كتبت: شذا وليد

اقترب موعد تجديد بطاقة الرقم القومي الخاصة بك؟!

ترغب في معرفة موعد صدور الفيلم الأخير لنجمك المفضل؟!

ترغب بحجز تذاكر قطار للإسكندرية لحضور مناسبة خاصة؟!

أم أنك مهموم بالبحث عن علاج ولم تجده بالصيدليات المجاوة لك؟!

كل تلك الخدمات وأكثر بإمكانك الحصول عليها وأنت في منزلك أو مكتبك دون الحاجة لمشقة الخروج من المنزل.

فبسبب تطور الخدمات الحكومية والخاصة، أصبحت عملية الحصول على العديد من الخدمات الهامة عملية سهلة للغاية. وأصبحت مشاوير صعبة ومملة كاستخراج بطاقة الرقم القومي، ودفع قيمة فواتير تليفونك الأرضي وتجديد خدمة الانترنت عملية بسيطة.

بل إن الأمر تجاوز هذا الحد، فأصبحت الخدمات الإلكترونية تشمل جوانب كثيرة للحياة من حولنا، كحجز فندق مثالي لتقضية أجازتك المقبلة فيه، أو معرفة مواعيد صدور أحدث فيلم لنجمك المفضل، ولو رغبت في التبرع لأي من الجمعيات الخيرية فبإمكانك فعل هذا وأنت في مكانك. ولو أحببت أن تريح زوجتك من عناء الطبخ فبمكإنك أيضًا فعل ذلك عن طريق الإنترنت من خلال معرفة قائمة بأفضل المطاعم المحيطة بك ومعرفة المنيو الخاص لما تقدمه تلك المطاعم.

ولما كان هدفنا الأهم في ياقوطة هو راحتك عزيزي القارئ فقد قمنا اليوم بعمل (دليل ياقوطة للخدمات الالكترونية في مصر) في محاولة منا لتوفير وقتك ومجهودك لمعرفة قائمة بأغلب وأهم الخدمات العامة والخاصة التي تحتاجها بصورة دورية، مع شرح مبسط لكيفية الاستفادة من تلك الخدمات.

ياقوطة.. راحتك هدفنا.

