كتب: خالد عاصم

كل عشق ألعاب الفيديو عارفين كويس الحديث السنوي الأهم في عالم الألعاب وهو حدث Game of the Year اللي بيقام مع نهاية كل سنة من خلال مؤسسة The Game Awards في الحفلة اللي بتحمل نفس الاسم وبيتم فيها الإعلان عن جوائز الألعاب المختلفة ومن بينها الجائزة الأهم وهي لعبة السنة، ولسنة 2023 تم الإعلان عن ست ألعاب مرشحة للعبة السنة ومن بينها لعبة جديدة من واحدة من أشهر سلاسل الألعاب ومعشوقة الملايين من عشاق ألعاب الرعب، سلسلة Resident Evil.

ففي سنة 2023 قدمت Capcom الإصدار الجديد Resident Evil 4 Remake واللي بيقدم إعادة تقديم لواحد من أشهر أجزاء السلسلة دي ومن بين اكترها نجاحًا، Resident Evil 4 اللي تم طرحها في سنة 2005، وقدر الجزء الجديد إنه يقدم نجاحات ضخمة بتيعد للأذهان نجاح الجزء الأصلي، وفي المقال ده هنتعرف على لعبة Resident Evil 4 Remake أكتر وهنعرف إن كانت تستحق فعلًا توصل للترشيح المهم ده ولا لا.

وما تنساش إن لو اللعبة عجبتك هتقدر تطلبها من خلالنا في ياقوطة وهتوصلك لحد باب البيت وكمان تقدر تشتري المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

مراجعة لعبة Resident Evil 4 Remake

الفرق ما بين Remake وRemastered

لعبة Resident Evil 4 بشكلها الجديد بتنتمي لفئة ألعاب Remake، واللاعبين عارفين إن فيه إصدارات جديدة بتطلع من ألعاب قديمة، نوع منها بيحمل اسم Remake ونوع بيحمل اسم Remaster، والفرق ما بينهم بسيط، فألعاب Remastered بتكون هي هي اللعبة القديمة من غير أي اختلاف ولكن بتحسينات وتعديلات على مستوى الجرافيكس والأداء أحيانًا، يعني بتكون نفس اللعبة القديمة بس بتعديلات مناسبة للأجيال الأحدث من منصات الألعاب ومتوافقة مع إمكانياتها.

اما ألعاب Remake فيتكون إعادة تصميم كامل للعبة قديمة، يعني المطورين مش بيجيبوا اللعبة القديمة ويشتغلوا عليها ويعدلوها، لا. دول بيعملوا لعبة جديدة بالكامل من الألف للياء ولكن بتكون معتمدة على نفس القصة ونفس الشخصيات وأحيانًا بيكون فيه بعض الاختلافات في القصة أو شوية تحسينات أو تعديلات في السيناريو والحوار بتوع اللعبة، يعني نفس الحدوتة القديمة ولكن بتصميم جديد بالكامل متوافق ومستغل لإمكانيات الأجيال الجديدة من منصات الألعاب وأجهزة الكمبيوتر الأقوى، والنوع ده اللي بتنتمي ليه لعبة Resident Evil 4 Remake.

قصة اللعبة واختلافات النسخة الجديدة

بتبدأ اللعبة بإصدارها الجديد زي بداية الإصدار الأصلي بالظبط، وبتنطلق من الشخصية الشهيرة ليون كينيدي، ظابط الشرطة المبتدئ اللي اتبهدل بمعنى الكلمة في جزء Resident Evil 2، بيرجع مرة تانية في الجزء ده بعد ما بقى ظابط عمليات خاصة فيدرالي متفوق بيتم إرساله في مهمة في قريبة بعيدة في أوروبا عشان يبحث عن بنت الرئيس الأمريكي المخطوفة، خصوصًا لأن ده أخر مكان اتعرف إنها موجودة فيه.

وبيدخل كينيدي القرية دي من خلال طريق غابة ضخمة مهجورة عشان يتفاجئ بالغربان فوق جثث الحيوانات الميتة، وبيسمع أصوات غريبة بتملى الأجواء مع انتشار روايح كريهة في كل مكان، وفي الأخر بيكتشف كوخ قديم متهالك مختفي ما بين أغصان الأشجار الميتة، ومن هنا بندخل لأجواء مختلفة كليًا، بتبدأ معاها اللعبة اللي بيكتشف خلالها ليون أسرار مظلمة كتير بتتضمن موتى أحياء وكائنات مخيفة وشخصيات متعصبة دينيًا وغيرها من العناصر اللي بتقدم أشرار اللعبة وعناصر التحدي والرعب الرئيسي فيها.

