كتبت: صفاء مجدي

المكنسة الكهربائية من الأجهزة المنزلية المهمة جدًا واللي لا غنى عنها لأنها بتوفر على ست البيت وقت ومجهود تنظيف السجاد والأرضيات المختلفة سواء باركيه، سيراميك أو بلاط. ولأن المكنسة جهاز مهم قوي كده في البيت فلازم لما تشتري مكنسة جديدة تختارها بتأني وعن علم.

عشان كده، ياقوطة النهارده هتقدملك دليل مفصّل للحاجات اللي تدور عليها لما تيجي تشتري المكنسة الكهربائية، عشان تفتكر ياقوطة وتدعيلنا في كل مرة تستخدم فيها مكنستك الكهربائية الجديدة بكل سهولة وراحة.

اقرا كمان المقال ده من هنا عشان تتعرف على أفضل ٥ مكانس من بين الأكتر مبيعًا على ياقوطة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مبدئيًا كده، فيه شوية حاجات لازم تحددها الأول قبل ما تاخد قرار شراء المكنسة زي:

مساحة البيت

لو البيت مساحته واسعة فانت في أغلب الأمر هتحتاج مكنسة ذات سعة كبيرة عشان تساعدك في التنظيف بدون الحاجة لتفريغها من التراب كل شوية.

تقسيمة البيت

لو كان بيتك فيه مستويات أو مثلًا سلالم ودور أول وتاني فانت هتدور على مكنسة خفيفة في المقام الأول عشان تسهل عليك المهمة وتتنقل معاك من فوق لتحت وعلى السلالم بدون تعب.

نوع الأرضيات والأسطح

هل بيتك كله مفروش موكيت؟ ولا حتة باركيه وحتة سجاد؟ هل فيه بلاط؟ سيراميك؟ هل هتستعين بيها في تنظيف الأثاث أو الدولاب أو الستاير؟ لازم تحط كل ده في عين الاعتبار عشان لما تيجي تشتري تدور على مكنسة بملحقات مناسبة لأنواع الأرضيات والأسطح المختلفة اللي عندك في البيت.

الحيوانات الأليفة

لو كنت مربي كلب أو قطة في البيت فانت هتحتاج نوع معين من المكانس الكهربية. هتحتاج نوع تكون فرشته وقوة شفطه قادرة على التقاط الشعر والوبر من السجاد والأرضيات وكمان ممكن تحتاج مكنسة ليها فلتر بيلقط الروايح اللي مش لطيفة.

عدد مرات التنظيف

يمكن يكون بيتك صغير لكن بتحب تنضفه مرة كل يوم وبالتالي هتحتاج مكنسة خفيفة الوزن ما تزهقكش في الحركة وكمان تكون ذات سعة معقولة تستحمل الشغل كل يوم.

خصائص المكنسة الكهربائية

بكيس ولا من غير كيس؟

المكنسة الكهربائية بتلم التراب في مكان ما جواها. المكان ده حاجة من اتنين: يا كيس، يا وعاء زي سلة مثلًا. وعشان تحدد إيه الأنسب ليك الكيس ولا اللي من غير كيس لازم تعرف المعلومات التالية:

• الكيس بيحتاج الغسيل كل فترة ويُفضل تغييره كل ٦ أشهر على الأقل.
• المكنسة اللي بكيس بتكون أرخص من المكنسة اللي من غير كيس لكن الكيس بيحتاج تغيير كل فترة وبالتالي اللي هتوفره في تمن المكنسة هتصرفه على تغيير الأكياس.
• المكنسة اللي من غير كيس بتحتاج تنظيف فلاتر كل فترة وتغيير فلتر على المدى الطويل.
• تغيير وتنظيف الفلاتر من المهام اللي فيها تراب كتير وبالتالي لو كنت من أصحاب الحساسية فالمكنسة اللي بكيس هتكون أنسب لحالتك الصحية.
• المكنسة اللي بكيس بتشيل تراب أكتر من النوع التاني.
  
• لو هتشتري مكنسة بكيس اتأكد إن فيها مؤشر يعرفك لما الكيس يكون مليان.
• من الآخر المكنسة اللي من غير كيس أريح من اللي بكيس.
• لكن اللي بكيس صحية أكتر لو كان عندك حساسية للتراب.

أنواع الفلاتر

الفلاتر جزء مهم جداً من المكنسة وهو اللي بيمر من خلاله التراب وبينقي الهواء ويفضل تغيير الفلتر كل 6 شهور وأنواع الفلاتر كالتالي:

• فلتر المراحل: بيكون حوالي ٣-٧ مراحل تنقية.
  
• فلتر العمر الطويل: مش بيحتاج تغيير وبيفضل عايش حوالي ٧-١٠ سنين وهو العمر الافتراضي للمكنسة الكهربية.
  
• هيبا HEPA: مناسب لأصحاب الحساسيات لأنه دقيق جدًا في عمله وبيلتقط أصغر الجزيئات من الهواء.
• فلتر الفحم: بيتخلص من الروايح ومناسب لو كنت من أصحاب الحيوانات الأليفة.

شكل المكنسة

الشكل التقليدي

المكنسة التقليدية هي النوع الأكثر انتشارًا وبتتكون من جزئين: جزء فيه الموتور ومكان تجميع التراب موصول من خلال خرطوم بالجزء الشافط.
النوع ده هو أكثر الأنواع قوةً في الشفط وبيكون كمان فيه سعة تخزينية كبيرة للتراب ده غير كمان إنها بتكون أرخص نسبيًا من المكانس الكهربائية ذات الجزء الواحد، ولو إن التقليدية أكتر إزعاجًا شوية. من ميزاتها كمان إنها بتكون عملية أكتر لأن انفصال الذراع الشافط عن الموتور بيدّيك مرونة في الحركة فتقدر ترفعها وتنضف بيها الفرش أو الستاير أو السلالم.
اشتري مكنسة كهربية تقليدية من هنا.

