كيف تختار ساعة يد مناسبة؟
كتبت: صفاء مجدي
ساعات اليد من الإكسسوارات المهمة جدًا ورغم أن أغلبنا دلوقتي بيعتمد على الموبايل عشان يعرف الوقت إلا أن ساعات اليد مازالت مهمة عند بعض الناس وبيعتمدوا عليها لمعرفة الوقت، وأحيانًا لزوم الشياكة ده غير إن الساعات من أحسن وأكثر الهدايا انتشارًا سواء للرجال أو الستات أو حتى الأطفال. ياقوطة بتقدم لك أهم النصائح لاختيار ساعة اليد المناسبة، ستتعرف على كيفية شراء ساعة يد مثالية بالتفاصيل بداية من سوار الساعة، والشكل، والخامة حتى طريقة عمل الساعة نفسها وأكثر من ذلك.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
لما تيجي تنزل تشتري ساعة بتواجهك أسئلة كتير أوي زي: هل اشتري ساعة واحدة غالية معدية ألفين تلات آلاف ولا اشتري أكثر من واحدة بثمن معقول؟ اجيبها استيك جلد ولا معدن؟ طب لو جلد اجيبها لون ايه؟
أسئلة كتير أوي مش هتجاوبها لوحدك لأن ياقوطة هتجاوبهالك خلال السطور الجاية ونخلي عملية شراء ساعة اليد مش بس سهلة لكن ممتعة جدًا.
في البداية تعالى نحكي لك سريعًا عن تاريخ ساعات اليد وازاي وليه ظهرت
الساعة كانت في الأصل… مسلة!
- مبدئيًا مفهوم الوقت والساعة ده مفهوم قديم أوي وأول ساعة أو بمعنى أدق أول طريقة لمعرفة الوقت اتسجلت في التاريخ ترجع لقدماء المصريين، كانوا يستخدمون المسلات وظلها المنعكس على الأرض في تحديد الوقت وده كان سنة 3500 قبل الميلاد.
- المسلات مكانتش منتشرة في كل حتة ولكنها كانت موجودة فقط جنب قصور الملوك والأمراء، وجنب المعابد عشان يحددوا مواعيد الصلاة.
- بعدها ظهرت فكرة الوقت والساعات الحضارة البابلية في العراق.
- تتطورت طرق معرفة الوقت باستمرار لحد ما وصلت إلى شكل ساعة الحائط المعروفة، وعشان مكانش فيه طريقة تشيل بيها الوقت في جيبك فكانت ساعات الحائط دي كبيرة وموجودة في كل مكان وعلى أسطح المباني الكبيرة عشان تظهر للناس في الشارع.
الحرب أم الاختراع
ساعات اليد زيها زي اختراعات أخرى كثيرة ظهرت كضرورة للجنود في الحرب.
- أصلًا فكرة الوقت المحمول دي مظهرتش غير في القرن الـ 16
- قبل ساعات اليد على طول كان فيه ساعات الجيب اللي بنشوفها في الأفلام الأبيض وأسود عارفينها؟ دي لما الراجل من دول يطلع ساعة مدورة مربوطة بسلسلة من جيبه يفتحها ويعرف منها الوقت.
- المثير للاهتمام أن ساعات الجيب في الوقت ده مكانتش بس أداة لمعرفة الوقت أو حاجة لزوم الشياكة ولكنها كانت كمان استثمار كويس جدًا للناس.
- لكن ساعات الجيب دي مكانتش عملية اوي في ساحة الحرب، يعني تخيل نفسك جندي مسحول في المعركة وعاوز تعرف الوقت كام تقوم تدخل ايدك في جيبك تفتح الساعة الجيب المدورة.. حوار مش كده؟
- لذلك تم اختراع ساعات اليد عشان الجندي من دول يبص في الساعة اللي في ايده بسهولة.
- بداية صناعة الساعات كانت من الكريستال، وش الساعة كان من الكريستال لكن الكريستال مش مادة عملية اوي في ساحة الحرب ولهذا تطور صناعة وش الساعة ففكروا يحطوا عليها غطاء، لكن فكرة الغطاء برده مكانتش عملية للجنود في المعارك! شوية بشوية انتهى بيهم الحال في التفكير في صناعة وش الساعة من مادة زجاج غير قابلة للكسر ومقامة للغبار.
- ومن وقتها وساعات اليد انتشرت بشكل كبير مش بس في ميادين الحرب لكن كمان في ايد الناس العادية.
ولأن أصل ساعات اليد كان في الحرب فاستغل المعلنين عن الساعات فكرة الرجولة والشجاعة في إعلاناتهم عن الساعات وكأن ساعات اليد دي هي رمز الرجولة والجدعنة. لكن ده ممنعش السيدات من استخدامها برده وفي فرنسا تحديدًا استخدمت السيدات العاملات ساعة اليد لأول مرة سنة 1912.
