اتفاجأت بفاتورة الكهرباء غالية؟ ٤٠ نصيحة لتقليل استهلاك الكهرباء وتخفيض الفاتورة
كتبت: صفاء مجدي
توفير الكهرباء من العادات الممتازة اللي مش بس بتعود بالنفع على الفرد لكن على المجتمع ككل. وكتير جربنا اللي بيحصل لما الكهرباء بتقطع بشكل مستمر وخصوصًا في فصل الصيف نتيجة لزيادة الأحمال. لو بتشتكي من زيادة فاتورة الكهرباء ياقوطة بتعرض عليك نصائح وخطوات لو نفذتها هتقلل من استهلاك الكهرباء وبالتالي هتقلل من فاتورة الكهرباء.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
نصائح عامة لترشيد استهلاك الكهرباء
- أول قاعدة لتوفير الكهرباء هي اطفي الحاجات اللي مش بتستخدمها زي المروحة أو التكييف أو التلفزيون، مثلًا لمبة شغالة في غرفة مفيش حد قاعد فيها أو سايبها شغالة في البلكونة وأنتم قافلينها وقاعدين جوا الشقة.
- علم أولادك الكلام ده كويس وتعودهم من صغرهم أنهم يطفوا الأجهزة بعد استخدامها، كده مش هتضطر تجري وراهم في البيت طول النهار تطفي في الأجهزة ونور الغرف.
- حاول تشتري أجهزة كهربية موفرة للطاقة بالفعل وتعرف ده من المعلومات المرفقة مع أي جهاز تشتريه.
- اشتري الأحجام الصح من الأجهزة على أد استهلاكك وبس لأنك لو اشتريت ثلاجة أكبر من استخدامك أو سخان أكبر من حاجتك فأنت هتكون بتضيع طاقة كهربائية على الفاضي وده هينعكس على فاتورة الكهرباء.
- عارفين أن البرد في الشتاء أصبح صعب جدًا في السنوات الأخيرة واستعمال الدفاية بقى أمر أساسي لكن لو عاوز توفر في الفاتورة يبقى قبل ما تشغل الدفاية جرب الأول أنك تلبس شرابات أو كوفيه أو شال والحاجات الجميلة دي اللي بتدفي، لو لسه بردان في الحالة دي بس شغل الدفاية.
- كمان حاول أنك في الحر تلبس لبس مناسب قطني بألوان فاتحة وخامات خفيفة وبكده تقلل استهلاكك للتكييف.
- دايمًا حافظ على أجهزتك نظيفة عشان تفضل كفاءتها عالية ولهذا شوف مقال ياقوطة عن تنظيف وصيانة الأجهزة المنزلية زي المكواة والمروحة، والتكييف، والشفاط، والفرن
- وأنت بتنقل بيت جديد اعرف وظيفة كل غرفة وكمية الأجهزة الكهربية اللي هتكون موجودة فيها وعلى أساسه تعمل عدد مناسب لفيش الكهرباء وده هيقلل حمل استهلاك الكهرباء.
قد يهمك أيضًا: دليلك لشراء دفاية
نصائح لتقليل الكهرباء وبالتالي تقليل فاتورة الكهرباء
الثلاجة
- سيب الأكل يبرد الأول برة الثلاجة قبل ما تدخله فيها عشان توفر في الكهرباء.
- حاول تخلي الثلاجة والفريزر في درجة حرارة مناسبة مش أقل من 2 درجة مئوية للثلاجة ومش أقل من -18 للفريزر.
- حافظ دايمًا على باب الثلاجة يكون مغلق لو مش بتستخدمها.
- حط الثلاجة على بعد 15 سم من الحائط عشان يحصل تهوية كويسة حوالين ملف المكثف.
- لو فيه مشكلة في باب الثلاجة صلحها عشان متسربش برودة.
- ممكن تستخدم كولمان في الصيف للمياه عشان متضطرش تفتح الثلاجة وتقفلها كتير عشان المياه.
- اقرأ دليل ياقوطة لشراء الثلاجة اللي هيساعدك تعرف ايه مواصفات وحجم الثلاجة المناسبة لاحتياجك
ادخل شوف أسعار وأشكال الثلاجات تبدأ من 1275 جنيه مصري.
الغسالة
- حاول متشغلش الغسالة إلا لو كانت مليانة بالفعل.
- كل ما كان ممكن حاول تشغل الغسالة على البارد.
قارن واشتري أحسن غسالة ملابس من هنا، يبدأ السعر من 999 جنيه مصري
غسالة الأطباق
- وفر استخدام غسالة الأطباق للعزومات والحفلات الكبيرة أو لو كنت فعلًا في يوم مش قادر تغسل الصحون، غسالة الأطباق مش بس بتستهلك مياه كتير لكن كمان كمية كهرباء مش قليلة
- شغل غسالة الأطباق لما تكون مكتملة وخلي درجة الحرارة دايمًا عند 60 مش أكتر من كده ويفضل الغسيل على البارد إذا قدرت.