المكنسة ذات الجزء الواحد

• شكلها زي مقشة البيت العادية بس ركبنالها موتور وبتكنس وتنظف بدون مجهود.
• النوع ده بيكون أخف في الحركة ولكن مش أخف وزنًا عشان الموتور وكيس التراب كله في مكان واحد.
• مش بتاخد حيز كبير في التخزين.
• ولكنها في الأغلب بييجي معاها إكسسوارات وإمكانيات أقل من المكنسة الكهربية التقليدية.

المكنسة الروبوت

• دي مكنسة اختراع!
• بتكون مدورة وبتحطي لها جدول تنظيف وهي زي الشاطرة أول ما ييجي معاد التنظيف تجري في الشقة تنظف وحدها.
  
• بيكون لها حساسات حركة عشان تاخد بالها ومتخبطش في الأثاث.
• فيه منها بالريموت للتحكم عن بعد.
  
• ولكنها بطبيعة الحال بتكون أغلى شوية.
• لو عاوزة تشتري مكنسة من النوع ده شوفي السعة بتاعتها مناسبة ولا صغيرة قوي وكمان شوفي بتاخد وقت قد إيه في الشحن وكمان بتخلص شحنها في قد إيه.
  اشتري مكنسة روبوت من هنا.

المكنسة الكهربية اليدوية المحمولة

• دي المكنسة الصغيرة اللي بتشيلها معاك وبتنضفلك الأثاث والمفروشات.
  
• مش بتكون في نفس قوة شفط المكنسة الكبيرة ولا في نفس سعتها.
• عملية في تنظيف المساحات الصغيرة المحدودة زي أرفف الدولاب مثلًا أو تنظيف العربية.
  شوف أسعار المكنسة المحمولة من هنا.

لو عايز تتفرج على مكانس كهربائية أكتر، شوف المتاح من هنا.

ملحقات المكنسة

• ملحقات المكنسة عامل مهم جدًا بيحددلك إن كانت مناسبة ليك ولا لأ.
  
• هل معاها دراعات لتنظيف الفرش والستاير؟ ملحق لتنظيف الأماكن الضيقة؟ فرشاة خاصة بالباركيه أو السيراميك؟
• كمان يُفضل لو كان مكان تخزين الملحقات موجود في قلب جسم المكنسة عشان ما تتوهش منك.
• سهولة الاستخدام.
• حتى لو كنت هتشتري المكنسة أونلاين من ياقوطة فيفضل إنك تنزل الأول تجربي الموديل اللي عجبك في محل.
  
• جرّب المكنسة فعلًا على الأرضية وشوف سهولة ومرونة حركتها.
  
• هل خفيفة كفاية عليك في الحركة؟ دراعها مرن؟ الفرشاة بتجري بسهولة على الأرضية؟
  
• كمان يفضل تختار نوع يكون زراير التحكم بتاعته في إيد المكنسة في مسكة إيدك لسهولة التحكم.
  
• جرّب كمان المكنسة عشان تشوف قد إيه صوتها عالي أو مزعجة. من الأمور اللي بتسهل الاستخدام وجود زرار بيسحب السلك مرة واحدة.
• معروف إن سلك المكنسة بيكون طويل قوي ودي حاجة كويسة عشان تتحرك معاك بسهولة لكن لما تيجي تلمّه بيتكعبل منك. ولهذا زرار فرد ولم سلك المكنسة هيوفر عليك المعاناة دي.
  
• غير كده، في مكانس بدون سلك وبتعتمد في عملها على بطارية بيتم شحنها. لو هتشتري النوع ده من المكانس اختار اللي بتاخد وقت قليل في الشحن وبيفضل الشحن معاها أطول فترة ممكنة.

صوت المكنسة

• على قد ما بنحب المكنسة الكهربية على قد ما بنكره دوشتها. وعشان تعرف مدى إزعاجها زي ما قلنا تقدر تجربها في المحل الأول أو تستعين بالدليل ده.
• قوة الصوت للمكنسة بتتقاس بوحدة اسمها الديسيبل dB.
• لو كانت المكنسة ٦٠-٦٥ dB هتكون هادية جدًا.
• لو فوق ٧٠ هتكون مزعجة شويتين.

قوة الشفط

التعبير عن قوة الشفط بيكون يا إما بالأمبير أو بالواط وعشان تشتري مكنسة قوية اختار قوة شفط مش أقل من 12 أمبير أو 200 وات.

طريقة عمل الفرشاة

المكنسة اللي عندنا في البيت قديمة شوية والفرشاة مش بتتحرك أصلاً وعشان كده بفضل أعيد وأزيد في تنظيف السجادة وأحرك الفرشاة عليها رايح جاي ١٠٠ مرة عشان تنضف كويس. ولهذا أنصح بشدة إنك تشتري مكنسة تكون فرشاتها بتتحرك بموتور خاص بيها عشان تسهل عليك المهمة وتشيل التراب أو الشعر اللي بيكون لاصق في السجادة.
تقدر تدخل على ياقوطة وتشوف كل أنواع وأشكال المكانس الكهربائية وتقارن أسعارهم وتشتري اللي يناسبك.