وعلى الرغم من أن الإصدار الجديد من لعبة البقاء والرعب الشهيرة اعتمد على نفس السردية ونفس الأشخاص والأماكن الرئيسية الموجودة في اللعبة الأصلية، إلا إن بناء اللعبة نفسه اتغير من حيث دمج عناصر التخويف بشكل مختلف تمامًا عن الإصدار الأصلي عشان يكون أكتر عمقًا وقوة، وده بيخلي إصدار Remake ده ممتع حتى لو كنت لعبت اللعبة الأصلية قبل كده.

وعلى عكس إعادة التقديم للأجزاء السابقة اللي اتعودت عليه Capcom من حيث تقديم أحداث بتتقدم ببطء وبتدمج ما بين الرعب والتوتر البطيء، ففي الجزء ده ومن خلال إعادة التقديم الجديدة حرصت Capcom على زيادة سرعة وتيرة الأحداث وتقدمها باستمرار وبسرعة ودي ممكن تكون ميزة كبيرة وتقديم جديد لألعاب الرعب اللي بتعتمد على التوتر السريع، وعشان كده لو كنت لعبت اللعبة الأصلية هتلاحظ إن فيه قتالات رئيسية مع الزعماء تم تغييرها وكمان فيه قتالات زعماء اتشالت تمامًا من غير تبديل لمساعدة القصة على التقدم المستمر.

الشخصيات كمان على الرغم من الالتزام بيها إلا إنها شهدت شوية تغييرات وتحسينات مختلفة مش هيقدر يلاحظها غير اللي لعب اللعبة الأصلية وكلها تغييرات مستحسنة جدًا بتزود حيوية الشخصيات بشكل كبير. وكل التغييرات دي هي اللي بتخلينا نقول إن الإصدار الجديد ده هيخليك تحس إنه لعبة جديدة مختلفة بشكل واضح عن اللعبة الأصلية، فالإصدار الجديد سرع وأكتر حماس وقوة ونقدر نقول إنه رؤية عصرية مميزة للعبة Resident Evil 4.

وعلى الرغم من التعديلات دي إلا إن اللعبة احتفظت بكتير من عناصر غير القصة الأصلية طبعًا، ومنها التاجر المجهول اللي بتقدر تشتري منه أسلحة ومنتجات تانية مهمة ليك خلال اللعبة وكمان تقدر تبيعله أي حاجة معاك مش محتاجها، بس مبقتش تقدر تقتله زي الإصدار الأصلي، وكمان القتال المفتوج الكبير في القرية زي ما هو من غير تغيير، وشخصيات Regeneradors اللي بتظهر في الجزء الأخير من اللعبة زي ما هي مرعبة بشكل كبير، وبرضه كمان تقدر تستخدم ركلات ليون القوية مع بعض الأعداء أو تعرضه لهجوم الوحش البحري الضخم لو ضرب نار على البحيرة في القرية.

على مستوى أسلوب اللعبة فهو كمان شهد تطور واضح، فمثلًا خلال الساعات الأولى من اللعبة هتواجه عدد كبير من الشخصيات الشريرة اللي هيكون مطلوب منك تواجهها كلها، وبفضل أسلوب اللعب الجديد اللي شهد تحديثات قوية على مستوى الحركة والتصويب، هتقدر فعلًا تتعامل مع كل الأعداد دي.

أما على مستوى جودة الرسوميات فحدث ولا حرج، فعلى مدار ١٧ ساعة هي مدة لعب القصة الرئيسية في اللعبة، هتستمتع بأجواء مدهشة ومخيفة في الوقت نفسه، وعلى الرغم من إن جودة الرسوميات مش لنفس المستوى الاستثنائي اللي ظهرت بيه لعبة Alan Wake 2 اللي تم طرحها بعد اللعبة دي وهي كمان مرشحة لجائزة لعبة العام ومنتمية كمان لنفس فئة الرعب، إلا إن Capcom قدرت برضه إنها تستغل إمكانيات الجيل الجديد من منصات الألعاب في تصميم رسوميات لعبة Resident Evil 4 Remake، فالجرافيكس فعلًا منتمية للجيل الجديد على الرغم من إنها بتصدر بنسخة كمان لمنصة لعاب PS4، إلا إن الرسوميات على المنصات الأحدث هتكون ممتعة جدًا وواقعية بشكل كبير ومخيف في نفس الوقت.

لعبة Resident Evil 4 Remake من أفضل الألعاب اللي طرحت في سنة ٢٠٢٣ بدون شك، وتستاهل فعلًا إنها تكون من بين الألعاب المرشحة للعبة السنة، وأظن إنها أي حد في المستقبل هيحب يرجع لأحداث اللعبة فأكيد هيختار الإصدار ده بدل الإصدار الأصلي.

للعبة متوفرة على منصات ألعاب PlayStation 4 وPlayStation 5 وXbox Series X وXbox Series S وأجهزة الكمبيوتر.

اتعرف على عروض أسعار لعبة Resident Evil 4 Remake من هنا.

اتعرف على عروض أسعار كل ما يخص ألعاب الفيديو على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.