لما الساعة دخلت أمريكا
كل الكلام اللي فات كان حدث في أوروبا بس، أمريكا مكانتش تعرف أي شكل للساعات غير ساعة الحائط لحد سنة 1916 لما شافوا الساعات لأول مرة في أيادي الأوروبيين ومسكوهم تريقة «بص الراجل الخايب اللي لابس ساعة الحائط في ايده» وكلام من هذا القبيل. لكن الموضوع عدى حدود النكتة وزاد تقبُل المجتمع الأمريكي للفكرة يوم عن يوم ومش بس الأمريكان اللي لبسوا ساعات اليد لكن العالم كله من يومها مقدرش يستغنى عنها.
خطوات اختيار ساعة اليد المثالية
ساعات اليد مش بس مجرد أداة لمعرفة الوقت ولكنها كمان بتعكس ذوق صاحبها زيها زي أي قطعة ملابس تلبسها، ساعات اليد حاجة تستحق التقدير فعلًا حتى في عِلم كامل عن تصنيع الساعات واسمه بالانجليزي «Horology».
1. أنت محتاج ساعة واحدة ولا أكثر من ساعة؟
تتوقف إجابتك على السؤال ده على شوية حاجات:
ميزانيتك تسمح بإيه؟: تحديدك لسعر الساعة بيتوقف على عدد مرات استخدامك ليها، وشعورك وأنت لابسها. وعلى الأساس ده تقدر قيمة الساعة المادية وتحدد إن كانت الساعة دي سعرها كويس ولا مبالغ فيه.
نمط حياتك: هل نمط حياتك وشغلك بيتطلب منك لبس معين يمشي عليه استايل بعينه تلتزم بيه، ولا أنت شخص بيحب الخروجات فيكون مهم بالنسبة لك تكون عندك ساعة كاجوال وساعة فورمال شوية؟
ذوقك في اللبس: هل أغلب دولابك بدل أو فساتين فورمال؟ ولا شوية كده وشوية كاجوال؟
لو قررت تشتري ساعة واحدة فقط وتستثمر فيها
- غالبًا الأنسب لك هيكون ساعة يد معدن؛ لأن المعدن هيعيش معاك أكثر وهيليق على أي لون، على عكس الجلد اللي ممكن يبوظ بسرعة لو جودته مش عالية وكمان هيحيرك في اختيار اللون المناسب اللي يليق مع حاجات كثيرة.
- عمومًا أنت لازم تفكر في ساعة يد تكون ألوانها وخاماتها مناسبة لظروف حياتك بشكل كبير، يعني تنفع معاك في مناسبة أو شغل أو خروجة عادية مع أصحابك على القهوة أو في فندق خمس نجوم أو سفرية أو غيره.
لو كنت من الناس اللي بتحب التغيير وعايز أكثر من ساعة يد
- كثير من البنات والسيدات بيحبوا يغيروا ساعة اليد على حسب استايل اللبس، وفي برضه رجال وشباب بيحبوا جدًا يكون عندهم ساعات يد متنوعة وبأشكال مختلفة. في الحالات دي عليك تشتري ساعات يد بأشكال متنوعة، وألوان مختلفة عشان تناسب ظروف ومناسبات كثيرة ومتحسش بالملل وتغير فيها زي ما تحب.
قد يعجبك: ازاى تشترى ساعة ذكية؟
2. أنواع ساعات اليد بحسب سعرها
ساعات اليد الدرجة الأولى: أسعارها من 10000 جنيه فيما فوق ودي الساعات اللي معمولة بغرض الرفاهية وبيكون داخل في تكوينها ماس أو ذهب.
ساعات اليد الدرجة الثانية: أسعارها من 1000 لـ 10000 جنيه ودي الساعات اللي غالبًا مش هتجيب منها أكثر من واحدة، بتكون خامتها جيدة، وأشكالها شيك جدًا، ومعمولة عشان تعيش مدة طويلة إلى حد ما.
ساعات اليد الدرجة الثالثة: أقل من 1000 جنيه وبتكون ساعات معمولة بغرض الزينة في المقام الأول، بتعيش معاك مدة كويسة لكن غالبًا أقل من ساعات اليد الدرجة الثانية، ودي ممكن تجيب منها أكتر من واحدة تغير فيهم.
لما تشتري الساعة أونلاين خلي بالك كويس من البراند وكمان الموزع وحاول تخليك في حاجة مضمونة يكون فيه ناس علقوا عليها وادوها تقييم ايجابي.
3. استيك معدن ولا جلد؟
فكر في اللي ترتاح له أكثر واللي يناسب حياتك وشغلك، وفكر في الشخصية اللي بيعكسها اختيارك، مثلًا الجلد غالبًا بيعكس شخصية مرتاحة أكتر من الساعة المعدن.
- لو كان شغلك فيه شوية تعامل مع حاجات حادة فيبقى الساعات اليد المعدن أفضل وهتعيش أكثر.
- لكن لو كان شغلك مكتبي معظم الوقت فالساعة اليد الجلد هيكون اختيار مناسب.
ياقوطة بتديك خبرتها في الملابس والموضة وبتقولك النصيحة الجاية:
الساعات اليد الجلد: لازم تليق الساعة اليد الجلد على كل حاجة جلد تانية لابسها، بمعنى يكون لون استيك الساعة هو لون الجزمة الجلد، وهو لون الجاكت الجلد، والحزام، والشنطة وهكذا فعشان تكون في منطقة الأمان هات لون محايد يليق على كله زي الأسود سيد الألوان.
