كتب: خالد عاصم

أجهزة التابلت المتوفرة في السوق المصري دلوقتي بقت كتير، وعلى عكس السنين اللي فاتت اللي كان السوق بيعاني فيها من نقص الأجهزة دي، بقى فيه شركات كتير بتنزل أجهزة جديدة وفي فئات سعرية مختلفة، حتى الشركات اللي مكانتش بتعمل أجهزة تابلت زي Xiaomi وRealme بقى ليها هي كمان أجهزة متوفرة في مصر، وده بيخلي السوق ينتعش وبيخلي الشركات القديمة في سوق الأجهزة دي تهتم بإنتاج أجهزة جديدة وتوفيرها في مختلف الأسواق.

ومن بين الشركات اللي بتهتم اهتمام كبير بقطاع التابلت، شركة Huawei اللي بتقدم مجموعة متنوعة من الأجهزة في فئات مختلفة عشان ترضي مختلف المستهلكين بمختلف ميزانتيهم، ومن بين الأجهزة اللي بتصدر في سعر مقبول جدًا، جهاز Huawei MatePad 10.4 2022 اللي أعلنت عنه هواوي من فترة بسيطة ويعد إعادة تقديم للجهاز نفسه اللي صدر من سنتين من غير اختلافات كبيرة.

النهاردة هنركز بشكل أساسي على تابلت Huawei MatePad 10.4 2022 وهنتعرف عليه بشكل مفصل من خلال معرفتنا بمواصفاته ومراجعة المواصفات دي هنقدر نحدد مميزاته وعيوبه وكمان نحدد موقعه بين المنافسين في الفئة السعرية نفسها، وطبعًا هنتعرف على متوسط سعره في السوق المصري.

وما تنسوش إن لو التابلت عجبكم هتقدروا تطلبوه من خلالنا في ياقوطة ودلوقتي مع شهري، تقدر تشتري أي موبايل أو تابلت بدون مقدم ولغاية 36 شهر لدى شركائنا، واللي ممكن تعرفهم من أبليكيشن شهري.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

تابلت Huawei MatePad 10.4 2021

المواصفات

• أبعاد التابلت: سمك ٧.٥ مم × عرض ١٥٥ مم × طول ٢٤٥.٢ مم
• وزن التابلت: ٤٦٠ جرام 
• البناء والصناعة: هيكل وضهر من الألومنيوم بزجاج أمامي
• شرائح الاتصال: نانو
• نوع الشاشة: IPS LCD
• مواصفات الشاشة الفنية: شاشة بقطر ١٠.٤ بوصة بمعدل ٥:٣ تستحوذ على نسبة حوالي ٨١.٠ في الميه من مساحة التابلت الأمامية
• دقة عرض الشاشة: ٢٠٠٠ × ١٢٠٠ بيكسل بكثافة ٢٢٤ بكسل لكل بوصة
• المعالج والأداء: معالج Kirin 820 بمعمارية 7 نانوميتر المكون من شريحة Cortex-A76 بتردد ٢.٣٦ جيجا هيرتز ومن تلات شرائح Cortex-A76 بتردد ٢.٢٢ جيجا هيرتز ومن أربع شرائح Cortex-A55 بتردد ١٫٨٤ جيجا هيرتز ومدمج فيه معالج رسوميات Mali-G57 وبيصدر التابلت بإصدارين بذاكرة عشوائية سعتها ٤ جيجابايت رام وبذاكرة داخلية سعتها ٦٤ جيجابايت للإصدار الأول أو ١٢٨ جيجابايت للإصدار التاني  والتابلت بيقبل كروت الميموري
• نظام التشغيل: اندرويد ١٠ بواجهة مستخدم EMUI 10.1 من غير خدمات جوجل
• الكاميرا الخلفية: بدقة ٨ ميجا بيكسل وبتدعم تصوير الفيديو بجودة 1080p بمعدل ٣٠ إطار في الثانية 
• الكاميرا الأمامية: بدقة ٨ ميجا بيكسل بتدعم تصوير الفيديو بجودة 1080p بمعدل ٣٠ إطار في الثانية 
• الصوتيات: أربع سماعات ستريو 
• تقنيات الاتصال اللاسلكية: بلوتوث ٥.١
• المنافذ:  USB Type-C
• المستشعرات: التسارع – الدوران – البوصلة
• البطارية: غير قابلة للإزالة سعة ٧٢٥٠ ميللي أمبير في الساعة بتدعم تقنية الشحن السريع بقوة ٢٢.٥ وات

