كتب: محمد حمدي

في الفترة الأخيرة دخلنا في نقاشات موسعة مع مجموعة من الأصدقاء اللي بيجمعنا بيهم حبهم للتقنية والأجهزة الحديثة والذكية. وكان فيه شبه إجماع إن عملية شراء أي تليفون ذكي أو تليفزيون حديث أصبحت سهلة بعد دخول مواقع البيع الإلكتروني والمواقع والخدمات زي ياقوطة.

لكن سلعة واحدة سمعنا إنها بتدوخ المستخدمين اللي بيحاولوا يشتروها، وبتحصل عمليات نصب كتيرة أثناء شرائها نتيجة عدم إلمام المشترين بكل التفاصيل حواليها. بنتكلم هنا عن البلاي ستيشن 4 الصندوق الإسود الصغير اللي بيحمل عالم من الترفيه جواه، واللي ناس كتير بتلاقي صعوبات كبيرة في شراءه.

تعالوا نستعرض مع بعض رحلة شراء جهاز بلاي ستيشن 4 في العاصمة، واللي تقدروا من خلال ياقوطة تعرفوا أحسن الأسعار للبلاي ستيشن وتطلبوه ويوصل لغاية عندكم في أسرع وقت.

لكن قبل ما نبدأ نحب نقول إننا هنا بنتكلم عن شراء البلاي ستيشن 4 تحديدا، يعني لو بتقارن بين البلاي ستيشن ونيتندو ثري دي اس مثلا الموضوع ده هيكون مفيد أكتر.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

تاريخ بلاي ستيشن

سنة ١٩٩٤ تم الإعلان عن أول جهاز بلاي ستيشن في العالم كوحدة ألعاب مستقلة بذاتها وقادرة على توفير مجموعة من الألعاب اللي كانت أيامها نقلة كبيرة في عالم تكنولوجيا الألعاب.

بعد حوالي ٩ سنوات باعت سوني من إجمالي أجهزتها حوالي ١٠٠ مليون وحدة، منهم ٥٥ مليون وحدة لنسخة بلاي ستيشن 3 لوحده، غير ملايين من عمليات البيع التانية اللي بتحصل باستمرار حول العالم.

أما في ٢٠١٣ قدمت بلاي ستيشن أول أجهزتها من الجيل الرابع تحت اسم بلاي ستيشن 4 بذاكرة ٨ جيجا ومعالج AMD ونظام تشغيل orbis OS علشان تبدأ مرحلة جديدة ومثيرة في عالم صناعة الترفيه والألعاب الإلكترونية حول العالم.

أسئلة قبل الشراء

لكن قبل الشراء لازم نسأل نفسنا بعض الأسئلة، والإجابة عن الأسئلة دي هي اللي هتحدد هنشتري إيه؟ ومنين؟ وبكام؟ وباقي التفاصيل التانية.

هشتري أي إصدار من بلاي ستيشن 4؟

بلاي ستيشن 4 بييجي بأكتر من إصدار. إصدار تقليدي بمساحة ٥٠٠ جيجا وبتصميم بتكون فيه مفاتيح التشغيل وإخراج الأسطوانة بتعمل باللمس مش زراير حقيقية. وبيكون فيه سطح أملس على الجهاز من الخارج.

شوف بلاي ستيشن 4 من هنا.

Sony PlayStation 4 Ultimate Player

أما الإصدار التاني هو إصدار Ultimate Player وده بييجي زي الإصدار الأول بالضبط لكن مع مساحة أكبر ١ تيرابايت لتخزين الألعاب.

شوف بلاي ستيشن Ultimate Player من هنا.

 PlayStation 4 TB Slim 

بعد كده بنشوف إصدار جديد هو PlayStation 4 Slim وهو تصميم أرفع وبمساحة ١ تيرا وبأزرار حقيقية غير الأزرار اللي بتعمل باللمس واللي ضايقت ناس كتير وبدون مساحة ملساء على الجهاز من فوق.

شوف PlayStation 4 TB Slim من هنا.

Playstation PRO

وأخيرًا قدمت بلاي ستيشن أحدث أجهزتها وهو Playstation PRO وهو بنفس مواصفات بلاي ستيشن Slim لكن بيزيد عليه قدرته على عرض الألعاب على التليفزيونات اللي بتعرض الصورة بدقة 4K.

شوف Playstation PRO من هنا.

إحنا بنرشح لكم شراء Playstation4 slim في حالة لو التليفزيون عندك مش بيدعم خاصية 4K بسبب أنه الإصدار الأحدث والأسرع، وقدرت سوني تتغلب على كل الحاجات اللي ضايقت العملاء منها في الإصدارات السابقة من بلاي ستيشن.

أما لو تليفزيونك بيدعم الـ 4K يبقى ننصحكم تشتروا Playstation Pro فورًا.

الميزانية؟

من أهم الأسئلة اللي لازم نحددها إيه هي الميزانية اللي تم تحديدها لشراء الجهاز. يعني لو تليفزيونك بيدعم 4K هيكون بلاي ستيشن برو جهاز مناسب جدًا لكنه أغلى جهاز من سوني بالتالي لو كانت الميزانية قليلة ننصحكم بشراء Playstation Slim لأنه أرخص وبنفس المميزات لكن فقط بدون إضافة عرض الألعاب على شاشة 4K.

