كتب: محمد عبد الرحمن

بمرور الشهور والسنين قدرت شركة هواوي الصينية للموبايلات إنها تثبت نفسها وتبني لنفسها مكانة مش بس في السوق المصري، لكن في السوق العالمي كله وحققت نجاح كبير لدرجة إنها احتلت المركز الثاني عالميًا وبإزاحة العملاق الأمريكي أبل من مكانها.

في خلال الشهر ده، هواوي أقامت مؤتمرها السنوي اللي أعلنت فيه عن أهم موبايلات في تاريخها كله وهي سلسلة موبايلات Mate 10. من خلال ياقوطة هنتعرف على أهم الموبايلات اللي أعلنت عنها هواوي في المؤتمر ده، وأهم النقاط اللي ركزت عليها في موبايلاتها الجديدة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*ممكن تشوف مواصفات الموبايلات بالتفصيل من mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

نظرة عامة على Huawei Mate 10  وموبايل Huawei Mate 10 Pro

أهم النقط اللي اتكلمت عنها هواوي في مؤتمرها السنوي عن موبايلاتها الجديدة هي (التصميم، الكاميرا والذكاء الصناعي)، ودي النقط اللي هنتعرف عليها مع أهم ما يميز الموبايلات دي عمومًا.

أولًا: التصميم

تصميم الموبايلات جديد وفيه اهتمام بتفاصيل كتيرة زوّدت من الشكل الجمالي للموبايلات وعلى سبيل المثال هنلاحظ وجود انحناء بسيط من الجهة الخلفية للموبايل بتسهل من مسكة الموبايل، لكن فيه تميز في تصميم موبايل Huawei Mate 10 Pro عن موبايل Huawei Mate 10 واللي أطرافه بتكون أعرض شوية وده بيخلي مسك الموبايل لمدة طويلة عملية مش سهلة قوي.

وللمحافظة على الشكل الجمالي للموبايلات قامت هواوي بتصغير الحواف الجانبية المحيطة بشاشات موبايلاتها لدرجة إنها نقلت مستشعر البصمة في موبايل Huawei Mate 10 Pro للجهة الخلفية تحت الكاميرا لإن الحواف أصغر من حجم مستشعر البصمة الخاص بهواوي، في حين إن المستشعر ده موجود في نسخة Huawei Mate 10، وللأسف ده ما كانش مكان مناسب لإن مسكة الموبايل والتحكم فيه بإيد واحدة مش بيكون سهل كفاية، وبالتالي مسكة الموبايل والوصول لمستشعر البصمة هتكون عملية مش سهلة قوي وكان من الأفضل نقل المستشعر للجهة الخلفية زي موبايل Huawei Mate 10 Pro.

هنلاحظ كمان وجود شريط محيط بكاميرا الموبايل المزدوجة، الشريط ده مش بيدي شكل جمالي قوي عكس ما هواوي نوهت في مؤتمرها، وكمان هنلاحظ في التصميم إن كاميرتين الموبايل موجودين تحت بعض وده للأسف خلى شكل الموبايل الخلفي مش بالجمال المطلوب، ودي نقطة ضعف في مكان الكاميرا الخاصة بالموبايل.

واحدة من أهم نقاط تميز موبايل Huawei Mate 10 عن موبايل Huawei Mate 10 Pro هو إن مفيش منفذ جاك ٣٫٥ مللي في موبايل Huawei Mate 10 Pro واللي كتير جدًا من المستخدمين بيرفض خلو موبايلهم من المنفذ ده، في حين إن المنفذ ده موجود في موبايل أقل في الإمكانيات وهو Huawei Mate 10.

أخيرًا موبايل Huawei Mate 10 Pro بيتميز عن موبايل Huawei Mate 10 في مقاومته للمياه بشكل كامل، أما Huawei Mate 10 فبيكون مقاوم لرذاذ المياه بس.

