كتب: خالد عاصم

قدرت Xiaomi بشكل قوي جدًا إنها تكون ملكة متوجة على عرش الموبايلات متوسطة الفئة بشكل واضح خلاها نموذج يحتذى بيه وخلى أي موبايل بيصدر في الفئة دي هدفه الرئيسي إنه ينافس موبايلات Xiaomi وإنه يحاول ياخد من مكانتها اللي قدرت تكسبها خلال فترة قصيرة جدًا من خلال موبايلات ممتازة بتقدم كل اللي محتاجه المستخدم وبسعر قليل جدًا.

وقدرت Xiaomi من خلال موبايلات متعددة ومختلفة إنها ترضي أذواق كل المستخدمين اللي بيستهدفوا الفئة دي من أقل شريحة فيها لأعلى شريحة فيها، ومن بين الموبايلات اللي قدرت بيها Xiaomi ترضي فئة معينةمن المستخدمين موبايل Xiaomi Redmi 6A اللي بيجمع بين مواصفات شكلية وعامة بتنتمي لموبايلات أعلى وفي نفس الوقت إمكانياته الداخلية بتساعد إن الموبايل يفضل في فئة سعرية مناسبة جدًا ومنافسة جدا لموبايلات تانية كتير في الفئة نفسها.

النهارده هنتكلم عن موبايل Xiaomi Redmi 6A المنتمي للفئة المتوسطة وهنتعرف على مواصفاته ومن خلالها هنحدد مميزاته وعيوبه وكمان هنتعرف على متوسط أسعاره في السوق المصري. طبعًا لو عجبكم موبايل Xiaomi Redmi 6A هتقدروا تطلبوه من خلالنا في ياقوطة وهيوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

موبايل Xiaomi Redmi 6A

مواصفات Xiaomi Redmi 6A

• تاريخ الإعلان عن الموبايل: يونيو ٢٠١٨.
• تاريخ طرح الموبايل في الأسواق: يونيو ٢٠١٨
• أبعاد الموبايل: ٨.٣ × ٧١.٥ × ١٤٧.٥ مم
• وزن الموبايل: ١٤٥ جرام.
• شرائح الموبايل: ثنائي الشريحة.
• شاشة الموبايل: بيعتمد موبايل Xiaomi Redmi 6A على شاشة كاملة قطرها ٥.٤٥ بوصة بمعدل ١٨:٩ وبتشغل تقريبًا ٧٢.٧ % من مساحة الموبايل الأمامية، دقة الشاشة ١٤٤٠ × ٧٢٠ بيكسل وكثافتها ٢٩٥ بيكسل لكل بوصة، الشاشة معمولة من شرائح LCD 
• أداء الموبايل: موبايل Xiaomi Redmi 6A بيعتمد على بروسيسور MediaTek MT6761 Helio A22 وده بروسيسور مكون من أربع أنوية بسرعة ٢.٠ جيجا هيرتز لشرايح Cortex-A53 أما بروسيسور الجرافيكس فنوعه PowerVR GE8320. الموبايل بيصدر بإصدارين واحد بذاكرة عشوائية سعتها ٢ جيجابايت رام بذاكرة داخلية سعتها ١٦ جيجابايت والتاني بذاكرة عشوائية سعتها ٣ جيجابايت رام وبذارة داخلية سعتها ٣٢ جيجابايت وبيقبل كروت الميموري لحد ٢٥٦ جيجابايت.
• نظام التشغيل: أندرويد ٨٫١ أوريو.
• واجهة المستخدم: MIUI 9.0
• الكاميرا: موبايل Xiaomi Redmi 6A بييجي بكاميرا خلفية بقوة ١٣ ميجا بيكسل وفتحة المستشعر f/2.2 والعدسة دي مدعومة بتقنية التركيز التلقائي PDAF، الكاميرا الخلفية مدعومة بإضاءة فلاش ليد فردية وبتصور فيديو بجودة 1080p بمعدل ٣٠ إطار في الثانية. أما الكاميرا الأمامية فقوتها ٥ ميجا بيكسل بفتحة مستشعر f/2.2 .
• منفذ توصيل سماعات الرأس: متوفر.
• منفذ الشحن ونقل البيانات: microUSB
• مستشعرات الموبايل: التسارع والتقارب والبوصلة.
• البطارية: بطارية الموبايل غير قابلة للإزالة سعتها ٣٠٠٠ ميللي أمبير عن طريق منفذ microUSB.
• ألوان الموبايل المتاحة: الرمادي – الأزرق – الذهبي – الذهبي الوردي.

