كتب: محمد حمدي

على الرغم من العدد الكبير من الانتقادات اللي بتتوجه لعملاق الهواتف المحمولة سامسونج بخصوص نظام التشغيل الخاص بيها والمعتمد على نظام أندرويد، وتأخر وصوله لكتير من المستخدمين في بعض الأحيان، إلا إن سامسونج بتقدر تطرح أجهزة تحقق المعادلة الصعبة بين الأداء الجيد والسعر المناسب في نفس الوقت.

تعالوا نعرف أكتر عن Samsung Galaxy J7 Core اللي تم طرحه حديثًا من خلال تجربتنا في استخدامه. ومن خلال الريفيو ده تقدروا تتعرفوا أكتر على مواصفات ومميزات وعيوب الموبايل، ولو عجبكم تقدروا من خلال ياقوطة تعرفوا أحسن الأسعار ليه وتطلبوه وهيكون عندكم في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*ممكن تشوف مواصفات الموبايل بالتفصيل من mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

المواصفات التقنية

ملاحظتنا الأولى والأساسية على الموبايل، واللي كانت ملاحظة إيجابية بالمناسبة هي إنه تليفون ينفع لجميع الاحتياجات. يعني لو المستخدم بيتفرج على فيديوهات كتير هتعجبه الشاشة اللي بوضوح HD وبحجم ٥٫٥ بوصة يعني حجم مناسب للجيب وفي نفس الوقت ممكن نتابع من خلاله الفيديوهات بشكل كويس.

الناس اللي بتحب تعمل مكالمات كتير وتقارن بين عروض شركات الاتصالات أوبشن الشريحتين مع الموبايل هيكون مناسب بالنسبة لهم وهيفتح ليهم خيارات كتيرة ومتنوعة. أما الناس اللي بتحب التصوير هيلاقوا كاميرا ١٣ ميجابكسل رئيسية، وكاميرا أمامية ٥ ميجابكسل. وهنا ممكن تكون الكاميرا مش قوية قوي، لكنها مناسبة للناس اللي بتستخدم الكاميرا لتصوير المناسبات والخروجات، أما المصورين المحترفين مش هتناسبهم كاميرا الموبايل.

تصميم الموبايل

لو اتكلمنا عن تصميم الموبايل هنلاقي إن سامسونج ما قدمتش أي ابتكار في تغيير الشكل الخارجي للموبايل علشان يكون مختلف عن باقي الطرازات اللي بتصدرها، حتى لو فيه اختلاف بيكون طفيف ومش ملحوظ من أول نظرة، ودي من العيوب اللي بناخدها على الجهاز.

لكن المميز كان وزن الجهاز الخفيف (حوالي ١٧٠ جرام) وحجمه المناسب للمشاهدة والحمل في الجيب في نفس الوقت، والأزرار الجانبية للهاتف مصنوعة بحيث إن المستخدم ما يضغطش عليها بالغلط أثناء إجراء المكالمات.

الكاميرا

الموبايل بييجي بكاميرا رئيسية خلفية بدقة ١٣ ميجابكسل وهو رقم مناسب للاستخدام التقليدي وغير المحترف، لكن أداء الكاميرا كان قوي وبيقدر ياخد صور كويسة جدًا في مستويات مختلفة من الإضاءة وده من العناصر الإيجابية في كاميرا الموبايل.

أما الكاميرا الأمامية بقوة ٥ ميجابكسل فكانت أضعف من توقعاتنا للطراز ده خصوصًا مع رغبة ناس كتير في التقاط صور سيلفي، وفي الحالة دي الكاميرا ممكن تكون أضعف من توقعات المستخدمين.

الشاشة

تعتبر الشاشة من أهم عناصر قوة Samsung Galaxy J7 Core على الرغم من حجمها اللي ممكن البعض يشوفه صغير نسبيًا ٥٫٥ بوصة، لكن الشاشة بتعرض بدقة HD وده مناسب جدًا للموبايل، لكن بعض المستخدمين كانوا متوقعين الجودة تكون Full HD بما إننا في عصر بيتجه بسرعة نحو عالم الـ 4K والدقة الكبيرة جدًا في الشاشات. وفي المقابل الشاشة بتتمتع بتكنولوجيا Super AMOLED بعمق ١٦ مليون لون لكن بدون دعم للـ Spen.