ثانيًا: الشاشة

شاشة موبايل Huawei Mate 10 بتيجي بحجم ٥٫٩ بوصة بدقة وضوح 2K، أما موبايل Huawei Mate 10 Pro بييجي بحجم شاشة أكبر واللي بتكون ٦ بوصة وبدقة وضوح ١٠٨٠ بكسل ودي تعتبر أقل رغم إن Huawei Mate 10 Pro نسخة أعلى وأرقى من Huawei Mate 10.

من النقط اللي ميزت موبايل Huawei Mate 10 Pro (على الورق) هو إن شاشته مصممة بالأبعاد الجديدة واللي اتجهت ليها معظم الشركات الكبيرة زي سامسونج في موبايلها الجديد Note 8 وإل جي في موبايلها الجديد V 30، وهي ١٨:٩، أما Huawei Mate 10 فبييجي بالأبعاد المعتادة في الموبايلات وهي ١٦:٩، ودي نقطة تفوق للمستخدم لإن الأبعاد دي المشهورة والمعتادة في مشاهدة الأفلام من على المواقع الشهيرة زي يوتيوب، واللي هيخلي الفيلم يتعرض على الشاشة بحجمها الكامل وبالتالي هتكون تجربة المشاهدة ممتعة أكتر من Huawei Mate 10 Pro لإنه هيستفيد من حجم الشاشة بالكامل. أما Huawei Mate 10 Pro فالأفلام مش هتتعرض عليه بالحجم الكامل والمستخدم هيلاحظ وجود شريطين لونهم أسود على جوانب شاشة الموبايل وبكده مش هيستفيد بحجم الشاشة ككل وهيحس إنها أقل من ٦ بوصة.

هنلاحظ كمان إن موبايل Huawei Mate 10 Pro شاشته بتيجي بدقة أموليد مش بدقة IPS زي Huawei Mate 10 ودي ميزة مهمة ونقطة تميز للموبايل.

ثالثًا: الذكاء الصناعي

ودي هواوي دشنت ليها حملة دعاية كبيرة جدًا من قبل المؤتمر الصحفي؛ وده لإنه أول معالج في العالم ييجي بتكنولوجيا الذكاء الصناعي وزي ما قالت هواوي إنه بيوفر لغاية ٥٠٪ من استهلاك البطارية، وبيدي قوة في الأداء العام للموبايل أسرع ٢٥ من المعالجات العادية، ومن خلال التكنولوجيا دي الموبايل بيقدر من خلال تحليل استخدامنا للموبايل إنه يتعرف على طبيعة البرامج اللي بنعتمد عليها بشكل يومي ويقفل باقي البرامج والتطبيقات اللي مش بنستخدمها كتير، وليه ميزة كمان في التصوير وهي إنه بيقدر يتعرف على طبيعة الأشياء اللي بتصورها لو شخص أو حيوان أو نبات والميزة هنا إنه بيظبط الإضاءة المحيطة بالجسم اللي بتصوره تلقائيًا بحيث تكون مناسبة لطبيعة الجسم ده والصورة تطلع بشكل أحسن.

ميزة كمان للذكاء الصناعي لمعالج موبايلات هواوي الجديدة مفيدة في المكالمات، وهي إن المعالج بيقدر يحدد مدى قوة صوتك وانت بتتكلم فلو كانت عالية زيادة أو مش عالية قوي هو بيتحكم في نقل الصوت للي بيكلمك بشكل كويس ومسموع كفاية في حالة كان الصوت مش عالي قوي أو العكس.

رابعًا: الكاميرا

الموبايلات الجديدة بتيجي بكاميرا بقوة ١٢ ميجابكسل مخصصة لالتقاط الألوان والتانية بقوة ٢٠ ميجابكسل بتلتقط الصور بلونين هم الأبيض والأسود، والمميز هنا إن فتحة العدسة تعتبر الأعلى والأقوى في غالبية الموبايلات المعروضة في السوق واللي بتكون F1.6 ودي هتزود من الإضاءة اللي بتستوعبها عدسة الكاميرا والنتيجة صور مميزة مهما كانت ظروف التصوير المختلفة.

