كتب: خالد عاصم

من أهم أحداث الموبايلات في السنة، وتقريبًا هو الأهم في عالم موبايلات اندرويد، الكشف عن مجموعة موبايلات Samsung Galaxy S الجديدة، والمعتاد إنه بيتم الإعلان عنها في شهر فبراير من كل سنة، والسنة دي وفي نفس الشهر أعلنت Samsung عن مجموعة Samsung Galaxy S23 الجديدة واللي بدأت فعلا تتوفر للحجز المسبق في مصر بمجموعة كبيرة من المميزات المختلفة سواء على مستو الموبايلات نفسها أو على مستوى المميزات اللي هيحصل عليها المشتري وأبرزها إمكانية الحصول على الإصدارات بالسعة الداخلية الأكبر بنفس سعر الإصدارات الأقل، ولكن كل ده بسعر مرتفع جدًا مقارنة بأي موبايلات من موبايلات العيلة دي قبل كده.

وفي المقال ده هنتعرف على مجموعة موبايلات Samsung Galaxy S23 الرائدة الجديدة وهنتعرف على أبرز إمكانياتها وكمان أسعارها الرسمية في السوق المصري.

ولو أي موبايل من اللي هنتكلم عنهم عجبك هتقدر تطلبه من خلالنا في ياقوطة ودلوقتي مع شهري، تقدر تشتري أي موبايل أو تابلت بدون مقدم ولغاية 36 شهر لدى شركائنا، واللي ممكن تعرفهم من أبليكيشن شهري.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

اتعرف على موبايلات Samsung Galaxy S23 الجديدة

موبايلات Samsung Galaxy S23 وGalaxy S23 Plus

لو قارنا ما بين الموبايلين دول والموبايلات من نفس الفئة السنة اللي فاتت هنلاحظ إن الموبايلات الجديدة شهدت فعلًا تحديثات بس مش التحديثات الجذرية إطلاقًا، ومن بين التحديثات الأساسية واللي طالت كمان موبايل Samsung Galaxy S23 Ultra هو الاعتماد في كل الإصدارات على المعالج الجديد Snapdragon 8 Gen 2، يعني الإصدارات اللي في مصر مش هتيجي بمعالج Exynos زي زمان لا هتبقى بمعالج كوالكوم الرائد الأقوى على الإطلاق حاليًا، وكمان بنسخة خاصة منه مطورة مخصوص لموبايلات سامسونج الجديدة.

الكاميرات كمان فيها مجموعة من التحديثات، وإن كانت التحديثات دي مش على مستوى جذري برضه بس هي تحديثات مهمة، ومنها مثًلًا إمكانية تصوير صور RAW بدقة ٥٠ ميجا بيكسل مش بس بدقة ١٢ ميجا بيكسل زي موبايلات السنة اللي فاتت، وبفضل الاعتماد على المعالج الجديد القوي، فالكاميرا الخلفية الرئيسية اللي بدقة ٥٠ ميجا بيكسل بتقدر دلوقتي تصور الفيديو بجودة 8K بمعدل ٣٠ إطار في الثانية بدل ٢٤ إطار في الثانية بس.

العدسة التانية للموبايلين بدقة ١٢ ميجا بيكسل ودي عدسة بالغة العرض بزاوية رؤية ١٢٠ درجة، أما العدسة الأخيرة فعدسة مقربة بدقة ١٠ ميجا بيكسل وبتقريب بصري 3x، والكاميرا الأمامية بدقة ١٢ ميجا بيكسل في التلات موبايلات وبتقدر الكاميرا الأمامية تصور الفيديو بتقنية Super HDR بمعدل ٦٠ إطار في الثانية، وده تطور مهم جدًا.

على مستوى الشاشات فالهاردوير تقريبًا هو هو من السنة اللي فاتت، فالموبايلين بيعتمدوا على شاشة Dynamic AMOLED 2X مسطحة بجودة Full HD Plus وبمعدل تحديث متغير من ٤٨ هيرتز لحد ١٢٠ هيرتز ودعم حساسية لمس بتوصل لحد ٢٤٠ هيرتز في وضع الألعاب، وبييجي موبايل Galaxy S23 بقطر ٦٫١ بوصة وموبايل Galaxy S23 Plus بقطر ٦٫٦ بوصة، والاتنين طبعًا بيعتمدوا على نفس تصميم الثقب والاتنين فيهم ماسح بصمة مدمج ودول موجودين كمان في موبايل Ultra.

أما عن الاختلاف أو التحديث الجديد في شاشات الموبايلات الجديدة فهي وجود خاصية Vision Booster واللي بتقوم بتعديل الألوان والسطوع في الشاشة عشان تتوافق مع ظروف الإضاءة المحيطة بأفضل صورة ممكنة، وكمان فيه خاصية Enhanced Comfort اللي بتقوم بنفس المهمة بالظبط بس في المساء أو الإضاءة المنخفضة جدًا عشان تساعد على تقليل إجهاد العين وقت استخدام الموبايل.

