الأسعار والمعلومات في المقال ده سارية وقت نشر المقال، لو حابب تشوف أحدث مقال عن  أهم ٧ موبايلات على ياقوطة في ٢٠١٧ شوفه من هنا.

كتب: محمد عبد الرحمن

ارتفاع وتغير أسعار الموبايلات كل يوم خلّى ناس كتيرة تحس إن الحصول على موبايل بإمكانيات وسعر كويسين شيء صعب جدًا. وبقى طبيعي إن كتير مننا يسمع جملة «عاوز موبايل حلو هتدفع سعر غالي».

ولإننا في ياقوطة ما يرضيناش تعب وحيرة المشتري، جمعنا لكم في المقال ده أهم موبايلات بتبدأ من سعر ٥٠٠٠ جنيه لغاية ٦٠٠٠ جنيه وفيها مميزات كتيرة توازي أسعارهم، بالإضافة لأهم مميزات وعيوب وتجارب مستخدمي الموبايلات دي، ولو عجبك موديل منهم تقدر تعرف أحسن الأسعار ليه من خلالنا وممكن كمان تطلبه ويكون عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*ممكن تشوف مواصفات الموبايلات بالتفصيل من mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

١- موبايل Huawei P10 Lite

المميزات

• شاشة الموبايل بتيجي بحجم ٥٫٢ بوصة، وحجم بكسلات ١٢٨٠×١٠٨٠ بكسل، وكثافة بكسلات ٤٢٤ بكسل، وبتدعم لغاية ١٠ أصابع للمس.
• الموبايل بييجي ببروسيسور ثماني النواة HiSilicon Kirin 658 ومعالج رسومي Mali-T830MP2، ومزوّد برامات بسعة ٤ جيجابايت، وميموري داخلي بسعة ٣٢ جيجابايت، وممكن تزود ميموري إضافية لغاية ٢٥٦ جيجابايت.
• الموبايل بيشغل شريحتين اتصال وميموري خارجي، وبيدعم تقنيات الاتصال للجيل الرابع، وراديو FM، وكمان جيروكسوب، والـ OTG.
• الموبايل مزوّد بمستشعر بصمة الإصبع.
• كاميرا الموبايل بتيجي بقوة ١٢ ميجابكسل، ومزوّدة بفلاش أحادي LED، سيلفي الموبايل بقوة ٨ ميجابكسل.
• بطارية الموبايل بتيجي بسعة ٣٠٠٠ مللي أمبير، ومزوّدة بتقنية الشحن السريع.

العيوب

• الموبايل مش مزوّد بطبقة حماية من نوع جوريلا جلاس، والطبقة اللي عليها للحماية مش الأقوى.
• ما تقدرش تشغل شريحتين اتصال وميموري خارجي في نفس الوقت ولازم تستغنى عن واحد منهم.
• منفذ شحن ونقل البيانات للموبايل مش من نوع USB Type-C واللي موجود في معظم الموبايلات المنافسة، وللأسف الموبايل مش بيدعم تقنية الـ UR.
• الموبايل مش بيدعم تقنية الـ IR.
• سيلفي الموبايل مش مزوّد بفلاش أمامي، ودقة الكاميرا الخلفية تعتبر الأقل وسط الموديلات المطروحة معانا النهارده.
• بطارية الموبايل ما تقدرش تغيّرها بنفسك.