واحدة من أهم مميزات الموبايلات الجديدة هي إنه مزود بتقنية Pc Mood واللي عن طريق كابل USB تقدر تحول الموبايل الشخصي بتاعك لكمبيوتر ومش هتحتاج لأي أدوات تانية وتقدر كمان تستخدم الموبايل كماوس ومن خلاله تقدر تكتب بيه كلوحة مفاتيح كمان.

أخيرًا: البطارية

بطارية الموبايل بتيجي بقوة ٤٠٠٠ مللي أمبير ودي سعة كبيرة ومع المعالج المزود بالذكاء الصناعي البطارية هتكمل معاك لغاية يومين على الأقل من الاستخدام، ومع تقنية الشحن السريع فالموبايل هيتشحن في وقت قليل جدًا، لكن للأسف البطارية للموبايلين مش بتدعم تقنية الشحن اللاسلكي.

ممكن تشوف هواوي Mate 10 من هنا. 

كمان ممكن تشوف هواوي Huawei Mate 10 Pro  من هنا.

موبايل Huawei Mate 10 Porsche Design (إصدار خاص)

مفيش أي اختلاف في الإصدار ده عن باقي الإصدارات غير إن شكل الزجاج الخاص بالجزء الخلفي للموبايل مختلف شوية، والشريط الموجودة فيه الكاميرا المزدوجة للموبايل بيكون بالطول مش بالعرض (وده بيزود من شكل الموبايل الجمالي فعلًا) ومساحة الميموري الداخلية ليه بتكون ١٢٨ جيجابايت، ورام بسعة ٦ جيجابايت رام.

Samaung Note 8 VS Huawei Mate 10 Pro

ما كانش ينفع نتكلم عن أهم موبايلات صدرت من هواوي في تاريخها من غير ما نوضح أهم الفروق ونقاط القوة بينه وبين واحد من أهم الموبايلات اللي أصدرتها سامسونج في تاريخها برضه وهو موبايل Note 8.

لو هنتكلم عن سامسونج Note 8 فهنلاحظ تفوقه على موبايلات هواوي في الشاشة لإنها بدقة وضوح QHD وكمان الانحناء اللي في الشاشة والتفاصيل أوضح وأعلى من موبايلات هواوي.

لكن هنلاقي إن هواوي بتتفوق على Note 8 في سعة البطارية واللي بتيجي بسعة ٤٠٠٠ مللي أمبير مقابل ٣٣٠٠ مللي أمبير لسامسونج.

نسخة الأندرويد لموبايلات هواوي أحدث من سامسونج لإنها بتيجي بأحدث نسخة صدرت من جوجل (أوريو) وفي المقابل هنلاقي إن Note 8 ورغم صدوره بعد إصدار أوريو لكنه بييجي بنسخة نوجا ومفيش تأكيدات لسه على حصوله على تحديث أوريو.

Note 8 بيتفوق على موبايلات هواوي في وجود القلم واللي بتقدر من خلاله تكتب أو ترسم وتحدد وتقوم بأكتر من مهمة على موبايلك.

بالنسبة للكاميرا، في الحقيقة كان صعب جدًا علينا إننا نحدد ونقيم أنهي كاميرا موبايل فيهم أفضل من التانية، وكتير مننا كمان هيلاحظ إن في أكتر من تصنيف عالمي بيقول عن كاميرا هواوي أحسن من سامسونج أو العكس، لكننا في ياقوطة هنعرض عليك نقط بسيطة وانت اللي تقرر في النهاية أنهي كاميرا فيهم أفضل.

• كألوان ودقة وضوح سامسونج تتفوق.
• لكن كتصوير ليلي موبايل هواوي يتفوق بسبب فتحة العدسة.
• Note 8 مزود بخاصية Dual OIS مقابل OIS واحد بس في هواوي.
• الكاميرا الأمامية لسامسونج بفتحة عدسة أوسع من هواوي.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.