كتب: صفاء مجدي

الثلاجة بتلعب دور مهم في حياتنا ياقوطة في المقال ده هتعرفنا ازاي نشتري ونختار الثلاجة المناسبة اللي تعيش معانا العمر الطويل وتوفر في الطاقة. يمكن تتفاجئ في السطور الجاية بمعلومات جديدة وهتقابلك نصائح مهم تعرفها قبل شراء ثلاجة جديدة، وهتعرف ازاي تشتري الثلاجة على أساس سليم يوفر لك فلوسك، ووقتك، وكمان هتعرف أنواع الثلاجات المختلفة وتحدد الثلاجة الجديدة المناسبة لمطبخك بسهولة. تعرف معنا على أفضل أنواع الثلاجات وازاي تختار المناسب ليك.

الثلاجة! الصندوق الجميل اللي واقف في المطبخ بيحتضنا وقت الجوع  سواء كان الساعة 2 الظهر أو 2 بالليل. الثلاجة اللي لا يمكن تخيب ظنك ودايمًا هتلاقي فيها حاجة تسد جوعك سواء بواقي بيتزا امبارح أو حتة من تورتة عيد الميلاد أو حتى طبق الجبنة اللي مهما الزمن يعمل فينا يفضل موجود وقاعد مستنيك، ولا ازازة المية الساقعة اللي بتنقذك من حر الصيف!

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

الثلاجات الأكثر مبيعًا حتى منتصف 2016 وفقًا لمستخدمي ياقوطة

الديب فريزر الأكثر مبيعًا حتى منتصف 2016 وفقًا لمستخدمي ياقوطة

ازاي تختار ثلاجة جديدة؟

أنواع الثلاجات

نعرف الأول أن في 7 أنواع لأشكال الثلاجات المختلفة..

1. الثلاجة التوب فريزر (الفريزر العلوي)

ثلاجة اليكتروستار فريزر علوي

التوب فريزر ودي النوع التقليدي المتعارف عليه في أغلب بيوتنا، دي الثلاجة المقسومة ثلثين ثلاجة عادية بأرفف بتسقع والثلث الأخير فوق عبارة عن فريزر بيتلج،  ودي عادة النوع الأرخص والأكثر انتشارًا.

 والنوع ده هيخدم احتياجاتك الأساسية وهتكون اختيار رائع للناس اللي عندها مساحة محددة ومش مهتمين أوي بالشكل ولو أنه في الفترة الأخيرة أصبح منها أشكال وألوان تليق على ديكور معظم المطابخ.

*سعتها بتتراوح بين 14- 22 قدم

شوف أسعار وأشكال الثلاجة التوب فريزر من هنا، يبدأ السعر من 1925  جنيه مصري.

2. الثلاجة البوتوم فريزر (الفريزر السفلي)

ثلاجة الاسكا فريزر سفلي

النوع التاني مش منتشر اوي وهو البوتوم فريزر والنوع دا يشبه التوب فريزر بس الفريزر في الحالة دي تحت مش فوق.

 اختيارك للتوب فريزر أو البوتوم فريز هتحدده على أساس نمط استخدامك

• يعني هل هيكون أريح لك أنك توطي تجيب الحاجات من الفريزر ولا أسهل لك أنك تجيبها وأنت واقف؟
• هل طول الثلاجة مناسب لطولك ولا في كل مرة هتحتاج حاجة من الرف العلوي في الفريزر هتندهي على جوزك يجيبها أو تقفي على كرسي؟
• هل أطفالك بيستخدموا الفريزر كتير عشان ياخدوا منه آيس كريم أو حلويات وأنت زهقت من كل مرة يندهوا لك تجيب لهم اللي محتاجينه؟

فكر في الأسئلة دي كلها وعلى أساس الإجابات اختار التوب فريزر أو البوتوم.

سعتها بتتراوح بين 19- 25 قدم.

شوف الثلاجة البوتوم فريزر من هنا، يبدأ السعر من 3000 جنيه مصري.

3. الثلاجة ذات البابين

عارفينها؟ الكبيرة دي أم بابين واللي بتكون مقسومة نصين: نص للفريزر ونص للأكل الساقع.