تجربة المستخدم

• زوايا الرؤية والوضوح لشاشة الموبايل مُرضية للمستخدم في ظروف الإضاءة العادية، لكن في أشعة الشمس العالية الألوان هتبان باهتة شوية، ولازم تعلي الإضاءة علشان تشوف محتويات الشاشة بشكل كويس.
• بييجي مع الشاشة طبقة حماية إضافية ضد الكسر.
• حجم شاشة الموبايل بيسمح للمستخدم بالوصول لكل أجزاءها بإيد واحدة، ورغم ده فهواوي زودت ميزة تصغير مساحة الشاشة لتسهيل الوصول لكل برامجها.
• الموبايل أداءه حلو قوي في المهمات الوظيفية اليومية المعتادة من تصفح إنترنت ومتابعة البريد الإلكتروني والقراءة عليه ولو حبيت تحمل برامج كتيرة أو ألعاب مش هتحس بتقل في أداء الموبايل، ويعتبر خيار مُرضي لهواة الألعاب الخفيفة والمتوسطة، والألعاب التقيلة هتشتغل عليه لكن ألوانها والجرافيك بتاعها مش هيكون الأفضل ومش هتحس بسخونة مع الاستعمال المطوَّل للموبايل.
• الموبايل بيسمح للمستخدم بنسخ وتشغيل برنامجين بحسابين مختلفين في نفس الوقت زي الفيسبوك والواتساب والإنستجرام.
• أداء بصمة الموبايل قوي وسريع ومن خلالها تقدر تحمي وتأمّن برامجك وصورك الخاصة.
• واجهة هواوي بتدي للمستخدم خيارات مريحة في تشغيل برامج زي الكاميرا عن طريق رسم حرف C، وعن طريق النقر مرتين على الشاشة تفتح وتقفل.
• كاميرا الموبايل الخلفية بتخرّج صور مميزة في الإضاءة العادية والمرتفعة، لكن في الإضاءة الضعيفة صورها مش حلوة قوي حتى مع تشغيل الفلاش وده بسبب صغر حجم فتحة العدسة F 2.2، وهنلاحظ وجود Noise واضح.
• الكاميرا بتدّي للمستخدم خيار All Focus وده بعد ما بتصور بتقدر تحدد اللي تحبه وتظهره وتعمل تعتيم للجزء اللي وراه زي المصور المحترف.
• سيلفي الموبايل بتقدم صور مميزة في ظروف الإضاءة العالية والمتوسطة وتقدر تاخد بيها صور في مجموعات كبيرة بسبب حجم العدسة.
• رغم إن بطارية الموبايل بتدعم تقنية الشحن السريع، لكن للأسف البطارية بتتشحن شحنة كاملة في ساعتين ونص واللي يعتبر وقت طويل مع سعة بطارية مش أكتر من ٣٠٠٠ مللي امبير.

شوف موبايل Huawei P10 Lite من هنا.

٢- موبايل Samsung A5 2017

المميزات

• شاشة الموبايل بحجم ٥٫٢ بوصة ودقة وضوح Super Amoled، وحجم بكسلات ١٢٨٠×١٠٨٠ بكسل، وكثافة بكسلات ٤٢٤ بكسل، وبتيجي مزوّدة بطبقة حماية إضافية ضد الكسر Corning Gorilla Glass.
• الموبايل بييجي ببروسيسور ثماني النواة من نوع Exynos 7 Octa 7880، ومعالج رسومي Mali-T830 MP2، وكمان رام الموبايل ٣ جيجابايت، والميموري الداخلي بسعة ٣٢ جيجابايت، وممكن تزود ميموري خارجي لغاية ٢٥٦ جيجابايت.
• الموبايل مزوّد بتقنية بصمة الإصبع، وتقدر تشغل من خلاله شريحتين اتصال، وبيدعم تقنية الاتصال للجيل الرابع، وبيشغل راديو FM، ومعاه كمان ميكرفون إضافي مانع للضجيج.
• الموبايل بيدعم تقنية الجيروسكوب والـ OTG، ومزود بمنفذ شحن 0, Type-C 1.0 للشحن السريع.
• الموبايل مقاوم للمياه والأتربة.
• كاميرا الموبايل الخلفية والسيلفي بقوة ١٦ ميجا بكسل، والكاميرا الخلفية مزودة بفلاش أحادي LED.
• بطارية بسعة ٣٠٠٠ مللي أمبير.

العيوب

• كاميرا الموبايل مش مزودة بتقنية الـ IOS، ومش بتصور فيديو بدقة 4K.
• بروسيسور الموبايل بيستهلك من البطارية بشكل مكثف لإنه مع أي أمر بيستهلك الأنوية الـ ٨ مرة واحدة.
• بطارية الموبايل ما تقدرش تغيرها بنفسك.
• ما تقدرش تشغل على الموبايل شريحتين الاتصال والميموري الخارجي في نفس الوقت.
• الموبايل مش مزوّد بلمبة إشعارات LED.

