كتب: محمد عبد الرحمن

مع الأيام الأولي لعام ٢٠١٨ بدأ كتير من محبي الموبايلات التفكير في شراء موبايل جديد، ورغم إن المعتاد الاتجاه للجديد، لكن فيه نسبة كبيرة برضه بدأت تفكر تشتري موبايل جديد شوية، مش أحدث حاجة في السوق ومش قديم برضه، وده بيرجع لإن سعره وصل للحد الأدنى ليه والأهم هو إن الموبايل عدت عليه فترة في السوق وظهرت بنسبة كبيرة معظم مميزاته وعيوبه فقرار الشراء هيكون عن اقتناع كبير.

هنستعرض النهارده ٣ موبايلات سعرها من ٢٠٠٠ إلى ٣٠٠٠ جنيه، وهنتعرف من خلال ياقوطة على أهم مواصفات ومميزات وعيوب الموبايلات دي، ولو عاوز تشتري منهم تقدر من خلالنا تعرف أحسن الأسعار ليه وتقارن بينهم وتطلبه كمان وهيوصل لغاية عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

موبايل Oppo A71

المميزات

• شاشة الموبايل بحجم ٥٫٢ بوصة.

• الموبايل بييجي ببروسيسور ثماني النواة Mediatek MT6750، ورام داخلي بسعة ٣ جيجابايت، وميموري داخلية بسعة ١٦ جيجابايت.وتقدر تشغل على الموبايل شريحتين اتصال وميموري خارجي في نفس الوقت.
• الموبايل بيدعم الجيروسكوب، وتوصيل فلاشة خارجية OTG

• الموبايل بييجي بكاميرا خلفية بدقة ١٣ ميجابكسل، وفلاش Led.
• بطارية الموبايل بتيجي بقوة ٣٠٠٠ مللي أمبير.

العيوب

• دقة وضوح وكثافة بكسلات الشاشة ١٢٨٠ × ٧٢٠ بس، وتعتبر قليلة وسط المنافسين.
• الشاشة مش مزودة بأي طبقة حماية مقاومة للخدش أو الكسر.
• الموبايل مش مزود بمستشعر بضمة الإصبع واللي كتير من المستخدمين بيعتبر وجودها شيء أساسي.
• دقة تصوير الكاميرا السيلفي ٥ ميجابكسل.
• البطارية مش بتدعم تقنية الشحن السريع.

تجربة المستخدم

• دقة عرض الصور والأفلام على الموبايل مميزة، رغم كثافة البكسلات القليلة شوية ٢٨٢ بكسل.
• أزرار التنقل والتحكم بالموبايل موجودة بره الشاشة ودي حركة كويسة، خصوصًا إنها بتزود من حجم الشاشة لكنها مش مضيئة.
• الموبايل بيقدم تجربة مرضية في الاستعمال اليومي المعتاد، وكمان ممارسة الألعاب المختلفة على الموبايل.
• واجهة الموبايل مش مريحة قوي، خصوصًا إن أوبو خلت شريط المهام والوظايف المختلفة بيتفعل عن طريق السحب من تحت لفوق، ودي حركة مش معتادة عند كتير من المستخدمين.
• الموبايل بيدعم ميزة عمل أكتر من برنامج واتساب، وفيسبوك في نفس الوقت.
• مكان سماعات الموبايل تحت جهة اليمين، ومن الصعب كتمها عند الاستعمال المعتاد.
• شريحتين الاتصال بيدعموا الجيلين التالت والرابع وده معناه سرعة إنترنت أكبر ونقاء صوتي في المكالمات.
• كاميرا الموبايل صورها مرضية، وإن كانت مش الخيار الأفضل للمستخدم غاوي تصوير باستمرار.
• بطارية الموبايل بتتشحن شحنة كاملة في ٣ ساعات تقريبًا، ودي مدة طويلة شوية.

تقدر تشوف موبايل Oppo A71  من هنا.

موبايل Huawei Y5 2017

المميزات

• الموبايل بييجي بشاشة بحجم ٥ بوصة، بدقة وضوح ١٢٨٠ × ٧٢٠ بكسل، وكثافة بكسلات ٢٩٤ بكسل ودي مناسبة لحجم الشاشة.
• وزن الموبايل خفيف واللي بيكون ١٥٠ جرام.

• الموبايل بييجي ببروسيسور رباعي النواة Mediatek MT6737T بتردد 1.4 جيجاهرتز، ورام بسعة ٢ جيجا، وميموري داخلي بسعة ١٦ جيجابايت، ومعالج رسموي Mali-T720MP2 وممكن تضيف للموبايل ميموري داخلي بسعة توصل لـ ١٢٨ جيجابايت.
• الموبايل بيدعم تقنية الاتصال للجيل الرابع، وبيشغل راديو FM.
• تقدر تشغل على الموبايل شريحتين اتصال وميموري خارجي في نفس الوقت.

• كاميرا الموبايل الخلفية بدقة ٨ ميجابكسل، ومزودة بفلاش ثنائي.
• بطارية قوية بسعة ٣٠٠٠ مللي أمبير.

العيوب

• شاشة الموبايل مش مزدة بطبقة حماية ضد الكسر أو الشرخ.
• الموبايل مش بيدعم عدد من المستشعرات اللي بتهم كتير من المستخدمين زي البصمة والـ OTG.
• كاميرا الموبايل السيلفي دقتها ٥ ميجابكسل بس.
• الموبايل مش مزود بمستشعر بصمة الإصبع.