1. المواقع الحكومية

• موقع الحكومة المصرية: على الموقع تقدر تعرف عن خدمات حكومية كتير زي عناوين وأرقام والمواقع الإلكترونية للوزارات المختلفة وأسماء وعناوين وأرقام ومراكز محافظات مصر والمواقع الخاصة بمجالس الدولة المختلفة وملف الدستور والقوانين الحكومية وخدمات تنسيق القبول بالكليات والمعاهد وخدمة معادلات الدرجات العلمية وخدمة تكليف الأطباء بالإضافة إلى خدمات الجمارك والاستعلام عن ودفع فواتير الكهرباء للمشتركين مع شركة قناة السويس للكهرباء وخدمات مكاتب الشهر العقاري وخدمات المحاكم (الابتدائية والنقض والاستئناف) والاستعلام عن مخالفات رخص القيادة.
• بوابة الشكاوى الحكومية: من خلال الموقع تقدم على أي شكوى للحكومة ويتم دراستها وحلها في أقرب فرصة. تقدر تتابع حالة الشكوى بتاعتك والإجراءات اللي اتاخدت حيالها من خلال رقم التليفون أو رقم البطاقة.
• قطاع مصلحة الأحوال المدنية: من خلال الموقع ده تقدر تستخرج وثيقة ميلاد، وفاة، زواج، طلاق، بطاقة الرقم القومي، قيد عائلي أو فردي. يتم الدفع أون لاين بكروت الائتمان أو نقدًا عند الاستلام. بالإضافة إلى خدمات المصريين بالخارج.
• وظائف الحكومة المصرية: هتلاقي على الموقع ده فرص عمل في الحكومة وتقدر تشوف المتطلبات والضوابط المتعلقة بكل وظيفة.
• سكك حديد مصر: من خلال الموقع تقدر تعرف الجدول الزمني والأسعار الخاصة بالقطارات. بالإضافة إلى إمكانية حجز تذاكر القطار مكيفة الهواء للدرجة الأولى والثانية والدفع باستخدام بطاقات الائتمان.
• وزارة الكهرباء والطاقة المتجددة: من خلال الموقع تقدر تعرف قوانين الكهرباء وحالة الشبكة الكهربائية ومعلومات عن ترشيد استهلاك الطاقة وتقديم بلاغات سرقة التيار الكهربائي وحساب تقريبي للاستهلاك اليومي للكهرباء للبيت حَسَب استخدامك للأجهزة والاستعلام عن الفواتير ودفعها أون لاين وإجراءات توصيل الكهرباء. وممكن كمان تعرف آخر أخبار الوزارة ورؤيتها وإنجازاتها.
• شركة الخدمات التجارية البترولية: من خلال الموقع تقدر تستعلم عن فاتورة الغاز وإدخال قراءة الغاز بنفسك وتبعت أي شكاوى أو مقترحات خاصة بالخدمة والأرقام اللي ممكن تتصل بيها لو واجهتك أي أعطال. بالإضافة إلى معلومات عن الزيوت المستعملة وأنواعها ومتابعة آخر أخبار شركة بترو تريد.
• البريد المصري: من خلال الموقع تقدر تستعلم عن شقق وزارة الإسكان وتتبع المواد البريدية وتتبع شحنات الكوريير والبحث عن مناقصة أو مزايدة أو مورد والبحث عن مكاتب بريدية وخدمات الطباعة الرقمية والأوفست ومشاهدة الطوابع البريدية.
• بوابة معلومات مصر: في الموقع ده هتلاقي معلومات عامة عن مصر وإجراءات الدخول والخروج من البلد ومواعيد العمل والإجازات الرسمية. بالإضافة إلى البحث عن إحصاءات وقواعد بيانات خاصة بمصر، واللي أكيد أي باحث ممكن يحتاجها في شغله. ده غير ملفات عن دراسات اقتصادية واجتماعية متعددة ومعلومات عن ندوات وورش عمل. هتلاقي كمان عناوين وأرقام السفارات الأجنبية في مصر.
• الجهاز المركزي للتعبئة والإحصاء: هتلاقي على الموقع الساعة السكانية لمصر وسكان كل محافظة على حدة. بالإضافة إلى إحصاءات وبيانات تفصيلية وقواعد بيانات ومُسوح عن مختلف الموضوعات الخاصة بمصر سواء لها علاقة بالاقتصاد أو السياحة والتجارة والفقر والدخل وغيرها من المعلومات الحيوية والمهمة. هتلاقي على الموقع كمان إعلانات عن وظائف للعمل في الجهاز. ده غير إصدارات متنوعة موجودة أون لاين عن دراسات عديدة أجراها المركز وخرائط كتير عن جغرافيا مصر.
• بوابة المشتريات الحكومية: هتلاقي على الموقع عناوين وأرقام الهيئة العامة للأبنية التعليمية في كل محافظة في مصر والعمليات الشرائية المشتركة فيها. ومن خلال محرك البحث على الموقع تقدر تدوّر على مورد أو عملية شرائية أو منتج محلي. بالإضافة إلى ملفات لقوانين حكومية وإمكانية استعراض العروض المقدمة ونشر العمليات الشرائية.
• الشركة القابضة للنقل البحري والبري: تقدر تحجز رحلاتك الداخلية سواء برية أو بحرية من خلال الموقع وتدفع بكروت الائتمان.
• المصرية للاتصالات: ممكن تستعلم عن فاتورة التليفون الأرضي أون لاين باستخدام رقم الحساب أو رقم التليفون وتعرف رقمك الجديد. تقدر تعرف أحدث العروض الخاصة بالبيت والأعمال. ده غير وظائف متاحة في الشركة معروضة على الموقع. بالإضافة إلى أرقام مراكز وخدمات مهمة في مصر والكود والوقت الخاص بكل بلد حول العالم ودليل بفروع الشركة في كل محافظات مصر. وممكن تبعت أي استفسار أو شكوى أون لاين.
• وزارة التربية والتعليم: من خلال الموقع تقدر تتطلع على مركز معلومات الوزارة عشان تتواصل معاهم لو عندك أي استفسارات أو اقتراحات والاستعلام عن مصاريف الدراسية للمدارس والاطلاع على بوابة التعليم الفني وكتاب الإحصاء السنوي والمؤشرات والإحصاءات لكل عام دراسي ومعلومات عن نظام إدارة كادر المعلم، بالإضافة إلى شبكة المُعلمين التابعة لميكروسوفت والتي تحتوي على عدة برامج مفيدة للطلبة والمدرسين.
• وزارة التعليم العالي: هتلاقي على الموقع معلومات عن شئون الطلاب الوافدين، وطلبة الإشراف العلمي لتأجيل التجنيد، وخريطة الجامعات المصرية وعناوين وأرقام المراكز الثقافية الأجنبية بمصر ده غير إعلانات عن منح دراسية وجوائز ومسابقات ثقافية.
• وزارة الداخلية المصرية: هتلاقي على الموقع معلومات عن الوزارة ومواقع الجهات الشرطية ودليل مديريات الأمن ودليل الجهات الشرطية زي قطاع مصلحة الأمن العام والإدارة العامة للمرور وغيرهم كتير، بالإضافة إلى أرقام الطوارئ وإمكانية التقدم بشكاوى وبلاغات السائحين والمواطنين وخدمة تجديد تصاريح العمل والخدمات الإلكترونية لكلية الشرطة. هتلاقي كمان تصاريح وأخبار خاصة بوزارة الداخلية.
• البورصة المصرية: هتلاقي على الموقع القوائم المالية وأخبار القيد وأخبار الشركات ومعلومات وافية عن التداول وبيانات السوق والعلاقات الدولية وتقارير ونشرات عن البورصة المصرية ومؤشراتها والتسجيل لزيارة متحف البورصة المصرية.
• بوابة الحج المصرية: هتلاقي على الموقع توقيتات ونتائج حج القرعة ومعلومات عن الجمعيات والسياحة والهيئات والبعثات وإمكانية تقديم شكاوى أو مقترحات. هتلاقي برضه فتاوى عن الحج ومناسكه بالإضافة إلى أخبار عن الحج والتقديم له.

