خالد عاصم

امتى كانت آخر مرة فكرت فيها في تغيير المخدة اللي بتنام عليها؟ طيب هل فكرت في أي وقت إن المخدة ممكن تكون السبب الرئيسي في الوجع اللي بتعاني منه لما بتقوم من النوم؟ لو إجابتك كانت بتستبعد ضرورة تغيير المخدة فانت مش لوحدك، ده فيه ناس كتير بتهتم بالمرتبة بس وشايفه إن تغييرها هو السر الرئيسي في النوم المريح والهادي والصحي، بس ده مش حقيقي، لان المخدة كمان ليها تأثير كبير جدًا، وأهمية التأثير ده ماتقلش عن أهمية تأثير اختيار المرتبة المناسبة.

لو كنت بتنام على مخدة هابطة او بتحتاج تتنيها على بعضها قبل ما تنام كل ليلة أو المخدة ناشفة بزيادة، يبقى كل دي علامات على إنك لازم تبدأ تفكر بجد في تغييرها وإنك تدور على راحتك بإنك تشتري مخدة جديدة مناسبة ليك، وعلى الرغم من إن الموضوع بيبان سهل أول وممكن تشوف إن كل اللي انت محتاجه إنك تدخل على أي موقع أو تنزل تتفرج في أي محل، إلا إن الموضوع معقد شوية عن كده، فبمجرد ما هتفتح الموقع أو تروح المحل هتلاحظ وجود مجموعة كبيرة ومتنوعة من المخدات اللي ممكن تحتار وانت بتختار ما بينها.

بس الحيرة دي احنا هنساعدك تتخطاها في المقال ده وهنتكلم عن إزاي تقدر تختار المخدة المناسبة ليك واللي تقدر توفرلك نوم مريح وهادي وصحي مفيهوش تعب أو مشاكل، وكمان هتقدر تطبق اللي هتتعرف عليه ده على المخدات المتوفرة على ياقوطة، وماتنسوش إن لو أي منتج عجبكم هتقدروا تطلبوه من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع 

ليه المخدة مهمة للنوم المريح

السر الحقيقي في النوم المريح كل ليلة واللي مش بييجي بعده أي تعب بعد الصحيان هو وضع النوم، ووضع النوم المريح وغير المؤذي بيتحدد بحاجتين، المرتبة والمخدة، فالمخدة المريحة هتساعدك إنك تنام في الوضع المناسب ليك واللي هيقدر يتعامل مع شكل الجسم ومستوى توازنه من أول الرأس والرقبة ولحد الركبة والفخذ مرورًا بالعمود الفقري والصدر والكتاف.

فلو مثلًا كتافك مكانش ليها الدعم الكافي خلال النوم أو كانت زاويتها مش مظبوطة وانت نايم، فده أكيد هيأدي لأضرار واضحة جدًا أثارها هتوصل لحد العمود الفقري وأسفل الضهر وغيرها من أماكن جسمك، وعشان كده زي ما المرتبة مهمة لتقديم الدعم المطلوب لجسمك، فكمان المخدة مهمة جدًا عشان تقدر تكمل الدعم ده.

وعشان تقدر تختار المخدة المناسبة ليك في مجموعة من العوامل اللي لازم تاخد بالك منها واللي هنتعرف عليها دلوقتي.

امتى أكون محتاج أغير المخدة؟

كقاعدة عامة، مخدات السرير العادية بتحتاج تتغير كل 18 شهر يعني كل سنة ونص، مع العلم إن المخدات المعمولة من مادة الميموري فوم Memory Foam بتقدر تعيش أكتر، وتقريبًا لحد تلات سنين، وكمان المخدات الطبيعية أو المعمولة يعني من مواد طبيعية أكتر بتقدر تعيش أكتر من المخدات المعتمدة على ألياف صناعية أكتر، وطبعًا المخدات اللي جودتها عالية بتقدر تعيش أكتر من المخدات اللي جودها أقل.

طبعًا ممكن تقول إن دي مدة قليلة أوي لتغيير المخدة، لو افترضنا إنك هتغيرها مثلا كل سنتين، بس بنفكرك إننا بنستخدم المخدات تقريبًا كل يوم لمدة من سبع لتمن ساعات يعني أكتر من 2500 ساعة في السنة، وده معناه معدل استهلاك كبير جدًا بيخلينا دايمًا ننصح بإنك تشتري مخدة أغلى عندها القدرة إنها تعيش أكتر فتعدي حتى معدل الاستهلاك ده من غير مشاكل.

