شراء عربية الأطفال مش سهله زي ما الناس فاكره، عشان تشتري عربية أطفال تناسبك و تناسب إحتياجات طفلك في حاجات كتير لازم تكوني عامله حسابها. عوامل كتير بتحدد نوع العربية الى تناسبك انتى وطفلك زي الإرتفاع و الوزن وقوة إيدك و حتي تفضيلاتك الشخصية والمميزات الإضافية الى ممكن تحتاجيها.

ياقوطة.كوم هتوفرلك مجموعة من النقاط هتساعدك في عملية الشراء

1. متقفيش عند إختيار واحد

 ممكن تعجبك عربية أطفال، بس ده مش معناه إنك تتسرعى وتشتريها، لازم تدوري و تتفرجى علي عربيات تانيه عشان تتأكدي إنك فى النهاية  إشتريتي المنتج الأصلح و الأنسب. لأن ممكن بعد ما تشتري أول عربية تعجبك، تكتشفي عربية تانيه فيها مميزات احسن بكتير.

2. فكري في عمر طفلك علي المدي القريب و البعيد

الأطفال الى لسه مولودين بيناموا علي ظهرهم، و لما بيكبروا شوية تقريبا بعد 6 شهور ممكن يقعدوا. لو عايزة عربية الأطفال تفضل معاكي لازم تتأكدي إنها مجهزة إن الطفل ممكن ينام ويقعد فيها في نفس الوقت، لو لقيتي العربية اللي عجباكى مفيهاش ميزة إن طفلك ممكن يكون قاعد، اعملى حسابك لما يكبر شوية تجيبي له عربية أطفال تانية تناسبه.

3.عربية أطفال و كرسي سيارة في نفس الوقت

طفلك نايم و مش عايزه تصحيه من النوم، في كراسي أطفال للسياره بتكون في نفس الوقت عربية للأطفال. يعني حتي لو في مشوار و معاكي طفلك و نام، تقدري تفصلي العربية عن كرسي السيارة و تحطيه في عربيتك و تطبقي عربية الأطفال، بس طبعا دي بيكون سعرها أعلي شوية عن سعر عربيات الأطفال التانية.

4. سلامة طفلك أولًا

لازم تكون عينيكى علي طفلك دايما و خصوصا و هو نايم لأنه ممكن يتزحلق من فتحة الرِجل. دايما تتأكدى إن الحزام مربوط كويس.. بلاش تشيلي حاجات كتير في عربية الطفل عشان متتكسرش و عشان تقدري تزقيها.. فرامل الأمان شيء أساسي لو واقفه بالعربية عشان متمشيش منك لوحدها أو لو حد خبطها. فرامل الأمان مفيش مجال للاستغناء عنها أو اهمالها.

5. فكري في التفاصيل الصغيرة

في تفاصيل صغيره ضرورى تكون فى بالك و إنتي بتختاري العربية لطفلك، مهم جدا تكوني عارفه مين تاني هيزق الطفل ؟  عشان لو في حد تاني يبقا لازم تكون إيد العربية فيها خاصية إنك تطوليها و تقصريها عشان تناسب كل المستخدمين. هل العربية بيركب لها غطاء ولا لأ ! عشان لو مطرت أو لو مكان فيه حشرات كتير تعرفي تركبي للعربيه ناموسيه عشان تحمي الطفل. بالإضافة إن لازم يكون فيها سله عشان تشيلي فيها إحتياجات طفلك. بس أهم حاجه، إتأكدي إن عربية الأطفال دي لما تطبقيها هتدخل في عربيتك.

هنا فى قائمة كبيرة من عربيات وكراسى سيارة الأطفال ممكن تفيدك