 2. مواقع البيع والشراء

• بيع واشتري Be3 weshtery: هو موقع لبيع وشراء حاجات كثير زي موبايلات وعقارات (ممكن للإيجار كمان) وكمبيوترات وسيارات. ممكن تنشر أو تلاقي إعلان عن وظائف متعددة في مجالات زي التسويق، والهندسة، والبرمجة وغيرهم، بالإضافة إلى نشر إعلانات مبوبة.

• بروبيرتي فايندر Property Finder: هو موقع لبيع وشراء وتأجير العقارات في مصر وأكتر من دولة عربية كمان. تقدر من خلال محرك البحث بتاعهم تدوّر على العقار المناسب ليك حَسَب السعر وعدد الغرف والمساحة. ممكن تلاقي من خلاله برضه وحدات طبية ومحلات تجارية.
• عقار ماب Aqar Map: هو موقع لبيع وشراء وتأجير الشقق والعقارات والفيلات والشاليهات في مصر والسعودية. الموقع عليه نصائح متعددة فيما يتعلق بشراء العقارات واستغلال المساحات بطريقة ذكية في الشقق. ممكن من خلال الموقع تتواصل مع المُعلِن عشان لو عندك أي أسئلة.
• إستبينا Estabena: من خلال الموقع أو تطبيق الموبايل تقدر تبيع وتشتري عقارات من مختلف الأنواع (شقة، فيلا، عيادة، مكتب… إلخ) في القاهرة الكبرى والإسكندرية والمنوفية. تقدر تدوّر على العقار المناسب حَسَب السعر وعدد الغرف. عشان تسجّل عقارك، يتم التواصل مع الفريق وتحديد ميعاد للزيارة عشان يجمعوا معلومات وصور دقيقة عن العقار. بعدين المعلومات دي بتنشر على الموقع عشان زوار الموقع يشوفوها.
• كونتاكت كارز Contact Cars: تقدر من خلال الموقع ده تبيع أو تشتري سيارات وموتوسيكلات مستعملة أو جديدة. عليه عناوين كل مراكز الخدمات الخاصة بكل نوع سيارة، بالإضافة إلى أسماء معارض السيارات في مصر وتقييم المستخدمين ليهم. ده غير برامج التقسيط والتأمين على السيارات.

