كتب: محمد عبد الرحمن

Oppo الفترة الأخيرة احتلت موبايلاتها كتير من واجهات المحلات، وده لإنها قدرت الفترة الأخيرة تحديدًا تتواجد بأكتر من موبايل بمواصفات مميزة، وسعر قدرت تنافس بيه كتير من الشركات الأقدم منها في السوق المصري.

وواحد من الموبايلات دي هو موبايل Oppo F5 Youth واللي يعتبر النسخة الأصغر من موبايل Oppo F5.

وفي الريفيو ده هنتعرف على أكتر على مواصفات ومميزات وعيوب الموبايل، ولو عجبك الموبايل تقدر من خلال ياقوطة تعرف أحسن الأسعار ليه وتقارن بينهم، وممكن طمان تطلبه من خلالنا وهيوصل لغاية عندك وفي أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المواصفات

وصف الموبايل

• الجهة الأمامية هنلاقي مع شاشة الموبايل كاميرا سيلفي.
• الجهة الخلفية هنلاقي كاميرا خلفية مزودة بفلاش ومستشعر لبصمة الإصبع.
• الجهة اليمنى للموبايل هنلاقي زر منفصل للباور، مع وجود درج خاص بشريحتي الموبايل والميموري الخارجي.
• الجهة اليسرى هنلاقي زر التحكم في الصوت.
• الجهة السفلية للموبايل هنلاقي منفذ شحن الموبايل ومكان سماعات الهاند فري، مع وجود سماعات الموبايل.
• مفيش وجود للخط الملون في الجهة الخلفية للموبايل زي النسخة الأكبر، وللأسف مفيش لمبة إشعارات Led.

الشاشة

المميزات

• شاشة LTPS IPS LCD بحجم ٦ بوصة، ودقة وضوح ٢١٦٠ × ١٠٨٠ بكسل، وكثافة بكسلات ٤٠٢ بكسل.
• الشاشة بتيجي بالأبعاد الجديدة للعرض ١٨:٩.
• الشاشة مزودة بطبقة حماية إضافية ضد الكسر Corning Gorilla Glass 5.

العيوب

• لا يوجد.

تجربة المستخدم

• شاشة الموبايل حجمها مناسب جدًا لمشاهدة أفلام الفيديو والقراءة عليها.
• زوايا الرؤية والوضوح مناسبين جدًا ومريحة للعين حتى في ظروف الإضاءة المختلفة.
• للأسف دقة وضوح وسطوع الألوان بتقل تلقائي وبمجرد ما الموبايل بيوصل شحن البطارية فيه لـ ٢٠٪، ومهما عليت درجة السطوع هتفضل قليلة، والحركة دي ورغم إنها بتوفر البطارية لكنها متاحة في معظم الموديلات اللي في السوق عند ٥٪ مش ٢٠٪.
• رغم إن زراير التنقل متاحة في الموبايل جوه الشاشة، فالمستخدم يقدر يستغنى عنها ويستعمل اللمس للتنقل جوه الموبايل وده عن طريق السحب من ناحية اليمين للأعلى (Back)، وعن طريق السحب من المنتصف للأعلى تروح للـ Home، ولو محتاج تروح للبرامج اللي شغالة في خلفية الموبايل هتسحب من منتصف الشاشة للأعلى، وعلشان تشوف شريط المهام زي الواي فاي والثري جي، بيتم ده عن طريق السحب ناحية الشمال.

الأداء

المميزات

• الموبايل بييجي بنظام تشغيل نوجا، وبييجي ببروسيسور ثماني النواة Mediatek MT6763T Helio P23 بتردد 2.5 جيجاهرتز، ومعالج رسومي Mali-G71 MP2 مع رام داخلي بسعة ٣ جيجابايت وميموري داخلي بسعة ٣٢ جيجا، وممكن تضيف ميموري خارجي بسعة توصل لغاية ٢٥٦ جيجابايت.
• الموبايل بيدعم تشغيل شريحتين اتصال وميموري خارجي في نفس الوقت، وكمان تقنية الجيل الرابع للاتصال.
• الموبايل بيدعم وجود مستشعر بصمة الإصبع، وتقنية الـ OTG، والجيروسكوب.

العيوب

• الموبايل مش بيدعم تشغيل راديو FM.

تجربة المستخدم

• أداء الموبايل مميز جدًا وواجهة الموبايل تقريبًا نفس واجهة نظام موبايلات أبل.
• الموبايل بيقدم تجربة مميزة في التصفح والتنقل وتشغيب اكتر من برنامج في نفس الوقت، والمستخدم مش هيلاحظ أي بطء في استعمال الموبايل، وده بفضل الرام المميزة وكمان واجهة اوبو اللي بتكون ملائمة لمواصفات الموبايل وبتسهل كتير من استجابة الموبايل للمهام المطلوبة.
• أداء بصمة الموبايل سريع جدًا، والمستخدم مش هيواجه أي تأخير أو تهنيج عند استعمالها.
• الموبايل خيار كويس لعشاق الألعاب وده بفضل سرعته وكمان دقة وحجم شاشة الموبايل.
• سماعات الموبايل صوتها نقي وواضح، لكن وجودها في الجهة السفلية جهة اليسار بيقلل من صوتها عند الاستماع للفيديو أو ممارسة الألعاب المختلفة.
• ميزة مهمة جدًا من أوبو وهي إن الشريحتين بيدعموا تشغيل الإنترنت، واحدة منهم 3G ن والتانية 4G.

الكاميرا

المميزات

• الموبايل بييجي بكاميرا خلفية بدقة ١٣ ميجابكسل بفتحة عدسة F2.0 وفلاش أحادي.
• الكاميرا السيلفي للموبايل بتيجي بدقة ١٦ ميجابكسل.

العيوب

• الكاميرا الخلفية مفيهاش تقنية الـ IOS.
• مفيش فلاش للكاميرا السيلفي.

تجربة المستخدم

• كاميرا الموبايل ورغم إن عدد الميجابكسل اللي فيها أقل من النسخة الأكبر، فالمستخدم مش هيلاحظ وجود فرق ملحوظ بينهم، وإن كان تقليل حجم فتحة العدسة بيقلل التفاصيل شوية خصوصًا في الإضاءة القليلة.
• أداء الكاميرا السيلفي مميز وتقنية عزل الصور فيها بيتم بشكل كويس، لكن ألوان الصور السيلفي هنا فاتحة بشكل ملحوظ عن الأخ الأكبر.
• كمان ميزة الذكاء الاصطناعي للكاميرا السيلفي بتسمح للكاميرا إنها تدرس كل تفاصيل وش المستخدم وعند التصوير بتجمع التفاصيل دي من الصور السابقة ليها وتظهره بأحسن شكل، ودي ميزة قوية وأحسن بكتير من الوضع الجمالي اللي موجود بموبايلات تانية.
• الكاميرا الخلفية مش موجود فيها ميزة البورتريه، ولو حصل أي اهتزاز لإيد المستخدم الصور المستخدم بيفقد جزء من جمال الصورة، كمان الكاميرا مش بتوفر ميزة البورتريه زي الكاميرا السيلفي.

البطارية

المميزات

الموبايل بييجي ببطارية بسعة ٣٢٠٠ مللي أمبير.

العيوب

• البطارية مش بتدعم تقنية الشحن السريع.

تجربة المستخدم

• البطارية بتتشحن شحنة كاملة في ساعتين ونص تقريبًا.
• الموبايل بيقدم تجربة أداء مناسبة جدًا وتكفي يوم كامل من الاستعمال المكثف.

ممكن تشوف موبايل Oppo F5 Youth من هنا.