ثلاجة ذات بابين من يونيون آير

مميزات الثلاجة ذات البابين

• أنها بتوفر مساحة كبيرة جدًا للأكل، مناسبة لك لو بتحب تخزن في الثلاجة حاجات كثيرة.
• الثلاجات ذات البابين بتكون أغلبها متقسمة من الداخل تقسيمة حلوة جدًا وهتلاقي مساحة كبيرة لكل الأكل اللي نفسك تحطه بشكل منظم جدًا وسهل الوصول له.
• الثلاجات دي بيكون فيها مميزات كتيرة شوية عن بعض الثلاجة العادية زي مثلًا حنفية المياه أو الثلج لكن بقى فيه أنواع ثلاجات عادية بنفس الميزة دي.
• عادة بيكون أشكالها أنيقة جدًا وبتدي فخامة للمطبخ.  

عيب الثلاجات ذات البابين

• مساحتها الكبيرة من عيوبها لأنك هتحتاج مكان واسع في المطبخ.
• استهلاكها للطاقة الكهربائية كبير.
• أن لو هي من نوع مش متقسم من الداخل وكل جزء ببابه منفصل من داخل الثلاجة فأنت هتكون بتهدر طاقة وبتسرب برودة الثلاجة بشكل زايد كل مرة تفتح فيها أي باب من الاتنين دول.

حط في اعتبارك كقاعدة إن كل ما زادت سعة الثلاجة كل ما يزيد استهلاكها للطاقة.

*سعتها بتتراوح بين 22-30 قدم.

شوف أسعار وأشكال الثلاجة ذات البابين من هنا، يبدأ السعر من 11300 جنيه مصري.

4. الثلاجة ذات البابين ودرج (الباب الفرنسي)

بتجمع الثلاجة ذات البابين ودرج بين حاجتين الثلاجات أم بابين والثلاجات البوتوم فريزر لكنها بتكون أضخم شوية وبمساحة أكبر.

الثلاجة ذات البابين ودرج مثالية للناس اللي بتخزن أكل كثير، لكنها مش عملية أوي للاستخدام المنزلي وبتكون مناسبة أكتر للمطاعم أو للشيفات.

*سعتها تترواح بين 22-25 قدم

5. الثلاجة الصغيرة الميني بار

ثلاجة صغيرة ميني بار من وايت ويل

وهي الثلاجة الصغيرة اللي عادة بتاخد ربع الحاجات اللي بتاخدها ثلاجة عادية كبيرة، بتكون بباب واحد بس وجواها رف علوي كفريزر. لكن ميغركش شكلها الصغير لأنها في بعض الأحيان بيكون استهلاكها للكهرباء زيه زي الثلاجة الكبيرة بالظبط.

أهمية الثلاجة الصغيرة الميني بار واستخدامها المثالي

• لغرفة في سكن جامعي.
• لو بتحتاج ثلاجة صغيرة للمياه أو غيره في غرفة النوم لو مثلًا الغرفة بعيدة عن المطبخ.
• لو محتاج ثلاجة صغيرة تبقى جنب حد كبير مش بيتحرك بسهولة.
• لو محتاج ثلاجة في مكتبك.

أسعار وأشكال الثلاجة الصغيرة الميني بار من هنا، يبدأ السعر من  1150 جنيه مصري.

6. الثلاجة بيلت ان

زي ما في بوتاجاز وفرن بيلت ان في كمان ثلاجة بيلت ان ودي معمولة أساسًا عشان توفر المساحة بشكل كبير، بس الثلاجات البيلت ان بتكون من النوع اللي ببابين أو الثلاجات الفرنساوي اللي ببابين وفريزر تحتاني.

قد يعجبك أيضًا: خطوات ياقوطة بإيجاز لشراء جهاز البوتاجاز

7. ثلاجة من غير فريزر

الثلاجات من غير فريزر بتكون مثالية لو أنت أصلًا عندك وحدة فريزر منفصلة عن الثلاجة، وميزتها طبعًا المساحة الواسعة.