• هتلاقي Hatla2ee: موقع لبيع وشراء سيارات جديدة أو مستعملة. تقدر من خلال محرك البحث بتاعهم تدوّر على السيارة المناسبة ليك حَسَب السعر والموديل والماركة. عليه برضه أسعار السيارات الجديدة والمستعملة عشان تبقى عارف الأسعار وانت بتشتري أو بتبيع. هتلاقي على الموقع عناوين وأرقام مراكز الصيانة لكل ماركة، بالإضافة إلى معلومات ونصائح عن شراء السيارات والمخالفات المرورية.

3. خدمات طبية

• فيزيتا Vezeeta: تقدر من خلال الموقع تدوّر على أكتر من ٢٠٠٠ دكتور في العديد من المحافظات وتقارن حَسَب تقييمات المرضى وتحجز ميعادك باليوم والساعة. بالإضافة إلى معرفة سعر الكشف ومدة الانتظار.
• روشتة Rosheta: الموقع بتاعهم عبارة عن محرك بحث واللي من خلاله تقدر تدور على أي دواء محتاجه. ممكن تدور على الدواء من خلال اسمه أو الأعراض اللي عندك أو المادة الفعالة اللي فيه. ممكن كمان ترفع صورة الروشتة والموقع هيساعدك تلاقي الأدوية اللي انت محتاجها. لما تحدد الدواء اللي انت عايز تشتريه، الموقع بيقولك على أقرب ٣ صيدليات لعنوانك عشان تختار اللي يناسبك أكتر. روشتة دوت كوم بيوصل لكل محافظات مصر تقريبًا بدون أي رسوم.

4. خدمات ترفيهية

• تيكيتس مارشيه Ticketsmarche: عليه جدول بكل المناسبات والحفلات في مصر. هتلاقي حفلات موسيقية ومناسبات رياضية وسياحية وفنية. كل اللي عليك تعمله إنك تنشئ حساب على الموقع وتحجز نوع التذكرة اللي انت عايزها للمناسبة اللي رايحها بعدين بتستلم التذكرة من إحدى منافذ البيع الموضحة على الموقع وتدفعها هناك.
• احجزلي e7gezly: ممكن من خلال الموقع تدوّر وتحجز ندوات ومناسبات وحفلات كتير في مصر. ممكن تدفع أون لاين أو من خلال موقع فوري أو تدفع نقدًا لما المندوب يجيلك على البيت.
• دار الأوبرا المصرية: حجز الحفلات بقى أسهل بكتير دلوقتي لإنك ممكن تحجز وتدفع تذاكرك أون لاين وتختار المقاعد اللي انت عايزها.
• السينما. كوم: ممكن من خلال الموقع تحجز تذاكر للفيلم اللي انت عايزه في مجموعة سينمات مُختارة في القاهرة. ممكن تدفع من خلال موقع فوري أو بكروت الائتمان. ممكن برضه تشوف إيرادات كل فيلم بالإضافة إلى دليل قنوات التليفزيون.
•  eventtus: هو تطبيق وموقع مصري شبيه بموقع الفيس بوك وتويتر، يمكنك من خلاله معرفة جميع الأحداث المهمة والشهيرة الموجودة بمنطقتك أو بلدك، وبإمكانك مشاركة أي إيفنت ترغب بالتنويه عن لأصدقائك. وعن طريق خاصية Handshake يمكنك التواصل مع من قابلتهم في الإيفنت عن طريق تبادل المعلومات.