مميزات Xiaomi Redmi 6A

• موبايل Xiaomi Redmi 6A بيمتاز بتصميم الشاشة الكاملة ١٨:٩ وده تصميم قليل لما بنشوفه في موبايل بالسعر الاقتصادي جدًا ده
• تصميم الموبايل في المجمل رائع جدًا ومايختلفش كتير عن الموبايلات الأعلى منه في السعر حتى الكاميرا الخلفية الفردية تصميمها مع إضاءة الفلاش يوحي بإن الموبايل بييجي بكاميرا خلفية مزدوجة.
• شاشة Xiaomi Redmi 6A قطرها متوسط بالنسبة للموبايلات المتوفرة دلوقتي ودي ميزة للناس اللي بتفضل الهواتف اللي شاشاتها مش كبيرة قوي زي مختلف الموبايلات الجديدة وكمان مش صغيرة أوي زي الموبايلات القديمة.
• مساحة الرؤية للموبايل ممتازة جدًا.
• النسبة اللي بتحتلها الشاشة معقولة صحيح أقل من الطبيعي للمعدل ده بس أحسن من موبايلات كتير في الفئة نفسها وده بيخلي الموبايل مثالي جدًا للفرجة على الأفلام وتصفح الإنترنت.
• دقة الشاشة مش قوية بس هي الأنسب للفئة دي الموبايلات.
• الموبايل بيعتمد على نظام تشغيل أندرويد ٨٫١ أوريو.
• الموبايل بيدعم كروت الميموري لحد ٢٥٦ جيجابايت.
• كارت الميموري ليه منفذ خاص يعني استخدامه مش هيعطل استخدام شريحة الاتصال التانية.
• الكاميرا الخلفية لموبايل Xiaomi Redmi 6A مقبولة جدًا وممكن نتوقع منها صور كويسة خصوصاً في الإضاءة العالية.
• بطارية الموبايل ممتازة بالنسبة لاستهلاك الطاقة لأن الشاشة والبروسيسور مش بيستهلكوا طاقة كبيرة.

عيوب Xiaomi Redmi 6A

• المواد المستخدمة في صناعة Xiaomi Redmi 6A من البلاستيك وده السبب في إنه خفيف قوي للدرجة دي.
• الموبايل مش محمي بأي تقنية ضد الغبار والغمر في المياه وده ممكن يكون طبيعي في الفئة دي.
• الشاشة كمان مش محميه بأي إصدار من إصدارات أي نوع من أنواع الزجاج المقوى.
• بروسيسور Xiaomi Redmi 6A مش قوي رغم إنه مناسب للفئة دي بس متتوقعش منه إنه يقدم أكتر من المهام الأساسية زي تصفح الإنترنت وتشغيل التطبيقات والألعاب الخفيفة طبعًا إجراء الاتصالات واستخدام تطبيقات التواصل الاجتماعي.
• بروسيسور الجرافيكس مش هيقدر يدعم عدد كبير من الألعاب.
• الإصدار الأعلى من الموبايل مش متوفر في مصر.
• الكاميرا الخلفية بعدسة واحدة ودي حاجة اتغلبت عليها موبايلات بتنتمي لنفس الفئة.
• الكاميرا الأمامية ضعيفة خصوصًا في الإضاءة المنخفضة.
• الموبايل مفيهوش ماسح بصمة وبيعتمد على الطرق القديمة في التأمين.
• بطارية الموبايل مش بتدعم أي تقنية من تقنيات الشحن السريع.

اتعرف على عروض أسعار موبايل Xiaomi Redmi 6A من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.