الساعات اليد المعدن: لو لبست ساعة يد معدن برده ضروري تكون لايقة على كل حاجة معدن في لبسك زي دبابيس كُم القميص، وتوكة الحزام وهكذا.
4. تفاصيل الساعة
جسم الساعة
ساعة اليد عبارة عن جزئين: الاستيك واتكلمنا عنه في الفقرات السابقة، وجسم الساعة نفسه اللي فيه العقارب والأرقام وده اللي هنشرحه لك حالًا.
الشكل
- جسم الساعات اليد في منه أشكال متنوعة منها المدور، والمربع، والمستطيل، والمثلث وأشكال متنوعة أخرى.
- لو ناوي تجيب الساعة بغرض الشياكة والأناقة والرسميات يبقى خليك في ساعات يد جسمها مدور.
- الأشكال الغير تقليدية زي المثلث والوردة وغيرها بتكون حاجة كاجوال أكتر.
الخامة
فيه خامات مختلفة من ساعات اليد زي الاستنالس ستيل، والذهب الأبيض، والبلاتينيوم، والتياتنيوم. وفي الأنواع الرخيصة شوية بيكون مصنوع من نوع مقوى من البلاستيك المطلي بالمعدن.
5. داخل الساعة
أرضية الساعة
- أرضية الساعة هو الجزء اللي فيه الأرقام والعقارب.
- عشان تشوف الوقت بوضوح: اختار ساعة يكون لون عقربها غير لون أرضيتها.
- لاحظ أنه كل ما يكون الفرق واضح بين اللونين مثلًا (عقارب سوداء على أرضية بيضاء) كل ما يكون الساعة لها ستايل كاجوال شوية وبعيد عن الفورمال.
- لو هتجيب حاجة فورمال فيكون الفرق بين اللونين مش كبير مثلًا (أرضية سوداء وعقارب معدنية).
وش الساعة
وهو الزجاج اللي عليها وبيتعمل من خامات مختلفة:
- الياقوت وده الأغلى فيهم ولكن ثمنه فيه لأنه غير قابل للكسر أو للخدش.
- زجاج معدني وده أرخص ولكنه برده كويس ومقاوم للخدش.
- زجاج بلكسي وده أرخص نوع ولكنه مش مقاوم للخدش.
مقاس وش الساعة
دي حاجة ممكن تنساها وخصوصًا لو بتشتري أونلاين عشان كده لازم تركز فيها كويس جدًا، خلي بالك من مقاس حاجتين:
- مقاس رستك (المعصم) يكون هو مقاس استيك الساعة.
- مقاس عرض رستك يكون مناسب لجسم الساعة نفسها يعني متكونش مثلًا الساعة واكلة نص يدك أو صغيرة أوي على ايدك.
- مقاس وش الساعة بيتقاس بالملليمتر والمقاسات كالتالي:
28 ملليمتر: غالبًا بتكون ساعات السيدات.
29-38 ملليمتر: دي مقاسات عادية مناسبة لأغلب الرجال.
فوق 38 ملليمتر: ودي مقاسات كبيرة شوية.
أكبر من 44 ملليمتر: دي بتكون وشوش كبيرة بزيادة.
- أحيانًا تلاقي ساعات بأكثر من عقربين ودوائر تانية غير الدائرة الكبيرة، ودي بيكون ليها وظائف مختلفة منها مثلًا أنها تكون بتعرض الوقت في منطقة زمنية تانية ودي خصائص ممكن تراجعها بنفسك في الساعة اللي تشتريها.
اقرأ أيضًا: تعرف على نظارات الواقع الافتراضي VR وأنواعها
6. طريقة عمل الساعة
فهمك لطريقة عمل الساعة هيساعدك تختار الساعة المناسبة ليك.
ساعة يد ميكانيكا: دي الساعة اللي بتعتمد عقاربها على سوست تتظبط كل فترة، وعشان كده النوع ده ممكن يفقد دقته بعد فترة.
ساعة يد أتوماتيكيا: دي بتعتمد على حركة اللي لابسها؛ بتستمد طاقتها من حركة ايدك ولازم تكون بتتحرك على طول عشان تكون ساعتك شغالة.
ساعة يد كوارتز: وهي النوع الأكثر شيوعًا، بتعتمد على البطاريات وبتستمر وقت طويل ولو وقفت الساعة الكوارتز مستخدمها بيحتاج بس تغيير بطاريات كل فترة.
لحد كده تكون ياقوطة وصلتك لبر الأمان واتطمنت عليك في رحلتك لشراء ساعة اليد. يلا دلوقتي ادخل على ياقوطة واتفرج على الساعات وقارن واشتري.
لمشاهدة مجموعة متنوعة من ساعات اليد من هنا، بسعر يبدأ من 25 جنيه مصري.
لو عندك خبرة أو نصيحة في شراء الساعات ماتنساش تشاركها معانا.
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.