الشراء أونلاين أم من المحلات؟

من الأسئلة المهمة اللي لازم نسألها، هل هتشتري من المحلات الموجودة في الشارع ولا من المتاجر الإلكترونية على سوق وجوميا وغيرها؟ البعض بيفضل يشتري من محلات لها إسمها زي بي تك أو راديو شاك، علشان ياخدوا أجهزة مضمونة ومدعومة بفواتير ضريبية، لكن من ناحية تانية الشراء من مواقع الإنترنت بتكون أرخص بحوالي ١٥٠٠ إلى ٣٠٠٠ جنيه في الجهاز الواحد وده فرق يستحق الانتباه له. لكن البعض بيعتبر الشراء على الإنترنت غير آمن في خدمة بعد البيع، لكن النهارده ومع وجود كتير من الضوابط والضمانات كتير من المستخدمين بيشتروا من الأونلاين ستورز بسهولة ويسر.

شراء الجديد أم المستعمل؟

البعض بيفضل يشتري أجهزة مستعملة علشان يوفر شوية في الفلوس، خاصة لو كانت الأجهزة بتتباع من أشخاص موثوقة أو لو كان الجهاز غير مستخدم، أو مستخدم لوقت قليل، لكن بعض المستخدمين التانيين بيشوفوا إنه من الأفضل يدفع ٥٠٠ أو ١٠٠٠ جنيه زيادة أفضل من المخاطرة بشراء جهاز مستعمل ممكن تحصل فيه مشكلة بعد وقت قصير من شراؤه.

خدع وأسرار عملية الشراء

أما اللي هنقوله ليكم دلوقتي، نادرًا ما هيقوله ليكم أي بياع، وهي بعض التفاصيل الصغيرة اللي لازم تاخدوا بالكم منها قبل الشراء.

1. منطقة تصنيع البلاي ستيشن

وهنا لازم نعرف أن العالم منقسم لأكتر من منطقة كتصنيف خاص بحقوق الملكية الفكرية للألعاب والبرامج. المنطقة الأولى رقم ١ أو Region1 خاصة بأمريكا، و Region2 خاصة بأوروبا ومنطقة الشرق الأوسط – ومن بينها مصر والسعودية – وأخيرًا المنطقة ٣ أو Region3 ودي خاصة بمنطقة أسيا.

كتير من الأجهزة الموجودة في السوق بتكون Region3 وبيتم بيعها بأسعار رخيصة، لكن ماحدش بياخد باله إن الجهاز تابع لمنطقة أسيا، وده بيعمل مشكلة كبيرة لأن معظم الألعاب اللي بتتباع في مصر بتكون تابعة للمنطقة ٢ وفي الحالة دي مش هتشتغل مع البلاي ستيشن.

إزاي نتأكد أن الجهاز Region2 ؟

من خلال قراءة المكتوب على الكرتونة من تحت، بيكون فيه لوجو على شكل كرة أرضية ومكتوب عليها الرقم سواء ١ أو ٢ أو ٣. ونفس الموضوع بالنسبة لشراء الألعاب لازم ننتبه فيها أن رقم الـ Region يكون زي المكتوب على البلاي ستيشن.

الضمان والفاتورة الضريبية

كتير من البياعين سواء على الإنترنت أو في المحلات بيعطي المشتري ضمان دولي أو غير محلي، الكلمة دي بتدل على إن الجهاز مالوش ضمان في مصر يعني لو الجهاز مش شغال لأي سبب ماحدش في مصر هيصلحه.

أما الضمان المحلي فمش بيتم الاعتراف بيه إلا في حالة وجود فاتورة ضريبية، والمعلومة دي مش بيتم ذكرها في مواقع البيع الإلكتروني إلا في حالات قليلة.

تواصلنا بخصوص الموضوع ده مع إدارة سوق دوت كوم، وفهمنا منهم أن الأسعار اللي بيتم وضعها على أجهزة بلاي ستيشن 4 بتكون غير شاملة تكلفة إصدار فاتورة ضريبية، وفي حالة رغبة المستخدم في الحصول على فاتورة ضريبية بيدفع ١٤٪ من تمن الجهاز زيادة وبيحصل على الفاتورة الضريبية.

إدارة سوق كمان قالت لنا إن الفاتورة الضريبية مش بتكون مطلوبة دايمًا، وإن الطلب عليها بيكون فقط في حالة وجود عطل في الجهاز، علشان كده مش بيتم تضمين سعرها في الجهاز.

فترات التخفيضات

لو كنت قريب من موسم تخفيضات زي الجمعة البيضاء مثلًا يستحسن تنتظر الفترة دي علشان البلاي ستيشن من الأجهزة اللي عليها طلب كبير بالتالي بيحصل عليهم تخفيضات كبيرة برضه، وبيهتم البياعين بالفترة دي علشان يتنافسوا على بيع أكبر كمية من بلاي ستيشن.

تقدر تشوف معانا أسعار أجهزة مختلفة للبلاي ستيشن من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.