تجربة المستخدم

• تصميم الموبايل مميز جدًا ومصنوع من المعدن وجوانبه منحنية ودي بتدّي شكل جمالي رائع، وبتسهل على المستخدم مسك الموبايل بإحكام من غير ما يقع من الإيد.
• رغم إن الموبايل مش مزود بلمبة إشعارات LED، لكنه مزود بخاصية Always On Display واللي بتظهر الوقت والتاريخ من غير ما تحتاج تضيء الشاشة وكمان بتظهر أي إشعارات.
• كمان تقد بالبرامج والألعاب اللي عاوز الإشعار بتاعها يظهر ليك في قايمة Always On Display.
• دقة وألوان الشاشة مميزة جدًا في ظروف الإضاءة المختلفة والمستخدم مش هيواجه أي صعوبة في التعامل مع الشاشة تحت أشعة الشمس.
• بصمة الموبايل موجودة في واجهة الموبايل ومن خلالها تقدر تحمي برامجك المختلفة، وبتشتغل بالضغط وأداءها سريع ومش بتهنج ولا مرة.
• أدء الموبايل قوي وسريع في فتح والتنقل بين أكتر من برنامج في نفس الوقت، ومش هتواجه أي صعوبة في التعامل مع الموبايل، والموبايل يُعتبر اختيار مناسب لكل عشاق وهواة الألعاب المختلفة ومش هتحس بسخونة صادرة منه.
• صوت الموبايل نقي وواضح لكنه مش الأعلى وسط المنافسين بسبب مقاومته للمياه.
• كاميرا الموبايل من أهم الكاميرات اللي موجودة في موبايلات النهارده، ومن خلالها هتستمتع بالتقاط صورك المفضلة بشكل جميل، ومع إن الموبايل مش مزود بتقنية الـ ios لكن الصور بتكون واضحة ومش هتحس بغياب التقنية دي.
• سيلفي الموبايل جميل وصوره مليانة تفاصيل كتيرة.
• برنامج التعامل مع الكاميرا معتاد من سامسونج.
• رغم إن الموبايل بييجي بنسخة أندرويد مارشميلو واللي ما تعتبرش الأحدث، لكن سامسونج دعمت الموبايل بقبوله لتحديث النوجا.
• بطارية الموبايل قوية وبتكفي لغاية يومين من الاستعمال المتوسط.
• رغم إن ميموري الموبايل كبيرة ومش من السهل إنها تتملي لكن سامسونج أضافت ميزة قوية للمستخدم، وهي إنه يقدر ينقل البرامج الموجودة على الموبايل على الميموري الخارجي وبكده يفضل أداء الموبايل قوي وسريع دايمًا.

شوف موبايل Samsung A5 2017 من هنا.

٣- موبايل Oppo F1s

المميزات

• شاشة بحجم مناسب ٥٠٥ بوصة، وحجم بكسلات ١٢٨٠×١٠٨٠ بكسل، ومزودة بطبقة حماية إضافية ضد الكسر.
• بروسيسور ثماني النواة، ورام بسعة ٤ جيجابايت، وميموري داخلي بسعة ٦٤ جيجابايت، وممكن تضيف ليه ميموري خارجي.
• الموبايل بيدعم تشغيل شبكات الجيل الرابع، وراديو FM، وبيدعم كمان تقنية الجيروسكوب، وتقنية الـ OTG، ومستشعر بصمة الإصبع، وميكرفون إضافي مانع للضجيج.
• سيلفي الموبايل مميز بقوة ١٦ ميجابكسل بفتحة عدسة f/2.0، وكاميرا خلفية بقوة ١٣ ميجابكسل بفتحة عدسة f/2.2، ومزودة بتقنية Auto Focus، وفلاش LED.
• بطارية قوية بسعة ٣٠٧٥ مللي أمبير.

العيوب

• كثافة بكسلات الشاشة ٢٦٧ بكسل، ودي سعة قليلة.
• كاميرا الموبايل مش مزودة بتقنية ios، ومش مزود بتقنية NFC.
• نسخة أندرويد الموبايل قديمة وسط المنافسين أندرويد لولي بوب.
• بطارية الموبايل مش بتدعم تقنية الشحن السريع.