بالإضافة لمعدل العمر والزمن ففي كمان معدلات وعناصر تانية بتقوم بضرورة تغيير المخدة، ودي نقدر نعرفها من خلال اختبار بسيط، كل اللي عليك إنك تشيل كيس المخدة وتشوفها نفسها، هي فيها بقع من العرق، هل فيها قطعات كتير في القماش، هل ريحتها واضحة ونفاذة حتى لو ماكنتش منفرة، كل دي عوامل بتقول إنك لازم تغير المخدة، ومتنساش إن المخدات بتجمع عناصر كتير غير مرغوب فيها زي الجلد الميت والتراب والفطريات والبكتريا وحتى حشرات الفراش المختلفة، وكل دي هتحول المخدة لقنبلة موقوتة مش وسيلة راحة ونوم هادي.

لو افترضنا إن المخدة عدت من الاختبار اللي فات، فكده يبقى فاضل اختبار تاني وهو اختبار الطي، كل اللي عليك إنك تحاول تطوي أو تتني المخدة لنصين، بعد كده سيبها، فلو رجعت مكانها تبقى لسا ماسكة نفسها شوية، بس لو فضلت متنية لوحدها يبقى كده خلاص انتهت ولازم تتغير، وممكن تعمل نفس الاختبار على مخدات الألياف الصناعية بإنك تحط عليها تقل بعد ما تتنيها وبعد كده شيل التقل ده وشوف هترجع لطبيعتها ولا لا.

ودلوقتي بعد ما عرفت إمتى هتكون فعلًا محتاج إنك تغيرها، تعالى نتعرف على كيفية اختيار المخدات الجديدة المناسبة.

ازاي تختار المخدة الجديدة؟

نقدر نقول إن عملية اختيار المخدات الجديدة هي عملية فردية جدًا، فمفيش مخدة بعينها تنفع لكل الناس أو لفئة بعينها منهم، فالمخدات بتختلف على مستوى المقاس والشكل والمواد المستخدمة في صناعتها وكل دي عوامل مش هتقدر تتناسب بنسب صحيحة جدًا عشان تخليها مثالية للكل، وعشان كده هي عملية فردية هتحتاج منك تاخد بالك من مجموعة من المعايير وعلى أساسها تختار، ودلوقتي هنتعرف على المعايير دي.

المادة المستخدمة في الحشو

بتتنوع أنواع الحشو المستخدمة في المخدات، ومفيش واحدة منهم نقدر نقول دي أحسن أو أوحش، بس لكل نوع منهم استخدامه ومميزاته وعيوبه وهنتعرف دلوقتي على أكتر الأنواع شيوعًا:

مخدات الريش Down Pillows: وده النوع المشهور بخفته وبنعومته فلو انت محتاج لحاجة ناعمة راسك تغوص فيها يبقى النوع ده هو الماثلي ليك، والنوع ده بيعتمد إما على ريش الوز أو على ريش البط، والنوع الأولاني معروف بنعومته أكتر وكمان بيكون أغلى، وبينقسم النوع ده لأنواع نقية بتعتمد على الريش بس وأنواع تانية بتتكون من الريش مع مجموعة من الألياف المنوعة المختلفة التانية.

مخدات الحشو الصناعي أو البوليستر Synthetic and Polyester: وده النوع الأرخص من النوع الأولاني لأنه بيعتمد على ألياف صناعية زي البوليستر والنوع ده بيكون أقل تعريض للحساسية من النوع الأولاني ولكنه بيحتاج يتغير على فترات قصيرة، والنوع ده معروف بإن نعومته ومرونته بتكون من المرنة للمتوسطة وفي المجمل أقل مرونة من مخدات الريش.

مخدات الصوف Wool: وده نوع بطبيعته بيكون مضاد للحساسية ومقاوم لأتربة وحشراتها، وكمان بتتميز بقدرتها على سحب الرطوبة من الرس والرقبة وده بيكون ليه تأثير إيجابي على تعديل درجة الحرارة خلال النوع بمعنى إنها بتدفي خلال الشتاء وبترطب خلال الصيف، والنوع ده معروف بصلابته مقارنة بالأنواع اللي فاتت وبيعيش لمدة أطول.

مخدات القطن Cotton: والنوع ده مشابه لمخدات الصوف في حاجات كتير زي مقاومتها للحساسية والتراب والحشرات والعفن، ومعروفة بإنها بتكون مسطحة وكمان صلبة إلى حد ما، وهي تعتبر خيار ممتاز جدًا للناس اللي عندها حساسية عامة أو حساسية للكيماويات.