5. مواقع التوظيف

• جوبزيلا Jobzella: تقدر من خلال الموقع ده تنشر السيرة الذاتية أو ال resume بتاعتك وتدوّر على فرص العمل اللي تناسبك، بالإضافة إلى البحث عن دورات تدريبية. والموقع ده مفيد لأصحاب الأعمال والشركات إنهم يلاقوا مرشحين للعمل اللي بيقدموه. كل فترة، جوبزيلا بينظّم معرض توظيف يجمع العديد من الشركات من مختلف المجالات.
• وظّف Wuzzuf: من خلال الموقع ده تقدر تنشر سيرتك الذاتية وتلاقي فرص العمل والتدريب في مختلف الشركات في مصر. ممكن برضه لو حد محتاج يلاقي مرشح لشغل يعلن عن الفرصة دي على الموقع. بالإضافة إلى إن الموقع عليه مقالات ونصائح كتير عن الشغل ومقابلات العمل. ده غير إعلانات عن معارض التوظيف وورشات العمل اللي بتتعمل كل فترة.
• بيت Bayt: من خلال الموقع ده تقدر تنشر سيرتك الذاتية وتلاقي فرص العمل والتدريب في مختلف الشركات في مصر والشرق الأوسط. والموقع ده مفيد لأصحاب الأعمال والشركات إنهم يلاقوا مرشحين للعمل اللي بيقدموه. ده غير خدمات كتابة السيرة الذاتية عشان تساعدك في التقديم. وهتلاقي على الموقع دورات تدريبية لدعم سيرتك المهنية وبرامج الدرجات الجامعية.

6. مواقع حجز الطيران والسياحة

• إيجيبت ترافيل Egypt Travel: ده موقع تابع لهيئة السياحة المصرية عليه دليل متكامل عن كل الأنشطة والأماكن اللي تتراح في مصر. وممكن كمان تلاقي عليه المناسبات اللي بتتعمل في البلد.
• بطوطة Batuta: الموقع ده عليه دليل متكامل للعديد من المدن السياحية حول العالم مكتوبة باللغة العربية تضم الأنشطة والمزارات السياحية في كل مدينة. بالإضافة إلى إمكانية حجز فوري للفنادق بإلغاء مجاني على معظم الحجوزات. ممكن كمان تشوف مقالات عن أشهر المطاعم والفعاليات وأماكن التسوق في كل بلد.
• ترافل ستارت Travel Start: من خلال الموقع تقدر تلاقي أحسن العروض على تذاكر الطيران والفنادق وسيارات للتنقل في العديد من الدول حول العالم. بالإضافة إلى تأمين السفر وإجراءات سفر كل بلد والأماكن اللي تتراح وأهم الأنشطة اللي تعملها.

7. مواقع الطعام

• المنيوز Elmenus: الموقع ده عليه كل قوائم الطعام وأرقام وعناوين كل المطاعم في مصر. من خلال محرك البحث على الموقع، ممكن تدوّر على المطعم اللي انت عايزه حَسَب المكان ونوع الطعام اللي نفسك فيه. بالإضافة إلى إنك تقرأ رأي الناس في المطاعم المتعددة.
• Otlob: رافعين شعار الساخر الكبير (برنارد شو) ليس هناك حب أعظم من حب الطعام، يقدم موقع وأبلكيشن أطلب دوت كوم دليل شامل لخريطة المطاعم الموجودة بمنطقتك ويمكنك من التعرف بدقة على قائمة الطعام الخاصة بكل مطعم على حدة ويمكنك من الطلب من خلاله لما تشاء وتحدد أيضًا وقت استلام الطلب، وبإمكانك الدفع عند استلام طلبك.
• menuegypt: وهو دليل مُجمع لأفضل وأشهر المطاعم بجمهورية مصر العربية، ويمكن البحث من خلال المنطقة التي تسكن بها ويعرض عليك قائمة بكافة المطاعم المتاحة بمنطقتك، إلى جانب ميزة البحث (بالاسم،الأكثر مشاهدة، الأحدث) يعرض لك الموقع عناوين الأفرع ويعرض عليك أيضًا قائمة بالمطاعم الشبيهة بالمطعم الذي تبحث عنه من حيث المحتوى، كما يعرض عليك بالطبع قوائم  الطعام لكافة المطاعم الموجودة.