بعد ما تكلمنا عن نوع الثلاجة من حيث الشكل، هنتكلم عن مواصفات أخرى في الثلاجة ضروري تعرفها قبل شراء ثلاجة جديدة

سعة الثلاجة

• تاني حاجة تحددها هي الحجم، ودي بسيطة لأنك بتقيس مكان الثلاجة في مطبخك اد ايه وعلى أساسه تحدد.
• وخلي بالك تكون الثلاجة في مكان بعيد عن البوتاجاز وطبعًا تكون في حتة براح شوية تقدر تفتح فيها باب الثلاجة بحرية بدون ما يسد سكة أو يخبط في رف.
• اترك مسافة حوالي 10-15 سم خلف الثلاجة، واترك مسافة حوالي 5 سم حوالين الثلاجة يمين ويسار، لأنك مينفعش تزنقها في الحيطة من ورا أو في أي وحدة من وحدات المطبخ اللي حواليها.
• على عكس المتوقع الثلاجات اللي ببابين ممكن تكون كويسة جدًا في مساحة صغيرة لأن أبوابها الصغيرة في العرض مش بتحتاج مساحة كبيرة عشان تتفتح، وكل المساحة اللي هتحتاجها هتكون عرض الثلاجة ذات نفسها ولو قدرت توفر المساحة اللي تستوعب دا فأنت ممكن تشتري الثلاجة أم بابين عادي جدًا.
• حجم الثلاجة بيتقاس بالقدم.
• اختيارك لسعة الثلاجة المناسبة مهم لأن زيادة سعة الثلاجة عن حاجتك هيستهلك منك طاقة كهربائية زيادة، وهيكلفك زيادة على فاتورة الكهرباء أنت في غنى عنها.

طيب ازاي تحدد سعة الثلاجة المناسبة؟

ثلاجة 16 قدم من كريازي

• الحجم المثالي لثلاجة لأسرة من أربعة أفراد هو حوالي من 18 قدم  إلى 24 قدم، يعني نصيب الفرد بيكون حوالي 4-6 قدم.. لو أسرتك أكبر من 4 أفراد فاحسبها على الأساس ده.
• لو الأسرة أفرادها اثنين بس ومش بتطبخوا كثير فأنت مش هتحتاج ثلاجة كبيرة وحاول تكون ثلاجتك في حدود 12 قدم إلى 16 قدم مش أزيد من كده.
• لو أفراد الأسرة اثنين بس لكن بتطبخوا بشكل يومي مثلًا يبقى أقل حاجة تجيبها تكون 18 قدم .
• يتوقف حجم الثلاجة على عامل آخر مهم وهو نمط استخدامك للثلاجة:
  • في نمطين: النمط الأول هو أنك بتنزل كل أسبوع أو مرتين في الشهر تشتري كل مستلزماتك من اللحوم، والخضار، والفاكهة، والمعلبات، وترجع تملى الثلاجة على عينها. الثلاجة اللي تنفع في النمط ده بتكون الثلاجة اللي مساحتها كبيرة وتشيل كتير.
  • النمط الثاني: لو كنت من النوع اللي بيجيب مستلزمات الطبخ أول بأول على مهله، والثلاجة مش بتكون مليانة كلها مرة واحدة على بعضها فأنت تجيب الحجم الصغير أفضل.
• وأنت بتقيس أبعاد المكان اللي هتحط فيه الثلاجة فكر في الطريق اللي الثلاجة هتمر بيه لحد ما توصل لمكانها ده، بمعنى هل مثلًا هتمر من خلال باب قصير شوية أو طرقة ضيقة، تفكيرك في التفاصيل دي كلها هيجنبك المشاكل اللي ممكن تواجهها لما تشتري الثلاجة.

حجم الثلاجة بيكون مكتوب عليها أو بيكون موجود في الكتالوج بتاعها أو ممكن تسأل المسؤول في معرض الثلاجات.

فكر داخل الثلاجة

 ثلاجة 24 قدم نوفروست من هيتاشي 

• هل معظم اللي بتشتريه أكل طازة زي الخضار والفاكهة؟ ولا معظم أكلك لحوم مجمدة، وفراخ، وأسماك مجمدة هيتحطوا في الفريزر؟ ولا هل أنت من هواة التخزين ومحتاج مساحة فريزر كبيرة؟ على الأساس ده هتحدد شكل ثلاجتك يكون ازاي.
• فكر في منتجات الأكل المختلفة من حيث طرق تخزينها أو اللي بتحتاج درجة حرار مختلفة، يعني دلوقتي بقى موجود في معظم الثلاجات رف لتخزين الجبن مخصوص أو الزبدة أو الحاجات اللي بتحتاج درجة معينة من الحرارة والرطوبة، ممكن كمان تكون بتستخدم المياه والتلج بشكل مستمر وبالتالي بدل ما تفتح الثلاجة وتقفلها في اليوم مليون مرة وده ممكن يبوظ الباب أو يقلل من كفاءة تبريد الثلاجة بشكل عام فأنت في الحالة دي اشتري ثلاجة تكون بحنفية مياه وثلج تستخدمها بشكل مستمر من غير ما تفتح الثلاجة كتير.