مخدات اللاتكس Latex: النوع ده معروف بإنه بيكون أكتر صلابة من مخدات الريش بمختلف أنواعها، بس كمان بيكون مريح، والنوع ده مش بياخد شكل الراس يعني مش هيتضغط لما تحط راسك عليه، بس هو كمان مقاوم للعفن والتراب والغبار، وبيتميز النوع ده بإن فيه تصميمات مختلفة مصنوعة مخصوص لأصحاب المشاكل في النوع واللي بتمنع الحركة وغيرها.

مخدات الميموري قوم Memory Foam: وده النوع اللي قدر يحقق نجاح وانتشار واسع جدًا خلال السنين اللي فاتت، والميزة الأهم في النوع ده هو إنه بيقدر يستجيب لوزن الراس وشكلها وكمان درجة حرارة الجشم، وبيقدر كمان إنه بتضغط مع حركة الراس عشان يريح راسك ورقابتك وكتفك ده غير إنه بيوزع الوزن على كامل مساحتها، بس عيب النوع ده إنه بيخزن درجة الحرارة وعشان كده بيتسبب في التعرق وده ممكن يخليه مش مريح لبعض الناس.

وزن الحشو

مخدات الريش الطبيعي والصناعي والبوليستر معروفين بإنهم خيارات خفيفة، أما مخدات اللاتكس والميموري فوم فبيكونوا أتقل، ووزن المخدة بيكون دايمًا اختيار شخصي متوقف على رغبتك في تحريك المخدة خلال نومك أو لا.

جودة الحشو

مع كل نوع مخدة مختلف دايمًا بتكون الجودة مهمة، فكل ما كانت الجودة اعلى كل ما كانت مريحة أكتر وداعمة أكتر وكمان بتعيش أكتر، بس ده طبعًا بيكون معناه إنها بتكون أغلى، فطالما اخترت نوع معين خليك حريص إنك تختار نوع بجودة عالية عشان يكون مريح، وافتكر إنك هتقضي ساعات طويلة على مخدتك.

المقاس

لأغلب الناس، بيكون المقاس القياسي أكتر من كافي، ولو كنت بتفضل مخدة أكبر فدي مش مشكلة، خصوصًا لو المخدات الكبيرة بتكون مناسبة ليك عشان تحافظ على وضعة راسك خلال حركتك وقت النوم، كمان لازم تهتم بالمقاس من حيث الارتفاع أو النحافة لأن سمك المخدة بيكون مهم جدًا لراحة الراس والرقبة والكتف وده طبعًا بيأثر على العمود الفقري، لازم كمان تكون حريص إن كيس المخدة مايكونش ضيق مقارنة بالمخدة نفسها وإنها تكون مناسبة ليها والمخدة بتدخلها بمقاس مظبوط من غير ما تكون مضغوطة.

القماش المستخدم

اختار دايمًا إن قماش المخدة يكون طبيعي وقادر على التنفس، فمع اعتمادك على أنواع مميزة من القماش سواء كان قماش المخدة نفسها أو الكيس ده هيساعدك على زيادة عمر المخدة والحفاظ عليها وكمان الحفاظ على نفسك.

وضعية النوم

الناس اللي بتفضل تنام على جبنها هيكون أنسبلهم المخدات القوية الصلبة مش الناعمة أوي وحاول دايمًا يكون ارتفاعها قد المسافة بين ودنك وكتفك الخارجي، أما لو كنت من اللي بيفضلوا يناموا على بطنهم فهيكون أنسبلك تختار مخدة طرية ومرنة وممكن كمان تستغنى عن وضعها تحت راسك وتحظها تحت بطنك عشان تقلل من تعب الضهر، أما لو كنت بتحب تنام على ضهرك فالمخدات المسطحة هتكون خيارك الأفضل لانها بتقدر تحفاظ على نفس المستوى لراسك ورقابتك ويفضل كمان تكون مرنة وطرية، بس لو بتعاني من آلام في الضهر ففي الحالة دي يفضل تستخدم مخدة خاصة مصممة للنوع ده من الآلم.

ودلوقتي بعد ما عرفت كل التفاصيل دي هتقدر تختار المخدة اللي تناسبك من على ياقوطة بعد ما تطبق كل الخطوات اللي اتكلمنا عليها.

اتعرف على عروض أسعار مختلف أنواع المخدات المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.