8. خدمات تنظيف المنازل

• إليجانس كير Elegance Care: تقدر من خلال الموقع تطلب خدمات تنظيف متعددة للملابس والأثاث والبيت والستائر والعناية بالرخام. وممكن كمان تختار عروض التنظيف حَسَب احتياجاتك. الموقع كمان عليه نصائح متعددة لتنظيف البيت.
• تاسكتي Taskty: من خلال الموقع وتطبيق الموبايل تقدر تطلب العديد من الخدمات زي تنظيف المنازل والمفروشات ومكافحة الحشرات والصيانة المنزلية وأعمال نقاشة ودهان وغيرهم كثير. يتم الدفع نقدًا لمقدم الخدمة.
• Busybees: هي شركة تنظيف للمنازل بكل سهولة ويسر، عن طريق الموقع بإمكانك طلب خدمات تنظيف للمنزل، والمميز بشركة Busybees هو وجود مستويات لتنظيف المنزل (تنظيف خفيف ويشمل تلميع الأثاث بكافة أنواعه، تنظيف كامل ويشمل النجف واللمبات، والشبابيك، والأجهزة الكهربائية كالثلاجات وخلافه).

9. مواقع التنقل والتوصيل

• رايح Raye7: من خلال تطبيق الموبايل بتاعهم تقدر تتواصل مع الناس اللي في محيط سكنك أو شغلك عشان تركبوا مع بعض ما دام بتروحوا نفس المكان فتوفروا مجهود ووقت وفلوس. وممكن تحدد لو انت عايز تركَب مع حد أو عايز تركّب حد معاك وتقول معاك كام مكان في عربيتك. وسعر التوصيلة بيبقى بنظام نقاط حَسَب استهلاك البنزين.
• أوسطى Ousta: من خلال التطبيق تقدر تطلب عربية بسائق توصلّك المكان اللي انت عايزه. ميزته إن أجرته ثابتة على طول حتى لو في أوقات الذروة.  ممكن تدفع نقدًا أو من خلال بطاقتك الائتمانية.
• أوبر Uber: وممكن عن طريق التطبيق ده تطلب عربية ليك أو لغيرك عن طريق تحديد المكان اللي بتكون/ بيكون فيه وميزة البرنامج إنه بيديك تعريفة تقريبية للفلوس إللي ممكن تدفعها وكمان بيديك تنبيه في حالة طلب العربية في وقت الذروة إللي برضه بيقولك الفلوس هتكون قد إيه، البرنامج كمان بيقدم ميزة تتبع للعربية اللي انت طلبتها فتقدر تعرف من خلاله هو فين وقدامه وقت قد إيه ويكون عندك. ممكن تدفع لأوبر كاش أو بكروت ائتمان أون لاين.
• Careem: من أفضل وأشهر تطبيقات التوصيل لما يتميز به من الانتشار الكبير وتنوع موديلات السيارات إلى جانب طرق الدفع (كاش، فيزا كارد)، البرنامج يعطي تعريفة تقريبية للمشوار قبل الطلب وبإمكانك متابعة خط سير السيارة وهي في الطريق إليك، كما يمكنك طلبه لأي فرد من عائلتك أو أصدقائك عن طريق مكان الذهاب.
• Go Bus: بإمكانك من خلال التطبيق أن تحجز رحلتك أون لاين إلى الغردقة، الأقصر، الإسكندرية، مرسى علم، وشرم الشيخ دون الحاجة للتوجه إلى مكتب التذاكر، ويتميز البرنامج بتحديد موعد الوصول إلى وجهتك. كل ما عليك فعله هو تحديد موعد وتاريخ الرحلة واترك الباقي لجو باص.

