إمكانيات آلة صنع القهوة من جينريك
كتبت: سارة عمار
القهوة ليها عشاق كتير، بيستمتعوا بشربها على مدار أوقات مختلفة من اليوم. يمكن عشان كده اتعمل ليها آلة مخصوص. وطبعًا ياقوطة زي ما عودتكم دايمًا جاهزة لتوضيح تفاصيل وإمكانيات أي جهاز ينزل السوق عشان يبقى عندكم خلفية قبل ما تقرروا تشتروه.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
المواصفات
| طريقة التشغيل | بالكهرباء. |
| التحكم | يدوي/زرار بيشغلها ويطفيها. |
| القدرة | ٥٠٠ وات. |
اللي يميزها
- عملية لو أنت في مكتب وعندك عملاء تقدر الآلة دي تنجزك في حوالي ٤ فناجين قهوة، وممكن أكتر كمان لو الفنجان صغير، وسريعة كمان يعني القهوة مابتاخدش غلوة.
- فيها زرار الأون والأوف ليد فلاش ده يخليه يبان انها شغالة ومتوصلة الكهرباء ولا لاء.
- بتتغسل وبتتنظف عادي بطريقة بسيطة.
- بتفصل لوحدها لما تخلص غلي القهوة في الوقت اللي هيا محدداه وده بيدي نوع من أنواع الأمان، انه حتى لو اتنست في الكهرباء هيا كده كده حتفصل.
- ينفع تشتغل من جديد بعد ما تخلص أول دور قهوة، وبتشتغل كذا مرة كتير.
اللي يعيبها
- المادة اللي مصنوع منها الآلة بيطلع ريحة لأنه مش قد كده، وممكن الريحة دي تلقط في القهوة، وبيكون نتيجة التسخين الجامد.
- مفهاش أي تايمر للوقت ولا أي حاجة تعرفك قربت تغلي القهوة أو لسه بدري، فلازم تفضل مراقبها كويس عشان القهوة ماتفورش.
- بتسخن جامد أوي ومفهاش أي عازل للسخونية دي لازم تتحط على ترابيزة خشب أو رخام وتبعدوا أي بلاستيك عنها أو أكياس قماش.
- ملهاش حامل ولا قاعدة، وممكن تقع منكم والمعدن يتعوج.
- مع كتر الاستخدام السلك ممكن يبوظ ويهلك عشان هوا ضعيف ومايستحملش.
- يبان انها مابتسحبش كهرباء بس لو استخدمتوها كتير وباستمرار حتسحب كهرباء والفاتورة حتغلا عليكم.
- مابتعملش أنواع قهوة تانية هيا بس القهوة التركي وممكن القهوة المغلية انك ترجع تشغلها مرة تانيه عشان تغلي، وكده هيا مش آلة مرنة.
- ملهاش غطا، معرفش ده عيب ولا ميزة بس اللي بيفهموا في القهوة حيعرفوا انه ميزة لأنه الكنكة مابتتغطاش غير في الآخر لما الوش يقلب وممكن مش لازم تغطيه، واللي بيخافوا يقع في الكنكة حاجة حيعتبروه عيب أنه مفهاش غطا.
تصليحها
هيا جهاز مش مهم أوي عشان يبقى ليه تصليح وصيانة وكده، جهاز استخدمته حبة وخلاص حتى مالهاش ضمان ولا توكيل.
وفيه في نفس الماركة جينريك آلة صنع القهوة التركي ممكن تشوفوها من هنا.
لو غاوي قهوة وجربت مكنة صنعها قولنا عليها في الكومنتات.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.