أفضل نصائح لتجهيزات السفر واختيار الشنطة المناسبة
كتبت: دينا أمير
طبعاً أغلبنا بيحب السفر وتغيير الأماكن وفرحة الطريق بس كلنا بنقلق لحسن ننسى أي حاجة مهمة في البيت أو ناخد حاجات أزيد و ده ممكن يضيع فرحة السفر. ياقوطة عايزاك تستمتع بكل لحظة بتعيشها وعشان كده قررنا نقدم لكم نصائح لتجهيزات السفر من «عبدالرحمن عمرو» أحد مؤسسي «مشروع سفر» وهنوضح لكم ازاي تختاروا شنطة السفر المناسبة وتسافروا بأقل التكلفة.
بدأ مشروع سفر لما عمرو سافر وكان في أسئلة كتير جداً مش لاقي لها إجابة فقرر أنه يعمل مدونة عشان يجاوب على الأسئلة دي. كبرت المدونة وعدد زوارها زاد وتحولت إلى موقع على الإنترنت – website – عشان يجاوب على كل الأسئلة في عدة مقالات زي ازاي اطلع فيزا، واحجز فندق، واخطط صح لصرف الفلوس، أغلبية الأسئلة بتكون عن الفيزا، والطيران، وتخطيط الميزانية، الموقع بالعربي عشان يخدم أكبر عدد من المصريين، بيوفر لك نصائح تسهل عليك السفر وتقلل التكلفة.
ازاي تختار شنطة السفر؟
عمرو قال لنا «في البداية لازم تعرف الدولة اللي أنت رايحها كويس لأن وقتها الأنشطة والاحتياجات هتختلف، فمثلاً لو هتروح الهند شنطك هتكون غير وأنت مسافر باريس. لو هتحتاج حركة كتير يبقى هدومك واحتياجاتك مختلفة وأغلبها عملي يبقى شنطة الضهر غالباً هتكون كفاية، لو بتخطط للسفر إلى أوروبا بأقل التكلفة وقتها شنطة الضهر مناسبة جداً، مع العلم أن لو غرض السفر هو التسوق يبقى لازم تكون محضر شنطة أو اثنين.»
ايه أحسن ماركة شنط سفر؟
سامسونيت دايماً عندها اختيارات كتير وجودتها عالية بالرغم من السعر العالي بس هتعيش معاك، وأضاف عمرو «المهم تبعد عن الشنط الرخيصة لحسن تتقطع منك أثناء السفر.»
شوف هنا 5 قطع شنط من سامسونيت.
ازاي ترتب الهدوم اللي محتاجها في أقل مساحة؟
- وكانت نصيحة عمرو، احنا متعودين نحط الهدوم فوق بعض بس لو لفينا الهدوم على بعض بمعنى أصح إننا نحط الهدوم على بعض وبعد كده نلفها – roll – الهدوم وهي على بعض وبين كل طبقة هدوم نحط طبقة من ورق الزبدة عشان تفضل مكوية ومتتكرمش.
- استخدم كل شبر في الشنطة، أضاف عمرو «بمعنى أنك ممكن تعين المعجون والشامبو مثلاً في الحذاء بس بعد ما تحطهم في شنطة بلاستيك، ممكن البرفانات، وغسول الجسم، ومزيل العرق تعينهم في بونيه الاستحمام.»
- لو جبت هدية وخايف تتكسر ممكن تلفها كويس وتعينها في جيب بنطلون أو وسط لفة تشيرتات.
4- ممكن تعتمد على غسل الهدوم بدل ما تاخد طقم لكل يوم.
ازاي تبدأ تحضر حاجاتك قبل السفر؟
أبدأ بالحاجات الأساسية وبعد كده الأقل أهمية وممكن لو هتقدر تاخد معاك حذاء جلد، أما لو سيدة ممكن تاخد حذاء بكعب لو شايفه أنها ممكن تحتاجه. وأضاف عمرو« بعد ما تحط الأشياء الثانوية ابتدي شيل أي حاجة مش مهمة ومش هتحتاجها هناك لكن ده برده يعتمد على مكان السفر والنشاطات اللي في المكان.»
حاجات مهمة تاخدها لو مسافر خارج مصر
- لو البلد اللي أنت رايحها فولت الكهرباء عندهم مختلف يبقى لازم تاخد محول- adapter –للشواحن.
- شطافة محمولة Smart Buzz
شوف هنا شطافة محمولة Smart Buzz
- لازم تاخد باوربنك – power Bank- عشان لو الموبايل فصل شحن في أي وقت.
شوف باوربنك من هنا
- النشرة الجوية مهمة جداً، لأن الجو بيختلف من دولة للتانية فممكن تحتاج شمسية في أوقات كتير من أول ما توصل المطار.
تطبيقات مهمة أثناء السفر
Zabihah : التطبيق ده هيساعدك توصل لأقرب المطاعم اللي بتقدم أكل حلال.
Google translate: التطبيق ده نزله وثبته على الموبايل عشان يساعدك في الترجمة والمهم أنه يكون متحمل على الجهاز عشان لو مفيش انترنت في المكان اللي أنت فيه، ونزل قاموس البلد اللي أنت رايحها.