المميزات الشقية للثلاجات العصرية

في السنوات الأخيرة الثلاجات معدتش مجرد ثلاجات وبقى فيه ثلاجات ذكية بتجمع بين أكثر من وظيفة وكمان ظهرت ثلاجات أسهل في الاستخدام والتنظيف ومميزات أخرى كثيرة  جبنالك أهمها هنا:

سهولة الاستخدام

الثلاجات اللي ببابين أو بأدراج في منها أنواع سهلة جدًا في الفتح أو أدراجها بتتزحلق بسهولة وبالتالي بتسهل الاستخدام، من الأنواع دي ثلاجات أل جي، وثلاجات سامسونج.

مساحات تخزين مرنة

حاول تشتري ثلاجة يكون سهل تحريك أرففها ويكون تركيب وإزالة الأرفاف سهل بالإضافة إلى التحكم في الأدراج وتقسيمتها عشان لو هتحط فيها حاجة كبيرة شوية زي مثلًا زي تورتة كبيرة.

ثلاجات ذكية

في ثلاجات ذكية زيها زي التلفزيونات الذكية، ودي بتلقط واي فاي وتتصل بالإنترنت عشان تبحث عن الوصفات، وكتابة ملاحظات، وكمان ممكن تشغل موسيقى عشان تستمع للموسيقى زي ما تحب وأنت في المطبخ.

تغيير الحرارة والرطوبة

في ثلاجات تقدري تغيري طبيعة شغلها عن طريق تغيير درجة الحرارة تمامًا وتحوليها من ثلاجة إلى فريزر والعكس، من المميزات الرئيسية في الثلاجة أنك تقدر تتحكم في درجة الحرارة والرطوبة عشان يكون أكلك طازج دائمًا.

سهولة التنظيف

اشتري ثلاجة تكون سهلة التنظيف، أغلب الثلاجات سطحها ناعم يادوب يتسمح بفوطة مبلولة ويتنشف، تجنب الثلاجات اللي سطحها منقوش أو خشن شوية عشان دي هتغلبك في تنظيفها. في كمان ثلاجات بيكون سطحها مبيتأثرش ببصمات الأصابع ودي كويسة جدًا خصوصًا لو عندك أطفال.

الهدوء

تأكد أن الثلاجة مش زنانة ومش بتعمل صوت مزعج وخصوصًا لو مطبخك مفتوح أو هتحط الثلاجة في طرقة أو صالة.

الرائحة

معظم الثلاجات الجديدة فيها ميزة امتصاص الروائح والتخلص منها وهي ميزة مهمة عشان الأكل مبيوظش رائحة بعضه.

استهلاك الطاقة الكهربائية

اقرأ كتالوج الثلاجة والتعليمات الخاصة بالطاقة الكهربائية اللي بييجي مع الثلاجة وقارن بين الأنواع المختلفة. وعشان توفر في الطاقة الكهربائية بلاش تحط الثلاجة في مكان قريب من أي مصدر للحرارة سواء بوتاجاز أو فرن أو حتى جهاز بيسخن زي مثلًا الغسالة أو غسالة الأطباق.

لو اتبعت كل الخطوات السابقة قبل شرائك للثلاجة فنضمن لك أنك هتشتري ثلاجة كويسة تعيش عمر طويل، وتوفر لك فلوسك، ووقتك.

لو شايف إننا نسينا حاجة في خطوات شراء الثلاجة أو عندك اقتراحات ابعت لياقوطة!

تقدر تشوف كل الثلاجات الموجودة في ياقوطة من هنا.

اتصفح ياقوطة وابحث، وقارن، واشتري وأنت في مكانك.

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.