- شغل غسالة الأطباق في وقت غير أوقات الذروة وهي الفترة اللي بعد المغرب وبتكون لمدة 4 ساعات.
شوف أسعار غسالات الصحون من هنا يبدأ من 2149 جنيه مصري.
قد يعجبك: كيف تختار غسالة الأطباق المناسبة لك؟
الإضاءة
- بَدِل كل اللمبات في بيتك بلمبات ليد LED واللي بتستهلك كهرباء 80% أقل من اللمبات العادية.
- اللمبات الليد مش بس هتوفر كهرباء لكن هتعيش أطول وكمان هتديك إضاءة أفضل من اللمبات الصفراء اللي بتشع حرارة مع الضوء وبترفع درجة حرارة الغرفة بسرعة.
- نور ربنا مفيش أحسن منه وبالتالي حاول تستغنى عن إضاءة اللمبات طول ما النهار منور.
- خلي دايمًا للنجف مفتاحين متقسم عليهم اللمبات عشان توفر الكهرباء.
- استخدم أجهزة التحكم في شدة الإضاءة واللي اسمها ديمر عشان تتحكم في شدة الإضاءة وبالتالي في كمية الكهرباء المستهلكة.
غير كل لمبات بيتك للمبات ليد من هنا
التكييف
- شوف نصائح ياقوطة لصيف لطيف بدون تكييف اللي يمكن تخليك تستغنى عن التكييف.
- لو هتستخدم التكييف متخليش الحرارة أقل من 22 وافتكر كل درجة بتوفر حوالي 3% من الاستهلاك.
- اختار حجم التكييف المناسب للمكان لأن المقاس الكبير اوي هيهدر طاقة، والمقاس الصغير أوي هتضطر تشغله فترة أطول وبرده هتكون بتهدر طاقة.
- احرص على غلق الشبابيك والأبواب طول ما التكييف شغال عشان متسربش البرودة.
لو لسه عايز تكييف، شوف تكييف يناسبك من هنا.
اقرأ أيضًا: التكييف المحمول أم مبرد الهواء ، دليل ياقوطة للتكييفات
الغلاية
- لما تستخدم غلاية المياه أولًا اشتري واحدة على المقاس المناسب لاحتياجاتك وبس.
- لما تغلي المياه عايرها الأول بكوباية وأغلي المياه بس على اد احتياجاتك كل مرة.
اشتري أحسن غلاية في مصر من هنا، يبدأ السعر من 79 جنيه مصري
السخان
- يُفضل أنك تحول للسخانات الشمسية أو سخانات الغاز لأنها موفرة في الطاقة أكتر بكتير من السخانات الكهربية
- حاول تقتصد في وقت استحمامك أكيد على أد ما تقدر وخصوصًا لو بتستحمى بمياه ساخنة.
- شغل السخان بس قبل ما هتستخدمه بنصف ساعة أو المدة المتوقع أه يسخن لك كمية المياه اللي أنت عارف أنك هتحتاجها، وخصوصًا لو كان من السخانات اللي بتخزن المياه وممكن تسرب الحرارة وترجع تسخنها تاني.
- اظبط الثرموستات دايمًا على 50-60 درجة مئوية، درجات الحرارة العالية أوي بتستهلك كهرباء أعلى وكمان بتقلل من العمر الافتراضي للسخان.
- لما تشتري سخان بخزان اتأكد أن فيه سطح عازل كويس جواه بيمنع تسرب الحرارة وبالتالي تفضل المياه ساخنة لفترة أطول.
شوف أسعار السخانات من هنا تبدأ من 649 جنيه مصري.
الأجهزة الالكترونية
- لما موبايلك يخلص شحن افصله على طول، ده مش بس هيوفر كهرباء لكن كمان هيحافظ على بطارية الموبايل لفترة أطول. ونفس الكلام ينطبق على أجهزة اللابتوب والتابلت.
- في حاجة عادة بنقع فيها كتير هي إننا نسيب الكمبيوتر شغال تقريبًا 24 ساعة متواصلة. أولًا ده بيؤثر سلبًا على كفاءة الجهاز وكمان بيستهلك كهرباء زيادة، لما تطفي الجهاز وأنت مش بتستخدمه هتوفر حوالي 8% من استهلاك الكهرباء.
الفرن الكهربائي
- لو كنت هتستخدم الفرن الكهربائي للخبز فقط فسخنه قبلها بـ 5-8 دقايق لكن في الشوي والتحمير مش لازم تسخنه قبله.
- حاول متفتحش الفرن الكهرباء أثناء تشغيله عشان متسربش الحرارة وتهدر الطاقة.
اشتري فرن كهرباء من هنا، يبدأ السعر من 342 جنيه مصري.
لو عندك أفكار مفيدة لتوفير الطاقة بشكل عام والكهرباء بشكل خاص ابعت لياقوطة.
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.