تجربة المستخدم

• تصميم الموبايل وشكله قريب جدًا من الأيفون، ووزنه خفيف مع إنه مصنوع من المعدن، والمستخدم مش هيحس بأي مشاكل في التعامل مع الموبايل ومسكه بإيد واحدة لوقت طويل.
• ألوان الشاشة واضحة وزوايا الرؤية والوضوح معقولة في أشعة الشمس المباشرة، وأزرار التحكم في الموبايل مضيئة وموجودة خارج الشاشة ودي بتدي مساحة أكبر ليها، لكن للأسف مش هتقدر تعرف أي إشعار يوصل ليك والموبايل شاشته مقفولة لإنه مش مزود بلمبة إشعارات LED.
• مع إن مساحة الشاشة بتسهل على المستخدم الوصول لكل جزء منها بإيد واحدة، فهنلاقي أوبو زودت الشاشة بخاصية تصغير الشاشة علشان تسهل أكتر من وصول المستخدم لأي برنامج عليها.
• أداء الموبايل مميز في التعامل والتنقل بين أكتر من برنامج في نفس الوقت، وصوت السماعات واضح ونقي.
• بصمة الموبايل أداءها قوي وسريع وتقدر من خلالها تحمي برامجك وصورك الخاصة وتقدر كمان ترد على المكالمات.
• أوبو أضافت ميزات مفيدة للمستخدم زي تقنية Eye Protection واللي بتحمي العين وقت القرية لأوقات طويلة، وترسم حرف الـ V تشغل الفلاش، وحرف الـ O تشغل الكاميرا.
• الموبايل خيار مناسب لعشاق الألعاب الخفيفة والمتوسطة، وحتى الألعاب التقيلة هتشتغل عليه لكن مش بنفس قوة ولا سهولة الألعاب المتوسطة في الجرافيك بتاعها.
• كاميرا الموبايل الخلفية مميزة في التصوير الخارجي والنهاري والدقة دي بيكون فيها Noise في الإضاءة الضعيفة، والمستخدم هيستمتع بأكتر من وضع تصوير ومن أهمهم وضع Ultra HD واللي بيسمح بالتصويربحجم بكسلات كبير وده بيظهر التفاصيل بشكل قوي لو حبيت تطبع الصور دي.
• سيلفي الموبايل رائع وده المعتاد من شركة أوبو، ورغم إنها مش مزوّدة بفلاش لكن بتدي إضاءة عالية عند التصوير في الأماكن اللي إضاءتها قليلة والصور بتكون منورة.
• بطارية الموبايل مميزة وأداءها قوي وبتكفي لغاية يوم كامل من الاستعمال التقيل، لكن للأسف بتتشحن في ٣ ساعات ودي مدة طويلة مقارنةً بسعة البطارية.

شوف موبايل Oppo F1s من هنا.

٤- موبايل Huawei Nova Plus

المميزات

• حجم شاشة ٥٫٥ بوصة بدقة وضوح مميزة.
• الموبايل بيدعم تشغيل خطين اتصال وكارت ميموري.
• كاميرا الموبايل بدقة ١٦ ميجابكسل وفلاش مزدوج وبتصور فيديو بدقة 4K، وكاميرا سيلفي بدقة وضوح ٨ ميجابكسل.
• بروسيسو ثماني النواة من نوعية Qualcomm Snapdragon 625 ورامات ٣ جيجا، وذاكرة داخلية ٣٢ جيجابايت.
• بطارية الموبايل بتدعم تقنية الشحن السريع.
• الموبايل بيدعم تقنية بصمة الإصبع.
• الموبايل مزوّد بمنفذ USB Type-C واللي بيتميز بسرعته الكبيرة في نقل البيانات.

العيوب

• للأسف شاشة الموبايل مش مزودة بطبقة حماية إضافية ضد الكسر ولا الشرخ.
• الموبايل مش بيدعم تقنية الجيروسكوب ولا تقنية الـ NFC، ولا الـ IR.
• ما تقدرش تستعمل خطين اتصال وكارت ميموري في نفس الوقت ولازم تستغنى عن واحد منهم.

تجربة المستخدم

• سهولة التحكم في الموبايل بإيد واحدة بفضل الانحناء الموجود في تصميم جسم الموبايل الخلفي، لكن ممكن تلاقي صعوبة في الوصول لكل أجزاء الشاشة بنفس الإيد.
• كاميرا الموبايل من عوامل تميزه وده لإنها بدقة ١٦ ميجابكسل وبكثافة بكسلات ٢١٦٠ بكسل ودي ميزة حلوة قوي وهتطلع صورك منورة، وبفضل الفلاش HDR للتصوير الليلي هتلاقي صورك تحفة فنية في الإضاءة القليلة.
• كاميرا الموبايل بتقدم أوضاع تصوير مختلفة وصورها منورة حتى في الإضاءة الداخلية والضعيفة.
• بصمة هواوي بتشتغل باللمس وليها وظايف تانية زي الرد على المكالمات وقفل المنبه والتصوير وتأمين صورك وملفاتك المهمة.