الاتصال

المميز في الموبايل إنه بييجي بدعم لشريحتين اتصال وده هيوفر كتير على مستخدميه خاصة مع زيادة أسعار كروت الشحن مؤخرًا واحتياج كتير من المستخدمين لأكتر من اختيار قبل إجراء المكالمات، كمان الموبايل بيدعم شبكات الجيل الثالث والرابع وتقنيات بلوتوث وواي فاي وGPS لكن بيعيب الموبايل إنه مش متوفر فيه تقنية NFC أو الاتصال قريب المدى.

المواصفات التقنية

• الموبايل بييجي بمجموعة من البرامج والتطبيقات اللي تعتبر مميزة جدًا بالنسبة للفئة بتاعته، زي تقنية Kies اللي بتربط الموبايل بجهاز الكمبيوتر بسرعة وسهولة، وبكده ممكن تدير الجهاز بالكامل من جهاز الكمبيوتر وتخزن بياناته المهمة لضمان عدم ضياعها.
• كمان الجهاز بيدعم التصوير بتليفزيونات HD لعرض الصور والفيديوهات عليه مباشرة، لكن ده بيتطلب شراء محول HDMI بيتباع بشكل منفصل عن الجهاز.
• آخر خاصية جيدة شوفناها في الموبايل كانت خاصية Dual messenger، اللي بتخلي مستخدم الموبايل يقدر ينزل أكتر من نسخة من نفس التطبيق ويدير أكتر من حساب messenger أو whatsapp بدون ما يضطر لتغيير شريحة الاتصال.
• الموبايل بييجي ببروسيسور ثماني النواة بقوة ١٫٦ جيجاهرتز، وده هيسهل على كتير من الناس التعامل مع البرامج بسرعة وسهولة، ومش هيلاقوا أي بطء في استجابة الموبايل لأوامرهم المختلفة، يمكن ٢ جيجابايت رام تعتبر سعة قليلة شوية عليه، لكن في معظم الأوقات مش هتلاقي تهنيج يذكر.
• الميموري الداخلي للموبايل مقبولة لكنها مش الأفضل وكنا نتمنى من سامسونج إنها تزودها شوية لإنها بتيجي بسعة ١٦ جيجابايت، وبيتبقى منها للمستخدم ١٠ جيجابايت تقريبًا واللي تعتبر سعة مناسبة.
• الموبايل خيار مناسب لهواة الألعاب المتوسطة والخفيفة، ولو جربت عليه ألعاب بجرافيك عالي زي Asphalt هتحس بتكسير في شوية فريمات للعبة.
• الموبايل بيدعم من المستشعرات التسارع والتقارب، ولو كنت من حابب تتفرج على صور بـ ٣٦٠ درجة فللأسف الموبايل مش بيدعمها.
• الموبايل بييجي بنسخة أندرويد نوجا، وبيشغل راديو FM.
• الموبايل بييجي ببطارية بسعة ٣٠٠٠ مللي أمبير وتعتبر سعة معقولة، خصوصًا إنها بتكفي لغاية ١١ ساعة تقريبًا من استخدام الإنترنت على شبكة 3G، ولغاية ٢١ ساعة مكالمات. 

تجارب المستخدمين

• من العيوب اللي أشار ليها أحد المستخدمين هي إن كاميرا الموبايل مش بتشتغل بالقوة والكفاءة المتوقعة منها، كمان تصميمها بشكل ملاصق للجزء الخلفي من الموبايل بيخليها ممكن تتعرض للخدش من كثرة وضع الموبايل على أسطح خشنة.
• كمان شوفنا بعض الشكاوى من انخفاض صوت الموبايل في النغمات وغيرها، وعمر البطارية اللي يعتبر ضعيف نسبيًا. كمان عدم وجود حماية للشاشة Screen protectorكان مزعل ناس كتير.
• أما على صعيد الإيجابيات المستخدمين كانوا مبسوطين من السرعة النسبية لفتح التطبيقات، وشاشة الموبايل الـ HD كانت مرضية لعدد كبير منهم، بالإضافة للبرامج الملحقة بالجهاز واللي عجبهم جدًا، وقارن المستخدمين بين الموبايل وموبايلات تانية من نفس الشريحة السعرية في شاومي مثلًا وكانت النتيجة في النهاية إيجابية لصالح سامسونج.

شوف موبايل Samsung Galaxy J7 Core من هنا.