10. مواقع الدفع الإلكتروني

• ون كارد One Card: تعتبر بوابة دفع إلكترونية وتسهلك شراء وحجز اللي انت عايزه أون لاين. وليهم موزعين في محلات متعددة في القاهرة.
• كاش يو Cashu: كل اللي عليك تعمله إنك تنشئ حساب على الموقع بعدين تحُط فيه فلوس من خلال موزعين كتير موجودين في مصر بعدين تشتري وتحجز اللي أنت عايزه أون لاين بأمان.
• بي Bee: هي شركة لخدمات السداد وحلول التحصيل عشان تقدر تخلّص خدمات كتير بسرعة وأمان زي شحن رصيد المحمول ودفع فواتير التليفون وال ADSL ومصاريف جامعات معينة، وشحن رصيد الألعاب والتبرعات وخدمات التأمين. لديهم العديد من المنافذ في محلات كتير في مصر. وممكن برضه من خلال الموقع تلاقي وظائف في الشركة.
• مصاري Masary: هو موقع لتسهيل خدمات الدفع الإلكتروني. تقدر من خلاله تدفع فواتير التليفون والتأمين ولجهات التبرع ومصاريف بعض الجامعات والتسوق أون لاين ودفع مصاريف الكهرباء. خدمات تسهيل الدفع الإلكتروني متوفرة للأفراد والشركات. وممكن برضه من خلال الموقع تلاقي وظائف في الشركة.

11. مواقع التبرع

• بنك الطعام المصري: ممكن تتبرع بكارت الائتمان الخاص بيك من خلال الموقع للمساهمة في القضاء على الجوع في مصر. في كذا برنامج إطعام ممكن تتبرع ليهم زي لحوم الصدقات، والإطعام الشهري، وزكاة المال، والتغذية المدرسية وغيرهم كتير. ممكن تتبرع من خلال البنك الأهلي المصري أو البنك العربي الأفريقي الدولي.
• مؤسسة مجدي يعقوب للقلب: ممكن تتبرع من خلال الموقع عشان تساهم في عمليات القلب في المؤسسة. ممكن تتبرع بالمبلغ اللي انت عايزه بالجنيه المصري، أو بالدولار الأمريكي.
• مدينة زويل للعلوم والتكنولوجيا: ممكن تتبرع من خلال الموقع لدعم البحث العلمي في مصر بالمبلغ اللي انت عايزه.
• جمعية رسالة: من خلال الموقع تقدر تتبرع لكذا مشروع زي كفالة اليتيم وتبرع لأطراف صناعية، وسماعات للصم وضعاف السمع، وزكاة المال.
• مؤسسة بهية: من خلال الموقع تقدر تتبرع بالمبلغ اللي انت عايزه للكشف والعلاج من سرطان الثدي.
• مستشفى ٥٧٣٥٧: من خلال الموقع تقدر تتبرع لكذا برنامج لعلاج سرطان الأطفال زي زكاة المال والصدقة الجارية، والتبرع الشهري والبحث العلمي، وكفالة علاج طفل مريض.
• جمعية الأورمان: من خلال الموقع تقدر تتبرع لكذا برنامج زي مستشفى شفاء الأورمان، وعمليات القلب وكفالة اليتيم، والأضحية، وشنطة رمضان، وزكاة المال، والصدقة، والصدقة الجارية.
• مؤسسة الحسن: تهدف المؤسسة إلى دعم وتأهيل مستخدمي الكراسي المتحركة. ممكن من خلال الموقع تتبرع بالمبلغ اللي انت عايزه لشراء أجهزة طبية، أو إعانة عائلة، أو حملات توعية، أو إعادة تأهيل وغيرهم كتير من البرامج.
• مؤسسة أهل مصر: من خلال الموقع تقدر تتبرع بالمبلغ اللي انت عايزه للعلاج والتوعية عن الحروق.
• مؤسسة مصر الخير: من خلال الموقع تقدر تتبرع بالمبلغ اللي انت عايزه لدعم مشروعات تنمية الإنسان من حيث الصحة والبحث العلمي، والتكافؤ الاجتماعي وغيرها من المجالات.
• مستشفى أيادي المستقبل: تقدر تتبرع من خلال الموقع لعلاج الأورام بالمجان. يمكنك اختيار نوع التبرع، علاج أو أجهزة طبية أو كفالة سرير.
• بيت الزكاة والصدقات المصري: تقدر تساهم بتبرع أو زكاة والبيت بيصرفها في الأوجه المناسبة المقررة شرعًا.
• مؤسسة نور علي نور: تقدر تتبرع من خلال الموقع لعلاج الأطفال.

في مواقع تانية بتستخدموها بتسهّل عليكم حياتكم؟ شاركونا بيها في التعليقات.