هدايا العزومات لكل الميزانيات.. غير الحلويات
كتب: صفاء مجدي
الأصول بتقول أن عيب تدخل على حد وايدك فاضية وخصوصًا لو كان الحد ده عازمك على أكلة حلوة وما بالك كمان لو كانت الأكلة دي هي إفطارك في رمضان، من المستحب أنك تاخد معاك هدية رمزية تشكره فيها على تعبه في العزومة واهتمامه بيك.. ودي مش مشكلة لناس كتير لكن المشكلة في اختيار الهدية المناسبة للعزومة ولميزانيتك.. طبعًا أول حاجة بنفكر فيها إننا نجيب طبق حلويات، ودا شيء جميل لو أنت معزوم لوحدك لكن لو أنت واحد من ضمن عشر أشخاص في العزومة وكل واحد منكم جاب طبق حلويات هيبقى عند صاحب العزومة كمية مهولة من الحلويات وأكيد مش هيقدر يستفيد منها كلها ولا كل المعازيم يقدروا يأكلوا كل الكمية دي من الحلويات!
عشان كده ياقوطة النهاردة جايبة لكم قائمة اقتراحات بهدايا العزومات في رمضان لتناسب أذواق وميزانيات مختلفة والأهم من كده أنك تقدر تشتريها أونلاين من خلال ياقوطة أو تبعتها هدية مباشرة من المحل لصاحب العزومة أو تطلبها تيجي لك البيت وتاخدها معاك.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
ممكن تسأل برضه الناس اللي أنت معزوم عندهم لو هم محتاجين حاجة معينة، ممكن يكون في حاجة بسيطة هم عايزنها ولما تجيبها بكدا توفر عليهم المجهود.
1. الفاكهة والحلويات
لو كنت معزوم وخصوصًا في رمضان ممكن جدا تدخل على اللي عازمك باتنين كيلو فاكهة أو مثلًا طبق حلويات. ده حل كويس ولكن عيبه أنه منتشر وناس كتير دايمًا بتلجأ للحل ده، ورغم أنها هدية لطيفة لكن ممكن تسبب عبء على صاحب العزومة لأنه جايز ينتهي بيه الحال وعنده 5 كيلو موز و3 كيلو كنافة بالمانجا يكفوه للسنة الجاية.
هتعمل ايه لو كان صاحب العزومة مالوش في الكنافة بالمانجا أو مالوش في الحلويات أصلا؟
عمومًا لو لجأت للحل ده يفضل أنك تسأل صاحب العزومة أو تحاول تعرف بطريقة غير مباشرة إن كان بيفضل النوع الفلاني من الحلويات أو بيحب صنف فاكهة معينة، وبرده حاول تجيب كمية معقولة على حسب عدد أفراد الأسرة.
2. التمر
التمر طبعًا من الحاجات الأساسية في رمضان ومفيش حاجة اسمها تمر زيادة عن اللزوم خصوصًا أنه مش بيبوظ بسرعة وبالتالي مش هيسبب نفس المشكلة اللي بتسببها الفاكهة. بس برده متروحش تجيب اتنين كيلو تمر من العادي بتاع الخشاف. حاول تجيب هدية مميزة وعشان كده لما تجيب تمر حاول تجيب تمر مش عادي يعني مثلًا تمر محشي مكسرات أو لوز أو شيكولاتة.
شوف أسعار التمر من هنا. يبدأ السعر من 17 جنيه مصري.
3. شمع معطر
الشمع المعطر من الهدايا اللطيفة جدًا وخصوصًا لو صاحب العزومة بيحبها، ودلوقتي في منها أشكال كثيرة وتستخدم قطع ديكور في البيت.
شوف شمع معطر من هنا. يبدأ السعر من 59 جنيه مصري.