بطاريات الموبايلين زادت بمعدل ٢٠٠ ميللي أمبير في الساعة عشان تبقى سعة بطارية الموبايل الأصغر ٣٩٠٠ ميللي أمبير في الساعة وموبايل S23 Plus تبقى بطاريته بسعة ٤٧٠٠ ميللي أمبير في الساعة، أما تقنية الشحن السريع فقوتها ٢٥ وات في الموبايل الأولاني وبتقدر تشحنه لحد ٥٠ في الميه في ٣٠ دقيقة، وقوتها ٤٥ وات في الموبايل التاني وبتقدر توصل لحد ٦٥ في الميه في ٣٠ دقيقة، أما تقنية الشحن اللاسلكي فقوتها ١٠ وات وتقنية الشحن اللاسلكي العكسي قوتها ٤٫٥ وات.

أما عن الأسعار الرسمية للموبايلين، فبالنسبة لموبايل Samsung Galaxy S23 فسعره الرسمي ٣٤٬٩٢٠ جنيه مصري لإصدار ٨/٢٥٦ جيجابايت، أما موبايل Samsung Galaxy S23 Plus فسعره الرسمي ٤١٬٠٥٠ جنيه مصري لإصدار ٨/٢٥٦ جيجابايت.

اتعرف على عروض أسعار موبايل Samsung Galaxy S23 وGalaxy S23 Plus من هنا.

موبايل Samsung Galaxy S23 Ultra

الموبايل اللي شهد تحديثات أكبر مقارنة بموبايل السنة اللي فاتت هو موبايل Samsung Galaxy S23 Ultra، وعلى الرغم من إنه شكلًا مايختلفش عن موبايل السنة اللي فاتت إلا إن التدقيق في المواصفات هيكشف عن تحديثات مختلفة، ومنهم موضوع الاعتماد عل معالج كوالكوم زي ما عرفنا من شوية، بس التحديث الرئيسي هو الاعتماد على كاميرا خلفية بمستشعر رئيسي ISOCELL HP2 الجديد بدقة ٢٠٠ ميجا بيكسل واللي بيقدر يدمج ١٦ بيكسل في بيكسل واحد بدقة ١٢ ميجا بيكسل وبحجم بيكسل ٢٫٤ ميكروميتر، ويقدر كمان يدمج ٤ بيكسل في بيكسل واحدة بدقة ٥٠ ميجا بيكسل وده بيزود التفاصيل في الصورة بشكل كبير جدًا.

وطبعًا المستشعر ده مع المعالج الجديد بيجمعوا مجموعة كبيرة من المميزات منها اللي اتكلمنا عنه زي خاصية Expert RAW وكمان خاصية Astro Hyperlapse في تصوير الفيديو، وكمان إمكانيات تثبيت الصورة الأفضل في الفيديو ومجموعة كبيرة من الإمكانيات الممتازة على مختلف المستويات الخاصة بالكاميرا، أما باقي العدسات فمش هتختلف عن موبايل السنة اللي فاتت يعني هنلاقي عدستين مقربتين واحدة بريسكوبية بتقريب بصري 10x والتانية مقربة عادية بدقة 3x والاتنين بدقة ١٠ ميجا بيكسل، وكمان عدسة بالغة العرض بدقة ١٢ ميجا بيكسل.

شاشة الموبايل منحنية Dynamic AMOLED 2X بقطر ٦٫٨ بوصة بدقة ٣٠٨٨ × ١٤٤٠ بيكسل وبمعدل سطوع بيوصل لحد ١٧٥٠ شمعة، أما معدل التحديث فمتغير من ١ هيرتز لحد ١٢٠ هيرتز والشاشة بتتمتع بنفس الإمكانيات الممتازة الجديدة المتوفرة في الموبايلات التانية، وأخيرًا بطارية الموبايل سعتها ٥٠٠٠ ميللي أمبير في الساعة مدعومة بتقنية الشحن السريع بقوة 45 وات اللي بتقدر تشحن البطارية من صفر لحد ٦٥ في الميه في ٣٠ دقيقة مع نفس تقنيات الشحن اللاسلكي واللاسلكي العكسي في الموبايلين الأولانيين.

أما عن سعر الموبايل الرسمي فهو ٥٢٬٢٥٥ جنيه مصري لإصدار ١٢/٢٥٦ جيجابايت وبسعر ٦٥٬١٥٠ جنيه مصري لإصدار ١٢/٥١٢ جيجابايت.

اتعرف على عروض أسعار موبايل Samsung Galaxy S23 Ultra من هنا.

اتعرف على عروض أسعار مختلف موبايلات سامسونج المتوفرة على ياقوطة من هنا.

اتعرف على عروض أسعار مختلف الموبايلات المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.