مميزات وعيوب تابلت Huawei MatePad 10.4 2022

مزايا تابلت Huawei MatePad 10.4 2022

• التابلت بيدعم شرايح الاتصال وبيدعم تقنية 4G LTE من خلال الاعتماد على شريحة نانو
• سمك التابلت نحيف جدًا ودي ميزة رائعة مع النظر لشاشته الكبيرة وكمان بيتميز بوزن خفيف جدًا صعب أوي نلاقيه في تابلت بقطر أكتر من ١٠ بوصة
• التابلت بيعتمد على الألومنيوم بالكامل في صناعته
• بيدعم استخدام القلم
• شاشة قطرها كبير وجودتها عالية ومن بين مميزاتها المهمة إنها بتستحوذ على نسبة كبيرة من المساحة الأمامية للتابلت بفضل الحواف النخيفة اللي حواليها وده بيخلي التابلت شكله مميز ما بين الأجهزة التانية المتوفرة في نفس الفئة السعرية
• التابلت بيعتمد على معالج قوي من هواوي بيتميز بسرعات عالية وإمكانيات ممتازة في الفئة السعرية دي وهيقدر يقدم أداء قوي جدًا على مستويات مختلفة خصوصًا تشغيل التطبيقات التقيلة شوية والمهام المتعددة
• الذاكرة الداخلية كبيرة سعتها ١٢٨ جيجابايت ومع زيادتها من خلال كروت الميموري اللي بيقبلها التابلت هتقدر تعلي سعة التابلت التخزينية بشكل كبير
• التابلت بيقبل كروت ميموري
• الكاميرات بالنسبة للفئة السعرية مقبولة ومعتاده وإن كان من الصعب شوية اعتبارها ميزة أوي ولكن أداءها كويس بالنسبة للمطلوب من أجهزة التابلت بشكل عام
• صوتيات قوية جدًا بفضل الاعتماد على اربع سماعات ستريو قوية وبتتمتع بصوت واضح ونقي
• التابلت بيدعم تقنية الشحن السريع بقوة عالية نسبيًا من خلال منفذ USB Type-C

عيوب تابلت Huawei MatePad 10.4 2022

• شاشة التابلت مش بتدعم أي معدل تحديث مرتفع وبتكتفي بمعدل تحديث ٦٠ هيرتز ومش بتدعم أي تقنيات إضافية
• رغم إن معالج التابلت بيدعم تقنية 5G إلا إن التابلت نفسه بيكتفي بدعم تقنية 4G بس
• التابلت بيعتمد على نظام تشغيل اندرويد ١٠ بس وكمان طبعًا مش بيدعم أي من خدمات جوجل كعادة مختلف أجهزة هواوي
• التابلت بيكتفي بذاكرة عشوائية سعتها 4 جيجابايت رام بس في كل إصداراته ومفيش إصدارات أقوى شوية
• التابلت مفهوش منفذ ٣٫٥ مم
• بطارية التابلت كويسة بس بالنظر للقطر الكبير للشاشة والحجم الكبير للتابلت كان من الأفضل تكون أكبر من كده شوية

اتعرف على عروض أسعار تابلت Huawei MatePad 10.4 2022 من هنا.

اتعرف على عروض أسعار مختلف أجهزة هواوي المتوفرة على ياقوطة.

اتعرف على عروض أسعار مختلف أجهزة التابلت المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.