4. قطع ديكور
خللي بالك أن الهدية دي بالذات لازم تكون لحد دخلت بيته قبل كده وعارف شكله ايه، وطرازه ايه، وألوانه عشان متروحش مثلًا تجيب مفرش أو فازة ملهاش أي علاقة على الإطلاق بديكور وروح البيت ووقتها صاحب العزومة مش هيستفيد بيها بشكل كبير. قطع الديكور بيقع تحتها حاجات كتير زي مفارش السفرة أو المفارش الصغيرة لترابيزة القهوة أو فازات.
يبدأ السعر من 65 جنيه مصري.
ممكن تشوف أفكار لزينة رمضان من هنا، ممكن تنفعك وتختار حاجة منها وتأخذها هدية.
5. المشروبات
تنقسم المشروبات إلى نوعين: الباردة والسخنة.
بالنسبة للمشروبات الساخنة: لو كان صاحب العزومة من محبي القهوة ممكن جدًا تدخل عليه بكيس قهوة أمريكاني محترم أو كيس بن طازج من النوع المفضل عنده، ولو حاسس إنها هتكون هدية رخيصة شوية ممكن يا سيدي تزود عليها صينية شيك أو طقم فناجين أو حتى ماج عليه اسمه وتلفهم لفة هدية شيك.
تبدأ أسعار صينية من 140 جنيه مصري.
تبدأ أسعار فناجين القهوة 191 جنيه مصري.
بالنسبة للمشروبات الساقعة: فدي برده حاجة تانية من الحاجات اللي مبنشبعش منها في رمضان، دلوقتي بقى فيه أكياس تمر هندي، وخروب، وعرقسوس تعملها في البيت.
6. برواز أو ألبوم صور
هدية جميلة ومناسبة لو كان صاحب العزومة حد من صحابك القريبين وبينكم ذكريات كثيرة حلوة. ياقوطة بتقترح أنك تلم الصور دي في كولاج ( مجموعة صور ملصقة مع بعض) وتحطها في برواز لطيف يتعلق في بيت صاحبك أو حتى تطبعها وتحطها في ألبوم شيك وتقدمه لصاحبك مع كارت فيه كلمتين حلوين.
يبدأ سعر البراويز من 30 جنيه مصري.
7. فانوس رمضان
فوانيس رمضان السنة دي على كل لون وشكل ومنها الفوانيس القماش، والنحاس، والبلاستيك، وحتى الخشب.. هتكون هدية في منتهى الشياكة لو دخلت على صاحب العزومة بفانوس هدية وكمان لو كان له أطفال تقدر تشتري لهم فوانيس رمضان هدية.
شوف فوانيس رمضان من هنا. يبدأ السعر من 45 جنيه مصري.
8. مكسرات
كثير من الناس بتحب الأكل والتسالي والمكسرات في رمضان. المكسرات هدية كويسة جدًا لو دخلت على اللي عازمك بكيلو مكسرات مشكلة أو صنف محدد بيحبه لو كنت تعرف ذوقه في الحاجات اللي زي دي.
شوف مكسرات من هنا. يبدأ السعر من 30 جنيه مصري.
9. ورد وشيكولاتة
الورد والشيكولاتة من الهدايا الكلاسيكية اللي تناسب ناس كتير، ممكن تدخل على صاحب العزومة ببوكيه ورد لطيف ومعاه علبة شيكولاتة وكارت بكلمات رقيقة تشكره على العزومة.
10. حلويات منزلية
زي ما صاحبك أو قريبك عزمك على أكلة من صنع إيده تقدر أنت كمان تعزمه على صنف حلو تعمله بنفسك في البيت وتاخده معاك تشاركه مع الناس. ومش لازم يكون صنف حلويات شرقية لكن حاول تغير وتخبز كيكة مثلًا أو كاب كيك أو تشيز كيك أو حتى تورتة آيس كريم تكسر حرارة الجو وتعب الصيام.
الهدية دي ممكن متكلفكش كتير لكن هيكون ليها أثر جميل في نفس صاحب العزومة لأنك بذلت فيها مجهود وعملتها بنفسك.
قد تنفد المنتجات من المتاجر – out of stock- في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحة Yaoota.com في فيسبوك.