Around me: التطبيق ده هيعرفك على كل الأماكن المهمة اللي ممكن تزورها من مسارح، ومتاحف، وغيره.
Trip Advisor: هيعرفك على كل الأماكن المهمة، وهتلاقي تقييم للعديد من الأماكن.
Rome2rio: التطبيق ده هيساعدك عشان تركب مواصلات سواء طيارات، وعربيات، وتاكسي، وسفن، وحتى المترو. وهتقدر تعرف مدة الرحلة وتكلفة كل اختيار.
Wifi Finder: ده تطبيق عشان يعرفك أقرب مكان فيه إنترنت بس لازم تشوفه قبل ما تنزل عشان بيحتاج إنترنت.
Skyscanner: أحسن أسعار لرحلات الطيران.
Booking.com: التطبيق ده مهم جداً عشان الإقامة وحجوزات الفنادق والشقق.
قد يعجبك: أشياء مهمة لا تسافر بدونها
أهم الأدوية اللي محتاجها وأنت مسافر
- لو بتحتاج أدوية دورية للسكر أو الحساسية لازم تاخد منها كميات كافية حسب الأيام اللي هتقضيها هناك.
- لو هتسافر بلد بتحتاج تطعيمات لازم تاخدها مثلاً لو مسافر أوروبا أو أمريكا هتحتاج مضاد حيوي للبرد أو أدوية لأي حاجة متوقع أنها ممكن تجيلك هناك، أما لو مسافر مكان في أفريقيا ممكن تحتاج كريم لدغات للحشرات وتزور VACSERA عشان تشوف التطعيمات اللي هتحتاجها حسب المكان اللي أنت مسافر له.
- المسكنات، والبنادول، وأدوية وكريمات لضربة الشمس.
شوف هنا بنادول اكسترا.
نصائح مهمة للسفر
- شوف تذكرة السفر واتأكد من ميعاد الرحيل بالظبط وشوف هل هو الصبح ولا بالليل، وهل على توقيتك ولا توقيت المكان اللي أنت رايحه. ووضح عمرو «عادة، رحلة العودة/المغادرة من البلاد اللي زرتها هتكون بتوقيت هذه البلد، وبالتالي ضروري تحط دا في اعتبارك، زيه زي رحلة الذهاب في البداية.»
- اظبط ساعة الموبايل وساعة ايدك على توقيت البلد اللي أنت رايحها.
- خلي دايماً في بالك أنك داخل على ثقافة مختلفة فلازم تعرف ايه مش محبب عندهم، وايه اللي مرحب بيه عندهم.
- لو مش حابب تفضل تلف في كل مكان بشنطة الضهر الكبيرة فممكن تاخد واحدة أصغر عشان التنقل والزيارات ده هيساعدك أوي لو رايح الهند أو آسيا لأنهم أزحم من الباقي.
شوف هنا شنطة للضهر.
- اياك والشنطة اللي بتتربط حوالين الوسط بدلاً منها ممكن تلبس حزام الفلوس اللي بيكون تحت الهدوم.
- خلي أغلب فلوسك في مكان آمن في الفندق اللي أنت مقيم فيه خصوصاً لو في خزنة وخد اللي محتاجه ليومك وبرده متخليهوش في مكان واحد فممكن شوية في الشنطة وشوية في جيبك وشوية في الشراب.
- بلاش تعين أي حاجة في جيب البنطلون اللي ورا.
تاخد ايه في شنطة الضهر الصغيرة اللي هتستخدمها في التنقل؟
- باوربنك عشان تشحن موبايلك.
- بطانية صغيرة عشان لو قعدت على الأرض أو سقعت.
- صورة من جواز السفر- Passport- وسيب الأصل في الخزنة في الفندق.
- مخدة للرقبة .
- مسكن.
شوف هنا مخدة للرقبة.
اقرأ أيضًا: تجهيزات حفلات الشواء
ازاي توفر فلوس لو أنت مسافر خارج مصر؟
- تذكرة الطيران: احجزها قبل ميعاد السفر بحوالي 3 أسابيع أو أكتر لأن سعرها بيكون أرخص.
- الإقامة: مش لازم تقيم في فندق ممكن نزل الشباب – hostel – هتشارك الغرفة مع أكتر من فرد وحمام واحد بس هتوفر كتير.
- الأكل:عندك 3 اختيارات أولهم أنك تأكل أكل الشارع و ده هايل لو أنت في آسيا لأنه تجربة في حد ذاته بينما الاختيار التانى هو أنك تطبخ في الفندق أو المكان اللي مقيم فيه، أما تالت حاجة هو طبعاً الأكل في المطاعم و ده مش رخيص فأحسن حاجة أنك تختار التلاتة سوا عشان توفر وتنبسط في نفس الوقت.
- التنقل: لو رايح أوروبا يبقى الطيران الداخلي هيساعدك تزور بلاد كتير بس المهم تكون معاك شنطة ضهر خفيفة وبس عشان غير كده هيبقى غالي جداً، واستخدم المواصلات العامة بدلاً من التاكسي.
وقد أكد عمرو على أن «النصايح دي هتساعدك تقضي أسبوع في باريس بحوالي 8 آلاف جنيه بس.»
استمتع بكل مكان بتروحه وكون ذكريات تتنقل بيها بين بلدان العالم.
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.