تجربة المستخدم

• حجم الشاشة مناسب للاستعمال بإيد واحدة، ومن السهل على المستخدم إنه يوصل لكل أجزاء الشاشة بإيد واحدة.
• ألوان الشاشة فيها ميل بسيط للون الأحمر، ودي نقطة ضعف في الشاشة، وممكن تتخلص منها عن طريق الإعدادات.
• الموبايل فيه زرار الـ Easy Key واللي تقدر من خلاله تتحكم في أكتر من وظيفة للموبايل، فمثلًا عن طريق الضغط عليه مرة واحدة تاخد Screen Shot، وعن طريق الضغط عليه مرتين تقدر تشغّل الفلاش، وعن طريق الضغط عليه لمدة طويلة تشغل أي برنامج تاني تختاره.
• الموبايل تصميمه من البلاستيك وده مديه وزن خفيف، ومن السهل التحكم في الموبايل بإيد واحدة لإن ضهر الموبايل مزود بنقشات خفيفة بتسهل على المستخدم مسك الموبايل وبتحميه من السقوط من الإيد.
• هواوي زودت المستخدم بزارا الـ Easy Key واللي يقدر من خلاله يتحكم في أكتر من وظيفة للموبايل، فمثلًا عن طريق الضغط عليه مرة واحدة تاخد Screen Shot، وعن طريق الضغط عليه مرتين تقدر تشغّل الفلاش، وعن طريق الضغط عليه لمدة طويلة تشغل أي برنامج تاني تختاره.

• أداء الموبايل مقبول لمستخدم احتياجاته من الموبايل عادية، فهنلاقي التنقل بين أكتر من برنامج بيتم بشكل كويس، لكنه مش الخيار الأفضل لهواة الألعاب.
• صوت سماعات الموبايل واضح وجودته متوسطة، لكن مكان سماعات الموبايل على شمال جسم الموبايل من الأسفل ومن السهل قوي إنه يتكتم عند استعمال الموبايل أو ممارسة الألعاب عليه.
• الـ GPS الموجود في الموبايل سرعته في الأداء مش الأفضل.
• كاميرا الموبايل بتقدم الحد الأدنى المقبول من الصور، وجودة الصور بتقل في الإضاءة الضعيفة.

• مدة شحن البطارية ساعتين وربع ودي سعة طويلة شوية.

شوف موبايل Huawei Y5 2017  من هنا.

موبايل Xiaomi Redmi 4A

المميزات

• شاشة بحجم ٥ بوصة، ودقة بكسلات ١٢٨٠ × ٧٢٠ بكسل، وكثافة بكسلات ٢٩٦ بكسل.
• وزن الموبايل ١٣١ جرام.
• كاميرا خلفية بقوة ١٣ ميجا بكسل مزودة بفلاش.
• رام الموبايل ٢ جيجابايت، والميموري الداخلي ١٦ جيجابايت، وفيه إصدار تاني نزل السوق مؤخرًَا ٣٢ جيجابايت.
• الموبايل مزود بتقنية الـ IR والـ OTG والجيروسكوب وراديو FM ولمبة إشعارات LED، وميكروفون إضافي مانع للضجيج.
• بروسيسور رباعي النواة بأداء مناسب، مع إمكانية إضافة ميموري خارجي بسعة ٢٥٦ جيجابايت.
• الموبايل بيدعم تشغيل شريحتين اتصال وميموري خارجي، وبيدعم الاتصال بتقنية الجيل الرابع 4G.
• بطارية بسعة ٣١٢٠ مللي أمبير.

العيوب

• ما تقدرش تشغل شريحتين اتصال وكارت ميموري مع بعض وهتحتاج تستغنى عن واحد فيهم.
• شاشة الموبايل مش موجود عليها طبقة حماية إضافية وهتحتاج تشتري طبقة حماية إضافية.
• الكاميرا السيلفي للموبايل ٥ ميجابكسل، من غير فلاش.
• الموبايل مش مزود بتقنية بصمة الإصبع.
• الموبايل مش بييجي معاه سماعات أذن Hand Free.

تجربة المستخدم

• زوايا رؤية الشاشة كويسة في ظروف الإضاءة المختلفة، وألوان الموبايل مقبولة، وهنلاحظ كمان إن زراير التنقل للموبايل موجودة على شاشة الموبايل ومش مضيئة ودي نقطة ضعف للموبايل خصوصًا عند استعمال الموبايل في مكان إضاءته ضعيفة.
• أداء الموبايل كويس بشكل كبير في المهام اليومية البسيطة والصعبة لكن لو حبيت عليه ألعاب بجرافيك عالي هتلاحظ غياب بعض الفريمات منها ومش هتستمتع قوي بالألعاب دي ولكن في الألعاب البسيطة والمتوسطة أداء الموبايل كويس جدًا.
• كاميرا الموبايل بتقدم صور عادية وتباين الألوان كويس. لكن هتلاحظ غياب تفاصيل بسيطة من الصور دي خصوصًا لو كانت في خلفية الجسم اللي انت صورته، والصور في الإضاءة الضعيفة مقبولة ولكن فيها Noise واضح.
• أما بخصوص سيلفي الموبايل فهو مقبول مش الأفضل وسط المنافسين لكنه مش ضعيف وأكيد هتلاقي صوره مرضية لكن في الإضاءة الضعيفة والليلية فالصور مش هتكون كويسة.

• الموبايل فيه خاصية Seconed Space واللي بتسمح للمستخدم إنه يقسم الموبايل لقسمين مختلفين تمامًا، كل قسم بيكون له أشكاله وبرامجه وألعابه وحتى خلفيته المختلفة عن التاني.

• تقدر عن طريق واجهة شاومي إنك تنسخ أكتر من برنامج تواصل اجتماعي ليك وبأكتر من حساب.

شوف موبايل Xiaomi Redmi 4A من هنا.