• الموبايل مش مناسب ليك لو كنت من هواة الألعاب اللي الجرافيك بتاعها عالي وبتسبب سخونة ملحوظة للموبايل، لكن في التنقل بين البرامج وفتح أكتر من برنامج والتنقل بينهم في نفس الوقت سلس.
• واجهة هواوي بتدي المستخدم مزايا حلوة زي إنه يفتح الكاميرا عن طريق الضغط مرتين على زرار كتم الصوت.
• أداء البطارية جيد جدًا وتكفي معاك لغاية يوم ونص من الاستخدام الشاق ويومين من الاستعمال العادي.
• منفذ شحن الموبايل بيسمح ليك بإدخال كابل الشحن من أي اتجاه وده مريح جدًا للمستخدم ومش هيخليه يقلق من دخول الشاحن بشكل خاطئ.

شوف موبايل Huawei Nova Plus من هنا.

٥- موبايل Infinix Zero 4 Plus

المميزات

• شاشة بحجم ٦ بوصة وده حجم مناسب لهواة القراءة ومشاهدة أفلا الفيديو، ودقة وضوح IPS وكثافة بكسلات ١٩٢٠×١٠٨٠، وكثافة بكسلان 368 بكسل، وكمان الشاشة مزودة بطبقة حماية ضد الكسر.
• بروسيسور الموبايل بعشرة أنوية، ورام ٤ جيجابايت، وميموري داخلي ٦٤ جيجابايت وممكن تضيف ليه ميموري خارجي.
• الموبايل مزود بمستعشر بصمة الإصبع، وتقنية الجيروسكوب، وراديو FM، والـ OTG، وبيدعم تشغيل شريحتين اتصال.
• كاميرا خلفية بقوة ٢١ ميجابكسل، مزودة بتقنية الـ OIS، وLaser Autofocus سيلفي الموبايل بقوة ١٣ ميجابكسل.
• بطارية بسعة ممتازة ٤٠٠٠ مللي أمبير وبتدعم الشحن السريع.

العيوب

• سهولة خدش الكاميرا الخلفية للموبايل بسبب بروزها.
• تصوير الفيديو لسيلفي الموبايل ضعيف وبيكون ٤٨٠ بكسل بس.
• ما تقدرش تشغل على الموبايل شريحتين اتصال وميموري خارجي في نفس الوقت.

تجربة المستخدم

• ألوان شاشة الموبايل مميزة في ظروف الإضاءة المختلفة.
• مش هتقدر تشيل الموبايل على أي سطح مش نضيف أو خشن بسبب بروز الكاميرا الخلفية واللي سهل جدًا خدشها، لكن وجود كوفر خلفي للموبايل هيحمي الكاميرا.
• بسبب حجم الموبايل فالمستخدم هيلاقي صعوبة من شيل الموبايل في جيبه.
• ضوت سماعات الموبايل الخارجية قوي ونقي ومش من السهل كتمه لوجوده أسفل الشاشة.
• واجهة الموبايل بتسمح بتأمين الموبايل عن طريق كلمة معينة لكن كتير من المستخدمين شايفين عن الخاصية دي عيب مش ميزة لإن أي شخص ممكن يعرف الكلمة ويفتح الموبايل.
• أداء بصمة الموبايل قوية وسريعة ومن خلالها تقدر تحمي الموبايل وترد على المكالمات من خلاله، وكمان تتنقل بين الصور.
• أداء الموبايل قوي وسريع والتنقل بين البرامج والتطبيقات هيتم بسلاسة تامة وكمان ممارسة الألعاب وده بفضل البروسيسور القوي (عشرة أنوية).
• كاميرا الموبايل أداءها جميل وعن طريقها تقدر تاخد بيها صور مميزة، وصورها في الإضاءة الضعيفة أفضل من المنافسين بكتير.
• للأسف الكاميرا الخلفية مش بتصور فيديو بدقة 4K، وكمان سيلفي الموبايل رغم إن صوره حلوة لكنه بيصور فيديو بدقة قليلة واللي بتكون ٧٢٠ بكسل بس ودي دقة قليلة جدًا وسط المنافسين.
• بطارية الموبايل مميزة جدًا وبتكفي لغاية يومين من الشغل المتوسط والتقيل، وبتتشحن شحنة كاملة في ساعتين بس ودي مدة ممتازة لو هنقارنها بسعة البطارية ٤٠٠٠ مللي أمبير.

شوف موبايل Infinix Zero 4 من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.